1-2. Andi lo’ u pasa te sëmbë ta dopu, nöö na un soni u musu buta pakisei?

 I SI wan kulupu sëmbë di o go dopu kaa u? Te de ta piki dee tu hakisi di de ta buta da de ufö de go dopu, nöö i ta fusutan gbelingbelin taa de dë seiki u di soni de kë du dë. I ta si taa dee famii u de ku dee mati u de ta wai ku de. Te de hopo hiniwan u dee sëmbë dë puu a basu wata, nöö i ta si fa hii sëmbë ta wai, söseei fa de ta naki maun da de. Hiniwan wiki dusudusu sëmbë ta buta de libi a Jehovah maun, nöö de dopu ko dë Kotoigi u Jehovah Gadu.

² Unfa soni dë da i? Ee i ta pakisei u dopu, nöö hën da i dë wan apaiti sëmbë a di hogi goonliba aki, u di i ta „suku Jehovah” baka (Ps. 14:1, 2). Di woto aki dë da hii sëmbë, aluwasi i njönku, nasö aluwasi i ko gaandi kaa. Ma dee sëmbë dee dopu seei kë mbei möiti u di biibi u de ko möön taanga, sö taa de sa dini Jehovah u teego. Fëën mbei boo luku dii u dee soni dee mbei u kë dini Jehovah.

3. Faandi mbei dee dinima u Jehovah lobi leti libi, söseei faandi mbei de lobi soni di dë tuu? (Psalöm 119:128, 163)

³ Jehovah bi piki dee sëmbë fëën u de „lobi di tuu” (Sak. 8:19). Jesosi bi da dee bakama fëën taanga u de ta libi a wan leti fasi (Mat. 5:6). Di soni aki kë taki taa wan sëmbë musu kë libi a wan leti fasi, a wan bunu fasi, söseei a wan limbo fasi a Gadu wojo. I lobi leti libi, söseei i lobi soni di dë tuu ö? U dë seiki ta i lobi de. I buuse mindimindi woto, söseei i buuse hii soni di hogi. (Lesi Psalöm 119:128, 163.) Wan sëmbë di ta mindi  soni ta djeesi Saatan, di tiima u di goonliba aki (Joh. 8:44; 12:31). Wan soni di Saatan kë du, hën da a kë poi di santa në u Jehovah. Sensi di ten di Adam ku Eva hopo fia ku Jehovah a di djai u Eden, hën Saatan ta paaja mindimindi woto u Jehovah te kuma tide. A ta mbei möiti u mbei sëmbë biibi taa Jehovah da wan Gadu di ta pakisei hënseei nöö, taa an ta tii a wan leti fasi, söseei taa an kë u libisëmbë feni bunu (Ken. 3:1, 4, 5). Dee mindimindi woto u Saatan ta mbei sëmbë ta pakisei hogi u Gadu. Te sëmbë an kë „lobi di tuu”, nöö Saatan sa mbei de du soni di an bunu.​—Lom. 1:25-31.

4. Unfa Jehovah lei taa hën da di „Gadu di ta taki tuutuu soni”? (Luku di peentje.)

⁴ Jehovah da di „Gadu di ta taki tuutuu soni”, nöö a ta lei dee sëmbë dee lobi ën tuutuu soni (Ps. 31:5). A sö wan fasi a ta heepi sëmbë u Saatan an feni de ganjan. Boiti di dë, Jehovah ta lei dee dinima fëën taa de musu ta du soni a wan leti fasi. A sö wan fasi de o ta dë bööböö (Nöng. 13:5, 6). Jehovah bi heepi i fii ko ta dë bööböö di i bi bigi lei soni u Bëibel ö? I bi ko fusutan taa di fasi fa Jehovah kë fuu libi da di möön bunu fasi fa hii sëmbë musu libi (Ps. 77:13). Fëën mbei i kë du dee soni dee Gadu taki taa bunu (Mat. 6:33). I kë hopo taki da di tuutuu lei, u di i kë u sëmbë ko sabi di tuu, söseei u di i kë lei taa mindi Saatan ta mindi soni da Jehovah. Unfa i sa du di soni dë?

5. Unfa i sa lei taa i lobi leti libi, söseei taa i lobi soni di dë tuu?

⁵ I sa libi a wan fasi di o dë kuma i ta taki taa: „Ma ta biibi dee mindimindi woto u Saatan, ma mi tei di së u di tuutuu lei. Mi kë taa Jehovah hën musu ta tii di libi u mi, söseei mi kë ta du dee soni dee ta kai ku ën.” Unfa i sa du di soni dë? Wë i sa du sö te i begi Jehovah buta i libi nëën maun, nöö i dopu u lei hii sëmbë taa i buta i libi a Jehovah maun. Te wan sëmbë lobi leti libi, söseei te a lobi soni di dë tuu, nöö di soni dë ta mbei a kë dopu.

6. Andi Psalöm 45:4 ta taki, di sa heepi i fii ko lobi Jesosi?

⁶ Faandi mbei i lobi Jesosi Keesitu? Luku wantu soni di Psalöm 45:4 ta taki. (Lesi ën.) Jesosi lobi soni di dë tuu, a lobi sakafasi, söseei a lobi leti libi. Ee i lobi soni di dë tuu, söseei ee i lobi leti libi, nöö a musu u dë sö taa i lobi Jesosi Keesitu. Pakisei luku fa Jesosi bi hopo du soni u lei taa a lobi leti libi ku soni  di dë tuu (Joh. 18:37). Ma nöö unfa Jesosi bi lei taa a lobi sakafasi?

7. Andi ta mbei i lobi di sakafasi di Jesosi abi?

⁷ Di fasi fa Jesosi bi ta du soni, bi ta da wotowan taanga u de ko abi sakafasi. A bi ta du soni u mbei hën Tata kisi gafa, ma an bi ta du soni u tja gafa ko da hënseei (Maik. 10:17, 18; Joh. 5:19). Unfa i ta fii te i ta buta pakisei a di sakafasi di Jesosi abi? An ta da i taanga fii ko lobi di Womi Mii u Gadu, söseei fii ta djeesi ën u? A musu u dë sö. Faandi mbei Jesosi abi sakafasi? Wë u di Jesosi Tata abi sakafasi, nöö a lobi hën Tata, söseei a ta djeesi ën (Ps. 18:35; Heb. 1:3). Jesosi ta djeesi hën Tata te dou, a hii dee fasi dee a abi. Di soni aki an ta mbei i kë ko dë mati u Jesosi ö?

8. Faandi mbei u lobi Jesosi di Könu fuu?

⁸ U lobi Jesosi di Könu fuu, u di hën da di möön bunu Tiima. Jehovah seei hën seeka di Womi Mii fëën faa ko dë könu, söseei hën butëën faa tii u (Jes. 50:4, 5). Buta pakisei tu a di fasi fa Jesosi lei taa a lobi u tjika (Joh. 13:1). U di Jesosi da di Könu fii, mbei a fiti fii lobi ën. A bi taki taa dee sëmbë dee lobi ën tuutuu ta du andi a taki, nöö dee sëmbë dë da mati fëën (Joh. 14:15; 15:14, 15). U ta tei ën u bigi seei taa u dë mati u di Womi Mii u Jehovah!

9. Na un futu di dopu u Jesosi ku di u dee bakama fëën dë di wan?

⁹ Wan u dee soni dee Jesosi bi taki taa dee bakama fëën musu du, hën da u de dopu (Mat. 28:19, 20). Hënseei bi dopu tu. U sa si taa wantu soni tooka te i tei di dopu di a bi dopu, maaka ku di u dee bakama fëën. (Luku di pisi „ Di fa di dopu u Jesosi tooka ku di u dee bakama fëën”.) Ma i sa si tu taa so soni dë di wan. Di Jesosi bi dopu, nöö a bi lei taa a dë kabakaba u du andi hën Tata kë (Heb. 10:7). Wë sö nöö a dë tu taa dee bakama u Jesosi ta dopu u lei hii sëmbë taa de buta de libi a Jehovah Gadu maun. Te de dopu kaa, nöö de an ta libi kumafa deseei kë möön, ma de ta mbei hii möiti u libi kumafa Gadu kë. A sö wan fasi de ta waka a di Masa u de baka.

10. Faandi mbei di lobi di i lobi Jesosi musu mbei i kë dopu?

¹⁰ Wë i ta biibi taa Jesosi da di wan kodo Womi Mii u Jehovah, söseei i ta wai taa Jehovah butëën faa tii u. I sabi taa Jesosi abi sakafasi, söseei taa a ta djeesi hën Tata te dou, a hii dee fasi dee a abi. Boiti di dë, i sabi taa a bi sölugu dee sëmbë dee hangi bi ta kii, a bi da dee sëmbë dee bi ta fii bookosaka kötöhati, söseei a bi kula suwakima (Mat. 14:14-21). I ta si fa Jesosi ta tii di kemeente a di ten aki (Mat. 23:10). I sabi taa a di ten di ta ko, a o du möön gaan soni, u di a dë Könu u di Könuköndë u Gadu. Unfa i sa lei taa i lobi Jesosi? Wë i sa du sö, te i ta djeesi ën a di fasi fa a ta du soni (Joh. 14:21). I sa bigi du di soni dë, te i buta i libi a Jehovah maun, nöö i dopu.

11. Andi da di möön fanöudu soni mbei i musu kë dopu, nöö faandi mbei i taki sö?

¹¹ Andi da di möön fanöudu soni mbei i musu kë dopu? Jesosi bi taki undi u dee wëti u Gadu da di möön hebi wan. A bi taki taa: ’Un musu lobi Gadu ku hii unu hati ku hii unu libi ku hii unu pakisei, te dou ku hii di kaakiti di un abi’ (Maik. 12:30). Dee soni dee Jesosi bi taki dë ta lei fa i lobi Gadu tjika u?

12. Faandi mbei i lobi Jehovah? (Luku di peentje.)

¹² Sömëni soni dë di sa mbei u ko lobi Jehovah. I ko fusutan taa hën da „di sëmbë di ta da libi”, söseei taa hën da di Sëmbë di ta da u hii dee bumbuu soni ku dee soni dee bunu te dou (Ps. 36:9; Jak. 1:17). Hii dee bunu soni dee ta mbei i ta piizii, ta kumutu a di lobihati Gadu fuu di lo’ u da sëmbë soni.

13. Faandi mbei di lusupaima dë sö wan apaiti kado?

¹³ Di lusupaima da wan gaan apaiti kado di Jehovah da u. Faandi mbei u sa taki sö? Wë pakisei luku fa Jehovah ku di Womi Mii fëën dë gaan mati tjika. Jesosi bi taki taa: „Mi Tata lobi mi”, nöö „mi lobi mi Tata” (Joh. 10:17; 14:31). De bi ko möön lobi deseei, u di de bi dë makandi milionmilion jaa longi (Nöng. 8:22, 23, 30). Wë nöö pakisei luku fa a bi musu u hati Gadu tjika, di a da pasi u di Womi Mii fëën tja sitaafu u tefa a dëdë. Jehovah lobi libisëmbë sö tee taa a bi dë kabakaba u da pasi u di lobi Womi Mii fëën dëdë, sö taa ju ku dee woto sëmbë tuu sa libi u teego (Joh. 3:16; Gal. 2:20). Di soni aki da di möön gaan soni di mbei u lobi Jehovah.

14. Andi da di möön bunu soni di i sa buta taa joo du a di libi fii?

¹⁴ I ko möön lobi Jehovah u di i ko sabi ën möön bunu. U dë seiki taa i kë ko dë mati fëën nöunöu kaa, söseei i kë dë mati fëën u teego. Wë i sa dou di maaka dë. A wan lobihati fasi seei Jehovah ta da i taanga fii du soni u mbei hën hati piizii (Nöng. 23:15, 16). I sa mbei hën hati piizii ku dee soni dee i ta taki, ma söseei ku dee soni dee i ta du. Di fasi fa i ta libi, hën o lei ee i lobi Jehovah tuutuu (1 Joh. 5:3). Di buta di joo buta taa joo ta du soni u mbei Jehovah hati ta piizii, da di möön bunu soni di i sa buta taa joo du a di libi.

15. Unfa i sa lei taa i lobi Jehovah?

¹⁵ Unfa i sa lei taa i lobi Jehovah? Di fosu  soni, hën da i musu begi wan apaiti begi ka joo buta i libi a di wan kodo tuutuu Gadu maun (Ps. 40:8). Baka di dë, nöö i dopu u lei hii sëmbë taa i buta i libi a Gadu maun. Kumafa u bi taki a fesi kaa, di daka di joo dopu ta dë wan piizii daka, söseei a ta dë wan apaiti daka a di libi fii. Di daka dë i ta bigi wan njunjun libi ka joo ta libi da Jehovah, ja o ta libi da iseei möön (Lom. 14:8; 1 Pet. 4:1, 2). A ta djei kuma a dë wan gaan soni u du, nöö sö a dë tuu. Ma di soni dë hën o mbei i sa feni di möön bunu libi. Unfa sö?

16. Unfa Jehovah o paka dee sëmbë dee buta taa de o dini ën, te u luku Psalöm 41:12?

¹⁶ Jehovah da di Sëmbë di möön lo’ u da sëmbë soni. Aluwasi andi i dëën, tökuseei hii juu te a o paka i, a ta da i gaanfa möön fa i bi dëën (Maik. 10:29, 30). Ee i buta taa joo dini Jehovah, nöö a o da i di möön bunu libi, söseei di möön suti libi di i sa abi nöunöu kaa a di hogi goonliba aki. Nöö na tuu fëën di dë jeti, bigi a bigi. Di njunjun libi fii di bigi di i dopu an abi fu kaba. I sa dini di lobi Tata fii go dou u teego. Di lobi di i ku di Tata fii abi da unuseei o ta ko möön taanga daka fu daka, nöö joo dë a libi solanga a dë a libi. Awa, joo ta libi u nöömö.​—Lesi Psalöm 41:12.

17. Andi i sa da Jehovah di an abi jeti?

¹⁷ Te i buta i libi a Gadu maun nöö i dopu, nöö i ta abi di gaandi u da di Tata fii wan gaan dii soni. A da i hii dee möön bumbuu soni ku hii dee möön suti soni dee ja bi o sa feni wan daka. U lei taa i ta tei dee soni dë u bigi, nöö i sa da di Sëmbë di abi mundu ku goonliba, wan soni di an abi jeti. Di soni dë da di dë di joo dë wan dinima fëën u nöömö (Jöpu 1:8; 41:11; Nöng. 27:11). Di soni aki da di möön bunu soni di i sa du a di libi fii! Awa, di lobi di i lobi Jehovah da di möön fanöudu soni di mbei i musu dopu.

18. Un soni i sa hakisi iseei?

¹⁸ Unfa i bi o piki ee de hakisi i ee joo dopu? Wë ju nöö sa piki di hakisi dë. Woto sëmbë an o sa du ën da i. Ma kandë an o taanga sö, ee i  hakisi iseei taa: ’Faandi mbei mi ta wakiti jeti?’ (Tjab. 8:36) Toona mëni dee dii soni dee u bi taki. Di fosu wan, hën da i lobi leti libi söseei i lobi soni di dë tuu. Hakisi iseei di soni aki: ’Mi kë si di ten ka hii sëmbë o sabi di tuutuu lei, söseei ka hii sëmbë o ta libi a wan leti fasi ö?’ Di u tu soni, hën da i lobi Jesosi Keesitu. Hakisi iseei di soni aki tu: ’Mi kë u di Womi Mii u Gadu ko dë Könu u mi, söseei mi kë djeesi ën a di fasi fa a ta libi ö?’ Nöö di u dii soni, di möön fanöudu wan, hën da i lobi Jehovah. Hakisi iseei di soni aki: ’Mi kë dini Jehovah u mbei hati fëën piizii ö?’ Wë ee i piki aai a hii dee hakisi aki, nöö andi seei mbei ja dopu jeti?​—Tjab. 16:33.

19. Faandi mbei ja musu biabia u dopu? Konda wan woto. (Johanisi 4:34)

¹⁹ Ee i ta biabia u dopu, nöö buta pakisei a di soni di Jesosi bi taki. (Lesi Johanisi 4:34.) Hoi a pakisei taa a bi tei dee soni dee hën Tata bi kë faa du, maaka ku njanjan. Faandi mbei? Wë u di soni u njan bunu da u dendu. Jesosi bi sabi taa hii dee soni dee Jehovah ta hakisi u fuu du, ta tja wini ko da u. Jehovah an kë fuu du wan soni di o hati u bakaten. Wë nöö Jehovah kë fii dopu ö? Aai, a kë fii dopu (Tjab. 2:38). Wë i sa dë seiki taa ee i du di soni di Jehovah kë aki, nöö joo feni wini fëën. Ee ja bi o biabia u njan di möön suti njanjan u goonliba, nöö faandi mbei i ta biabia u dopu?

20. Fuun soni woo taki a di woto di ta ko?

²⁰ Faandi mbei so sëmbë an dopu jeti? Wë sömëni sëmbë bi o taki di soni aki: „Ma kaba jeti.” Di buta di joo buta taa joo buta i libi a Jehovah maun nöö i dopu, da di möön fanöudu soni di i sa du a di libi fii. Fëën mbei a dë fanöudu fii kai pakisei bunu. A o tei ten, söseei a o dë fii mbei möiti fii sa dou di maaka dë. Ma ee i kë dopu tuutuu, nöö andi i sa du nöunöu kaa u tei seeka da di soni dë? Woo taki u di hakisi dë a di woto di ta ko.