Faandi mbei di womi di bi abi leti u bai di famii gudu u Elimeilëki bi taki taa a o lasi dee gudu fëën ee a tööu ku Luti? (Luti 4:1, 6)

Na awooten Isaëli, ee wan womi bi lasi libi söndö faa pai miii, nöö andi bi ta pasa ku dee goon fëën? Di famii në fëën bi ta lasi go u? Di Wëti u Mosesi ta heepi u fuu feni piki a dee lö hakisi aki.

Andi bi ta pasa ku di goon u wan womi di lasi libi, nasö di bi sei di goon fëën u di a bi ko pooti? Wë wan baaa fëën, nasö wan djudju famii fëën bi sa toona bai di goon tei baka. A sö wan fasi di famii an bi o lasi di goon u de.​—Leif. 25:23-28; Nöb. 27:8-11.

Unfa di soni dë bi sa mbei di famii në u di womi di lasi libi, an bi lasi go? Wë di baaa u di womi di lasi libi bi musu tööu ku di mujëë fëën baaa, sö taa di në u di baaa fëën di lasi libi an lasi go. Sö de bi du soni a di woto u Luti. Wan u dee baaa bi musu tööu ku di mujëë, sö taa a bi sa pai wan mii ku ën, nöö di mii dë bi o tja di në u di baaa di lasi libi, söseei di mii bi o feni dee gudu u di baaa di lasi libi. Di soni aki bi ta tja wini ko da di mujëë tu.​—Deto. 25:5-7; Mat. 22:23-28.

Buta pakisei a di fasi fa soni bi dë da Naomi. A bi tööu ku wan womi de kai Elimeilëki. Di Elimeilëki ku dee tu womi mii u de lasi libi, nöö sëmbë an bi dë u sölugu Naomi möön (Luti 1:1-5). Di Naomi toona ko a Juda ku hën mai Luti, hën a piki Luti faa hakisi Boasi faa bai di goon u de tei. Boasi bi dë wan zuntu famii u Elimeilëki (Luti 2:1, 19, 20; 3:1-4). Ma Boasi bi sabi taa wan woto womi bi dë di bi möön dë bëë u di famii. Di womi dë di Bëibel ta taki taa bi abi leti u bai di famii gudu u Elimeilëki tei. Hën fosu bi musu taki ee a o bai di goon u de.​—Luti 3:9, 12, 13.

Bigibigi, di womi bi dë kabakaba u bai di goon tei (Luti 4:1-4). A bi sabi taa a bi musu puu möni bai di goon, söseei a bi sabi taa Naomi an bi o sa pai miii möön di bi o feni di goon u Elimeilëki, u di a bi ko gaandi kaa. A sö wan fasi a bi o feni di goon u Elimeilëki fëën seei, nöö di soni dë bi o tja gaan wini ko dëën.

Ma di womi bi ko tooka pakisei di a ko fusutan taa a bi o abi u tööu ku Luti. A bi taki taa: „Ma o sa bai di goon e, ee mi bai ën mi o lasi” (Luti 4:5, 6). Wë faandi mbei an bi kë bai di goon möön?

Ee di womi dë, nasö wan woto womi bi tööu ku Luti, hën de bi ko pai wan womi mii, nöö di womi mii dë bi o feni di goon u Elimeilëki. Unfa di soni aki bi sa mbei di womi lasi dee gudu fëën? Wë di Bëibel an ta taki faandi mbei, ma a sa kan taa u dee soni woo taki aki hedi.

• Di fosu soni, hën da a bi o lasi di möni di a bi o tei u bai di goon, u di di womi mii u Luti hën bi o abi ën.

• Di u tu soni, hën da a bi musu ta sölugu Naomi ku Luti tuu.

• Di u dii soni, hën da ee a bi abi miii, nöö dee woto mii dee hën ku Luti bi o pai, bi o abi u paati dee gudu fëën ku hii dee woto mii dee a bi abi kaa.

• Di u fö soni, hën da ee di womi an bi pai woto mii ku wan woto mujëë, nöö wan womi mii u Luti bi o abi leti u tei di goon u Elimeilëki ku di u di womi tuu. Hën da te a bi lasi libi, nöö di goon fëën bi o fika da wan mii di ta tja Elimeilëki në. Di womi an bi dë kabakaba u lasi dee gudu fëën u heepi Naomi. A bi ta si kuma a bi o möön bunu dëën faa bi disa di faantiwöutu dë da Boasi, di woto womi u di famii di bi abi leti u bai di famii gudu u Elimeilëki. Boasi bi tei di faantiwöutu dë, u di a bi kë u „di famii gudu fika a di në u di womi di lasi libi”.​—Luti 4:10.

A ta djei kuma di womi bi ta möön booko hën hedi ku dee gudu fëën, söseei ku di kë di an bi kë u di në fëën lasi go. A bi ta pakisei hënseei nöö. Ma hii fa di womi aki bi mbei taanga möiti u di në fëën an lasi go, tökuseei te kuma tide wa sabi di në fëën möönsö. Boiti di dë, a lasi wan apaiti gaandi, nöö Boasi hën bi ko feni di gaandi dë. Boasi bi ko dë wan u dee gaan avo u Jesosi Keesitu, di Mësiasi. Tjali soni wë miti di womi dë e! Di soni dë bi miti ën, u di a bi ta pakisei hënseei sö tee taa an bi kë heepi wan sëmbë di bi abi heepi fanöudu!​—Mat. 1:5; Luk. 3:23, 32.