1-2. Faandi mbei ja musu lasi hati ee i si taa ja kaba u dopu? (Luku di peentje u di kafiti.)

 EE I buta taa i kë dopu, nöö a dë wan gaan bunu soni seei. I dë kabakaba u dopu ö? Ee i si kuma i kaba u dopu, söseei ee dee gaanwomi da i pasi fii dopu, nöö i sa seeka soni wantewante fii dopu. Te i dopu, nöö joo ta dë waiwai seei a di dini di i ta dini Jehovah.

² I da wan sëmbë di de taki taa musu go a fesi a di biibi möön ufö i sa dopu ö? Nasö iseei si taa i musu go a fesi a di biibi möön, ufö i dopu? Ee sö a dë da i, nöö na lasi hati. I sa go a fesi a di biibi, sö taa i dou di maaka u dopu, aluwasi ee i njönku nasö i ko gaandi kaa.

3. Andi wan womi di bi ta wooko da di mujëë könu u Etiopia bi hakisi Filipi, nöö un hakisi u musu piki? (Tjabukama 8:36, 38)

³ Lesi Tjabukama 8:36, 38. Wan womi di bi ta wooko da di mujëë könu u Etiopia, bi hakisi Filipi taa: „Andi ta tapa mi u mi dopu?” Di womi u Etiopia bi kë dopu. Ma a bi dë kabakaba tuutuu u dopu ö?

4. Unfa di Etiopia womi bi lei taa a bi kë sabi möön soni u Gadu?

⁴ Di womi u Etiopia „bi go a Jelusalen go begi Masa Gadu te a kaba” (Tjab. 8:27). Wë a musu u dë sö taa di womi aki bi tei di Dju biibi. A bi ko sabi soni u Jehovah, u di a bi lesi dee Hebelejën Buku u di Wöutu u Gadu. Ma hii fa a bi dë sö, tökuseei di womi aki bi kë ko sabi möön soni u Gadu.  Andi di womi aki bi ta du di Filipi bi miti ën a pasi? Wë a bi ta lesi wan pisi u Gadu Buku, di di tjabukama u Gadu de kai Jesaaja bi sikifi (Tjab. 8:28). Dee soni dee a bi ta lesi, bi dë dee fundu lei u Bëibel. Di womi aki an bi kë sabi dee lei u Bëibel dee an taanga u fusutan nöö, ma a bi kë sabi möön soni jeti.

5. Andi di Etiopia womi bi du ku dee soni dee a bi lei?

⁵ Di womi bi dë wan heihei sëmbë di bi ta wooko da di mujëë könu u Etiopia de kai Kandasi. A bi „ta seeka hii di möni u di mujëë könu” (Tjab. 8:27). Wë u sa taki taa di womi aki bi abi gaan faantiwöutu, söseei a bi musu u abi hia soni u du. Ma tökuseei a bi ta seeka soni faa bi sa dini Jehovah. An bi kë sabi soni u di tuutuu lei nöö a kaba, ma a bi ta libi ku dee soni dee a bi ta lei. Fëën mbei a bi kumutu a Etiopia go tee a di wosu u Gadu a Jelusalen u go dini Jehovah. A musu u dë sö taa di waka dë bi ta tei ten, söseei a musu u dë sö taa a bi musu puu möni da di waka. Ma di womi aki an bi ta luku dee soni dë, u di a bi kë dini Jehovah.

6-7. Unfa a waka taa di Etiopia womi bi ko lobi Jehovah möön gaanfa?

⁶ Di Etiopia womi bi lei wantu fanöudu soni a Filipi. A bi ko sabi taa Jesosi da di Mësiasi (Tjab. 8:34, 35). Di womi aki bi wai seei di a bi jei andi Jesosi bi du dëën. Andi a bi du baka di a jei andi Jesosi bi du dëën? Wë a bi sa libi fëën go dou leti kumafa a bi guwenti. Ma an du di soni dë. A bi ko lobi Jehovah ku di Womi Mii fëën möön gaanfa. A buta taa a o dopu ko dë wan bakama u Jesosi Keesitu. Filipi bi si taa di womi bi dë kabakaba u dopu. Fëën mbei a dopu ën.

⁷ Ee i waka a di Etiopia womi aki baka, nöö joo sa dopu. Ku hii i hati joo sa taki taa: „Andi ta tapa mi u mi dopu?” Boo luku unfa iseei sa du dee soni di di Etiopia womi bi du: A bi ta lei soni go dou, a bi ta libi ku dee soni dee a bi lei, söseei a bi ko möön lobi Gadu.

8. Andi Johanisi 17:3 ta taki taa i musu du?

⁸ Lesi Johanisi 17:3. Dee soni dee Jesosi taki a di tëkisi aki bi heepi i fii bigi lei soni u Bëibel ö? Wë a bi da sömëni fuu taanga fuu bigi lei soni u Bëibel. Ma di tëkisi aki ta da u taanga fuu lei soni u Bëibel go dou ö? Wë aai o. Hii juu u musu ta mbei möiti fuu ko sabi möön soni u „di wan kodo tuutuu Gadu” (Peleik. 3:11). U teego woo ta lei soni. Möön woo ta lei soni u Jehovah, möön u ku ën o ko dë gaan mati.​—Ps. 73:28.

9. Andi u musu ta du go dou baka di u ko sabi dee fosu lei u Bëibel?

⁹ Te u ta bigi lei soni u Jehovah, nöö u ta bigi ku dee fosu lei u Bëibel. A di biifi di apösutu Paulosu bi sikifi manda da dee Hebelejën baaa ku sisa, a bi kai dee lei dë „dee goonsei pisi u di woto u Masa”. An bi ta taki taa dee „fosu pisi u di lei u [Jesosi] Keesitu” an bi dë fanöudu, ma a bi tei ën maaka ku mëiki di ta da wan beibi kaakiti (Heb. 5:12; 6:1). Nöö a bi da hii Keesitu sëmbë taanga u de ko sabi dee möön fundu lei dee dë a di Wöutu u Gadu. I kë ko sabi dee fundu lei u di Bëibel ö? I dë kabakaba u go a fesi a di biibi ö? Söseei i dë kabakaba fii ko sabi möön soni u Jehovah ku dee soni dee a abi a pakisei u du ö?

10. Faandi mbei a sa ta taanga da so sëmbë u de lei soni?

¹⁰ An ta dë wan kösökösö soni da sömëni fuu fuu lei soni. Unfa soni dë da i? Di go di i go a siköö bi heepi i fii ko sa’ u lesi, söseei a bi heepi i fii ko sa’ u öndösuku soni möön bunu ö? I bi lobi di lei di i bi ta lei hia soni a siköö u? Naa i bi ta fii kuma ja abi fusutan u dee soni dë? Ee sö i ta fii, nöö na i wanwan ta fii sö e. Sömëni sëmbë ta fii sö tu. Ma Jehovah sa heepi i. Jehovah an ta mbei föutu, nöö hën da di möön bunu Leima di i sa feni.

11. Unfa Jehovah ta lei taa hën da di „Gaan Leima”?

¹¹ Jehovah taki taa hën da di „Gaan Leima” fii (Jes. 30:20, 21). A dë wan Leima di abi pasensi, bunu fasi, söseei a ta fusutan unfa soni dë da u. A ta suku dee bunu pisi u dee sëmbë dee a ta lei (Ps. 130:3). Nöiti a ta kë fuu du soni di a sabi taa wa sa du. Hoi a pakisei taa hën mbei di töönzön fuu (Ps. 139:14). A mbei u a sö wan fasi taa u ta kë lei soni. Di Sëmbë di mbei u kë fuu ta lei soni u teego, söseei a kë fuu ta wai ku di soni dë. Fëën mbei a dë wan bunu soni fuu „ta abi hangi” da dee lei u Bëibel nöunöu kaa (1 Pet. 2:2). Buta maaka di i sa dou. Lesi di Bëibel, nöö i öndösuku soni fëën hiniwan daka (Jos. 1:8). Jehovah o heepi i fii ko lo’ u lesi, söseei fii ko lo’ u lei soni fëën.

12. Faandi mbei a dë fanöudu fuu ta öndösuku soni di nama ku di libi ku di diniwooko u Jesosi?

¹² I musu ta tei ten u pakisei di fasi fa Jesosi bi ta libi ku di fasi fa a bi ta du di diniwooko fëën. Ee u kë dini Jehovah go dou, hii fa soni ta taanga, nöö a dë fanöudu fuu djeesi Jesosi (1 Pet. 2:21). Jesosi bi piki dee bakama fëën taa fuka o miti de (Luk. 14:27, 28). Ma a bi sabi taa dee tuutuu bakama fëën o sa hoi deseei a Gadu, leti kumafa a bi hoi hënseei a Gadu (Joh. 16:33). Öndösuku soni u di libi u Jesosi, nöö mbei möiti u djeesi ën.

13. Andi i musu ta hakisi Jehovah, nöö faandi mbei?

¹³ Di sabi di u sabi soni wanwan nöö an tjika. Di soni di musu mbei u kë ko sabi möön soni, hën da fuu sa ko sabi möön soni u Jehovah, sö taa u sa ko möön lobi ën, söseei u di biibi fuu sa ko möön taanga (1 Kol. 8:1-3). Te i ta lei soni go dou, nöö hakisi Jehovah faa heepi i u di biibi fii ko möön taanga (Luk. 17:5). A ta haika dee lö begi dë. Te di biibi fii ko möön taanga u di i ko sabi di Gadu fii möön bunu, nöö joo sa go a fesi seei.​—Jak. 2:26.

14. Unfa apösutu Petuisi bi lei fa a dë fanöudu tjika fuu ta du dee soni dee u ta lei? (Luku di peentje tu.)

¹⁴ Apösutu Petuisi bi taki faandi mbei a dë fanöudu taa dee bakama u Keesitu musu ta libi ku dee soni di de ta lei. A bi konda soni  u di woto u Noa. Jehovah bi piki Noa taa a o mbei tjuba kai singi hii di goonliba, nöö hii dee hogihati sëmbë u di ten dë tuu o dëdë. Di sabi di Noa bi sabi taa wan gaan wata bi o ko an bi tjika u tjubi hën ku di wosudendu fëën. Hoi a pakisei taa Petuisi bi ta taki u di pisiten ufö di gaan wata bi ko, nasö u „di ten di Noa bi ta mbei di gaan boto” (1 Pet. 3:20). Noa ku dee sëmbë fëën wosudendu bi du di soni di Gadu bi piki de u de du. De bi mbei wan gaan boto (Heb. 11:7). Petuisi bi tei di soni di Noa bi du maaka ku dopu. A bi taki taa: „Di wata dë, hën da wan soni ta lei u fu di dopu di u ta dopu . . . fuu sa feni heepi [a Gadu]” (1 Pet. 3:21). Wë u sa taki taa di seeka di i ta seeka fii dopu, dë kuma di wooko di Noa ku ën wosudendu bi wooko sömëni jaa longi u mbei di gaan boto. Andi ku andi i musu du ufö i sa dopu?

15. Unfa u ta lei taa u ta tjali tuutuu u dee zöndu fuu?

¹⁵ Wan u dee fosu soni dee u musu du, hën da u musu tjali u dee zöndu dee u bi du (Tjab. 2:37, 38). Te u ta tjali tuutuu u dee zöndu fuu, nöö woo sa bia du soni woto fasi. I disa soni di Jehovah an lobi ö? I disa soni kuma fanafiti libi, hai taku tabaku, ku kosi ö? (1 Kol. 6:9, 10; 2 Kol. 7:1; Ef. 4:29). Ee ja disa dee soni aki jeti, nöö mbei möiti go dou fii disa de. Mbei möiti u tooka soni a di libi fii. I sa fan ku di sëmbë di ta lei i soni u Bëibel, nasö i sa hakisi dee gaanwomi u di kemeente u de heepi i. Ee i da wan njönkuwan di ta libi ku dee gaansëmbë fii jeti, nöö i sa hakisi de u de heepi i fii disa soni di sa mbei ja dopu.

16. Andi ku andi u musu ta du di nama ku di biibi fuu?

¹⁶ A dë fanöudu tu fii ta du soni di nama ku di biibi fii. Hën da i musu nango a dee komakandi fuu, söseei i musu ta da piki (Heb. 10:24, 25). Te de da i pasi fii du di peleikiwooko, nöö mbei möiti fii ta du ën hii juu. Möön i ta du di peleikiwooko, möön joo lobi ën (2 Tim. 4:5). Ee i da wan njönkuwan di ta libi ku dee gaansëmbë fii jeti, nöö hakisi iseei dee soni aki: ’Dee gaansëmbë u mi musu ta mëni mi hii juu taa mi musu go a dee komakandi, nasö taa mi musu go a di  peleikiwooko u? Naa miseei nango te di juu dou?’ Te i ta du dee soni aki söndö u sëmbë musu ta piki i fii du de, nöö joo lei taa i abi biibi, taa i lobi Jehovah Gadu, söseei taa i ta tei dee soni dee a ta da i u bigi. Dee soni dë o lei taa i „ta dini Gadu fajafaja”. De o dë kuma kado i ta da Jehovah (2 Pet. 3:11; Heb. 13:15). Di Gadu fuu ta wai seei te u ta dëën kado ku hii u hati. (Luku 2 Kolenti 9:7.) U ta du dee soni dë, u di u ta fii bunu seei te u ta da Jehovah dee möön bunu soni dee u abi.

17-18. Un fasi i musu mbei möiti fii ko abi sö taa i sa go a fesi, fii sa dopu, nöö faandi mbei i musu ko abi di fasi dë? (Nöngö 3:3-6)

¹⁷ Fuka o ta miti i te i nango a fesi fii sa dopu. So sëmbë o mbei i fa u di biibi fii hedi. Kandë de o du ku i tu (2 Tim. 3:12). Kandë i ta mbei taanga möiti fii disa wan soni di an bunu, ma so juu a ta pasa taa tökuseei i go du di soni di an bunu. Kandë i sa lasi pasensi ku iseei, nöö i ko wei, u di a ta djei kuma ja sa dou di maaka fii. Andi o heepi i fii hoi dou? Wë lobi da Jehovah o heepi i.

¹⁸ Di lobi di i abi da Jehovah da wan gaan fanöudu soni seei. (Lesi Nöngö 3:3-6.) Di lobi di i ko abi da Jehovah o heepi i fii dini ën go dou aluwasi fuka ta miti i. Di Bëibel lo’ u taki u di hoi di Jehovah ta hoi ënseei a dee dinima fëën. Di soni dë kë taki taa nöiti Jehovah o bia baka da dee dinima fëën, söseei taa hii juu a o ta lobi de (Ps. 100:5). Gadu mbei i kumafa hënseei dë (Ken. 1:26). Unfa i sa djeesi Jehovah a di hoi di a ta hoi hënseei a wotowan?

19. Unfa i sa möön lei taa i ta tei dee soni dee Jehovah ta du da i u bigi? (Galasia 2:20)

¹⁹ Tei soni u bigi (1 Tes. 5:18). Hiniwan daka i musu hakisi iseei di soni aki: ’Unfa Jehovah lei mi taa a lobi mi?’ Baka di dë, nöö i begi Jehovah nöö i dëën tangi da dee soni dee a du da i. A bunu fii kai dee soni dee a du da i wanwan-fu-wan. Mbei möiti u si taa Jehovah ta du bunu da i vö, u di a lobi i. Apösutu Paulosu seei bi si di soni aki tu. (Lesi Galasia 2:20.) Hakisi iseei di soni aki: ’Mi kë lei Jehovah unfa miseei lobi ën tjika u?’ Di lobi di i lobi Jehovah o heepi i fii finga futu da tesi. Boiti di dë, a o heepi i fii dini Jehovah go dou. A sö wan  fasi joo sa lei hiniwan daka taa i lobi di Tata fii.

20. Andi i musu du fii buta i libi a Jehovah maun, nöö unfa di soni aki dë fanöudu tjika?

²⁰ Di lobi di i abi da Jehovah o mbei i begi wan apaiti begi. Di begi dë da di buta di joo buta i libi a Gadu maun. Hoi a pakisei taa te i buta i libi a Gadu maun kaa, nöö i sa dë ku di mëni taa u teego i da u fëën. Te i buta i libi a Jehovah maun, nöö i ta paamusi ën taa joo dini ën aluwasi ee soni nango bunu, nasö aluwasi ee soni an nango bunu. Ja ta begi di begi aki tu pasi. Di buta di i buta i libi a Gadu maun, an dë wan pëëpëë soni. Pakisei di soni aki: Sömëni bunu soni dë di i ta du a di libi fii, ma nöiti joo sa du wan möön bunu soni, möön leki di buta di i buta i libi a Gadu maun (Ps. 50:14). Saatan o mbei möiti fu ja lobi di Tata fii möön, sö taa te u kaba fëën ja hoi iseei nëën möön. Ma ja musu da Saatan pasi faa du di soni dë! (Jöpu 27:5) Di lobi di i abi da Jehovah o heepi i fii dini ën u teego, söseei a o heepi i fii ku ën ko dë gaan mati.

21. Faandi mbei u sa taki taa te u dopu nöö bigi u ta bigi dini Gadu awa?

²¹ Te i buta i libi a Jehovah maun te i kaba, nöö i sa fan ku dee gaanwomi u di kemeente ka i dë, u di dopu di i kë dopu. Hoi a pakisei taa te i dopu, nöö bigi i ta bigi dini Jehovah awa, nöö i musu dini ën u nöömö. Fëën mbei a bunu fii mbei möiti nöunöu fii ko lobi di Tata fii möön gaanfa. Buta maaka da iseei di o heepi i fii ko möön lobi Jehovah. Di soni dë o da i taanga fii dopu. Di daka di joo dopu o dë wan gaan daka seei. Ma bigi i ta bigi. Mbei möiti u di lobi di i abi da Jehovah ku di Womi Mii fëën ko möön taanga!