1, 2. Unfa Jehovah ta da u kötöhati te fuka ta miti u, nöö andi a paamusi u a di Wöutu fëën?

WAN njönku baaa di an tööu jeti bi ta pakisei di soni di sikifi a 1 Kolenti 7:28, di ta taki taa dee sëmbë dee tööu o „abi sömëni fuka u de tjai”. Di njönku baaa aki bi fan ku wan gaanwomi di tööu kaa, hën a hakisi ën taa: „Andi da dee ’fuka’ aki, nöö unfa mi o sa tja dee fuka aki ee mi ko tööu?” Ufö di gaanwomi piki di hakisi aki, hën a piki di njönku baaa faa buta pakisei a wan woto soni di apösutu Paulosu bi sikifi. Di baaa bi piki ën taa: Jehovah da di Gadu di ta „heepi u fuu feni kötöhati” a hii „dee fuka dee ta miti u”.—2 Kolenti 1:3, 4.

² U sabi taa di Tata fuu de kai Jehovah lobi u, nöö a ta da u kötöhati te fuka ta miti u. Kandë i ta mëni jeti unfa  Jehovah bi heepi i, söseei unfa a bi tii i ku di Wöutu fëën. U sa dë seiki taa a kë da u dee möön bunu soni, kumafa a bi da dee dinima fëën a di ten di pasa.—Lesi Jelemia 29:11, 12.

3. Un hakisi woo piki a di woto aki?

³ An ta taanga da u sö fuu tja dee fuka dee ta miti u te u sabi faandi mbei dee fuka dë ta miti u. Nöö faandi mbei a sa pasa taa u abi fuka a di tööu libi fuu, nasö a di wosudendu libi fuu? Nöö un woto u sëmbë fu awooten, söseei u di ten fuu aki sa heepi u fuu feni di kötöhati di u abi fanöudu? Boo luku andi da dee piki u dee hakisi aki, nöö woo luku tu unfa u sa tja dee fuka dee ta miti u.

4, 5. Un fuka womi ku mujëë di tööu sa abi?

⁴ Baka di Jehovah mbei di fosu mujëë, hën a tjëën go da di womi, hën a ko mujëë fëën. Baka di dë, hën Jehovah taki taa: „Wan womi o go disa hën mama ku hën tata, nöö a o go nama ku hën mujëë, nöö de o toon wan sinkii” (Kenesesi 2:24). Wë hii u tuu da zöndu libisëmbë (Loomë 3:23). Di soni aki mbei taa te wan womi ku wan mujëë tööu, nöö de sa dë ku di mëni taa de o abi bookohedi. Ufö wan mujëë tööu, nöö a bi musu ta piki hën mama ku hën tata buka. Ma di Wöutu u Gadu taki taa baka te wan mujëë tööu, nöö di womi hën ta ko dë di hedima fëën (1 Kolenti 11:3). Kandë bigibigi a o ta taanga da di womi faa piki di mujëë fëën andi a musu du. Nöö a sa ta taanga da di mujëë faa piki hën manu buka, kumafa a bi ta piki dee gaan sëmbë fëën buka. Söseei bigibigi te wan womi ku wan mujëë tööu, nöö kandë di womi ku dee mujëë bëë fëën an ta fusutan deseei, nasö di mujëë ku dee manu bëë fëën an ta fusutan deseei, nöö di soni aki sa dë wan bookohedi da de tu.

⁵ Pakisei tu unfa wan womi ku hën mujëë sa fii te de ko fusutan taa de o pai wan mii. Hii fa de o ta wai, tökuseei de o ta booko de hedi tu. Kandë de o ta pakisei ee hii soni o waka bunu, nasö ee di mii o dë gösöntu. De sabi tu taa de o abi möön hia möni fanöudu. Te de pai di mii kaa, nöö de musu tooka woto soni a de libi. Kandë di mujëë o ta dë ku di mii möön gaanfa. Di womi ku di mujëë an o ta abi sö hia ten da deseei möön kumafa de bi naa. Di tata seei o ko abi möön faantiwöutu. A musu sölugu taa di mujëë ku di mii tuu musu ta feni dee soni di de abi fanöudu.

6-8. Unfa wan womi ku wan mujëë di tööu sa ta fii te de an sa pai mii?

⁶ So womi ku mujëë di tööu abi wan woto fuka. De ta kë miii, ma de an sa pai. Te di mujëë an sa ko dë ku bëë, nöö a sa ta tjali gaanfa seei (Nöngö 13:12). Na awooten, nöö de bi ta si di tööu di wan mujëë musu tööu pai miii kuma wan fanöudu soni seei. Di soni aki bi mbei Lakëli, di mujëë u Jakopu bi ta tjali gaanfa seei u di an bi sa dë ku bëë, hii fa hën sisa bi sa pai miii (Kenesesi 30:1, 2). A so köndë, sömëni sëmbë ta si kuma a dë wan gaan fanöudu soni seei taa de musu abi hia mii. Sëmbë lo’ u hakisi dee sëndëlengi dee ta libi a dee lö köndë dë ee faandi mbei de an pai miii jeti. Hii fa dee sëndëlengi ta piki de faandi mbei de an pai miii, tökuseei so sëmbë  ta piki de taa „Aai baa, woo begi Gadu da unu be un pai!”

⁷ Boo luku wan woto soni jeti. Wan sisa di ta libi a Ingisiköndë bi kë pai miii. Di a ko fusutan taa an sa pai, hën di soni aki mbei a fii booko saka seei. Bakaten hën ku hën manu bi tei wan mii ta kiija. Ma tökuseei a bi ta tjali wan pisiten jeti. A bi taki taa: „Mi sabi taa di tei di mi tei wan mii ta kiija an o dë di wan seei soni kuma te miseei bi o pai wan mii.”

⁸ Di Bëibel ta taki taa te wan mujëë pai wan mii, nöö a o „feni heepi a Gadu” (1 Timoteo 2:15). Ma di soni aki an kë taki taa a o feni di libi u teego u di a pai miii. Nöö andi di tëkisi aki kë taki? Wan mama ta tei di ten fëën faa kiija dee mii fëën, söseei u seeka di wosu fëën. Dee soni aki sa heepi ën fu an go dë ta taki sëmbë soni, nasö fu an go tjökö buka a woto sëmbë soni (1 Timoteo 5:13). Ma tökuseei a o ta abi bookohedi a di tööu libi ku di wosudendu libi fëën jeti.

9. Un woto fuka sa miti sëmbë di tööu?

⁹ Wan woto fuka di wan sëmbë di tööu sa abi tu, hën da te hën mujëë nasö hën manu dëdë. Hii fa kandë de an bi pakisei taa sö wan soni bi o miti de wan daka, tökuseei de bi musu hoi dou di di soni aki miti de. Keesitu sëmbë ta biibi taa sëmbë o weki ko a libi baka, nöö di soni aki ta da de kötöhati seei (Johanisi 5:28, 29). Di Tata fuu de kai Jehovah, paamusi u sömëni soni a di Wöutu fëën, di ta da u kötöhati te soni ta taanga da u. Wë boo luku unfa so dinima u Jehovah bi feni di kötöhati aki, söseei unfa a bi heepi de.

10. Unfa Hana bi feni kötöhati? (Luku di peentje a bigi u di woto.)

¹⁰ Luku andi bi pasa ku Hana, di mujëë u Elikana. A bi kë miii, ma an bi sa pai. Ma di kambosa fëën de kai Penina, bi abi sömëni mii. (Lesi 1 Samuëli 1:4-7.) Di möön hogi soni, hën da „hiniwan jaa” Penina bi ta mbei Hana fa. Di soni aki bi ta hati Hana gaanfa seei. Andi a bi du faa bi sa feni kötöhati? A bi begi Jehovah. Hana bi go a di kamian ka de ta dini Jehovah, nöö a bi begi wan hii pisiten. A bi hakisi Jehovah faa dëën wan womi mii, nöö a bi abi di futoou taa Jehovah bi o heepi ën. Di a kaba begi, hën a bi fii bunu seei, „an bi ta tjali möön” (1 Samuëli 1:12, 17, 18). A bi sabi taa Jehovah bi o dëën wan womi mii, nasö taa a o dëën kötöhati ku wan woto soni.

11. Unfa begi sa da u kötöhati?

¹¹ U di u da zöndu libisëmbë, söseei u di u ta libi a di goonliba u Saatan, mbei fuka o ta miti u hii juu (1 Johanisi 5:19). Ma u sa feni heepi. U sa begi Jehovah, di Gadu ka „hii kötöhati ta kumutu.” Di soni aki  Hana bi du. A bi piki Jehovah unfa a ta fii tuutuu, nöö a bi begi ën faa heepi ën. Sö nöö te u dë ku fuka, nöö na konda nöö u musu ta konda dee fuka fuu da Jehovah, ma u musu ta begi ën faa heepi u, söseei u musu piki ën unfa u ta fii tuutuu.—Filipi 4:6, 7.

12. Andi bi heepi Ana faa ta dë waiwai hii fa fuka bi miti ën?

¹² Kandë u ta tjali gaanfa seei u di wa sa pai miii, nasö u di wan sëmbë fuu dëdë. Ma tökuseei u sa feni kötöhati. Pakisei di woto u Ana, di bi ta libi a di ten di Jesosi bi dë a goonliba. Baka di a tööu seibi jaa, hën di manu fëën ko dëdë. Nöö a djei kuma an bi pai na wan mii. Ma andi bi heepi ën? A bi ta „dë a di Wosu u Masa Gadu nöömö”. Hii fa Ana bi abi 84 jaa, tökuseei a bi nango begi a di Wosu u Gadu, söseei a bi nango dini Gadu ala tu (Lukasi 2:37). Di soni aki hën bi da Ana kötöhati, nöö a bi heepi ën faa dë waiwai hii fa fuka bi miti ën.

13. Unfa wan bunu mati fuu sa da u kötöhati, te wan sëmbë fuu du wan soni di mbei u ta tjali?

¹³ Useei sa feni kötöhati a dee mati dee u abi a di kemeente (Nöngö 18:24). Paula bi abi feifi jaa di hën mama an bi ta dini Jehovah möön. Paula bi ta tjali seei, nöö di libi bi ta taanga dëën. Ma wan sisa de kai Ann di bi ta du di pioniliwooko, bi dëën taanga, nöö a bi buta pakisei nëën. Paula ta taki taa: „Hii fa mi ku Ann an dë famii, tökuseei di fasi fa a bi ta booko hën hedi ku mi bi heepi mi seei. A bi heepi mi u mi dini Jehovah go dou.” Sensi di ten dë, hën di mama u Paula ko ta dini Jehovah baka, nöö di soni aki mbei Paula bi ta wai seei. Ann seei bi ta wai tu, u di a bi sa heepi Paula faa dini Jehovah.

14. Un wini u ta feni te u ta da wotowan kötöhati?

¹⁴ Te u ta tei di ten fuu u du bunu soni da wotowan, nöö u ta fëëkëtë dee fuka dee useei abi. Sömëni sisa di tööu, nasö di an  tööu, sabi taa te de ta paaja di bunu buka u di Könuköndë da wotowan, nöö de ta wooko makandi ku Jehovah, söseei de ta du di kë fëën. Di soni aki ta mbei de ta dë waiwai. Hii u tuu sa lei taa u ta booko u hedi ku wotowan, u di woo ta konda soni u di bunu buka da de. Nöö te u ta du bunu soni da dee baaa ku dee sisa fuu, nöö u ku de ta ko dë möön gaan mati (Filipi 2:4). Di soni aki apösutu Paulosu bi ta du tu. A bi ta booko hën hedi ku wotowan kumafa „wan mama ta kiija dee piki mii fëën”. Paulosu bi ta da dee baaa ku dee sisa fëën kötöhati ku degihati tu leti „kumafa wan  tata ta kiija dee mii fëën”.—Lesi 1 Tesalonika 2:7, 11, 12.

15. Ambë abi di faantiwöutu u lei miii soni u Jehovah?

¹⁵ Unfa u sa ta da sëmbë u wan wosudendu dee dë a di kemeente fuu kötöhati? So juu sëmbë di bigi lei soni u Bëibel, sa hakisi u fuu ko ta lei dee mii u de soni u Jehovah. Di Bëibel ta lei u taa Jehovah da mama ku tata di faantiwöutu u lei dee mii u de soni (Nöngö 23:22; Efeise 6:1-4). Hii fa wotowan sa ta heepi de, tökuseei a dë fanöudu seei taa mama ku tata musu ta lei dee mii u de soni. Dee mama ku dee tata musu ta fan ku dee mii u de hii juu.

16. Andi u musu ta hoi a pakisei te u ta heepi miii?

¹⁶ Te wan mama ku wan tata hakisi u fuu lei di mii u de soni u Bëibel, nöö a bunu fuu hoi a pakisei taa wa abi taki a di mii liba kuma hën mama ku hën tata. So juu u sa ta lei wan mii soni u Bëibel, hii fa hën mama ku hën tata an dë a di tuutuu lei. Te u ta lei wan mii soni u Bëibel, ma an dë miii fuu, nöö a bi o dë wan köni soni fuu lei ën soni nëën pisi te hën mama ku hën tata nasö wan woto Kotoigi dë ku u, nasö a wan kamian ka sëmbë sa si u. Te u du di soni aki, nöö sëmbë an o pakisei föutu soni fuu. Nöö kandë te u kaba fëën di mama ku di tata u di mii seei o sa lei dee mii u de soni u Jehovah.

17. Unfa miii sa da dee famii u de kötöhati?

¹⁷ Dee njönkuwan dee ko sabi soni u Jehovah, söseei dee ko lobi ën, sa da dee famii u de degihati ku kötöhati. Na un fasi? Wë te de ta lesipeki de mama ku de tata, ku te de ta heepi de a soni. Te dee mii ta hoi deseei a Jehovah, nöö di soni dë ta da hii dee famii u de degihati tu. Ufö di Gaan Wata bi ko, nöö Lamëki bi ta dini Jehovah. A bi taki u di womi mii fëën de kai Noa taa: „Di wan aki o da u kötöhati u dee taanga wooko dee u ta du, söseei u di pena di u ta pena fa u ta wooko di goon di Jehovah bi siba.” Di tjabukama woto aki bi pasa tuu baka di di Gaan Wata bi ko, di Jehovah bi puu di siba di a bi siba di goon (Kenesesi 5:29; 8:21). A di ten aki dee mii dee ta hoi deseei a Jehovah, sa da dee famii u de kötöhati tu. De sa heepi hiniwan sëmbë a di famii u de u hoi dou te fuka ta miti de a di ten aki, söseei a di ten di ta ko.

18. Andi sa heepi u fuu hoi dou aluwasi un tesi ta miti u?

¹⁸ A di ten aki dee sëmbë u Jehovah ta feni kötöhati te de ta begi, te de ta pakisei fundu u dee woto dee sikifi a Bëibel, ku te de ta dë gaan mati ku dee baaa ku dee sisa u de. (Lesi Psalöm 145:18, 19.) U sabi taa Jehovah dë kabakaba hii juu faa da u kötöhati, nöö u dë seiki taa a o heepi u fuu hoi dou aluwasi un tesi ta miti u!