JEHOVAH GADU kë u hii dee dinima fëën ta libi fiifii ku deseei. A kë u de ta mbei möiti u libi fiifii ku deseei. Te de ta du sö, nöö de o sa ta libi fiifii ku deseei a di kemeente. Di soni aki ta mbei sömëni sëmbë ta kë ko a di kemeente.

Wan bonuma di bi ta libi a Madagasikali bi si unfa dee sëmbë u Jehovah bi ta libi fiifii ku deseei, hën a taki taa: ’Ee wan daka mi bi o kë go a wan keiki, nöö a disi mi bi o go.’ An tei longi möön, hën di womi aki ko disa di dini di a bi ta dini dee taku jeje. A bi seeka di tööu libi fëën, hën a bigi dini Jehovah, di Gadu di lobi te sëmbë ta libi fiifii ku deseei.

Leti kuma di womi aki, sö nöö hiniwan jaa dusudusu sëmbë ta ko a di kemeente u Keesitu sëmbë, nöö de ta feni di fiifii libi di de bi ta suku. U ta lesi a di Bëibel taa „Ee i ta haun da otowan ta suku bunu fii wanwan” a di kemeente, nöö i ku wotowan an o dë mati möön, söseei un sa ko abi toobi (Jakobosi 3:14-16). Ma di Bëibel ta da u bunu lai di ta lei u unfa u sa koti pasi da dee lö toobi aki, söseei unfa u sa ta libi fiifii ku dee baaa ku dee sisa fuu. Boo luku unfa u sa wooko ku dee lai aki.

„Mi ku wan baaa bi ta wooko, nöö wa bi ta fusutan useei. Wan daka di u bi ta buja, hën tu sëmbë ko si u fa u ta buja.”—CHRIS.

„Wan sisa di mi ku ën bi lo’ u peleiki makandi an bi kë peleiki ku mi möön. An bi kë fan ku mi möön tu. Ma bi sabi faandi mbei a bi ta du di soni aki.”—JANET.

„Wan daka mi tei tëlëfön, hën mi bëli tu sëmbë, nöö mi bi ta fan ku dee tu sëmbë dë a di wan seei ten. Wan u dee sëmbë taki taa hën a o saka tëlëfön, nöö mi bi mëni taa a bi saka tuutuu. Hën mi taki wanlö hogi soni fëën da di woto sëmbë. Hën a jei andi mi taki.”—MICHAEL.

„A di kemeente fuu tu sëmbë di bi ta du di pioniliwooko bi abi toobi. Wan u de bi bigi ta gandji da di wotowan. Di fasi fa de bi ta libi ku deseei bi ta toobi wotowan.”—GARY.

Kandë dee toobi aki an ta djei gaan soni. Ma dee lö toobi aki sa hati wotowan tu, nöö a sa mbei sëmbë an ta libi fiifii ku deseei möön a di kemeente. U ta wai seei taa dee baaa ku dee sisa aki bi wooko ku dee lai dee dë a Bëibel, hën de ko ta libi fiifii ku deseei baka. Un lai u Bëibel i pakisei taa bi heepi de?

„Hati fuunu an musu ta boonu ku unuseei te un dë a pasi nango” (Kenesesi 45:24). Josëfu bi da dee baaa fëën di köni lai aki di de bi o toona go a de tata. Te wan sëmbë an ta duwengi dee fii fëën, söseei ee hati fëën ta boonu hesi, nöö a sa mbei wan piki toobi ko toon wan gaan toobi. Wotowan hati seei sa ko boonu tu. Chris bi ko si taa so juu a bi ta taanga dëën u abi sakafasi, söseei u wooko ku dee lai di de bi ta dëën. A bi kë tooka, nöö fëën mbei a bi hakisi di baaa di hën ku ën bi buja faa dëën paadon. Baka di dë, hën Chris mbei möiti u  hati fëën an ta boonu hesi sö möön. Di di baaa ko si unfa Chris bi ta mbei möiti faa tooka di fasi fa a bi dë, hën a du di wan seei soni tu. Nöunöu de ta dini Jehovah fiifii makandi.

„Te sëmbë an ta konda da deseei unfa soni dë tuutuu, nöö hii soni ta buuja” (Nöngö 15:22). Di di mati u Janet an bi kë fan ku ën möön, hën Janet buta taa a o du di soni di di tëkisi aki taki. A bi go fan ku di sisa. Janet bi hakisi ën ee a du wan soni ku ën di hati ën, nasö di mbei hati fëën boonu. Bigibigi de tuu bi ta sen u fan. Ma di de bi ta fan a wan suti fasi ku deseei go dou, hën de ko ta fii möön bunu. Di sisa bi ko fusutan taa an bi kaba fusutan wan soni di bi pasa, söseei taa Janet an bi du na wan soni u mbei hati fëën boonu. A bi hakisi Janet faa dëën paadon, nöö dee tu sëmbë bi ko dë mati baka, nöö de ta dini Jehovah makandi go dou.

„Ee i go a di [Wosu u Gadu] fii tja soni go da Gadu nöö hën i ko mëni taa wan sëmbë ta hoi i a bëë a wan sondi, nöö i musu disa di paima fii leti dë, nöö i go a di otowan go seeka di taki” (Mateosi 5:23, 24). Jesosi bi da u di lai aki a di taki di a bi hoi a di kuun liba. Baka di Michael bi taki hogi u di woto baaa, nöö a bi hati ën seei. A bi buta taa a o du hii soni fëën ku di baaa ko dë mati baka. Fëën mbei a bi go a di baaa, hën a hakisi ën faa dëën paadon. Andi bi ko pasa? Michael taki taa: „Di baaa u mi bi da mi paadon ku hii hën hati.” Dee tu baaa aki bi ko dë mati baka.

„Un musu hoi pasensi da unuseei ta da unuseei paadon ku hii unu hati, aluwasi un feni taa wan wotowan du wan soni di hati unu” (Kolosën 3:12-14, NW). I ta mëni dee tu sëmbë dee bi ta du di pioniliwooko dee bi buja a di peleikiwooko u? Wan gaanwomi bi heepi de a wan suti fasi u de fusutan taa di fasi fa de bi ta tja deseei bi ta toobi wotowan. A bi mëni de taa de musu ta hoi pasensi da deseei, nöö de musu ta mbei möiti u heepi wotowan u de sa ta libi fiifii ku deseei a di kemeente. De bi du di soni di di gaanwomi bi taki. Nöunöu de ta wooko fiifii makandi u paaja di bunu buka.

Di wan seei lai di sikifi a Kolosën 3:12-14 sa heepi i fii abi sakafasi, fii da wan sëmbë paadon te a du wan soni ku i di hati i, söseei u na ta pakisei di woto dë möön. Ma unfa a dë ee u bi kë da wan sëmbë paadon, ma a ta taanga da u? Di mama wëti di sikifi a Mateosi 18:15 sa heepi u. Hii fa di soni di Jesosi bi taki bi nama möön gaanfa ku gaan zöndu, tökuseei a ta taki wan soni di u sa du te u ku wan baaa nasö wan sisa kisi toobi. U musu fan a wan suti fasi, söseei u musu abi sakafasi, fuu sa go fan ku di sëmbë, sö taa u sa seeka di toobi.

Sömëni woto lai dë a Bëibel di sa heepi u tu. Gaansë u dee lai aki nama ku di buta di u musu ta buta futoou a di santa jeje u Gadu, sö taa u sa lei taa u abi dee fasi di „di jeje” u Gadu ta mbei sëmbë ko abi. Dee fasi aki da ’lobi, piizii, kötöhati, pasensi, tjalihati u sëmbë, bunuhati, biibi, saapifasi, söseei di duwengi di u musu ta duwengi useei’  (Galasia 5:22, 23). Pakisei di soni aki. Wan masini ta wooko bunu te i ta buta oli a hii dee pisipisi fëën. Wë te u ta lei taa u abi dee bunu fasi u Jehovah, nöö an ta taanga sö möön u seeka wan toobi, söseei fuu libi fiifii ku wotowan.

Hii u tuu abi tookatooka fasi, wa ta si soni a di wan seei fasi, wa ta fan a di wan seei fasi tu. Di soni aki sa mbei taa a ta möön suti te u dë makandi ku wotowan. Ma a sa mbei tu taa wa ta fusutan useei, nasö so juu a sa tja toobi ko. Wan baaa di dë gaanwomi sömëni jaa kaa, bi taki unfa di soni aki sa pasa. A bi taki taa: „A sa taanga da wan sëmbë di ta sen te a dë makandi ku wan sëmbë di dë wajawaja. Di soni aki sa djei wan piki soni, ma a sa tja gaan toobi ko.” I si kuma tu sëmbë di an abi di wan seei fasi, an o sa dë mati wan daka u? Boo luku di woto u tu apösutu. Te u ta pakisei Petuisi, nöö u ta si wan sëmbë di bi ta taki hiniwan soni di bi ko nëën pakisei. Te u ta pakisei Johanisi, nöö u ta si wan baaa di bi lobi wotowan, di bi lo’ u pakisei ufö a taki wan soni, nasö ufö a du wan soni. Petuisi ku Johanisi bi tooka a di fasi fa de bi dë. Ma tökuseei de bi ta dini Jehovah makandi a wan bunu fasi (Tjabukama 8:14; Galasia 2:9). Sö nöö a sa dë ku u a di ten aki sö tu. Keesitu sëmbë di tooka gaanfa a di fasi fa de dë, seei sa wooko makandi a wan bunu fasi.

Ma unfa a dë ee wan sëmbë a di kemeente taki wan soni nasö du wan soni di mbei hati fii boonu? A bi o bunu fii hoi a pakisei taa Keesitu dëdë da di baaa nasö di sisa dë leti kumafa a dëdë da i, nöö i musu lobi di baaa fii nasö di sisa fii (Johanisi 13:34, 35; Loomë 5:6-8). An bi o bunu fii taki taa ja o dë mati ku di sëmbë dë möön, nasö taa ja o fan ku ën möön. Ma hakisi iseei di soni aki: ’Di baaa nasö  di sisa u mi ta du wan soni di an ta kai ku dee wëti u Jehovah u? A ta du soni ku sabi u hati mi ö? Naa tooka nöö u tooka a di fasi fa u dë? A abi fasi di mi bi o kë ko abi ö?

Ee wan sëmbë lo’ u fan, ma ii lo’ u dë piii, nöö a bi o bunu fii wooko makandi ku ën a di peleikiwooko, nöö i luku andi i sa lei nëën. Kandë a lo’ u da sëmbë soni möön i. Te a ta da sëmbë di ko gaandi kaa soni, te a ta da sëmbë di dë ku suwaki soni, nasö te a ta da sëmbë di abi heepi fanöudu soni, nöö a ta möön dë waiwai. Ja si kuma i sa lei wan soni a di fasi fa di sëmbë dë lo’ u da sëmbë soni ö? Hën da aluwasi i ku di baaa nasö di sisa fii an abi dee seei fasi, tökuseei i sa buta pakisei a dee bunu fasi fëën. Hii fa kandë nöiti ja o ko dë gaan mati ku ën, tökuseei woon sa ta libi bunu ku unuseei. Di soni aki o mbei taa hii sëmbë u di kemeente o sa libi fiifii ku deseei.

A di ten u dee fesiten Keesitu sëmbë, i bi abi tu sisa de kai Jodia ku Sentike. A djei kuma de bi tooka a di fasi fa de bi dë, ma apösutu Paulosu bi da de degihati u de „dë makandi ku wan pakisei” (Filipi 4:2). Useei kë ta dini Jehovah makandi ku dee baaa ku dee sisa fuu tu, söseei u kë ta libi fiifii ku useei a di kemeente tu.

Faandi mbei u musu puu dee hogi dee u ta pakisei u wotowan a u hati wantewante? U sa djei dee hogi pakisei aki ku dee taku uwii dee ta göö a wan djai dendu ka wanlö hanse folo dë. Ee ja hön dee taku uwii aki puu, nöö de o göö fuu hii di djai. A di wan seei fasi, ee u ta pakisei hogi u wotowan nöömö, nöö a sa toobi hii dee sëmbë u di kemeente. Ma ee u lobi Jehovah, söseei ee u lobi dee baaa ku dee sisa fuu, nöö woo du hii soni di u sa du sö taa u sa ta libi fiifii ku useei a di kemeente.

 Te u ta mbei möiti u libi fiifii ku wotowan, nöö a sa bigi da u seei te u si fa soni ko ta waka möön bunu. Di soni aki bi miti wan sisa. A bi taki taa: „Wan sisa bi ta libi ku mi kuma mi da piki mii. Di soni aki bi ta toobi mi seei. Möönmöön hati u mi bi ta boonu ku ën, hën mi bigi koti pasi dëën. Mi bi ta pakisei taa ’an ta lesipeki mi kumafa a musu lesipeki mi, nöö ma o lei taa mi ta lesipeki ën tu.’”

Di sisa aki bi go pakisei unfa hënseei dë. Hën a taki taa: „Mi bigi ta si dee suwaki fasi u mi tu, nöö mi bi ko fii booko saka seei. Mi bi ko fusutan taa mi bi musu tooka di fasi fa mi ta pakisei. Di mi begi Jehovah u di soni aki te mi kaba, hën mi bai wan piki kado da di sisa, söseei mi sikifi wan biifi dëën u hakisi ën faa da mi paadon u di fasi fa mi bi libi ku ën. Bakaten u baasa useei, hën u taki taa woo disa di woto dë. Sensi di ten dë, wa bi abi na wan toobi möön.”

Hii sëmbë ta kë u wotowan libi fiifii ku de. Ma te wan sëmbë an dë seiki u wan soni, nasö ee a abi gaanfasi, nöö a sa du soni di ta mbei hën ku wotowan an ta libi fiifii möön. A di goonliba aki, sëmbë lo’ u libi a di lö fasi aki, ma Jehovah kë u dee dinima fëën du soni a wan woto fasi. Dee sëmbë u Jehovah musu ta libi fiifii makandi ku deseei. Jehovah bi mbei Paulosu sikifi wan biifi da dee Keesitu sëmbë taa de musu „libi kumafa a fiti u sëmbë fëën musu libi”. A bi da de degihati u de ’abi sakafasi ku saapi fasi. U de ta hoi pasensi da deseei nöömö. De musu ta tei di otowan u de kumafa a dë, fu di de lobi ën hedi. Söseei de musu mbei möiti be de ta libi fiifii ku deseei. De musu dë ku wan hati kumafa di jeje u Gadu buta de’ (Efeise 4:1-3). Di libi di dee sëmbë u Jehovah ta ’libi fiifii ku deseei’ da wan gaan gudu di de abi. Fëën mbei be hii u tuu du hii soni di u sa du fuu sa ta libi fiifii ku useei möön gaanfa, söseei fuu seeka hiniwan toobi di u ku dee baaa ku dee sisa fuu abi.