A DI buku Mateosi, u ta lesi taa: „Masa Jesosi ko dou a Jelusalen naandë, nöö hën a go wante a di Wosu u Gadu. Nöö di a go dou, hën a si wanlö hia sëmbë sai naandë ta sei soni da dee wakama ta ko dë. De ta sei dee mbeti ku dee pomba dee de ta kii da Gadu ta paka paima. So sëmbë sai dë ta tooka möni. . . . Nöö hën di Masa Jesosi si sö kaa, hën hati fëën boonu seei. Hën a jaka dee sëmbë puu dë, a kandi dee tafa u de tuwë djolou a goon, a tötö dee bangi u dee sëmbë ta sei pomba dë tuwë ku baka a goon. Hën a gandji da de taa: ’Wan bi jei fa Masa Gaangadu bi taki a di Buku ö? A taa di wosu fëën dë wan kamian ka sëmbë musu ta ko ta begi ën. Ma nöö unu tei ën buta ko tan kamian u fufuuma!’”—Mateosi 21:12, 13.

Dee woto fu awooten ta lei taa dee sëmbë dee bi ta sei soni a di Wosu u Gadu an bi ta libi bunu ku dee sëmbë dee bi ta ko bai soni, biga de bi ta sei dee soni u de dii poi. Wan pomba bi bukopu seei taa dee pootima bi sa bai ën u de paka paima a Gadu. Ma dee awooten buku u dee Dju sëmbë bi taki taa a di pisiten u dee fesiten Keesitu, wan sëmbë bi musu paka wan goutu dinai faa bi sa bai tu pomba. Wan sëmbë bi musu wooko söwan 25 daka longi faa sa feni di möni dë. Dee pomba bi ko dii tee taa dee pootima an bi sa bai de möön (Leifitiki 1:14; 5:7; 12:6-8). Wan Dju leima de ta kai Simiön Ben Gamalijëi hati bi boonu u di soni aki sö tee taa a bi buta taa an bi dë u dee Dju tja hia soni möön u paka paima a Gadu. Wantewante hën di möni di de bi musu paka da tu pomba ko bukopu seei. Ee i bi abi wan dinai, nöö i ta booko ën a höndö pisi, nöö wan u dee pisi dë i ta tei paka da tu pomba.

Te u luku ën bunu, nöö u ta fusutan taa dee sëmbë dee bi ta sei soni a di Wosu u Gadu bi abi langawojo, nöö de an bi ta libi bunu ku dee sëmbë. Fëën mbei Jesosi bi abi leti di a bi kai de „fufuuma”.