1. Un soni mbei u tooka ku dee mbeti?

JEHOVAH da libisëmbë wan apaiti soni. Di soni dë da di háti di ta tii u. Di soni aki hën ta mbei u tooka ku dee mbeti. Unfa u du sabi taa Adam ku Eva bi abi wan háti di bi ta tii de? Wë baka di de pasa Gadu buka, hën de go tjubi dëën. Háti u de bi ta fon de.

2. Na un futu di háti fuu dë kuma di soni di i ta panjan u tja wan sipi? (Luku di peentje a bigi u di woto.)

² Dee sëmbë dee an seeka di háti u de faa ta tii de a wan bunu fasi, dë kuma wan sipi di sa lasi go kaba a sösö. Wan sipi sa lasi go ee de an seeka di soni di i ta panjan u tja di sipi. Di ventu ku di seki wata sa tja wan sipi go lasi. Ma ee di soni di di sëmbë ta panjan u tja di sipi, ta wooko bunu, nöö a sa heepi di sëmbë faa tja di sipi a wan bunu fasi. U sa taki taa di háti fuu dë kuma di soni di i ta panjan u tja wan sipi. Di háti fuu da wan soni di dë a u dendu di ta tii u, nöö a ta piki u andi da bunu ku andi da hogi. A sa tja u a wan bunu fasi. Ma ee u kë u di háti fuu tii u a wan bunu fasi, nöö u musu ta seekëën faa sa ta wooko bunu.

3. Andi sa pasa ee wa seeka di háti fuu faa sa ta wooko bunu?

 ³ Ee wa seeka di háti fuu faa sa ta wooko bunu, nöö an o ta bai u te u bi o kë du soni di an bunu (1 Timoteo 4:1, 2). Di háti fuu sa piki u seei taa „hogi da bunu” (Jesaaja 5:20). Jesosi bi piki dee bakama fëën taa: „A o ko dë sö taa kii seei [sëmbë] o ta kii unu, nöö de o ninga taa Gadu wë de ta heepi fa de ta du dë” (Johanisi 16:2). Di soni aki dee sëmbë dee kii Sitefani bi ta mëni (Tjabukama 6:8, 12; 7:54-60). A di ten di pasa, sömëni sëmbë di bi nango a keiki bi kii wotowan, nöö de bi taki taa Gadu de bi du ën da. Ma te u luku ën bunu, nöö di soni di de du dë an bi ta kai ku dee wëti u Gadu (Ëkisodesi 20:13). Wë di soni aki ta lei taa háti u dee sëmbë dë an bi tii de a wan bunu fasi!

4. Andi u sa du sö taa di háti fuu sa ta tii u a wan bunu fasi?

⁴ Wë nöö andi u sa du sö taa di háti fuu sa ta tii u a wan bunu fasi? Dee wëti ku dee mama wëti u Bëibel „bunu u lei u soni, u bai u a soni, u leti u buta a pasi, u gandji da u sö taa u sa libi tololoo” (2 Timoteo 3:16, NW). Hii juu u musu ta lei soni u Bëibel, u musu ta pakisei fundu u dee soni dee a ta taki, nöö u musu ta du dee soni dee u ta lei. Te u ta du sö, nöö möönmöön woo ko ta si soni kumafa Jehovah ta si soni. Te a dë sö kaa, nöö woo ko dë seiki taa háti fuu o ta tii u a wan bunu fasi. Boo luku unfa u sa wooko ku dee wëti ku dee mama wëti u Bëibel, fuu sa seeka di háti fuu faa sa ta wooko bunu.

5, 6. Unfa dee wëti u Gadu ta heepi u?

⁵ Ee u kë u dee wëti u Gadu heepi u, nöö na lesi wanwan u musu ta lesi de, söseei na sabi nöö u musu sabi de. U musu lobi de, söseei u musu ta hoi de. Di Bëibel ta piki u taa: „Wan musu lobi hogi seepiseepi, ma un musu lobi bunu soni” (Amösi 5:15). Ma unfa u sa du di soni di sikifi a di tëkisi aki? U musu ko ta si soni kumafa Jehovah ta si soni. Pakisei di woto aki. Boo taa ja sa ta duumi a ndeti, hën di data fii piki i taa i musu ta njan soni di möön bunu da i dendu, i musu ta buli sinkii, söseei taa i musu ko ta du soni woto fasi. Boo taa i du kumafa a piki i, hën i ko si taa a heepi i! Unfa i bi o ko ta si dee soni di di data piki i taa i bi musu ta du?

⁶ Wë sö nöö di Gadu di mbei u, buta wëti da u fuu hoi. Dee wëti dë ta tjubi u u hogi an miti u, söseei de ta heepi u fuu sa abi wan möön bunu libi. Di Bëibel ta lei u taa wa musu ta mindi soni, wa musu ta fufuu, wa musu ta libi fanafiti a di së u manu ku mujëë soni, wa musu ta du hogi, söseei wa musu ta du soni di nama ku taku jeje. (Lesi Nöngö 6:16-19; Akoalimbo 21:8) Te u ta si dee bunu dee u ta feni te u ta piki Jehovah buka, nöö u ta ko lobi hën ku dee wëti fëën möön gaanfa.

7. Unfa dee woto dee sikifi a di Bëibel ta heepi u?

⁷ Wa abi fu tja sitaafu u di u pasa dee wëti u Gadu, fuu sa ko sabi andi da bunu ku andi da hogi. U sa lei wan soni a dee föutu di woto sëmbë bi mbei. Dee woto u dee sëmbë dë sikifi a di Bëibel. Nöngö 1:5 ta taki taa: „Wan köni sëmbë o haika wotowan, nöö a o kë ko sabi möön hia soni.” Gadu hën ta lei u soni, nöö a ta lei u dee möön bunu soni! Pakisei fa Dafiti tja sitaafu tjika di a pasa Gadu buka, u di a bi duumi ku Batiseiba (2 Samuëli 12:7-14). Te i ta lesi di woto dë, nöö i hakisi iseei dee soni aki: ’Andi Dafiti bi sa du u dee soni aki an miti ën? Andi mi bi o du ee mi bi dë a Dafiti kamian? Ee wan daka mi ko  abi di fii u libi fanafiti a di së u manu ku mujëë soni, mi bi o du andi Dafiti bi du ö, naa mi bi o du andi Josëfu bi du?’ (Kenesesi 39:11-15) Ee u ta pakisei dee hogi dee sa miti u te u du wan soni di an bunu, nöö ’wa o ta lobi hogi seepiseepi’.

8, 9. (a) Andi di háti fuu ta heepi u fuu du? (b) Unfa di háti fuu ku dee mama wëti u Bëibel ta wooko makandi?

⁸ Wa ta nama ku soni di Gadu ta buuse. Ma andi u musu du ee u kë du wan soni, ma di Bëibel an ta piki u gbelingbelin andi u musu du? Unfa woo du sabi andi Gadu kë taa u musu du? Wë ee u bi mbei di Bëibel seeka di háti fuu faa sa ta wooko bunu, nöö woo sa du soni a wan köni fasi.

⁹ U di Jehovah lobi u, mbei a da u dee mama wëti fëën, di sa heepi u fuu seeka di háti fuu. A ta piki u taa: „Mi Jehovah, da i Gadu. Mi da di sëmbë di ta lei i sö taa i sa feni bunu. Mi da di sëmbë di ta tii i ka i musu waka” (Jesaaja 48:17, 18). Te u ta pakisei fundu u dee mama wëti u Bëibel u de sa dou u hati, nöö di soni dë o seeka di háti fuu faa sa ta wooko bunu. Di soni aki o heepi u fuu ta du soni a wan köni fasi.

10. Andi da wan mama wëti u Bëibel, nöö unfa Jesosi bi wooko ku mama wëti u lei wotowan soni?

¹⁰ Wan mama wëti u Bëibel da wan soni di an ta tooka, nöö a ta heepi u fuu du soni a wan köni fasi. Te u sabi dee mama wëti u Bëibel, nöö de ta heepi u fuu ko fusutan unfa  Jehovah ta si soni, söseei de ta heepi u fuu ko fusutan faandi mbei a buta so wëti da u. Jesosi bi ta wooko ku mama wëti u Bëibel u lei dee bakama fëën taa dee soni dee wan sëmbë ta du, ku di fasi fa a ta tja hënseei sa tja bunu nasö hogi ko dëën. A bi lei de taa te wan sëmbë hati ta boonu ku wotowan, nöö di soni dë sa mbei a du hogi. A bi lei de tu taa te wan sëmbë ta pakisei soni di na fiti, nöö di soni dë sa mbei a go du fanafiti soni a di së u manu ku mujëë (Mateosi 5:21, 22, 27, 28). Te u ta mbei dee mama wëti u Bëibel ta tii u, nöö de o seeka di háti fuu faa sa ta wooko bunu, söseei woo ta du soni di ta tja gafa ko da Gadu.​—1 Kolenti 10:31.

11. Unfa di fasi fa di háti fuu ta wooko sa tooka ku di u wotowan?

¹¹ Aluwasi Keesitu sëmbë ta wooko ku di Bëibel u seeka di háti u de faa sa ta wooko bunu, tökuseei so juu de an o ta si soni di wan fasi. U ta si di soni aki te a nama ku di bebe di sëmbë ta bebe daan. Di Bëibel an ta taki taa wa musu bebe daan, ma a ta piki u taa wa musu bebe daan pasa maaka, söseei taa wa musu ta bebe ta dööngö (Nöngö 20:1; 1 Timoteo 3:8). Ma di soni aki kë taki taa solanga wan Keesitu sëmbë an ta bebe daan pasa maaka, nöö a sa bebe te a kë u? Wë nönö. Aluwasi háti fëën ta dëën pasi faa bebe daan, tökuseei a musu ta köni fu an du soni di sa toobi wotowan.

12. Unfa di soni di sikifi a Loomë 14:21 sa heepi u fu wa du soni di sa toobi wotowan?

¹² Paulosu bi lei taa u musu ta köni fu wa du soni di sa toobi wotowan. A bi taki taa: „Nöö hën wë mbei, ee a nama a wan soni u njan, nöö i disëën. Ee soni u bebe, nöö na bebëën möön. Biga ja musu du na wan soni di sa kaba di otowan fii a sösö” (Loomë 14:21). Fëën mbei aluwasi di Bëibel an ta tapa u fu wa bebe daan, tökuseei u musu ta köni be wa bebe ën ee u sabi taa di bebe di woo bebe ën dë, sa toobi wotowan. Kandë wan baaa bi ta bebe daan ufö a ko sabi soni u di tuutuu lei, nöö di soni dë bi taanga dëën faa disa. Ma di a ko disëën, hën a buta taa an o ta bebe wan piki wan möön seei. Wë ee a dë sö, nöö wa bi o kë du wan soni di sa mbei di baaa dë ko dë a di sitaafu dë baka (1 Kolenti 6:9, 10). Ee u bi o kai sö wan baaa ko a u pisi, nöö u bi o dëën daan faa bebe hii fa a piki u taa an kë u? Wë nönö!

13. Unfa Timoteo bi lei taa an bi kë du soni di sa toobi wotowan, u di a bi kë heepi de u de tei di bunu buka?

¹³ Di Timoteo bi dë wan njönku kijoo, hën a bi mbei de buta di maaka u dee Dju dëën, hii fa di soni dë bi sa hati ën seei. A bi sabi taa dee Dju dee a bi o go peleiki da bi ta si di soni dë kuma wan gaan fanöudu soni seei. Timoteo ku Paulosu an bi kë du soni di bi sa toobi wotowan (Tjabukama 16:3; 1 Kolenti 9:19-23). I dë kabakaba u disa wan soni di i bi o kë du, u di di soni dë sa toobi wotowan u?

14, 15. (a) Unfa u sa ko dë wan gaangaan sëmbë a di biibi? (b) Unfa Keesitu sëmbë di ko gaangaan sëmbë a di biibi ta libi ku wotowan?

¹⁴ Hiniwan fuu musu „ta lei nango te u ko gaangaan sëmbë a di biibi”, ma wa musu  „fika ku dee fosu pisi u di lei u Keesitu” (Hebelejën 6:1). Wa ta ko dë gaangaan sëmbë a di biibi u di u dë a di biibi sömëni jaa longi. Ma u musu ta mbei möiti fuu ko dë sö wan sëmbë. U musu ta lei soni u Bëibel nango nöömö fuu ko ta fusutan soni möön bunu. Hën da u musu ta lesi di Bëibel hii daka (Psalöm 1:1-3). Te i ta lesi di Bëibel hiniwan daka, nöö joo ko fusutan dee wëti ku dee mama wëti u Bëibel möön bunu.

¹⁵ Un wëti Keesitu sëmbë musu ta hoi möön gaanfa? De musu ta hoi di wëti di ta taki taa de musu ta lobi de na de. Jesosi bi piki dee bakama fëën taa: „Te un ta lobi sö kaa, nöö hii sëmbë o si taa bakama u mi gbelin un dë e” (Johanisi 13:35). Di Bëibel ta taki taa lobi da „di gaan bumbuu wëti”, nöö „hën wanwan tö sa mbei i ta hoi hii dee wëti u Gadu tuu ku telu” (Jakobosi 2:8; Loomë 13:10). An ta foondo u te di Bëibel ta taki taa lobi da wan fasi di hii Keesitu sëmbë musu abi, u di a ta piki u taa „Masa Gadu, hën hatiböö da lobi” (1 Johanisi 4:8). Na fii nöö Gadu ta fii da sëmbë. A ta lei taa a lobi sëmbë ku dee soni dee a ta du. Johanisi bi sikifi taa: „U si taa Masa Gadu lobi u tuu. Biga a tei di wan kodo Womi Mii fëën tö di a abi, manda ko a di goonliba aki fuu sa feni di teego libi u Masa Gadu” (1 Johanisi 4:9). Te u ta lei taa u lobi Jehovah, Jesosi, dee baaa ku dee sisa fuu ku woto sëmbë, nöö u ta lei taa u da Keesitu sëmbë di ko gaangaan sëmbë a di biibi.​—Mateosi 22:37-39.

16. Faandi mbei woo ko ta möön lobi dee mama wëti u Bëibel te u ta ko gaangaan sëmbë a di biibi?

¹⁶ Möön u ta ko gaangaan sëmbë a di biibi, möön woo ta lobi dee mama wëti u Bëibel. Na hii juu i sa wooko ku wëti, ma i sa wooko ku mama wëti a peipei soni. Pakisei di soni aki. Wan mii an ta fusutan faandi mbei an musu tei mati di ta du hogi, nöö fëën mbei hën mama ku hën tata ta buta wëti dëën fu  an musu go du di soni dë (1 Kolenti 15:33). Ma te di mii ta ko gaangaan sëmbë, nöö a ta lei unfa a musu ta wegi soni luku, faa ko sabi ee dee soni dee a kë du ta kai ku dee mama wëti u Bëibel. Dee mama wëti aki o heepi ën faa sa sabi ambë a sa tei ko dë mati fëën. (Lesi 1 Kolenti 13:11; 14:20.) Möön u ta lei u wegi soni luku ee de ta kai ku dee mama wëti u Bëibel, möön di háti fuu o ta wooko bunu. Te a dë sö, nöö woo ta fusutan möön bunu andi Gadu kë fuu du.

17. Faandi mbei u sa taki taa u abi hii dee soni dee u abi fanöudu fuu sa du soni di ta kai ku Jehovah?

¹⁷ U abi hii dee soni dee u abi fanöudu fuu sa du soni di ta kai ku Jehovah. U ta feni wëti ku mama wëti a di Bëibel di ta heepi u fuu ko „dë kabakaba, seekaseeka u du hiniwan bumbuu wooko” (2 Timoteo 3:16, 17). Dee mama wëti u Bëibel ta heepi u fuu ko sabi unfa Jehovah ta si soni. Ma u musu mbei möiti fuu ko sabi dee mama wëti aki (Efeise 5:17). U abi wantu soni di sa heepi u. U abi di buku Ondrosuku Bijbel moro fini-Gi Yehovah Kotoigi, di Watchtower Library, di Watchtower LIBRARY A INTERNET, ku di JW Library app. Te u ta wooko ku dee soni aki, nöö woo feni wini te u ta hoi di Wosudendu Dini fuu, söseei woo feni wini te u ta lei soni u Bëibel.

18. Andi ta pasa te u ta wooko ku dee wëti ku dee mama wëti u Bëibel?

¹⁸ U ta ko abi wan möön bunu libi te u ta mbei dee wëti ku dee mama wëti u Bëibel ta tii u! Psalöm 119:97-100 ta taki taa: „Mi lobi di wëti fii gaanfa seei! Hii di daka mi ta pakisei ën. Dee wëti fii ta mbei mi ko köni möön dee felantima u mi, u di mi ta buta pakisei a de hii juu. Mi ko ta fusutan soni möön bunu möön dee sëmbë dee ta lei mi soni, biga mi ta buta pakisei a dee wëti dee i ta piki mi taa mi musu hoi. Di fasi fa mi ta du soni ta lei taa mi ta fusutan soni möön dee womi dee ko gaan sëmbë kaa, u di mi ta hoi dee wëti fii.” Te u ta tei ten ta pakisei fundu u dee wëti ku dee mama wëti u Bëibel, nöö woo ko ta du soni a wan köni fasi. Söseei te u ta wooko ku dee wëti ku dee mama wëti dee Gadu da u u seeka di háti fuu faa sa ta wooko bunu, nöö „woo ko dë gbelingbelin kumafa Masa Jesosi seei dë söndö föutu”.​—Efeise 4:12.