U DI u ta libi a wan hogi goonliba, mbei a sa ta taanga da u fuu feni kötöhati. So juu u sa feni kötöhati u wan pisiten, ma a sa pasa taa wa ko abi ën möön. Andi di Bëibel ta lei u, di sa heepi u fuu ko abi tuutuu kötöhati di ta dë u nöömö? Söseei unfa u sa heepi wotowan u de ko abi di lö kötöhati dë tu?

Te wa ta fëëë taa soni o du u, söseei te u sabi taa wan sëmbë o heepi u te u dë a fuka, nëën ufö u sa taki taa u abi tuutuu kötöhati. U musu abi bunu mati, ma di möön fanöudu soni, hën da u musu ko dë gaan mati ku Gadu. Unfa u sa du di soni aki?

Dee wëti ku dee mama wëti u Jehovah bunu da u hii juu. Te u ta du andi dee wëti fëën ta taki, nöö u ta lei taa u ta futoou ën, söseei taa u kë fuu ku ën dë mati (Jelemia 17:7, 8; Jakobosi 2:22, 23). Te u du sö, nöö u ku Jehovah o ko dë gaan mati, söseei a o da u kötöhati. Jesaaja 32:17 ta taki taa: „Te soni o du a wan leti fasi, nöö hii soni o ta waka bunu. Te soni o du a wan leti fasi tuutuu, nöö hii sëmbë o ta fii bunu u nöömö, söseei de an abi bookohedi.” U sa ko abi tuutuu kötöhati te u ta piki Jehovah buka ku hii u hati.​—Jesaaja 48:18, 19.

Jehovah da u wan soni tu di sa heepi u fuu ko abi tuutuu kötöhati di ta dë u nöömö. Di soni dë da di santa jeje fëën.​—Tjabukama 9:31.

Apösutu Paulosu bi taki taa „te di jeje ta tii wan sëmbë”, nöö a ta abi kötöhati (Galasia 5:22, 23). U di di jeje u Gadu ta mbei sëmbë ko abi kötöhati, mbei u musu mbei di jeje tii u ee u kë feni kötöhati. Unfa u sa mbei di jeje tii u?

Di fosu soni di u musu ta du, hën da u musu ta  lesi di Wöutu u Gadu hiniwan daka (Psalöm 1:2, 3). Te u ta pakisei fundu u dee soni dee u ta lesi, nöö di santa jeje ta heepi u fuu ko fusutan unfa Jehovah ta pakisei u soni. Wë u ta ko möön fusutan unfa Jehovah ta dë bööböö, aluwasi andi ta pasa, söseei u ta ko möön fusutan faandi mbei Jehovah ta si bööböö libi kuma wan fanöudu soni. Te u ta libi ku dee soni dee u ta lei a di Bëibel, nöö woo abi wan möön bööböö libi.​—Nöngö 3:1, 2.

Di u tu soni di u musu ta du, hën da u musu ta begi Gadu faa ta da u di santa jeje fëën (Lukasi 11:13). Jehovah Gadu ta paamusi dee sëmbë dee ta suku heepi nëën taa: „Di kötöhati u Gadu di bigi pasa hii sëmbë fusutan o tjubi unu hati ku unu fusutan tuu a Jesosi Keesitu liba” (Filipi 4:6, 7). Te u ku Jehovah ko dë möön gaan mati, söseei te u ta buta futoou nëën taa a o da u di santa jeje fëën, nöö woo abi tuutuu kötöhati.​—Loomë 15:13.

Di Bëibel heepi sömëni sëmbë u de tooka de libi, nöö nöunöu de ku Jehovah dë fiifii, de feni kötöhati, söseei de ku wotowan sa ta libi fiifii. Unfa de du tooka soni a de libi?

Ufö so baaa ku sisa ko a di tuutuu lei, hati u de bi ta boonu hesi nasö de bi ta du hogi ku wotowan. Ma de mbei taanga möiti u tooka, nöö nöunöu de ko abi tjalihati u sëmbë, pasensi, söseei de ta libi fiifii ku wotowan. * (Luku di pisi a basu.) (Nöngö 29:22) Luku unfa wan baaa de kai David ku wan sisa de kai Rachel bi tooka dee fasi di de bi abi fosu.

Ufö David ko a di tuutuu lei, a bi ta kuutu wotowan, söseei an bi ta fan ku dee sëmbë fëën a wan sutifasi. Ma a bi ko fusutan taa a bi musu bia libi. Unfa a bi feni kötöhati? David bi taki taa: „Mi bi bigi libi ku dee mama wëti u Bëibel, hën te u  kaba fëën mi ku dee sëmbë u mi bi ko ta möön ta lesipeki useei.”

U di dee sëmbë u Rachel hati bi ta boonu hesi, mbei di a ko gaansëmbë, hati fëën seei bi ta boonu hesi. A ta taki taa: „Te kuma tide, a ta taanga da mi u hati u mi an ta boonu hesi, u di sö mi kiija.” Andi bi heepi Rachel faa feni kötöhati? A ta taki taa: „Mi bi ta begi, söseei mi bi ta buta futoou a Jehovah.”

David ku Rachel ku sömëni woto sëmbë ta feni kötöhati, u di de ta libi ku dee mama wëti u Bëibel, söseei u di de ta mbei di santa jeje ta tii de. Hii fa u ta libi a wan hogi goonliba, tökuseei u sa abi kötöhati. Di soni aki o heepi u fuu sa ta libi fiifii ku dee famii fuu, söseei ku dee baaa ku dee sisa fuu a di kemeente. Ma Jehovah ta piki u taa u musu ta ’biinga fuu libi fiifii ku hii sëmbë’ (Loomë 12:18). U sa du di soni aki ö? Faandi mbei u musu biinga u libi fiifii ku wotowan?

A di peleikiwooko, u ta paaja di bunu buka u di Könuköndë u Gadu di ta da sëmbë kötöhati (Jesaaja 9:6, 7; Mateosi 24:14). Sömëni sëmbë lobi di buka aki, nöö de ta du andi a taki. Di soni dë ta mbei de an ta dë pantapanta, söseei dee soni dee ta pasa a di goonliba aki an ta mbei hati u de ta boonu. De sabi taa soni o go möön bunu a di ten di ta ko. Fëën mbei de ta ’mbei möiti nöömö u de ta libi fiifii ku wotowan’.​—Psalöm 34:14.

Ma tökuseei na hii sëmbë ta lobi di bunu buka te u kondëën da de wantewante (Johanisi 3:19). Aluwasi sëmbë haika nasö de an haika, tökuseei Gadu ta da u di santa jeje fëën. A ta heepi u u hati fuu an ta boonu ku dee sëmbë dee u ta peleiki da, söseei fuu ta lei taa u ta lesipeki de. Te u ta du sö, nöö u ta du di soni di Jesosi bi taki. A bi taki taa: „Nöö te woon denda a di wosu, nöö un da dee sëmbë odi taa ’Masa Gadu musu da unu kötöhati e, dee sëmbë’. Nöö mi taki da unu taa ee dee sëmbë u di wosu naandë dë a pasi u kisi di lö bunu dë, nöö Gadu o da de kötöhati tuu. Ma ee de an dë a pasi u de feni ën, nöö de an o feni ën. Di bunu dë o toona ko a unu baka” (Mateosi 10:11-13). Te u ta du sö, nöö woo sa libi fiifii ku sëmbë, aluwasi andi de taki nasö aluwasi andi de du ku u. Di soni dë o heepi u fuu sa heepi dee sëmbë dë bakaten.

U ta lei tu taa u ta libi fiifii ku wotowan, te u ta fan ku dee tiima a wan lesipeki fasi, aluwasi de an lobi di wooko di u ta du. A wan köndë fu Afiikan, dee tiima an bi kë fuu mbei Könuköndë zali. Dee baaa bi sabi taa de bi musu koti di taki aki a wan lesipeki fasi. De bi manda wan baaa di bi dë wan sëndëlengi a di köndë dë fosu, u go a wan heihei sëmbë u di köndë dë, di bi ta libi a di foto London a Ingisiköndë. A bi go konda dëën taa u ta du di wooko fuu a wan lesipeki fasi.

Di baaa bi taki taa: „Di mi dou a di kantoo, hën mi si di fasi fa di mujëë di bi sindo a di kantoo, bi bisi. Hën mi fusutan taa a dë wan sëmbë u wan u dee lö di mi bi lei di töngö u de. Fëën mbei mi bi dëën odi nëën mamabëë töngö. A bi bigi dëën seei. Fëën mbei a hakisi mi taa: ’I ko seeka wan soni ö?’ Hën mi piki ën a wan lesipeki fasi taa mi bi kë si di basi u di kamian. A bëli di womi, hën di womi ko miti mi, söseei a da mi odi a Ingisitöngö. Baka di dë, hën a haika mi di mi bi ta konda dëën fa u ta du di wooko fuu a wan lesipeki fasi.”

Di di womi jei andi di baaa taki, hën a ko fusutan di wooko fuu möön bunu, nöö an bi ta pakisei hogi fuu möön. Baka wan pisiten, dee tiima bi tooka pakisei, hën de taa Jehovah Kotoigi sa toona mbei Könuköndë zali baka. Dee baaa ku dee sisa bi wai te na soni! Di soni aki ta lei taa te u ta lei taa u abi lesipeki da wotowan, nöö u ta lei taa u da sëmbë di ta libi fiifii ku wotowan.

A di ten aki, dee sëmbë u Jehovah ta libi fiifii makandi ku deseei. Hiniwan fuu musu ta mbei möiti fuu ko ta möön libi fiifii ku useei. Te u ta du sö, nöö u sa dë seiki taa Jehovah o wai ku u. Nöö a di njunjun goonliba fëën, a o da u kötöhati di o dë u nöömö.​—2 Petuisi 3:13, 14.