1. Unfa Saatan ta mbei u ko ta pakisei kumafa a kë, te u luku di soni di sikifi a Kolosën 2:4, 8?

SAATAN kë taa wa musu lobi Jehovah möön. Fëën mbei a ta mbei möiti fuu ko ta si soni woto fasi, nöö te u kaba fëën a ta mbei u ko ta pakisei kumafa a ta pakisei. A ta wooko ku dee soni dee u lobi u ganjan u fuu ko ta du soni kumafa a kë.​—Lesi Kolosën 2:4, 8.

2-3. (a) Faandi mbei u musu buta pakisei a dee soni dee sikifi a Kolosën 2:8? (b) Andi woo luku a di woto aki?

² Ma Saatan sa ganjan u tuutuu ö? Wë aai! Hoi a pakisei taa Paulosu an bi sikifi dee soni dee dë a Kolosën 2:8 da sëmbë di an bi ta dini Gadu. Ma a bi sikifi de da dee Keesitu sëmbë di Gadu bi salufu ku di santa jeje fëën (Kol. 1:2, 5). Wë ee Saatan bi sa ganjan dee Keesitu sëmbë u di ten dë, nöö a sa möön feni u dee Keesitu sëmbë a di ten aki ganjan (1 Kol. 10:12). Faandi mbei u taki sö? Wë de bi vinde Saatan ko a goonliba aki, nöö a ta mbei hii möiti faa ganjan dee sëmbë dee ta hoi deseei a Gadu (Ako. 12:9, 12, 17). Boiti di dë, u ta libi a wan ten ka hogiduma ku dee sëmbë dee ta ganjan sëmbë „ta hogi nango fesi nöömö”.​—2 Tim. 3:1, 13.

³ A di woto aki woo luku unfa Saatan ta wooko ku dee „sösö lei u di goonliba aki” u ganjan u. Woo ko sabi dii u dee „hogi köni fëën a ta boi” (Ef. 6:11). A di woto di woo luku baka disi, woo taki u soni di u sa du u Saatan an ganjan u möön. Ma nöunöu woo luku andi u sa lei u di fasi fa Saatan bi ganjan  dee Isaëli sëmbë di de bi go a di Paamusi Köndë.

4-6. Te u luku Detolonomi 11:10-15, nöö un njunjun fasi u paandi soni dee Isaëli sëmbë bi musu lei di de bi dou a di Paamusi Köndë?

⁴ Saatan bi ganjan dee Isaëli sëmbë u de ko ta dini poipoi gadu. Unfa a bi du di soni aki? Wë a bi sabi taa de bi o abi soni u njan fanöudu. Fëën mbei a bi seti soni sö taa de bi sa ko ta du soni kumafa a kë. Di dee Isaëli sëmbë bi go a di Paamusi Köndë, nöö de bi musu lei u paandi soni a wan woto fasi. Di de bi dë a Egepiti, nöö de bi ta tei wata u di Nëili Lio u de bi sa munjan dee soni di de bi paandi. Ma soni bi dë woto fasi a di Paamusi Köndë. De an bi sa kisi wata a wan lio u de munjan dee soni di de paandi, ma de bi musu wakiti u te tjuba kai munjan dee goon u de, nasö de bi musu wakiti u do wata munjan dee goon u de. (Lesi Detolonomi 11:10-15; Jes. 18:4, 5.) Di soni aki mbei dee Isaëli sëmbë bi musu lei u paandi soni a wan njunjun fasi. Di soni aki bi o dë wan taanga soni, u di gaansë u dee sëmbë dee bi sa’ u paandi soni, bi dëdë a di sabana.

⁵ Jehovah bi mbei dee sëmbë fëën ko fusutan taa soni tooka. Baka di dë, hën a bi piki de wan soni. Te i luku di soni di a bi piki de, nöö ja bi o pena mëni taa a nama ku di paandi di de bi ta paandi soni. A bi piki de taa: „Un köni be sëmbë an ganjan unu fuun bia baka da Gadu, nöö un go dë ta tjökö kini ta begi woto gadu” (Deto. 11:16, 17). Faandi mbei Jehovah bi piki dee sëmbë fëën u de an go dini poipoi gadu, hii fa a bi ta taki u di lei di de bi o lei wan njunjun fasi u paandi soni?

⁶ Jehovah bi sabi taa dee sëmbë fëën bi o kë go a dee sëmbë di an bi ta dini ën, u de lei de unfa de musu paandi soni. Dee sëmbë dee an bi ta dini Jehovah, bi sa’ u paandi soni möön dee Isaëli sëmbë, nöö dee sëmbë u Jehovah bi  sa lei soni a de. Ma de bi musu ta köni ku wan soni. Dee sëmbë u Kaana dee bi ta paandi soni, bi ta dini Baali, nöö de bi ta begi ën faa heepi de ku di wooko aki. De bi ta si Baali kuma wan gadu di abi liba ala, nöö de bi ta si kuma hën ta mbei tjuba ta kai. Jehovah an bi kë u dee sëmbë fëën ko ta biibi di soni aki. Ma tökuseei sömëni pasi a bi pasa taa dee Isaëli sëmbë bi go dë ta dini Baali (Nöb. 25:3, 5; Kuutm. 2:13; 1 Kön. 18:18). Wë boo buta pakisei a di fasi fa Saatan bi buta dee Isaëli sëmbë ko dë a di tii fëën basu.

7. Un tesi bi miti dee Isaëli sëmbë di de bi go a di Paamusi Köndë?

⁷ Di fosu soni di Saatan bi wooko ku ën u ganjan dee Isaëli sëmbë, da di kë di de bi kë u tjuba kai munjan dee goon u de. A di Paamusi Köndë, tjuba an bi ta kai wan bëtë a dee pisiten u piki-deewei-liba te go miti wajamaka-liba. Ee tjuba an bi kai a tinimu-liba, nöö dee soni di dee Isaëli sëmbë bi paandi an bi o sa göö u de feni njan. Saatan bi ganjan dee Isaëli sëmbë u de ko ta biibi taa ee de bi kë u dee soni di de bi paandi bi musu göö, nöö de bi musu du dee soni di dee sëmbë dee an bi ta dini Jehovah, bi ta du. Dee sëmbë aki bi ta biibi taa tjuba o kai te de du wanlö soni da dee gadu u de. Dee Isaëli sëmbë dee an bi ta biibi Jehovah tjika, bi ta biibi taa di wan kodo fasi fa di tjuba bi sa bigi kai, hën da te de bi o dini Baali. Fëën mbei de bi bigi ta du dee soni di dee sëmbë dee an bi ta dini Jehovah, bi ta du.

8. Andi da di u tu soni di Saatan bi wooko ku ën u ganjan dee Isaëli sëmbë?

⁸ Wan woto soni dë di Saatan bi wooko ku ën u ganjan dee Isaëli sëmbë. A bi wooko ku di kë di de bi ta kë du fanafiti soni a di së u manu ku mujëë soni. Dee woto köndë sëmbë dee an bi ta dini Jehovah, bi ta du wanlö gaan fanafiti soni te de bi ta dini dee gadu u de. Womi ku mujëë tuu bi ta du dee soni aki. Womi ku womi, nasö mujëë ku mujëë seei bi ta du fanafiti soni, nöö sëmbë an bi ta si di soni aki kuma wan hogi soni! (Deto. 23:17, 18; 1 Kön. 14:24) Dee woto köndë sëmbë dee an bi ta dini Jehovah, bi ta biibi taa di fasi fa de bi ta dini dee gadu u de, bi ta mbei taa dee soni di de bi ta paandi, bi ta göö. Sömëni Isaëli sëmbë bi go ta du dee fanafiti soni aki tu, nöö sö a bi ko waka taa de bi ko ta dini poipoi gadu. Wë u sa taki taa Saatan hën bi ganjan de u de ko dë a di tii fëën basu.

9. Unfa Saatan du mbei dee Isaëli sëmbë ko fëëkëtë ambë da Jehovah tuutuu, te u luku Hosea 2:16, 17?

⁹ Di u dii soni di Saatan bi wooko ku ën u ganjan dee Isaëli sëmbë, hën da di mbei di a bi mbei de an ta si Jehovah kumafa de bi musu ta si ën möön. A di pisiten di di tjabukama de kai Jelemia bi dë a libi, nöö Jehovah bi taki taa dee poipoi tjabukama bi mbei dee sëmbë fëëkëtë di në fëën, u de „go dini Baali” (Jel. 23:27). Te u kaba fëën, dee sëmbë u Jehovah an bi ta kai di në fëën möön, ma de bi ko ta kai Baali. Di në aki kë taki „Di sëmbë di abi ën” nasö „Masa”. Di soni aki bi o mbei a ko taanga da dee Isaëli sëmbë u de sabi ambë da Jehovah, ku ambë da Baali. Söseei a bi o möön mbei dee Isaëli sëmbë mökisi di dini di de bi ta dini Jehovah ku di u Baali.​—Lesi Hosea 2:16, 17.

10. Andi da dee soni di Saatan ta wooko ku de u ganjan sëmbë a di ten aki?

¹⁰ Wë Saatan ta wooko ku dee seei soni u ganjan u a di ten aki. A ta wooko ku dee soni dee u ta kë, a ta wooko ku fanafiti libi a di së u  manu ku mujëë soni, söseei a ta mbei sëmbë fëëkëtë Jehovah. Boo taki fosu u di fasi fa Saatan ta mbei sëmbë fëëkëtë di fasi fa Jehovah ta si soni.

11. Andi Saatan bi du u mbei a taanga da sëmbë u de ko sabi ambë da Jehovah?

¹¹ Saatan ta mbei sëmbë fëëkëtë Jehovah. Baka di dee apösutu u Jesosi tuu dëdë, hën so sëmbë di bi ta kai deseei Keesitu sëmbë, bi bigi ta lei sëmbë poipoi soni (Tjab. 20:29, 30; 2 Tes. 2:3). Dee sëmbë aki bi ta mbei a taanga da wotowan u de ko sabi ambë da di tuutuu Gadu. De bi ta puu di në u Gadu a dee Bëibel u de, nöö de bi ta buta „Masa”, nasö woto soni nëën kamian. Di du di de bi du di soni aki, bi mbei a bi ko ta taanga da wan sëmbë di ta lesi di Bëibel, faa si unfa Jehovah bi tooka ku dee woto „masa” di sikifi a Bëibel (1 Kol. 8:5). Jehovah ku Jesosi tuu de bi ta kai „Masa”, nöö di soni dë bi ta mbei a ta taanga da sëmbë u de ko sabi taa Jehovah ku Jesosi na di wan (Joh. 17:3). Di soni aki seei bi mbei sëmbë bi ko ta si kuma Jehovah, Jesosi, ku di santa jeje, da wan kodo sëmbë nöö, hii fa di Wöutu u Gadu an ta lei sëmbë di soni aki. Te u kaba fëën, sömëni sëmbë bi ko ta si kuma nöiti de o sa ko sabi soni u Gadu. Ma na sö a dë e!​—Tjab. 17:27.

12. Andi poipoi keiki da sëmbë pasi u de du, nöö andi ko pasa bakaten kumafa a sikifi a Loomë 1:28-31?

¹² Saatan ta wooko ku fanafiti libi a di së u manu ku mujëë soni, u ganjan sëmbë. A di ten u dee Isaëli sëmbë, Saatan bi ta wooko ku poipoi biibi u mbei sëmbë libi fanafiti a di së u manu ku mujëë soni. A di ten aki Saatan ta du di wan seei soni jeti. Dee poipoi keiki ta da sëmbë pasi u de ta libi fanafiti a di së u manu ku mujëë soni, söseei de an ta si ën kuma gaan soni te sëmbë ta libi dee lö libi dë. Di soni aki mbei sömëni sëmbë di nango a keiki, an ko ta hoi dee wëti u Gadu möön di ta taki unfa wan sëmbë musu ta libi a wan fasi di fiti. Apösutu Paulosu bi sikifi wan biifi da dee Keesitu sëmbë u Loomë, ka a bi taki u di soni di bi ko pasa te u kaba fëën. (Lesi Loomë 1:28-31.) A bi taki u di du di sëmbë ta „du dee poipoi soni de ta pakisei”. Dee soni aki nama ku hiniwan pei fanafiti libi a di së u manu ku mujëë soni, te kisi di duumi di womi ku womi, nasö mujëë ku mujëë ta duumi ku deseei (Lom. 1:24-27, 32; Ako. 2:20). A dë fanöudu seei fuu ta du dee soni dee sikifi a di Bëibel!

13. Andi da wan woto soni di Saatan ta wooko ku ën u ganjan sëmbë?

 ¹³ Saatan ta wooko ku dee soni di libisëmbë hati ta kë, u ganjan sëmbë. A dë sö tuu taa u abi di fii a u hati fuu sa ko sa’ u du wan wooko fuu sa ta heepi useei, söseei fuu sa ta sölugu dee sëmbë fuu wosudendu (1 Tim. 5:8). Möön gaanfa u ta ko sa’ u du wan wooko, te u lei a siköö. Ma tökuseei u musu ta köni ku di soni aki. A sömëni köndë de ta lei miii sömëni bunu soni di de sa ko sa’ u du bakaten, ma de ta lei dee mii aki di köni u di goonliba aki tu. De ta da dee mii taanga u de an biibi taa wan Gadu dë, sö taa an dë u de ta hoi deseei a dee soni dee sikifi a di Bëibel. De ta piki dee mii taa sëmbë di köni hën ta biibi taa hii soni ko fu hënseei (Lom. 1:21-23). Dee lei aki an ta kai ku di köni u Gadu.​—1 Kol. 1:19-21; 3:18-20.

14. Unfa di köni u libisëmbë ta mbei sëmbë ko dë?

¹⁴ Di köni u libisëmbë, an ta kai ku dee wëti u Jehovah. An ta mbei sëmbë ko abi dee fasi di di santa jeje u Gadu ta mbei sëmbë ko abi, ma a ta mbei „hati fii ta manda i fii du dee [soni dee] na ta kai ku Gadu” (Gal. 5:19-23). Di köni u libisëmbë ta mbei sëmbë ko abi gaanfasi. Te u kaba fëën, sëmbë ta ko lobi „de seei nöö” (2 Tim. 3:2-4). Ma Gadu kë u dee dinima fëën musu abi sakafasi (2 Sam. 22:28). So Keesitu sëmbë di go a hei siköö, bi bigi ko ta pakisei kumafa dee sëmbë u di goonliba aki ta pakisei, ka u de pakisei kumafa Gadu ta pakisei. Boo luku andi sa pasa ku u ee wa köni ku di soni aki.

15-16. Andi i lei u di soni di bi miti wan sisa?

¹⁵ Wan sisa di ta du di hii-ten diniwooko 15 jaa longi kaa, bi taki taa: „U di mi bi dë wan  dopudopu Kotoigi, mbei mi bi lesi soni u di hogi di sa miti i te i go a hei siköö, ma tökuseei ma bi köni da di soni dë. Ma bi ta si kuma di woto dë nama ku mi.” Andi bi miti di sisa aki te u kaba fëën? Hënseei bi toona taki taa: „Mi bi ta tei sömëni ten u mi lei dee siköö soni u mi, nöö ma bi ta feni ten u mi ta begi Jehovah möön kumafa mi bi naa. Ma bi ta feni ten möön u mi taki soni u Bëibel ku wotowan, söseei mi bi ta wei tee taa ma bi sa ta seeka bunu da dee komakandi. Ma mi wai seei taa di mi ko fusutan taa di hei siköö di mi bi nango, bi ta mbei mi ku Jehovah an dë mati möön, hën mi disëën.”

¹⁶ Unfa di hei siköö lei bi mbei di sisa aki bi ko ta pakisei? A bi taki taa: „Sen ta kisi mi u mi taki taa di go di mi bi go a hei siköö, bi mbei mi ko ta buta pakisei a dee föutu dee wotowan ta mbei, möönmöön a dee föutu u dee baaa ku dee sisa. Mi bi ta kë u de du möön fa de bi sa du, nöö ma bi lo’ u dë makandi ku de. A bi tei wan longi pisiten ufö mi bi ko ta si soni woto fasi. Di soni di bi miti mi aki, bi lei mi taa mi musu ta haika dee soni di di Tata fuu di dë a liba ala, ta mbei di ölganisaasi fëën piki mi. Jehovah sabi mi möön fa mi sabi miseei. Ee mi bi haikëën, di soni aki an bi o miti mi!”

17. (a) Andi u musu ta mbei möiti fuu du? (b) Andi woo luku a di woto di ta ko?

¹⁷ Mbei möiti u Saatan an ganjan i „ku dee sösö lei u di goonliba aki”. Nöiti i musu da Saatan pasi faa ganjan i (1 Kol. 3:18; 2 Kol. 2:11). Nöiti i musu da Saatan pasi faa mbei i fëëkëtë ambë da Jehovah, söseei na dëën pasi faa mbei i fëëkëtë di fasi fa Jehovah kë fii ta dini ën. I musu ta hoi dee wëti u Jehovah. Na mbei Saatan ganjan i te nöö ja ko ta haika Jehovah möön. Ma andi i musu du ee i ko si taa i ko ta pakisei kumafa dee sëmbë u di goonliba aki ta pakisei? Di woto di ta ko o lei u unfa di Wöutu u Gadu sa heepi u fuu disa soni di u bi ta du, ku soni di u ta pakisei, di an ta kai ku Gadu.​—2 Kol. 10:4, 5.