SENSI awooten, dee Isaëli sëmbë bi abi di guwenti u da möni a di dini di de bi ta dini Gadu. Ma a di ten di Jesosi bi dë a goonliba aki, dee Dju bi ta paka sömëni pei lanti möni, di bi ta mbei taa di libi bi ta taanga da de.

Dee Dju bi musu paka tu kpëngëlë möni u de bi sa seeka di tenti u Gadu, nöö bakaten de bi ta paka di möni aki go dou u de sa ta seeka di Wosu u Gadu. A di ten di Jesosi bi dë a goonliba, de bi ta paka di möni aki sö taa de bi sa abi soni u ta tjuma da Gadu, söseei u de bi sa ta seeka di Wosu u Gadu, di könu Helodi bi mbei. So u dee Dju bi hakisi Petuisi ee Jesosi bi ta paka di möni aki, nöö Jesosi bi taki taa an föutu u paka di möni aki. A bi piki Petuisi seei naasë a bi sa feni möni faa bi sa paka.​—Mat. 17:24-27.

Dee sëmbë u Gadu u di ten ala bi ta paka wan woto möni tu. Hën da de bi musu ta da di u teni pisi u dee soni di de bi paandi nasö u di möni di de bi ta feni (Leif. 27:30-32; Nöb. 18:26-28). Dee keiki fesima bi ta piki dee sëmbë taa de musu da Gadu di u teni pisi u dee soni u de, leti kumafa di wëti ta taki, te kisi „dee pikipiki sii tuu”. Jesosi an bi ta taki taa a föutu u paka di möni aki. Ma a bi taki taa di fasi fa dee Sabima u Wëti ku dee Faliseima bi ta mbei sëmbë hoi di wëti aki, an bi bunu.​—Mat. 23:23.

A di ten dë, dee Dju bi dë a dee Loomë sëmbë basu, nöö dee Dju bi musu paka peipei lanti möni. Sëmbë di bi abi wan goon, bi musu paka lanti wan soni. De bi sa du ën ku möni nasö ku dee soni di de paandi. De bi musu paati dee soni di de paandi a fö nasö feifi pisi, nöö wan u dee pisi dë de bi musu paka lanti. Boiti di dë, hiniwan Dju bi musu paka wan gaan möni tu. Di möni aki dee Faliseima bi hakisi Jesosi soni fëën. Jesosi bi lei u unfa u musu si di paka di u musu paka lanti möni di a bi taki taa: „Wë nöö di soni di dë u könu nöö un da könu ën e, nöö di soni di dë u Masa Gaangadu nöö un da Masa Gaangadu ën.”​—Mat. 22:15-22.

De bi musu paka wan möni tu, te gudu bi ta denda wan kamian nasö te de bi o kumutu a wan kamian. De bi ta pii di möni aki a peipei kamian. De bi ta pii ën a dee lampeesi, a dee booki, a so pasi liba, nasö a dee wojowojo.

Di paka di dee Dju bi musu ta paka lanti möni bi taanga da de seei. Wan öndösukuma u Loomë de kai Tacitus, bi taki taa a di ten di di Gaan Könu de kai Tibelia, bi ta tii, söseei a di pisiten di Jesosi bi dë a goonliba aki, hën „dee Silia sëmbë ku dee sëmbë u Judea bi begi dee Loomë sëmbë u de an mbei de paka sö hia möni möön, u di soni bi ta ko taanga da de seei”.

Söseei di fasi fa de bi ta pii lanti möni bi ta mbei a möön taanga da dee sëmbë. Di sëmbë di paka di möön gaan möni faa bi sa feni di wooko u pii lanti möni, hën bi ta feni di wooko dë. Di sëmbë di paka di möön gaan möni bi ta abi wookoma di bi nango pii di möni, nöö dee wookoma aki bi ta mbei möni a sëmbë liba. A djei kuma di womi de kai Zakeosi bi abi dee lö wookoma aki tu (Luk. 19:1, 2). Di soni aki mbei dee sëmbë hati bi ta boonu, söseei fëën mbei de bi ta buuse dee sëmbë dee bi ta pii möni a de.