1. Andi Jehovah du da hiniwan fuu?

 JEHOVAH hai hiniwan fuu ko nëën (Joh. 6:44). Pakisei luku andi di soni aki kë taki. Di Jehovah bi ta luku dee milionmilion sëmbë a goonliba aki, hën a si wan soni a i. A si taa hati fii limbo, söseei taa i sa ko lobi ën (1 Klon. 28:9). Jehovah sabi i, a ta fusutan i, söseei a lobi i. Di soni aki da wan soni di sa da i kötöhati seei.

2. Unfa Jesosi bi heepi u fuu ko fusutan unfa Jehovah lobi hiniwan u dee sikapu fëën tjika?

² Jehovah ta booko hën hedi ku i gaanfa seei. Söseei a ta booko hën hedi ku hii dee woto baaa ku sisa fii tu. U di Jesosi bi kë heepi u fuu fusutan di soni aki, mbei a bi tei Jehovah maaka ku wan sëmbë di ta kiija sikapu. Andi di sikapuma o du ee a abi 100 sikapu, hën wan u de lasi? ’A o disa dee nëigiteni-ku-nëigi ka de ta njan a di sabana dë, nöö a go suku di lasi sikapu dë tee a feni ën.’ Te di sikapuma feni di sikapu, nöö hati fëën an o boonu ku ën. A o wai. Andi u ta lei a di soni aki? Jehovah ta kai hiniwan u dee sikapu fëën gaan soni. Jesosi bi taki taa: „Mi Tata di dë a liba ala . . . an kë na wan kodo sëmbë fëën musu lasi, te dou ku dee piki mii kuma disi aki seei. Sö a ta kai de gaan soni tjika.”​—Mat. 18:12-14.

3. Andi woo taki a di woto aki?

³ Wë an dë u taki taa na wan daka seei u bi o kë du wan soni u mbei wan baaa nasö wan sisa fuu lasi hati. Unfa u sa köni fu wa mbei wotowan naki futu? Söseei andi u sa du ee wan sëmbë du wan soni di hati u? Woo piki dee hakisi aki a di woto aki. Ma ufö u piki de, nöö woo taki andi u sa lei a di soni di Jesosi bi taki a Mateosi kapitë 18 di a bi taki taa „dee piki mii kuma di i si aki sö”.

4. Ambë da „dee piki mii kuma di i si aki sö”, di Jesosi bi taki u de?

⁴ „Dee piki mii kuma di i si aki sö”, di Jesosi bi taki u de, da hii dee bakama u Jesosi. Aluwasi un mëni jaa de abi, u sa taki taa de dë kuma piki mii, u di de dë kabakaba u disa Jesosi be a lei de soni (Mat. 18:3). De dë sëmbë u peipei föluku, di abi tookatooka guwenti. De an ta si soni a di wan fasi, söseei de tooka ku deseei. Ma tökuseei hii de tuu ta biibi a Jesosi Keesitu, nöö Jesosi seei lobi de gaanfa.​—Mat. 18:6; Joh. 1:12.

5. Unfa Jehovah ta fii te wan sëmbë mbei wan u dee sëmbë fëën naki futu, nasö du wan soni di hati de?

⁵ Jehovah ta kai hii dee bakama u Jesosi gaan soni. Fii sa fusutan unfa a ta fii, nöö pakisei unfa u ta fii da piki mii. U ta kai de gaan soni. U ta kë tjubi de, u di de an taanga, de an abi öndöfeni, söseei de an köni kuma wan gaan sëmbë. Wa ta kë si te wan sëmbë ta du hogi ku wan woto sëmbë. Ma a ta möön toobi u te wan sëmbë ta du hogi ku wan mii. Di soni dë sa mbei hati fuu boonu tu. Wë sö nöö Jehovah ta kë tjubi u a di wan seei fasi tu. A ta toobi ën te wan sëmbë mbei wan u dee sëmbë fëën naki futu, nasö du wan soni di hati de. Di soni dë sa mbei hati fëën boonu tu!​—Jes. 63:9; Maik. 9:42.

6. Unfa dee sëmbë u di goonliba aki ta si dee bakama u Jesosi, kumafa 1 Kolenti 1:26-29 ta taki?

⁶ Na un fasi dee bakama u Jesosi dë kuma „piki mii”? Wë ambë dee sëmbë u di goonliba aki ta si kuma fanöudu sëmbë? Dee guduma, dee nëbai sëmbë, ku dee sëmbë dee abi makiti. Ma dee bakama u Jesosi an lo’ u dë dee lö sëmbë dë. Fëën mbei dee sëmbë u di goonliba aki, ta si de kuma „piki mii”, di an dë wan hojo soni. (Lesi 1 Kolenti 1:26-29.) Ma Jehovah an ta si de sö.

7. Unfa Jehovah kë fu ta si dee baaa ku dee sisa fuu?

⁷ Jehovah lobi hii dee dinima fëën, aluwasi de ta dini ën sömëni jaa kaa, nasö aluwasi de dë njunjun a di biibi. Jehovah ta kai hii dee baaa ku dee sisa fuu gaan soni. Fëën mbei useei musu ta kai de gaan soni tu. U kë ’ta lobi [hii] dee otowan dee ta biibi Masa Jesosi kuma u’. Wa kë lobi so u de nöö (1 Pet. 2:17). U musu dë kabakaba fuu du hii soni di u sa du fuu sa tjubi de, nasö fuu sa lei taa u ta booko u hedi ku de. Ee u ko jei taa u du wan soni di hati wan sëmbë, nöö wa musu du kuma soni an pasa. Söseei wa musu si kuma di sëmbë musu da u paadon, nöö a fëëkëtë di soni dë. Faandi mbei so soni sa toobi so sëmbë? Kandë di fasi fa de kiija so baaa ku sisa, sa ta mbei taa de ta si kuma de lagi möön woto sëmbë. Wotowan an dë sö longi a di tuutuu biibi jeti, nöö de an kaba sabi jeti unfa de musu libi ku wotowan te de ta mbei föutu. Ma aluwasi fa soni dë, tökuseei u musu mbei möiti fuu ko ta libi fiifii ku useei baka. Boiti di dë, ee a lo’ u pasa hia taa dee soni di wotowan ta du lo’ u toobi wan sëmbë, nöö a dë fanöudu faa ko fusutan taa di fasi dë da wan fasi di an bunu, di a musu tooka. Te a du sö, nöö a o ta dë waiwai, söseei hën ku dee baaa ku dee sisa fëën o ta libi fiifii ku deseei.

8. Unfa sëmbë bi ta si soni a di ten u Jesosi, nöö unfa di soni dë bi mbei dee bakama fëën ko ta pakisei?

⁸ Faandi mbei Jesosi bi taki soni u „dee piki mii kuma di i si aki sö”? Dee bakama fëën bi hakisi ën wan soni. De bi taki taa: „Masa o, u kë hakisi i wan soni. Undi fuu sa dë di möön hei wan a di Njunjun Tii u Gadu dendu di ta ko aki?” (Mat. 18:1) A di ten dë, sömëni Dju bi ta kë u woto sëmbë si de kuma heihei sëmbë. Wan womi di ta öndösuku soni fu awooten, bi taki taa: „Dee womi bi ta si nëbai, ku di lesipeki di wotowan bi musu lesipeki de, kuma di möön fanöudu soni a di libi.

9. Andi dee bakama u Jesosi bi musu du?

 ⁹ Jesosi bi sabi taa dee bakama fëën bi o abi u mbei taanga möiti u na si deseei hei möön wotowan, u di sömëni Dju bi ta pakisei sö. A bi piki de taa: ’Di sëmbë di dë di möön hei wan fuunu, hën musu dë di möön pikiwan. Nöö di sëmbë di ta tei fesi hën musu dë kuma wan wookoma a unu mindi’ (Luk. 22:26). U ta tja useei kuma di möön pikiwan, te u ta ’saka useei da dee wotowan fuu ta luku de kuma de hei möön u’ (Fil. 2:3). Te u ta mbei möiti fuu ta tja useei a di lö fasi dë, nöö an o ta pasa hesihesi taa u ta du soni di ta mbei wotowan naki futu.

10. Na un soni di Paulosu bi taki u musu ta buta pakisei?

¹⁰ Hii dee baaa ku dee sisa fuu sa’ u du wan soni bunu möön u. Di soni aki an ta taanga u si, te u ta buta pakisei a dee bunu fasi di de abi. A dë fanöudu seei fuu buta pakisei a di soni di Paulosu bi piki dee sëmbë u Kolenti. A bi piki de taa: „Wë ambë da i di köni di i abi? Na Gadu ta da u hii soni nö? Wë ee Gadu hën da i ën, nöö unfa i sa njan buka fëën?” (1 Kol. 4:7) Nöiti wan daka seei u musu kë u wotowan ko ta si u kuma wan apaiti sëmbë. Söseei nöiti u musu ko ta si kuma u hei möön wotowan. Ee wan baaa sa’ u hoi taki bunu seei, nasö ee wan sisa abi di köni u feni sëmbë u lei soni u Bëibel, nöö Jehovah de musu ta da di gaandi.

11. Andi Jesosi bi kë lei u ku di woto di a bi konda u wan könu ku wan saafu fëën?

¹¹ Kölö sö baka di Jesosi bi piki dee bakama fëën taa de musu ta köni u de an du soni u mbei wotowan naki futu, hën a bi konda wan woto u wan könu ku di saafu fëën da de. Di saafu bi abi wan gaan hia möni u paka di könu, ma an bi o sa toona pakëën di möni dë. Hën di könu piki ën taa an dë fa dëën di möni möön. Bakaten, di di saafu aki bi miti wan woto saafu u di könu kuma hënseei, di bi abi wan möön biti möni u dëën, hën a mbei toobi ku ën. An bi kë disëën seei. Te u kaba fëën, di könu bi buta di saafu aki a dunguwosu, u di an bi abi tjalihati u di wotowan fëën. Andi u sa lei a di soni aki? Jesosi bi taki taa: „Un si fa di soni pasa dë u? Wë nöö leti sö nöö mi Tata di dë a liba ala o libi ku unu tu e, ee wan puu dee otowan fuunu a bëë ku hii unu hati a dee hogi de ta du unu.”​—Mat. 18:21-35.

12. Unfa a sa tja hogi ko da wotowan ee wa kë da de paadon?

¹² Di soni di di saafu bi du, an bi tja hogi ko da hënseei nöö, ma a bi tja hogi ko da wotowan tu. Di fosu soni, hën da an bi lei taa a bi abi tjalihati u di wotowan fëën. Hën „a mbei dee siköutu ko tei ën tja go buta a dunguwosu fu tee a sa paka di paima”. Di u tu soni, hën da di soni di a bi du dë bi hati dee woto saafu dee bi si andi a bi du. Di soni dë bi toobi de seei te na soni. Wë sö nöö dee soni dee u ta du sa toobi wotowan. Ee wan sëmbë libi hogi ku u, hën wa kë dëën paadon, nöö andi sa pasa? Wë di fosu soni, hën da a o hati di sëmbë u di wa kë dëën paadon, u di wa kë buta mëni nëën, söseei u di wa kë lei ën taa u lobi ën. Di u tu soni, hën da woo mbei dee baaa ku dee sisa u di kemeente fii wan fasi, te de si taa u ku di sëmbë an ta libi fiifii ku useei.

13. Andi u ta lei a di soni di bi pasa ku wan sisa di ta du di pioniliwooko?

¹³ Te u ta da dee baaa ku dee sisa fuu paadon, nöö di soni dë ta tja wini ko da u ku wotowan tuu. Di soni aki wan sisa di ta du di pioniliwooko bi ko si. Woo kai di sisa aki Crystal. Wan sisa u di kemeente ka a dë, bi du wan soni di hati ën. Crystal bi taki taa: „So juu dee soni dee a bi ta taki bi ta tjökö mi sö tee taa a bi ta djei kuma a ta koti mi ku faka. Ma bi ta kë u de buta mi u mi ku ën peleiki seei. Ma bi ko ta fii sö möön u go a di peleikiwooko, söseei ma bi ko ta dë waiwai  sö möön tu. Crystal bi ta si kuma a abi leti u hati fëën boonu. Ma hii fa a dë sö, an bi hoi di sisa a bëë, söseei an bi buta pakisei nëën seei nöö, nasö a di fasi fa a bi ta fii. Faandi mbei? A bi abi sakafasi, hën a du soni kumafa di Bëibel ta taki. A bi du di soni di sikifi a di woto „Gi sma pardon nanga yu heri ati”, di dë a di Waktitoren u 15 u tinimu-liba, u di jaa 1999. Crystal bi da di sisa fëën paadon. A bi taki taa: „Nöunöu mi ko si taa hii u tuu ta mbei taanga möiti fuu sa tooka. Nöö Jehovah ta dë kabakaba u da u paadon hiniwan daka. Mi fii seei taa mi böö fëëë sö. Mi ko ta dë waiwai baka.”

14. Andi bi sa ta taanga da apösutu Petuisi, te u luku Mateosi 18:21, 22?

¹⁴ U sabi taa u musu da wotowan paadon. Di soni aki da di möön bunu soni di u sa du. Ma a sa taanga da u fuu du. A kan taa apösutu Petuisi bi ta fii sö so juu. (Lesi Mateosi 18:21, 22.) Andi i sa du te iseei ta fii sö? Di fosu soni di i sa du, hën da i sa pakisei luku un mëni pasi Jehovah da i paadon (Mat. 18:32, 33). Wa fiti faa musu da u paadon, ma tökuseei a ta dë kabakaba u du ën (Ps. 103:8-10). Boiti di dë, ’u musu ta lobi useei tu’. Hën da di da di u musu ta da wotowan paadon da wan soni di u musu u du. U musu u da dee baaa ku dee sisa fuu paadon (1 Joh. 4:11). Di u tu soni di i sa du, hën da i sa pakisei luku andi ta pasa te u da wotowan paadon. U sa heepi di sëmbë di du wan soni ku u di hati u. U sa heepi dee sëmbë u di kemeente u de ta libi fiifii ku deseei. U sa mbei taa u ku Jehovah sa dë mati go dou. Söseei woo fii taa u böö seei fëëë sö u di wa abi di lö bookohedi dë möön (2 Kol. 2:7; Kol. 3:14). Di lasiti soni di i sa du, hën da i sa begi Jehovah faa heepi i, u di hën da di sëmbë di ta piki u fuu ta da wotowan paadon. Na da Saatan pasi faa mbei taa i ku dee baaa ku dee sisa fii an ta libi fiifii ku unuseei möön (Ef. 4:26, 27). A dë fanöudu u Jehovah heepi u, ee wa kë u Saatan feni u kisi ku di taapu fëën.

15. Ee u luku andi Kolosën 3:13 ta taki, nöö andi u musu du ee wan baaa nasö wan sisa du wan soni di toobi u?

¹⁵ Unfa a dë ee wan baaa nasö wan sisa du wan soni di toobi i gaanfa seei? Andi i musu du? Mbei hii möiti fii ku di baaa nasö di sisa dë sa dë bunu go dou. Piki Jehovah unfa i ta fii. Hakisi ën faa sa mbei di sëmbë dë feni gaan bunu, söseei faa heepi i fii si dee bunu fasi di di sëmbë abi, di bi mbei a hai ën ko nëën (Luk. 6:28). Ee ja sa fëëkëtë di soni di di baaa nasö di sisa fii du, nöö i sa go fan ku ën. Ma pakisei luku andi da di möön bunu fasi fa i sa fan ku ën. Hii juu a ta bunu fii hoi taa na kë di baaa nasö di sisa fii bi kë du wan soni u hati i (Mat. 5:23, 24; 1 Kol. 13:7). Te i ta fan ku ën, nöö hoi taa a abi bunu fii a pakisei. Wë nöö ee an kë fii ku ën dë fiifii ku unuseei wë? Nöö ’hoi pasensi dëën’. Na ko wei u hoi pasensi da di baaa nasö di sisa fii. (Lesi Kolosën 3:13.) Di möön fanöudu soni, hën da ja musu hoi di baaa nasö di sisa fii a bëë, u di di soni aki sa poi di dë di i ku Jehovah dë mati. Na mbei na wan soni mbei i naki futu. Te i ta du di soni aki, nöö a sö wan fasi i ta lei taa i lobi Jehovah möön hiniwan woto soni.​—Ps. 119:165.

16. Un fanöudu soni hiniwan fuu musu ta du?

¹⁶ U ta wai seei taa u sa dini Jehovah makandi kuma „wan kodo hipi sikapu” di ’wan kodo sikapuma’ ta tii (Joh. 10:16). Di buku Wi orga fu du a wani fu Yehovah, ta taki a bladsëidë 165 taa: „U di i ta feni wini u di libi di u ta libi makandi kuma wan famii, mbei a dë fanöudu fii seei mbei möiti fuu sa libi sö go dou. Hën da u musu mbei möiti fuu ko ta si dee baaa ku dee sisa fuu kumafa Jehovah ta si de.” Hii u tuu dë gaan soni a Jehovah wojo, leti kuma „piki mii”. I ta si dee baaa ku dee sisa fii kumafa Jehovah ta si de u? Jehovah ta si hiniwan soni di i ta du u heepi de, söseei u lei taa i ta booko i hedi ku de. Nöö a ta tei dee soni dë u bigi.​—Mat. 10:42.

17. Andi u dë kabakaba u du?

¹⁷ U lobi dee baaa ku dee sisa fuu. Fëën mbei u musu ’mëni useei bunu fu wa musu buta wan sitonu a pasi fu di otowan fuu naki futu kai’ (Lom. 14:13). U ta si dee baaa ku dee sisa fuu kuma de hei möön u, nöö u kë da de paadon ku hii u hati. Wa musu mbei wotowan mbei u naki futu. Ma „boo biinga ku dee soni dee sa mbei u dë fiifii ku u seei, ku dee soni dee sa heepi u fuu ko a fesi a di biibi”.​—Lom. 14:19.