WAN sisa de kai Lisa * bi konda andi bi heepi ën faa bigi lei soni u Bëibel. A bi taki taa: „Di lei di dee baaa ku dee sisa bi lei taa de abi bunuhati bi heepi mi.” Wan woto sisa de kai Anne bi taki sö wan soni tu. A bi taki taa: „Na dee soni di dee Kotoigi ta lei sëmbë bi mbei mi bi kë ko sabi soni u di tuutuu lei, ma a bi dë di bunuhati di de abi da wotowan.” Nöunöu dee tu sisa aki tuu, lo’ u lesi di Bëibel, söseei de ta pakisei fundu fëën, ma di bunuhati di wotowan bi abi da de bi heepi de gaanfa.

Unfa u sa da wotowan taanga te u ta lei taa u abi bunuhati? Wë woo taki u tu fasi fa u sa du di soni aki: Dee soni dee u ta taki ku dee soni dee u ta du. Baka di dë, woo luku ambë u musu abi bunuhati da.

Nöngö kapitë 31 ta taki taa wan bunu mujëë ta lei taa a abi bunuhati te a ta fan (Nöng. 31:26). Bunuhati ta mbei a luku bunu andi a o taki, ku unfa a o taki ën. Dee womi dee abi miii musu lei taa de abi bunuhati tu, te de ta fan. Gaansë u sëmbë di abi miii sabi taa dee mii u de an o kë haika de, te de an ta fan a wan bunu fasi ku de. Ma te de ta fan a wan suti fasi ku dee mii u de, nöö de ta möön piki de buka a soni.

Unfa i sa ko dë wan sëmbë di ta fan a wan suti fasi? Wë u sa feni di piki a Nöngö 31:26. A taa: „Te a o taki wan soni, a ta taki ën ku köni”. Di soni aki kë taki taa u musu köni ku dee soni dee woo taki, söseei ku di fasi fa woo taki ën. Ufö u taki wan soni, nöö a bunu fuu hakisi useei di soni aki: ’Di soni di mi o taki aki o mbei sëmbë hati boonu, naa a o mbei u libi fiifii ku useei go dou?’ (Nöng. 15:1) Awa, a dë wan köni soni fuu pakisei soni ufö u fan.

Wan woto tëkisi a Nöngö ta taki taa: „Te sëmbë ta taki soni söndö u pakisei, nöö a dë kuma tjökö de ta tjökö wotowan ku wan feti ufangi” (Nöng. 12:18). Te u ta hoi a pakisei unfa wotowan o fii u dee soni dee woo taki, nasö u di fasi fa woo taki ën, nöö a sa heepi u fuu ta köni ku dee soni dee u ta taki. Te u abi bunuhati u wotowan, nöö woo mbei möiti fu wa taki soni u hati wotowan, ma woo ta fan a wan suti fasi ku de (Ef. 4:31, 32). Te u ta mbei di möiti aki, nöö wa o ta pakisei soni, nasö taki soni di an fiti, ma woo ta fan a wan suti fasi ku wotowan. Jehovah da wan sëmbë di u sa djeesi, te u luku di fasi fa a bi fan ku Elia di a bi ta fëëë. Jehovah bi manda wan ëngëli u fan ku Elia a wan „saapi fasi” (1 Kön. 19:12). Ma na fan nöö u musu ta fan a wan suti fasi, u musu ta du soni tu di ta lei taa u abi bunuhati u wotowan. Unfa u sa du di soni aki?

Te u ta fan a wan suti fasi, söseei te u ta du soni di ta lei taa u abi bunuhati, nöö hën da u ta djeesi Jehovah (Ef. 4:32; 5:1, 2). Lisa, di sisa di u bi taki soni fëën a bigi u di woto, bi konda unfa dee Kotoigi bi du soni u lei taa de abi bunuhati dëën. A bi taki taa: „Di de bi duwengi mi ku de sëmbë u mi wosudendu fuu  foloisi wantewante, hën tu baaa ku de mujëë bi tei fëlëi u de ko heepi u seeka lai. A di ten dë, ma bi ta lei soni u Bëibel jeti seei!” Dee lö soni aki, bi da Lisa taanga faa öndösuku soni u Bëibel.

Anne di u bi taki soni fëën a bigi u di woto aki, ta tei di lei di dee Kotoigi bi lei taa de abi bunuhati dëën u bigi tu. A bi taki taa: „Di fasi fa sëmbë u di goonliba aki ta libi, mbei a bi taanga da mi u mi ta futoou sëmbë.” A bi taki tu taa: „Di mi ku dee Kotoigi bi miti, nöö ma bi ta futoou de. Mi bi hakisi miseei taa ’Faandi mbei de ta booko de hedi ku mi sö?’ Ma u di di sisa di bi ta lei mi soni u Bëibel bi abi bunuhati u mi tuutuu, mbei mi bi ko ta futoou ën.” Andi bi ko pasa bakaten? Anne bi taki taa: „Baka di dë, mi bi ko ta möön buta pakisei a dee soni dee mi bi ta lei.”

Di fasi fa dee baaa ku dee sisa u di kemeente bi ta lei taa de abi bunuhati u Anne ku Lisa, bi da de taanga u de ko sabi soni u di tuutuu lei. Söseei a bi heepi de u de ko ta futoou Jehovah ku dee sëmbë fëën.

Kandë so sëmbë ta fan suti ku wotowan ta lafu ku de u di sö dee sëmbë u di lö u de, nasö u di pisiwata ka de kiija, ta libi ku wotowan. Ee dee soni aki ta mbei so sëmbë ta libi bunu ku wotowan, nöö a dë wan bunu soni seei. Ma ee dee soni aki nöö ta da u taanga fuu libi bunu ku wotowan, nöö a kan taa wa ta djeesi Gadu a di fasi fa a ta lei taa a abi bunuhati.​—Luku Tjabukama 28:2.

Tuutuu bunuhati da wan u dee fasi di di santa jeje u Gadu ta mbei sëmbë ko abi (Gal. 5:22, 23). Di soni aki ta lei taa u abi di santa jeje u Gadu fanöudu ee u kë lei taa u abi bunuhati tuutuu. Te u ta lei taa u abi bunuhati, nöö hën da u ta djeesi Jehovah ku Jesosi. Söseei u di u da bakama u Jesosi, mbei u ta booko u hedi ku wotowan. U ta lei taa u abi bunuhati, u di u lobi Jehovah ku woto sëmbë. A sö wan fasi di bunuhati di u abi o ta kumutu a u hati, nöö Gadu o ta wai ku u.

Kandë an ta taanga da u fuu lei taa u abi bunuhati u dee sëmbë dee ta du bunu da u, söseei da dee sëmbë dee u sabi (2 Sam. 2:6). Wan fasi fa u sa du di soni aki, da te u ta da de tangi (Kol. 3:15). Ma unfa a dë ee u ta fii kuma wan sëmbë an bunu tjika fuu lei taa u abi bunuhati dëën?

Pakisei di soni aki luku: Jehovah da di sëmbë di ta möön lei taa a abi bunuhati u wotowan, nöö di Wöutu fëën ta lei u unfa a dë fanöudu tjika fuu lei taa u abi bunuhati u wotowan. Di „bunuhati” di u ta taki fëën aki dë u feni sömëni pasi a di Giiki pisi u Bëibel. Unfa Gadu ta lei u taa a abi bunuhati fuu?

Pakisei dee milionmilion sëmbë di Jehovah lei taa a abi bunuhati da, u di a ta da de dee soni di de abi fanöudu u de sa libi (Mat. 5:45). Jehovah bi lei taa a abi bunuhati fuu, hii fa wa bi pena sabi ën jeti (Ef. 2:4, 5, 8). A da u di möön dii soni di a bi abi, hën da di wan kodo Womi Mii fëën. Apösutu Paulosu bi taki taa u di Jehovah abi „sö wan gaan bunuhati” da u, mbei a seeka di lusupaima da u (Ef. 1:7). Boiti di dë, hii fa so juu u ta du soni di ta hati Jehovah, tökuseei a ta lei u soni go dou, nöö a ta tjubi u tu. Dee soni dee a ta piki u dë kuma „tjuba di ta kai jëlëjëlë sö” (Deto. 32:2). Nöiti woo sa pakëën u di bunuhati fëën. Nöö u sabi taa ee Jehovah an bi abi bunuhati fuu, nöö wa bi o feni na wan bunu a di ten di ta ko.​—Luku 1 Petuisi 1:13.

Di bunuhati u Jehovah ta hai u ko nëën, söseei a ta da u taanga fuu hopo du soni. Ka fuu ta lei taa u abi bunuhati u wantu sëmbë nöö, nöö u musu mbei möiti u djeesi Jehovah, nöö u ta libi bunu ku wotowan hiniwan daka (1 Tes. 5:15). Te u ta du di soni aki, nöö woo dë kuma wan faja ka sëmbë nango këndë faja te kamian kötö. Woo sa ta da sömëni sëmbë kötöhati. Dee sëmbë aki sa dë dee famii fuu, dee baaa ku dee sisa fuu, dee sëmbë dee u ku de ta wooko a di wan kamian, dee mii dee u ku de nango a di wan siköö, ku dee sëmbë dee ta libi a di pisiwata fuu.

Pakisei dee famii fii ku dee baaa ku dee sisa u di kemeente dee o feni bunu, u di i ta fan suti ku de, nasö u di i ta du soni u lei taa i abi bunuhati u de. Kandë wan sëmbë u di kemeente abi wan sëmbë fanöudu u heepi ën seeka wosu, nasö u heepi ën seeka djai. Nasö kandë a abi wan sëmbë fanöudu u heepi ën bai soni. Boiti di dë, te i dë a di peleikiwooko nöö i si taa wan sëmbë abi heepi fanöudu, nöö i sa dëën wan maun.

Boo djeesi Jehovah u di woo ta fan a wan suti fasi ku wotowan, söseei u di woo ta du soni u lei taa u abi bunuhati u de.