1. Un pei soni sa mbei u ta fëëë?

 BOO luku andi bi miti so u dee dinima u Jehovah. Wan baaa de kai Nestor ku hën mujëë María bi kë go heepi a wan kamian ka möön peleikima dë fanöudu. * U di de bi kë du di soni aki, mbei de bi musu tooka soni a di fasi fa de bi ta puu möni. Ma de bi ta fëëë taa de an bi o dë waiwai möön ee de bi musu du di soni dë. Di wan womi de kai Biniam bi toon wan Jehovah Kotoigi a wan köndë ka de ta du ku dee baaa ku dee sisa fuu, hën a ko fusutan taa te i dë dinima u Jehovah nöö sëmbë sa du ku i. Di soni aki bi mbei a fëëë. Ma a bi ta möön fëëë dee famii fëën, u di an bi sabi unfa de bi o du te de bi ko sabi taa a dë a wan woto keiki. U di Sisa Valérie bi jei taa a abi wan pei kankël di sa kii ën, mbei a bi ta suku wan data di bi o sa opalasi ën söndö fa tei buuu. An dë u taki taa di sisa aki bi ta fëëë taa a sa lasi hën libi.

2. Faandi mbei u musu mbei möiti fu wa ta fëëë möön?

² Dee lö soni aki bi mbei i fëëë kaa u? Wë sö a bi dë da sömëni fuu. Ee wa saandi u musu du te u ta fëëë, nöö a sa pasa taa u du soni di sa mbei taa u ku Jehovah an dë mati möön. Nöö di soni aki Saatan kë. Te a si taa u ta fëëë, nöö a sa mbei u du soni di ta mbei wa ta hoi useei a dee wëti u Jehovah möön. Wan u dee wëti aki, da di paaja di u musu ta paaja di bunu buka (Ako. 12:17). Saatan abi taku hati, an abi fii da na wan sëmbë, söseei a abi makiti. Ma tökuseei u sa tjubi useei fu an feni u kisi. Wë nöö unfa u sa du di soni aki?

3. Andi o heepi u fu wa ta fëëë möön?

 ³ Te u dë seiki taa Jehovah lobi u, söseei taa a o heepi u hii juu, nöö wa o fëëë Saatan (Ps. 118:6). Sömëni soni bi miti di sikifima u Psalöm 118. A bi abi sömëni felantima, nöö so u de bi dë heihei sëmbë (vers 9, 10). So juu soni bi ta taanga dëën seei (vers 13). Jehovah bi sitaafu ën tu (vers 18). Ma tökuseei di psalöm sikifima aki bi kanda taa: „Ma o fëëë.” Ma andi bi mbei a bi kanda di soni aki? Hii fa a bi sabi taa Jehovah bi sitaafu ën, tökuseei a bi sabi taa Jehovah lobi ën gaanfa seei. Di Psalöm sikifima bi dë seiki taa aan toobi andi bi o miti ën, di lobihati Gadu fëën bi o dë kabakaba u heepi ën hiniwan juu.​—Ps. 118:29.

4. Unfa di dë di u dë seiki taa Gadu lobi u, o mbei taa wa o ta fëëë möön?

⁴ U musu biibi taa Jehovah lobi u. Te u dë seiki taa a lobi u, nöö di soni dë o heepi u fu wa ta fëëë dee dii soni aki möön. Dee dii soni aki da: (1) te u ta fëëë taa wa o sa sölugu dee sëmbë fuu wosudendu, (2) te u ta fëëë libisëmbë, ku (3) te u ta fëëë taa u sa lasi u libi. Dee baaa ku dee sisa dee u taki soni u de a dee palaklafu a fesi, an bi ta fëëë möön, u di de bi dë seiki taa Gadu lobi de.

5. Andi sa mbei wan hedima u wosudendu ta booko hën hedi gaanfa seei? (Luku di peentje u di kafiti.)

⁵ Wan hedima u wosudendu, di dë wan Keesitu sëmbë, ta si di sölugu di a musu sölugu dee sëmbë fëën wosudendu kuma wan gaan fanöudu soni (1 Tim. 5:8). Ee i da wan hedima u wosudendu, nöö a sa dë sö taa di di kolona siki paaja a goonliba, nöö kandë i bi ta booko i hedi taa i bi o lasi di wooko fii. Söseei a kan taa i bi ta booko i hedi taa ja bi o sa feni soni u njan da dee sëmbë fii möön, nasö taa ja bi o sa feni wan kamian u de libi. A kan taa i bi ta booko i hedi tu taa ee i bi lasi di wooko fii, nöö ja bi o sa feni wan wotowan möön. Ee nasö leti kuma Nestor ku María di u bi taki soni u de a fesi kaa, kandë iseei ta si kuma ja o sa libi ku möön biti möni. Wë u di so sëmbë bi ta fii sö, mbei Saatan feni di okasi u tapa de u de an dini Jehovah möön.

6. Andi Saatan kë fuu biibi?

⁶ Saatan kë fuu biibi taa Jehovah an ta booko hën hedi ku u, söseei taa an o heepi u fuu sölugu dee sëmbë fuu. Te u kaba fëën, nöö u sa si kuma u musu du hii soni di u sa du, fu wa lasi di wooko fuu, aluwasi ee de taki taa u musu du wan soni di sa mbei taa u ku Jehovah an dë mati möön.

7. Fu un pei soni Jesosi ta mbei u dë seiki?

⁷ Jesosi di sabi hën Tata bunu möön hiniwan sëmbë, ta piki u taa u sa dë seiki taa di Gadu fuu ’sabi gaanduwe kaa andi ku andi u abi fanöudu’ (Mat. 6:8). Jesosi sabi taa Jehovah dë kabakaba u heepi u ku dee soni dee u abi fanöudu. U da sëmbë u di wosudendu u Gadu, u di u da Keesitu sëmbë. Jehovah hën da di hedima u di wosudendu aki, nöö fëën mbei u sa dë seiki taa a o du di seei soni di a ta piki dee hedima u wosudendu u de du, di sikifi a 1 Timoteo 5:8.

8. (a) Andi o heepi u fu wa fëëë möön taa wa o sa sölugu dee sëmbë u di wosudendu fuu? (Mateosi 6:31-33) (b) Unfa u sa djeesi di baaa ku di mujëë fëën di u ta si a di peentje, di ta tja soni u njan ko da wan sisa?

⁸ Te u dë seiki taa Jehovah lobi u, söseei taa a lobi di wosudendu fuu tu, nöö wa o booko u hedi taa wa o feni dee soni dee u abi fanöudu. (Lesi Mateosi 6:31-33.) Jehovah kë da u dee soni dee u abi fanöudu, u di a lobi sëmbë, söseei u di a lo’ u da sëmbë soni! Di a mbei di goonliba an da u dee soni dee u  abi fanöudu u dë a libi nöö a kaba, ma a da u möön leki dee soni dë seei. A wan lobihati fasi a mbei te a hia soni buta a goonliba da u, di sa mbei u ta dë waiwai (Ken. 2:9). Aluwasi ee wan daka u feni dee soni dee u abi fanöudu u pasa di daka dë wanwan nöö, tökuseei a bunu fuu hoi a pakisei taa Jehovah hën bi da u dee soni dee u bi abi fanöudu u pasa di daka dë. An fëëkëtë u sölugu u (Mat. 6:11). A bunu fuu hoi a pakisei taa dee soni dee Jehovah o da u bunu gaanfa möön dee soni dee u disa sö taa u sa dini ën. Söseei a o da u teego libi a di ten di ta ko. Di soni aki Nestor ku María bi ko fusutan.​—Jes. 65:21, 22.

9. Andi u sa lei u di woto u Baaa Nestor ku Sisa María?

⁹ Baaa Nestor ku Sisa María bi abi wan waiti wosu, söseei de bi abi bumbuu wooko a di köndë Kolombia. De bi taki taa: „U bi pakisei unfa u bi sa tooka soni a di libi fuu sö taa u bi sa du möön hia soni a di diniwooko. Ma u bi ta fëëë taa wa bi o ta dë waiwai möön, u di u bi o abi möön biti möni.” Andi bi heepi de u de an fëëë möön? De bi kai pakisei a dee sömëni fasi fa Jehovah bi lei de taa a lobi de. U di de bi dë seiki taa a bi o sölugu de, mbei de bi disa di bumbuu wooko u de ka de bi ta paka de bunu. De sei di wosu u de, hën de foloisi go libi a wan woto kamian u di köndë, ka möön hia peleikima bi dë fanöudu. Unfa de bi ta fii baka di de du di soni aki? Nestor taki taa: „Useei ko si taa di soni di sikifi a Mateosi 6:33 da wan tuutuu soni. Nöiti u bi ta makei dee soni dee u bi abi fanöudu. Nöö nöunöu u abi wan möön suti libi.”

10. Faandi mbei libisëmbë ta fëëë wotowan?

¹⁰ Sensi di Adam ku Eva hopo fia ku Gadu, hën libisëmbë ta du hogi ku wotowan (Peleik. 8:9). Sëmbë ta du hogi ku wotowan u di de abi taki a de liba, hogiduma ta du hogi ku wotowan, miii ta du hogihogi ku wotowan a siköö ta kosi dee wotowan u de, ta paamusi de taa de o du hogi ku de, söseei so sëmbë ta libi hogi ku dee famii u de. Fëën mbei an dë wan foombo soni taa libisëmbë ta fëëë woto libisëmbë! Unfa Saatan ta wooko ku di fëëë di u ta fëëë libisëmbë?

11-12. Unfa Saatan ta wooko ku di fëëë di u ta fëëë libisëmbë?

¹¹ Saatan ta mbei möiti fuu ta fëëë libisëmbë sö tee taa u tapa u peleiki, nasö taa wa  ta du dee woto soni dee Jehovah ta piki u fuu du möön. U di dee tiima dë a Saatan maun, mbei de ta du ku u, söseei de ta tapa di wooko fuu (Luk. 21:12; Ako. 2:10). Dee sëmbë dee dë a di tii u Saatan basu ta mindi soni da dee Jehovah Kotoigi. Nöö dee sëmbë dee ta biibi dee soni dë sa mbei u fa, kandë de sa fon u seei (Mat. 10:36). A musu foondo u taa Saatan ta du dee soni aki ku u ö? Wë nönö. Guwentiguwenti soni fëën di a bi naa du kaa sënsi di pisiten u dee fesiten Keesitu sëmbë!​—Tjab. 5:27, 28, 40.

¹² Ma di fëëë di u ta fëëë taa dee tiima o du ku u an dë di wan kodo soni di Saatan ta wooko ku ën. So sëmbë ta fëëë andi dee famii u de o taki, gaanfa möön di fon di woto sëmbë sa fon de ee de toon Kotoigi. U di de lobi dee famii u de gaanfa seei, mbei de kë u de ko sabi Jehovah, söseei u de ko lobi ën tu. A ta hati de te de ta jei fa dee famii u de ta taki hogi u di Tuutuu Gadu ku dee dinima fëën. Ma a pasa kaa taa so u dee famii u dee lö sëmbë aki ko a di tuutuu lei bakaten. Ma boo taki taa dee famii fuu an kë nama ku u möön, u di u kë toon wan Kotoigi. Andi woo du?

13. Unfa di dë di u dë seiki taa Jehovah lobi u, o heepi u te dee famii fuu an kë nama ku u möön? (Psalöm 27:10)

¹³ U sa feni taanga a di soni di sikifi a Psalöm 27:10. (Lesi ën.) Te u ta pakisei unfa Jehovah lobi u tjika, nöö wa o ta booko u hedi te dee famii fuu an kë nama ku u möön. Söseei u sabi taa a o mbei u feni gaan bunu u di u ta hoi dou. Jehovah o da u hii dee soni dee u abi fanöudu fuu dë a libi, a o heepi u fuu dë waiwai, söseei a o heepi u fuu ku ën dë mati go dou. Di soni aki Biniam di u bi taki soni fëën kaa, bi ko si.

14. Andi u ta lei u di woto u Biniam?

¹⁴ Biniam bi toon wan Jehovah Kotoigi, hii fa a bi sabi taa di tii u di köndë ka a ta libi, ta du ku dee Jehovah Kotoigi seei. Pakisei unfa di sabi di Biniam bi sabi taa Jehovah lobi ën, bi heepi ën fu an fëëë libisëmbë möön. Biniam bi taki taa: „Di du di de bi ta du ku dee Kotoigi bi hogi möön fa mi bi mëni. Ma mi bi ta möön fëëë di du di dee famii u mi bi o du ku mi möön di du di di tii u di köndë ta du ku dee Kotoigi. Mi bi ta si kuma mi tata an bi o wai ku mi te mi bi ko toon wan Jehovah Kotoigi, söseei mi bi ta si kuma dee famii u mi bi o taki taa mi kaba a sösö.” Tökuseei  Biniam bi dë seiki taa hii juu Jehovah ta booko hën hedi ku dee sëmbë dee a lobi. Biniam taki taa: „Mi bi ta kai pakisei a di fasi fa Jehovah bi heepi wotowan u de hoi dou te de bi abi möni fuka, te sëmbë bi ta kuutu de a fesi, söseei te sëmbë bi bondji ko a wan u ko du ku de. Mi bi sabi taa mi bi o feni gaan bunu ee mi bi hoi miseei a Jehovah. Sömëni pasi siköutu bi kisi mi, söseei de bi fon mi, ma a dee ten dë mi bi ta si taa Jehovah ta heepi u ee u ta hoi useei nëën.” Jehovah bi ko dë kuma wan tuutuu Tata da Biniam, söseei dee dinima u Jehovah bi lei taa de dë tuutuu famii fëën.

15. Faandi mbei u ta fëëë u dëdë?

¹⁵ Di Bëibel ta taki taa dëdë da wan felantima (1 Kol. 15:25, 26). Te u pakisei di dëdë di sëmbë ta dëdë, nöö u sa fëëë seei, möönmöön te u, nasö wan sëmbë di u lobi suwaki gaanfa seei. Faandi mbei u ta fëëë u dëdë? U di Jehovah mbei u ku di fii u libi u teego (Peleik. 3:11). Ma di fëëë di u ta fëëë u dëdë sa tjubi di libi fuu. Boo taa a sa da u taanga fuu ta njan soni di bunu da di gösöntu fuu, fuu ta sport, fuu go suku heepi a data te a dë fanöudu, söseei fuu wa ta du soni di sa mbei u lasi u libi.

16. Unfa Saatan ta wooko ku di fëëë di u ta fëëë u dëdë?

¹⁶ Saatan sabi taa u lobi di libi fuu. A ta djula taa wan sëmbë o disa hii soni di a abi a baka faa sa dë a libi, te kisi di dë di hën ku Jehovah dë mati (Jöpu 2:4, 5). Ma Saatan ta mindi soni da u! Ma u di Saatan hën da di sëmbë di „tja dëdë ko”, mbei a ta wooko ku di fëëë di u ta fëëë u dëdë, sö taa u sa go disa Jehovah (Heb. 2:14, 15). Soo juu dee sëmbë dee dë a di tii u Saatan basu, ta bë wojo da u taa de o kii u ee wa tapa u dini Jehovah. Nasö so juu Saatan sa wooko ku di heepi di u ta suku a data, u mbei u pasa Gadu wëti. Dee data nasö dee famii fuu dee an ta dini Jehovah, sa duwengi u fuu tei buuu, hii fa a dë wan soni di an ta kai ku dee wëti u Gadu. Nasö wan sëmbë sa da u taanga fuu suku woto pei heepi di an ta kai ku dee mama wëti u Bëibel.

17. Faandi mbei an dë fanöudu fuu ta fëëë u lasi u libi, te u luku Loomë 8:37-39?

¹⁷ Hii fa wa kë dëdë, tökuseei u sabi taa Jehovah o lobi u go dou aluwasi ee u lasi u libi (Lesi Loomë 8:37-39.) Te wan Mati u Jehovah lasi libi, nöö a ta pakisei soni fëën go dou kuma a dë a libi jeti (Luk. 20:37, 38). A ta wakiti u tjëën ko a libi baka (Jöpu 14:15). Jehovah paka wan gaan paima sö taa u „sa feni di libi u teego” (Joh. 3:16). U sabi taa Jehovah lobi u gaangfa seei, söseei taa a ta booko hën hedi ku u. Fëën mbei ka fuu go disa Jehovah te u dë ku suwaki nasö te u dë a dëdë buka, nöö u ta hakisi ën faa da u kötöhati, faa da u köni, söseei faa da u taanga. Di soni aki Sisa Valérie ku hën manu bi du.​—Ps. 41:3.

18. Andi i sa lei u di woto u Sisa Valérie?

¹⁸ Di Sisa Valérie bi abi 35 jaa, hën data bi ko si taa a abi wan hogi pei kankël. Luku unfa lobi bi heepi di sisa aki fu an ta fëëë. A taki taa: „Di mi bi jei taa mi bi abi kankël, nöö hati u mi ku mi manu bi latja te na soni. Mi bi musu du wan gaan opalasi sö taa ma lasi libi. Mi bi suku heepi a peipei data, ma de an bi kë du di opalasi söndö buuu. Mi bi ta fëëë seei, ma u di mi bi kë piki Gadu buka, mbei ma bi kë tei buuu. Hii mi libi longi Jehovah lei mi fa a lobi mi tjika. Nöö nöunöu mi abi di okasi u lei ën taa mi lobi ën tu. Hiniwan juu te de bi ta booko buka da mi taa  soni an nango bunu, nöö mi bi ta möön dë kabakaba u du soni u mbei Jehovah wai ku mi, ka u mi mbei Saatan wai. Te u kaba fëën, hii soni bi waka bunu di de du di opalasi, hii fa ma bi tei buuu. Jehovah ta da u hii dee soni dee u abi fanöudu, hii fa mi dë ku suwaki jeti. A di komakandi di u bi hoi ufö mi bi jei taa mi abi di siki aki, u bi taki u di woto ’No frede te problema e miti yu na ini a ten disi’. * Di woto aki bi dë wan gaan heepi da u seei. U bi lesi di woto aki sömëni pasi. Dee lö woto aki, ku dee soni kuma di pleikiwooko, ku dee komakandi bi heepi mi ku mi manu fu wa booko u hedi te poi, söseei fuu du soni a wan bunu fasi.”

19. Andi o pasa abiti möön?

¹⁹ A hii së u goonliba Jehovah ta heepi baaa ku sisa u pasa dee tesi dee bi ta miti de, söseei a ta heepi de u de finga futu da Didibi (1 Pet. 5:8, 9). A sa heepi i tu. Abiti möön Jehovah o manda Jesosi ku dee sëmbë dee o tii makandi ku ën, u de „poi dee wooko u di Didibi” (1 Joh. 3:8). Nöö baka di dë, dee dinima u Gadu a goonliba aki an ’o fëëë na wan sëmbë, söseei de an o ta dë pantapanta’ (Jes. 54:14; Mik. 4:4). Ma a di mindi aki, woo abi fu mbei taanga möiti fu wa ta fëëë möön.

20. Andi o heepi u fu wa ta fëëë möön?

²⁰ U musu mbei möiti go dou fuu ta biibi taa Jehovah lobi u, söseei taa a ta tjubi dee dinima fëën. Di soni di o heepi u fuu du di soni aki, hën da te u ta kai pakisei a di fasi fa Jehovah bi tjubi dee dinima fëën a di ten di pasa, söseei te u ta konda dee soni aki da wotowan. Söseei u sa toona mëni unfa a bi heepi u di soni bi taanga da u. Jehovah sa heepi u fu wa ta fëëë möön!​—Ps. 34:4.