SÖMËNI sëmbë sabi di woto u Jesosi di de pekëën a wan posu a tu hogiduma mindi (Mat. 27:35-38). Ma so sëmbë ta biibi taa di Bëibel an sa taki finifini ee de bi seeka di dëdë sinkii u Jesosi buta a wan geebi.​—Maik. 15:42-46.

Dee sëmbë dee ta kuutu soni u dee woto u Jesosi, ta taki taa de an ta si kuma sëmbë bi ta da pasi u de bei wan sëmbë a wan fasi di fiti, ee de bi dëën dëdë sitaafu. Ka u di dë, de ta biibi taa sëmbë bi ta du soni a wan woto fasi da dee sëmbë dee bi kisi dëdë sitaafu u di de bi dë hogiduma. Wan womi de kai Ariel Sabar di ta sikifi soni buta a buku, bi konda faandi mbei de ta pakisei sö. A bi taki taa: „Di peka di de bi ta peka sëmbë a wan posu, bi dë wan fasi fa de bi ta sitaafu dee gaan hogiduma. Nöö fëën mbei so sabima ta taki taa a bi o dë wan sösö soni seei u pakisei taa dee Loomë sëmbë bi o bei dee lö sëmbë dë a wan fasi di fiti.” U di dee Loomë sëmbë bi ta kë sitaafu dee hogiduma a wan hogihati fasi seei, mbei de bi ta disa di dëdë sinkii u de a dee posu be mbeti njan de. Nöö dee pisi u de dee bi fika, de bi ta tuwë de go a wan baaku ka de bi tuwë woto pisi u woto hogiduma go kaa.

Ma dee sëmbë dee ta puu awoo soni a goonbasu u öndösuku de, bi ko fusutan wan woto soni. De bi feni pisi u so Dju di bi kisi dëdë sitaafu, nöö a di jaa 1968, de bi feni wanlö dëdë sëmbë bonu u wan womi di bi kisi dëdë sitaafu a di ten di Jesosi bi dë a goonliba. De bi feni de a wan geebi u wan Dju famii zuntu ku di foto Jelusalen. Dee dëdë sëmbë bonu aki bi dë a wan kesi dendu. Wan bakafutu bonu bi dë a di kesi aki dendu tu. A bi dë pekapeka a wan udu pisi ku wan peegu di bi langa söwan 11.5 centimeter. Sabar taki taa: „Wan womi de bi ta kai Yehochanan, hën bi abi di bakafutu bonu dë. Nöö di soni aki mbei taa u sa biibi di soni di sikifi a Bëibel taa de bi bei Jesosi a wan fasi di fiti. Di bakafutu bonu u Yehochanan, ta lei u taa dee Loomë sëmbë bi ta da dee Dju pasi u de bei wan sëmbë u de di de bi peka a wan posu, a di fasi fa dee Dju bi ta bei sëmbë.”

A kan taa sëmbë ta pakisei peipei soni u di fasi fa Jesosi bi dëdë a di posu, te u luku di soni di dee öndösukuma ko fusutan baka di de feni di bakafutu bonu u Yehochanan. Ma di soni di dë gbelingbelin u fusutan, hën da de bi bei so u dee hogiduma di bi kisi dëdë sitaafu a wan fasi di fiti. De an bi tuwë de go a wan baaku nöö a kaba. Wë an dë u taki taa u sa biibi di soni di di Bëibel ta taki taa de buta di dëdë sinkii u Jesosi a wan geebi. Söseei dee soni dee sëmbë bi öndösuku, ta lei taa di soni aki dë sö tuutuu.

Di möön fanöudu soni hën da Jehovah bi taki a fesi taa de bi o bei Jesosi a di geebi u wan guduma, nöö na wan sëmbë sa mbei taa dee soni di Gadu taki an pasa.​—Jes. 53:9; 55:11.