Ee u kë u Jehovah ta wai ku u, nöö u musu abi biibi. Di Bëibel ta taki taa „na hii sëmbë ta biibi Gadu” (2 Tes. 3:2). Di apösutu Paulosu bi taki di soni dë, nöö a bi ta taki soni u dee „hogi sëmbë” dee bi ta du ku ën. Ma tökuseei di soni di a bi taki dë ta fiti sömëni sëmbë u di ten aki. Hii fa sömëni soni dë di ta lei taa Gadu hën mbei hii soni, tökuseei sömëni sëmbë an ta kë biibi taa Gadu dë (Lom. 1:20). So sëmbë ta taki taa de ta biibi taa Gadu dë. Ma di soni dë wanwan an tjika u mbei Gadu wai ku de.

U musu ta biibi tuutuu taa Jehovah dë, söseei u musu ta biibi taa „a ta paka” dee sëmbë dee ta suku ën ku hii de hati (Heb. 11:6). Ee u kë ko abi di biibi di ta kai ku Gadu, nöö u musu hakisi ën be a da u di santa jeje fëën. Biga biibi da wan u dee fasi di di santa jeje u Gadu ta mbei sëmbë ko abi (Luk. 11:9, 10, 13). Wan woto fasi fa Jehovah sa da u di santa jeje fëën, da te u ta lesi di wöutu fëën. Biga ku di santa jeje fëën a mbei sëmbë sikifi di Bëibel. Te u ta lesi ën, nöö u musu ta kai pakisei a dee soni dee u ta lesi, söseei u musu ta mbei möiti u du dee soni dee u ta lei. Te u ta du sö, nöö di jeje u Jehovah o abi kaakiti a di libi fuu. A o heepi u fuu ko abi di biibi di ta kai ku ën.