1. Andi ta heepi dee dinima u Jehovah u de ta dini ën go dou, hii fa de ta abi bookohedi?

 DI Bëibel ta taki taa di ten di u ta libi aki da „wan tumisi hogi ten” (2 Tim. 3:1). Dee dinima u Jehovah ta abi dee bookohedi dee sëmbë ta abi a di hogi goonliba u Saatan aki. Ma sëmbë ta du ku de tu, u di de ta dini Jehovah. Wë, andi ta heepi u fuu ta dini Jehovah go dou hii fa u abi dee bookohedi aki? Wan u dee soni dee ta heepi u, hën da u di u ko sabi taa Jehovah da „di libilibi Gadu”.​—Jel. 10:10; 2 Tim. 1:12.

2. Faandi mbei u sa taki taa Jehovah da di libilibi Gadu?

² Jehovah da wan tuutuu Sëmbë di ta suku fasi u heepi u te u dë a fuka (2 Klon. 16:9; Ps. 23:4). Te u ta hoi a pakisei taa hën da di libilibi Gadu, nöö di soni dë o heepi u fuu sa hoi dou te u dë a fuka. Boo luku fa di soni dë bi heepi Könu Dafiti.

3. Andi Dafiti bi kë taki di a bi taki taa „Jehovah da wan libilibi Gadu”?

³ Dafiti bi sabi Jehovah, nöö a bi ta futoou ën tu. Di Könu Saulosu ku woto sëmbë bi kë kii ën, hën a bi begi Jehovah faa heepi ën (Ps. 18:6). Baka di Jehovah bi piki dee begi u Dafiti, söseei di a bi heepi ën, hën a bi taki taa: „Jehovah da wan libilibi Gadu!” (Ps. 18:46) Andi Dafiti bi kë taki ku di soni dë? Wan buku ta taki taa Dafiti bi ko dë möön seiki taa Jehovah „da wan libilibi gadu di ta heepi  dee dinima fëën hii juu”. Awa, Dafiti bi ko fusutan taa di Gadu fëën bi ta si dee soni dee bi ta miti ën, nöö a bi dë kabakaba u heepi ën.​—Ps. 18:28, 29, 49.

4. Unfa u ta feni wini te u ta fusutan taa Jehovah da di libilibi Gadu?

⁴ Te u dë seiki taa Jehovah da di libilibi Gadu, nöö di soni dë sa heepi u fuu sa ta dini ën fajafaja go dou. Woo feni taanga fuu sa hoi dou te tesi ta miti u, söseei woo ta wooko taanga da Jehovah go dou. Boiti di dë, woo kë dë mati u Jehovah u nöömö.

DI LIBILIBI GADU O DA I KAAKITI

5. Andi sa da u taanga te u dë ku fuka? (Filipi 4:13)

⁵ Ee u ta hoi a pakisei taa Jehovah da wan libilibi Gadu, söseei taa a ta dë kabakaba u heepi u, nöö woo sa hoi dou te tesi ta miti u, aluwasi ee di tesi bigi nasö a piki. Jehovah sa heepi u ku hiniwan tesi, u di na wan fuka hebi dëën poi. A abi hii makiti, nöö a sa da u kaakiti fuu sa hoi dou. (Lesi Filipi 4:13.) Fëën mbei wa musu lasi hati te u dë ku fuka. Te u ta si fa Jehovah ta heepi u a pikipiki soni, nöö di soni dë ta mbei u dë seiki taa a o heepi u te u dë ku gaan fuka tu.

6. Andi bi pasa ku Dafiti di a bi njönku, di bi heepi ën faa ko ta futoou Jehovah möön gaanfa?

⁶ Boo taki u tu soni di bi pasa ku Dafiti, di bi heepi ën faa ko ta futoou Jehovah möön gaanfa. Di a bi dë wan njönku sikapuma, hën wan lëun ku wan mbeti de kai beer bi ko kisi wan u dee sikapu fëën tata ta tja go. Hii dee tu pasi dë tuu Dafiti bi lei taa a abi degihati, di a kule a dee mbeti dë baka go feti tei di sikapu. Ma tökuseei Dafiti an bi ta taki taa hën wanwan hën bi du dee soni dë. A bi sabi taa Jehovah hën bi dëën di kaakiti faa du de (1 Sam. 17:34-37). Nöiti Dafiti bi fëëkëtë dee soni dë. Te a bi ta kai pakisei a de, nöö a bi ta ko dë möön seiki taa di libilibi Gadu bi o dëën taanga a di ten di ta ko.

7. Na un soni Dafiti bi ta buta pakisei, nöö unfa di soni dë bi heepi ën faa bi sa feti ku Goliati?

⁷ Bakaten, di Dafiti bi njönku jeti, hën a bi go a di kampu u dee sodati u Isaëli. A bi ko si taa dee sodati bi ta fëëë wan gaan djanga Filisiti womi de kai Goliati. Di womi dë bi ’ta kai dee Isaëli sëmbë a döö’ (1 Sam. 17:10, 11). De bi ta fëëë u di de bi ta luku fa Goliati bi dë, söseei u di de bi ta haika dee soni dee a bi ta taki (1 Sam. 17:24, 25). Ma Dafiti bi buta pakisei a woto soni. A bi sabi taa fa Goliati bi ta mbei dee Isaëli sëmbë fa dë, nöö di libilibi Gadu hën wë a bi ta mbei fa dë (1 Sam. 17:26). Dafiti bi ta hoi Jehovah a pakisei. A bi sabi taa di Gadu di bi heepi ën a di ten di a bi dë wan sikapuma, bi o heepi ën baka. Fëën mbei a bi go feti ku Goliati, hën a wini!​—1 Sam. 17:45-51.

8. Andi sa heepi u fuu dë seiki taa Jehovah o heepi u te tesi ta miti u? (Luku di peentje tu.)

⁸ Te wa ta fëëkëtë taa di libilibi Gadu dë kabakaba u heepi u, nöö woo sa hoi dou te tesi ta miti u tu (Ps. 118:6). U sa ko ta futoou Jehovah möön gaanfa, te u ta buta pakisei a di fasi fa a bi heepi u a di ten di pasa. I sa lesi woto u sëmbë a Bëibel, di ta heepi i fii buta pakisei a di fasi fa Jehovah bi ta heepi dee dinima fëën (Jes. 37:17, 33-37). Boiti di dë, i sa go luku a jw.org, fa Jehovah bi heepi dee baaa ku dee sisa fuu u di ten aki. I sa pakisei fa Jehovah bi heepi i tu. Na booko i hedi ee Jehovah an bi du wan gaan foombo soni da i kuma Dafiti. Faandi mbei? Wë di möön fanöudu soni, hën da i abi Jehovah a i libi! A heepi i fii ku ën ko dë mati (Joh. 6:44). U di Jehovah ta heepi i, mbei i  dë a di tuutuu lei jeti. I sa hakisi ën faa heepi i fii mëni fa a bi piki dee begi fii, fa a bi da i dee soni dee i bi abi fanöudu a di soifi ten, söseei fa a bi heepi i di i bi dë ku fuka. Te i ta hoi dee soni dë a pakisei, nöö joo ko dë möön seiki taa Jehovah o ta heepi i go dou.

9. Andi u musu ta hoi a pakisei te u abi bookohedi?

⁹ Te u ta fusutan taa Jehovah da wan tuutuu sëmbë, nöö di soni dë o heepi u fuu si dee bookohedi fuu kumafa u musu si de. Te u abi bookohedi, nöö u musu ta buta pakisei a di möön fanöudu soni di u musu du. Saatan bi taki taa te tesi ta miti u, nöö woo bia baka da Jehovah. Fëën mbei di fasi fa u ta du soni te u abi bookohedi, sa mbei Jehovah tjali, nasö a sa mbei a fii bunu. (Jöpu 1:10, 11; lesi Nöngö 27:11.) Ma te wa bia baka da Jehovah te u abi bookohedi, nöö u ta lei taa u lobi ën, söseei taa Saatan da wan mindisonima. A dë sö taa dee tiima u di köndë ka i ta dë ta du ku i ö? I abi bookohedi a di së u möni soni ö? Sëmbë an ta haika i te i ta peleiki ö? Naa kandë i abi woto bookohedi? Wë ee a dë sö, nöö hoi a pakisei taa dee bookohedi dë ta da i pasi fii mbei Jehovah hati dë ku piizii. Na fëëkëtë tu taa Jehovah an o disa wan soni miti i di ja sa tja (1 Kol. 10:13). A o mbei wan baaku da i nöömö fii pasa be ja kai.

DI LIBILIBI GADU O PAKA I

10. Andi di libilibi Gadu o du da dee dinima fëën?

¹⁰ Jehovah hën ta paka dee sëmbë dee ta dini ën (Heb. 11:6). A ta da u bööböö libi, söseei a ta mbei u dë waiwai nöunöu kaa. Ma a di ten di ta ko, a o da u di libi u teego. U sa dë seiki taa Jehovah kë paka u, söseei taa a abi di makiti u du ën. Di soni dë ta da u taanga fuu ta wooko taanga dëën go dou, kumafa dee dinima fëën u di ten di pasa bi ta du ën. Di soni dë Timoteo bi ta du.​—Heb. 6:10-12.

11. Faandi mbei Timoteo bi ta wooko taanga a di kemeente? (1 Timoteo 4:10)

 ¹¹ Lesi 1 Timoteo 4:10. Timoteo bi ta biibi di libilibi Gadu. Fëën mbei a bi ta wooko taanga da Jehovah ku woto sëmbë. Unfa sö? Apösutu Paulosu bi dëën taanga faa mbei möiti faa ko toon wan möön bunu peleikima, ku wan möön bunu takima. A bi piki Timoteo tu taa a musu dë wan sëmbë di gaanwan ku pikiwan tuu sa waka nëën baka. So u dee wooko de a bi musu du bi taanga u du. A bi musu ta bë wojo da sëmbë te a bi dë fanöudu. Ma a bi musu ta du ën ku lobi (1 Tim. 4:11-16; 2 Tim. 4:1-5). Hii fa sö juu sëmbë an bi o ta si dee soni dee Timoteo bi ta du, söseei hii fa so juu de an bi o ta tei de u bigi, tökuseei Timoteo bi sa dë seiki taa Jehovah bi o pakëën u dee soni dë.​—Lom. 2:6, 7.

12. Faandi mbei dee gaanwomi ta wooko taanga a di kemeente? (Luku di peentje tu.)

¹² Dee gaanwomi u kemeente u di ten aki seei sa dë seiki taa Jehovah ta tei dee soni dee de ta du u bigi. De ta luku dee sikapu u Gadu, de ta lei sëmbë soni, söseei ta du di peleikiwooko tu. Ma sömëni u de ta heepi mbei Könuköndë zali, nasö de ta heepi te wan hogi pasa a wan kamian. So u de ta heepi a di Hatiwosu Komite, nasö de nango ta luku wotowan a hatiwosu. Dee gaanwomi sabi taa di kemeente na u libisëmbë, ma u Jehovah. Fëën mbei te de o du wan wooko a di kemeente, nöö de ta du ën fajafaja. Söseei de dë seiki taa Jehovah o paka de.​—Kol. 3:23, 24.

13. Unfa Jehovah ta si dee soni dee u ta du dëën?

¹³ Na hii sëmbë sa toon gaanwomi u kemeente. Ma hii u tuu sa da Jehovah wan soni. Di Gadu fuu ta wai seei te u ta dini ën ka u sa dini ën dou. A ta si te u ta buta möni da di wooko di u ta du a hii di goonliba, aluwasi ee an hia. A ta wai tu te a ta si taa u ta mbei möiti u hopo finga u da wan piki a  komakandi, hii fa sen ta kisi u. Söseei a ta wai te u ta da wotowan paadon te de du wan hati soni ku u. Aluwasi ee i ta si kuma ja sa du hia soni da Jehovah kumafa i bi o kë, tökuseei i sa dë seiki taa Jehovah ta tei hii dee soni dee i ta du dëën u bigi. A lobi i u di i ta du dee soni dë dëën, nöö a o paka i tu.​—Luk. 21:1-4.

DË A DI LIBILIBI GADU BANDJA U NÖÖMÖ

14. Unfa di mbei di woo ta mbei möiti fuu ku Jehovah ko dë möön gaan mati, o heepi u fuu sa hoi useei nëën? (Luku di peentje tu.)

¹⁴ Ee u ku Jehovah dë gaan mati, ee u ta biibi taa a dë tuutuu, nöö an o taanga da u sö fuu hoi useei nëën. U ta si di soni dë a di woto u Josëfu. An bi libi fanafiti libi a di së u manu ku mujëë soni. Hën ku Jehovah bi dë gaan mati, a bi ta biibi taa a dë tuutuu, nöö an bi kë du soni di Jehovah an lobi (Ken. 39:9). U ku Jehovah sa ko dë gaan mati, te u ta tei ten ta fan ku ën, söseei te u ta öndösuku di Wöutu fëën. Te u ta du sö kaa, nöö u ku ën o ko dë möön gaan mati. A sö wan fasi, nöö wa o kë du na wan soni di Jehovah buuse, leti kuma Josëfu.​—Jak. 4:8.

15. Andi u sa lei u di soni di bi pasa ku dee Isaëli sëmbë a di sabana? (Hebelejën 3:12)

¹⁵ Dee sëmbë dee ta fëëkëtë taa Jehovah da di libilibi Gadu, sa bia baka dëën hesihesi seei. Buta pakisei a di soni di bi pasa ku dee Isaëli sëmbë di de bi dë a di sabana. De bi sabi taa Jehovah dë tuutuu, ma de bi bigi ta si kuma Jehovah an bi o sölugu de. De bi ta hakisi taa: „Jehovah dë ku u tuutuu ö?” (Ëki. 17:2, 7) Te u kaba fëën, de bi hopo fia ku Gadu. Wë wa kë waka a de baka a di fasi fa de bi du soni.​—Lesi Hebelejën 3:12.

16. Andi sa mbei di biibi fuu ko suwaki?

¹⁶ Di goonliba aki ta mbei a ta taanga da u  fuu hoi useei a Jehovah. Sömëni sëmbë an ta biibi taa Gadu dë. Nöö so juu a ta djei kuma dee sëmbë dee an ta libi kumafa Gadu kë, ta abi wan bunu libi. Te u ta si di soni dë, nöö di biibi fuu sa ko suwaki. Hii fa u sabi taa Gadu dë, tökuseei u sa bigi ta hakisi useei ee a o heepi u tuutuu. Di sëmbë di sikifi Psalöm 73 seei bi hakisi hënseei di soni dë tu. A bi ta si faa dee sëmbë dee na bi ta haika Gadu ta libi wan suti libi. Te u kaba fëën, hën a bi bigi ta hakisi hënseei ee a dë fanöudu faa dini Gadu go dou.​—Ps. 73:11-13.

17. Andi o heepi u fuu dë a Jehovah bandja u nöömö?

¹⁷ Andi bi heepi di Psalöm sikifima faa ko ta si soni a wan bunu fasi? A bi kai pakisei a dee soni dee bi o pasa ku dee sëmbë dee ta fëëkëtë Jehovah (Ps. 73:18, 19, 27). Söseei a bi buta pakisei a dee bunu dee sëmbë ta feni te de ta dini Gadu (Ps. 73:24). Useei sa kai pakisei a dee bunu dee Jehovah da u. Nöö u sa pakisei tu unfa libi fuu bi o dë ee wa bi ta dini ën. Dee soni aki o heepi u fuu hoi useei a Jehovah go dou, leti kuma di Psalöm sikifima. A bi taki taa: „A bunu da mi u ko zuntu ku Gadu.”​—Ps. 73:28.

18. Faandi mbei an dë fuu fëëë dee soni dee o pasa a di ten di ta ko?

¹⁸ U sa pasa dee fuka dee ta miti u a dee lasiti daka aki, u di u „ta waka a di tuutuu Gadu baka di ta libi u nöömö” (1 Tes. 1:9). Di Gadu fuu ta booko hën hedi ku u, nöö hii juu a o ta heepi u. Leti kumafa a bi dë ku dee dinima fëën a di ten di pasa, sö nöö a dë ku u a di ten aki tu. Abiti möön di gaan fuka o bigi. Nöö u sa dë seiki taa Jehovah o dë ku u (Jes. 41:10). Be hii u tuu „taki seei söndö panta a u hati taa: ’Masa hën da mi Heepima. Ma o fëëë.’”​—Heb. 13:5, 6.