Soni di dee lesima hakisi
Faandi mbei u sa taki taa dee wöutu „joo tjubi hiniwan u de” di sikifi a Psalöm 12:7, nama ku „dee möfina sëmbë” di vers 5 taki, ka fuu taki taa a nama ku „dee soni dee Jehovah ta taki” di sikifi a vers 6?
Dee woto vers u di Psalöm aki ta lei taa vers 7 ta taki u sëmbë.
Psalöm 12:1-4 ta taki taa: „Dee sëmbë dee ta piki [Jehovah] buka an dë a goonliba möön.” Nöö buta pakisei a Psalöm 12:5-7. De ta taki taa:
„’De ta du ku dee möfina sëmbë,
Nöö dee pootima ta djëmë,
Fëën mbei mi o hopo du wan soni nöunöu u heepi de’, sö Jehovah taki.
’Mi o tjubi dee möfina sëmbë da dee sëmbë dee ta si de kuma wisiwasima.’
Dee soni dee Jehovah ta taki dë soifi.
De dë kuma soofu di sëmbë ta mbei ko limbo. De ta tjumëën seibi pasi a wan onfu di ta mbei soni ko soifi.
Kee Jehovah, i ta luku dee möfina sëmbë.
Joo tjubi hiniwan u de, sö taa dee hogihati sëmbë u di ten aki an feni de pena nöiti möön.”
Vers 5 ta taki andi Gadu o du da „dee möfina sëmbë”. A taa a o heepi de.
Vers 6 ta taki taa „dee soni dee Jehovah ta taki dë soifi”, ’kuma soofu di tjuma ko limbo’. Di soni aki ta lei unfa u dee dinima u Jehovah ta si di Wöutu fëën.—Ps. 18:30; 119:140.
Boo buta pakisei a Psalöm 12:7. Di vers aki ta taki taa: „Kee Jehovah, i ta luku dee möfina sëmbë. Joo tjubi hiniwan u de, sö taa dee hogihati sëmbë u di ten aki an feni de pena nöiti möön.” Unfa u du sabi taa Psalöm 12:7 ta taki u dee möfina sëmbë?
U di vers 6 ta taki u „dee soni dee Jehovah ta taki”, mbei so sëmbë sa ta pakisei taa vers 7 ta taki taa Gadu ta „tjubi” dee soni dee a ta taki. Tuu taa Gadu bi tjubi di Bëibel be dee sëmbë dee bi ta pooba u poi ën, an feni ën poi kaba a sösö.—Jes. 40:8; 1 Pet. 1:25.
Ma leti kumafa vers 5 ta taki, nöö Jehovah ta tjubi dee sëmbë fëën tu. Hii juu a ta heepi „dee möfina sëmbë”, ku dee sëmbë dee „ta djëmë”. A bi heepi de a dee ten dee pasa, söseei a bi tjubi de, nöö a o ta du di seei soni go dou.—Jöpu 36:15; Ps. 6:4; 31:1, 2; 54:7; 145:20.
Wë nöö unfa u du ko fusutan taa vers 7 taki u sëmbë?
Te u luku dee soni dee sikifi a di Psalöm aki finifini, nöö a ta dë gbelingbelin u fusutan taa u sëmbë a ta taki.
A Psalöm 12:1, Dafiti bi ta taki soni u dee dinima u Jehovah di dee hogihati sëmbë bi ta ganjan. Nöö dee woto vers ta lei taa Jehovah o hopo du wan soni ku dee sëmbë dee ta taki soni di an bunu. Di psalöm aki ta lei u taa u sa dë seiki taa Gadu o hopo du wan soni u heepi dee sëmbë fëën. Biga dee soni dee a ta taki dë soifi.
Vers 7 ta taki taa Jehovah o tjubi dee möfina sëmbë di dee hogihati sëmbë ta pena.
Di fasi fa u puu Psalöm 12:7 ta kai ku dee Hebelejën pisi u Bëibel di sëmbë ta futoou. Di Giiki Septuaginta wooko tu pasi ku di wöutu „u” a vers 7. Fëën mbei u sa taki taa a ta taki u dee dinima u Jehovah dee ta tja fuka, söseei di sëmbë ta pena. Te u kaba fëën, vers 7 ta taki taa Jehovah o tjubi „hiniwan” u dee dinima fëën be „dee hogihati sëmbë u di ten aki”, an feni de du hogi möön. Dee sëmbë dë ta da sëmbë taanga u de du soni di an bunu (Ps. 12:7, 8). Di de puu Psalöm 12:7 ko na Alamëitöngö, hën de puu ën sö: „KEE MASA O, joo heepi dee bunuhati sëmbë, joo tjubi de da dee hogihati sëmbë u di ten aki u teego. Dee hogihati sëmbë ta waka daama ta du hogi ku sëmbë kuma di soni de kai sebitaa di ta söigi sëmbë buuu.” Di fasi fa de puu di tëkisi aki na Alamëitöngö ta lei gbelingbelin taa dee soni dee sikifi a Psalöm 12:7 nama ku dee möfina sëmbë.
Vers 7 ta lei taa „dee sëmbë dee ta piki [Jehovah] buka”, sa abi di biibi taa a o hopo du wan soni u heepi de. De sa dë seiki fëën!
