1, 2. Faandi mbei Gadu an bi kë Saulosu kuma könu möön? (Luku di peentje a bigi u di woto.)

DI JEHOVAH bi tei Saulosu buta könu, nöö Saulosu bi abi sakafasi (1 Samuëli 9:1, 2, 21; 10:20-24). Ma baka di a bigi tii kuma könu, hën a bi ko abi gaanfasi. Wan daka hën dusudusu Filisiti sëmbë bi ko feti ku dee Isaëli sëmbë. Di tjabukama u Gadu de kai Samuëli bi piki Saulosu taa a bi o ko tjuma dee soni di a bi musu tjuma da Jehovah. Ma ufö Samuëli ko dou, hën dee Isaëli sëmbë ko fëëë te sömëni u de go disa Saulosu. An bi abi pasensi tjika u wakiti u te Samuëli dou, hën a tjuma dee soni da Jehovah hënseei. Saulosu an bi abi leti u du di soni dë, nöö di soni dë an bi kai ku Jehovah.—1 Samuëli 13:5-9.

² Di Samuëli dou, hën a bë wojo da Saulosu u di a pasa Jehovah buka. Ma Saulosu an bi si kuma a bi du wan hogi soni. A bi taki soni u puu sen da hënseei, nöö a bi taki taa woto sëmbë hën mbei a mbei di föutu dë (1 Samuëli 13:10-14). Sensi di ten dë, hën Saulosu du sömëni woto soni di lei taa a abi gaanfasi. Fëën mbei Jehovah an bi këën kuma könu möön  (1 Samuëli 15:22, 23). Bigibigi soni bi nango bunu ku Saulosu, ma te u kaba fëën, soni an bi waka bunu dëën seepiseepi.—1 Samuëli 31:1-6.

3. (a) Andi sömëni sëmbë ta pakisei u sakafasi? (b) Un hakisi woo luku a di woto aki?

³ Sömëni sëmbë a di ten aki feni taa de an sa abi sakafasi, nöö de abi wan bunu libi a di wan seei ten. De ta njan buka taa de bunu möön wotowan. Leti sö nöö wan nëbai womi di ta pëë fëlön, di dë wan politikima tu, bi taki taa: „Sakafasi an dë da sëmbë kuma mi aki, nöö ma bi o kë ko abi sakafasi tu.” Ma faandi mbei wan Keesitu sëmbë musu abi sakafasi? Unfa wan sëmbë ta lei taa a abi sakafasi? Unfa wan sëmbë ta lei taa an abi sakafasi? Woo piki dee hakisi aki a di woto aki. Nöö a di woto di ta ko woo si unfa u sa abi sakafasi hii juu aluwasi a ta taanga da u so juu.

4. Andi wan sëmbë ta du te a abi gaanfasi?

⁴ Di Bëibel ta lei u taa te wan sëmbë abi gaanfasi, hën da an abi sakafasi. (Lesi Nöngö 11:2.) Dafiti bi begi Jehovah taa: „Heepi di futuboi fii be an ko abi gaanfasi, sö taa an go du soni di an bunu” (Psalöm 19:13). Andi wan sëmbë ta du te a abi gaanfasi? Wë a sa go du wan soni di an abi leti u du, kandë u di an abi pasensi. So juu gaanfasi ta mbei hii u tuu ta du soni di an bunu, u di u da zöndu libisëmbë. Ma leti kumafa di woto u Könu Saulosu ta lei u, nöö ee u ko abi gaanfasi, nöö Jehovah an o feni u bunu möön. Psalöm 119:21 ta taki taa Jehovah o „bë wojo da dee sëmbë dee abi gaanfasi”. Faandi mbei a o du di soni aki?

5. Faandi mbei a dë wan gaan hogi, te wan sëmbë go du wan soni di an bunu u di a abi gaanfasi?

⁵ Di fosu soni, hën da ee u du wan soni di ta lei taa u abi gaanfasi, nöö u ta lei taa wa abi lesipeki da Jehovah, di dë di Gadu fuu ku di Tiima fuu. Di u tu soni, hën da ee u du wan soni di wa abi di leti u du, nöö kandë u ku wotowan sa kisi toobi, söseei u ku wotowan an o ta fusutan useei (Nöngö 13:10). Di u dii soni, hën da woo ko dë kuma sösö sëmbë te wotowan ko si taa gaanfasi mbei u go du wan soni di an bunu (Lukasi 14:8, 9). A dë gbelingbelin u si faandi mbei Jehovah kë fuu abi sakafasi.

6, 7. Unfa wan sëmbë ta lei taa a abi sakafasi?

⁶ Wan Keesitu sëmbë di abi sakafasi an abi gaanfasi, söseei a ta si wotowan hei möön hënseei (Filipi 2:3). Wan sakafasi sëmbë an ta mbei hei da wotowan. A ta si taa an sa du hii soni, nöö te a mbei wan föutu, a ta piki taa a mbei wan föutu. A ta dë kabakaba u haika andi wotowan ta taki, söseei u lei wan soni a de. Wan sëmbë di abi sakafasi ta du soni di ta kai ku Jehovah.

⁷ Di Bëibel ta lei u taa wan sëmbë di abi sakafasi sabi taa so soni dë di an sa du, söseei taa so soni dë di an abi leti u du. Di soni aki ta heepi ën faa lesipeki wotowan, söseei faa libi bunu ku de.

8. Ku un fasi u pakisei u musu ta köni, ee u kë abi sakafasi hii juu?

 ⁸ Tökuseei u sa bigi ta pakisei soni a wan fasi di ta lei taa u abi gaanfasi söndö fuu sabi. Unfa di soni aki sa pasa? Wë u sa bigi ta fii taa u bunu möön wotowan, u di useei nasö dee sëmbë dee u sabi, abi wan gaan faantiwöutu a di kemeente (Loomë 12:16). Nasö u sa bigi ta du soni u sëmbë sa buta pakisei a u (1 Timoteo 2:9, 10). Kandë u ta bigi ta konda da wotowan andi de musu du ku andi de an musu du.—1 Kolenti 4:6.

9. Unfa a du ko taa so sëmbë bi ko abi gaanfasi? Konda wan u dee woto di dë a Bëibel.

⁹ Ee wa ta basi dee pakisei fuu di an bunu, nöö u bi o sa bigi ta du soni di ta lei taa u abi gaanfasi. Sömëni sëmbë bi ko abi gaanfasi u di de bi ta suku gafa da deseei, de bi ta haun ku wotowan, nasö de an bi sa ta hoi deseei u hati u de an boonu. Di soni aki hën pasa ku sömëni sëmbë di di Bëibel ta taki u de. So u dee sëmbë aki da Absalöm, Usia ku Nebukatnesali. Jehovah bi piki de gbelingbelin andi de bi musu du u de ko abi sakafasi.—2 Samuëli 15:1-6; 18:9-17; 2 Kloniki 26:16-21; Daniëli 5:18-21.

10. Faandi mbei u musu ta köni be wa ta kuutu dee soni dee woto sëmbë ta du? Konda wan u dee woto di dë a Bëibel.

¹⁰ So juu woto soni sa dë di ta mbei sëmbë an abi sakafasi. Pakisei di woto u Abimeileki ku Petuisi (Kenesesi 20:2-7; Mateosi 26:31-35). Dee womi aki bi abi gaanfasi ö? A bi o sa dë sö taa de an bi sabi hii soni ö, naa de bi ta du soni söndö u pakisei? Wë u di wa sa sabi andi dë a wan sëmbë hati, mbei wa sa kuutu dee soni dee woto sëmbë ta du.—Lesi Jakobosi 4:12.

11. Andi u musu ko fusutan?

¹¹ Wan sëmbë di abi sakafasi ta fusutan un wooko a abi a di ölganisaasi u Gadu. Jehovah da wan Gadu di an ta du soni fanjanfanjan. A da hiniwan sëmbë u di kemeente wan wooko. Hii u tuu dë fanöudu. Jehovah da hii u tuu peipei köni, nöö a ta disa u fu useei taki unfa woo wooko ku de. Ee u abi sakafasi, nöö woo wooko ku dee köni aki kumafa a kë fuu wooko ku de (Loomë 12:4-8). U ko si taa Jehovah kë fuu wooko ku dee köni dee a da u fuu tja gafa ko dëën, söseei fuu heepi wotowan.—Lesi 1 Petuisi 4:10.

12, 13. Andi u musu hoi a pakisei ee soni ko tooka a u libi a di dini di u ta dini Jehovah?

¹² Möön di ten ta pasa, möön a sa pasa taa dee soni dee u ta du a di ölganisaasi u Jehovah, sa tooka. Pakisei dee sömëni soni dee tooka a Jesosi libi. Di fosu soni, hën da hën ku hën Tata wanwan bi dë (Nöngö 8:22). Baka di dë, hën a heepi Jehovah u mbei dee ëngëli, di mundu, ku libisëmbë (Kolosën 1:16). Bakaten hën Gadu mandëën ko a goonliba. De pai ën kuma wan libisëmbë, hën a göö ko gaangaan sëmbë (Filipi 2:7). Baka di Jesosi dëdë, hën a toona go a liba ala baka, nöö a di jaa 1914 a toon Könu u di Könuköndë u Gadu (Hebelejën 2:9). A di ten di ta ko, baka te Jesosi tii kuma Könu u dusu jaa longi, nöö a o da Jehovah di Könuköndë baka, sö taa a sa „dë di kaba Takima u Mundu”.—1 Kolenti 15:28.

¹³ Sömëni soni sa tooka a u libi tu. So juu useei ta du soni di sa mbei di faantiwöutu fuu tooka. Wë boo taa kandë wa bi tööu,  ma bakaten hën u ko tööu. Nasö u ko pai miii. Kandë bakaten u buta taa woo tooka so soni a u libi fuu sa du di hii-ten diniwooko da Jehovah. So juu dee faantiwöutu fuu sa tooka u di soni ko tooka a u libi. Kandë u sa du möön hia soni, nasö kandë u musu ko ta du möön biti soni. Ma aluwasi u njönku nasö u ko gaandi kaa, aluwasi u gösöntu nasö u dë ku siki, tökuseei Jehovah sabi unfa hiniwan fuu sa dini ën möön bunu. An ta hakisi u fuu du soni di wa sa du. Nöö a ta wai seei ku hiniwan soni di u sa du dëën.—Hebelejën 6:10.

14. Unfa sakafasi sa heepi u fuu dë tifeedi, söseei fuu sa ta dë waiwai hii juu?

¹⁴ Jesosi bi ta wai seei ku hiniwan wooko di Jehovah bi dëën, nöö useei sa ta wai ku dee wooko dee a ta da u tu (Nöngö 8:30, 31). Wan sëmbë di abi sakafasi ta dë tifeedi ku dee wooko dee a ta du a di kemeente. An o ta haun ku dee wooko dee wotowan ta du. Ma a dë tifeedi ku di u fëën wooko di a ta du a di ölganisaasi u Gadu. A ta si taa Jehovah hën dëën di wooko dë. Wan sëmbë di abi sakafasi ta lesipeki wotowan tu, nöö waiwai seei a ta heepi de. A ta fusutan taa Jehovah da de wan wooko tu.—Loomë 12:10.

15. Andi u sa lei a di woto u Gidion?

¹⁵ Gidion da wan sëmbë di u sa djeesi a di sakafasi di a bi abi. Di Jehovah bi da Gidion di wooko faa go puu dee Isaëli sëmbë a dee Midian sëmbë basu, hën Gidion taki taa: „Di famii u mi da di möön pikiwan u di lö u Manase. Nöö mi da di möön pikiwan a di wosudendu u mi tata” (Kuutuma 6:15). Ma Gidion bi abi futoou a Jehovah, hën a  tei di wooko di a bi dëën. Baka di dë, hën Gidion mbei möiti faa fusutan andi Jehovah kë faa du, hën a begi Jehovah faa tii ën (Kuutuma 6:36-40). Gidion bi dë wan taanga womi, nöö a bi abi degihati. Ma a bi dë wan köni womi tu, söseei a bi ta köni u hogi an miti ën (Kuutuma 6:11, 27). Bakaten, di dee sëmbë bi kë faa tii de, hën an bi kë du ën. Baka di a du di soni di Jehovah bi hakisi ën, hën a toona go nëën pisi.—Kuutuma 8:22, 23, 29.

16, 17. Unfa wan sëmbë di abi sakafasi sa go a fesi a di biibi?

¹⁶ Ee wan sëmbë tei wan njunjun wooko di de dëën a di kemeente, nasö ee a kë du möön soni a di kemeente, nöö di soni dë an kë taki taa an abi sakafasi. Di Bëibel ta taki taa a dë wan bunu soni u dë wan dinima u Jehovah di kë heepi dee baaa ku dee sisa möön gaanfa, söseei a dë wan bunu soni ee wan dinima u Jehovah kë go a fesi a di biibi (1 Timoteo 4:13-15). Ma u musu u kisi wan njunjun wooko ufö u sa go a fesi a di biibi ö? Wë nönö. Hii u tuu sa mbei möiti u ko abi dee fasi di wan Keesitu sëmbë musu abi, söseei u wooko ku di köni di Jehovah da u fuu sa dini ën möön bunu, söseei fuu sa heepi wotowan.

¹⁷ Ufö wan sëmbë di abi sakafasi tei wan wooko, nöö a ta suku u ko sabi andi da di wooko di a musu du. A ta begi Jehovah, nöö a ta pakisei fundu ee a o sa du di wooko dë. A o pakisei luku ee a o abi ten ku kaakiti tjika u du dee woto fanöudu soni di a musu du. Ee an o sa, nöö a o luku ee woto sëmbë sa heepi ën ku so u dee wooko di a ta du nöunöu. Baka te a pakisei dee soni aki, nöö kandë a o ko si taa an o sa du di njunjun wooko aki kumafa a musu du ën. Ee u abi sakafasi, nöö kandë u musu taki taa wa sa du di wooko.

18. (a) Andi wan sëmbë di abi sakafasi o du te de dëën wan njunjun wooko a di kemeente? (b) Unfa Loomë 12:3 ta heepi u fuu abi sakafasi?

¹⁸ Jehovah kë fuu ’abi sakafasi, hii fa u ta waka ku ën’ (Mika 6:8). Fëën mbei te de da u wan njunjun wooko, nöö u ta hakisi Jehovah faa tii u, söseei faa heepi u, leti kumafa Gidion bi hakisi ën. U musu pakisei fundu u dee soni dee Jehovah ta piki u a di Bëibel, söseei ku di ölganisaasi fëën. Boo hoi a pakisei taa u sa du hii dee soni dee u ta du a di dini di u ta dini Jehovah, u di a abi sakafasi, söseei u di a kë heepi u, ma na u di u abi wan apaiti köni mbei (Psalöm 18:35). Wan sëmbë di abi sakafasi an o ’luku hën seei hei möön fa a dë’.—Lesi Loomë 12:3.

19. Faandi mbei u musu abi sakafasi?

¹⁹ Wan sëmbë di abi sakafasi sabi taa Jehovah wanwan fiti u kisi gafa, u di hën mbei hii soni, söseei u di hën da di Möön Heiwan u mundu (Akoalimbo 4:11). Ee u abi sakafasi, nöö woo ta dë waiwai ku hiniwan wooko di u sa du a di dini di u ta dini Jehovah. Woo abi lesipeki da di fasi fa dee baaa ku dee sisa fuu ta fii, söseei woo abi lesipeki da di fasi fa de ta pakisei tu. Nöö te u kaba fëën, u ku de o ta libi makandi kuma wan famii. Wan sëmbë di abi sakafasi ta pakisei bunu ufö a du wan soni, nöö a sö wan fasi a ta köni fu an mbei gaan föutu. Jehovah ta wai seei ku dee sëmbë dee abi sakafasi. Fëën mbei a dë fanöudu seei taa dee sëmbë u Gadu abi sakafasi. A di woto di ta ko woo si unfa u sa abi sakafasi hii juu aluwasi a ta taanga da u so juu.