WOTO 4
Wan komakandi di ta lei u soni u wan Könu di dë a liba ala
„Hën da di sinkii u mi. . . . Hën da di gadjabia u mi di mi o tuwë a goon fu Gadu sa mbei wan njunjun buka ku libisëmbë.”—MAT. 26:26-28.
KANDA 16 Gafa Jehovah u di a salufu di Womi Mii fëën
WANTU SONI U DI WOTO *
1, 2. (a) Faandi mbei an ta foondo u taa Jesosi an bi du gaan apaiti soni u lei u fa u musu mëni di dëdë fëën? (b) Fuun fasi u Jesosi woo taki?
I SA konda andi ta pasa a di komakandi di u ta hoi hiniwan jaa u mëni di dëdë u Keesitu ö? Gaansë fuu sabi andi ta pasa te u ta hoi di Ndeti Njanjan u Masa. Faandi mbei? U di wa ta du wan gaan apaiti soni a di komakandi dë. Ma tökuseei a dë wan apaiti komakandi. Fëën mbei u sa hakisi useei taa: ’Faandi mbei wa ta du wan gaan apaiti soni a di komakandi aki?’
2 Di Jesosi bi ta du di diniwooko fëën a goonliba aki, nöö a bi ta lei sëmbë soni u Gadu a wan fasi di an bi taanga u fusutan (Mat. 7:28, 29). A di wan seei fasi, a lei u fa u musu ta hoi * di Ndeti Njanjan an wan fasi di an taanga u hoi, ma tökuseei di soni dë da wan fanöudu soni da u. Boo taki möön fini u di mëni di u ta mëni di dëdë u Jesosi, u so u dee soni dee a bi taki, söseei u so u dee soni dee a bi du. Woo ko fusutan möön bunu unfa Jesosi bi abi sakafasi, degihati, ku lobi tjika, nöö woo ko sabi unfa u sa djeesi ën möön bunu.
JESOSI ABI SAKAFASI
Di bëëë ku di win di u ta tei u mëni di dëdë u Jesosi ta heepi u fu wa fëëkëtë taa Jesosi bi ko dëdë da u, söseei taa nöunöu a dë Könu ta tii a liba ala (Luku palaklafu 3-5)
3. Te u luku Mateosi 26:26-28, nöö unfa Jesosi bi seti di Ndeti Njanjan u Masa, nöö andi di bëëë ku di win kë taki?
3 Jesosi seti di mëni di u musu ta mëni di dëdë fëën di hën ku dee 11 apösutu fëën bi dë makandi. A tei dee soni dee bi fika di de bi hoi di Pasika piizii, hën a seti di Ndeti Njanjan u Masa. Mateosi 26:26-28.) A bi hoi ën ku di bëëë söndö sooda, ku di win di bi fika. Jesosi bi piki dee apösutu fëën taa di bëëë kë taki di sinkii fëën di an bi abi zöndu, nöö di wini kë taki di buuu fëën, di a bi tei u paka paima da de. An bi foombo dee apösutu taa Jesosi an bi du wan gaan apaiti soni u hoi di piizii aki. Faandi mbei?
(Lesi4. Unfa di soni di Jesosi bi piki Maita, ta heepi u fuu fusutan faandi mbei Jesosi an bi seeka te a hia soni u njan, di a bi hoi di Ndeti Njanjan?
4 Luku andi bi pasa wantu liba a fesi. Di ten dë, Jesosi bi du di diniwooko fëën dii jaa kaa, nöö Lazalosi, Maita ku Malia bi dë mati u Jesosi. Nöö wan daka a bi go a de pisi. Di a dou ala, hën a bigi ta lei sëmbë soni. Maita bi sai dë, ma an bi ta haika, u di a bi ta seeka gaan hia soni u njan da Jesosi. Di Jesosi si di soni aki, hën a piki Maita a wan suti fasi taa na hii juu a dë fanöudu u seeka gaan hia soni u njan (Luk. 10:40-42). Kölö sö ufö Jesosi dëdë, hën a hoi hënseei a di soni di a bi piki Maita. An bi seeka te a hia soni u njan, u lei dee bakama fëën unfa de musu ta mëni di dëdë fëën. Andi di soni aki ta lei u u Jesosi?
5. Andi u ta lei u Jesosi, te u luku di fasi fa a bi lei dee bakama fëën taa de musu ta mëni di dëdë fëën? Nöö unfa di soni aki ta kai ku Filipi 2:5-8?
5 Jesosi bi ta lei taa a bi abi sakafasi a hii soni di a bi ta taki, söseei a hii soni di a bi ta du. Fëën mbei an ta foondo u taa Jesosi bi lei taa a bi abi sakafasi tuutuu a di lasiti ndeti di a bi dë a goonliba aki (Mat. 11:29). A bi sabi taa di juu bi o dou faa paka di möön gaan paima da libisëmbë, nöö a bi sabi tu taa Jehovah bi o toona weki ën ko a libi baka faa toon könu a liba ala. Hii fa a bi sabi dee soni aki, tökuseei an bi du soni u sëmbë buta pakisei nëën. An bi piki dee bakama fëën u de musu ta du gaan hia soni u mëni di dëdë fëën. Ma a bi piki de taa de bi musu ta du di soni aki wan pasi a wan jaa, nöö an bi dë fanöudu u de seeka gaan hia soni u njan (Joh. 13:15; 1 Kol. 11:23-25). Di soni aki ta lei u taa Jesosi an bi abi gaanfasi. U ta wai seei taa u abi wan Könu di dë a liba ala, di abi sakafasi.—Lesi Filipi 2:5-8.
6. Unfa u sa djeesi Jesosi a di sakafasi di a bi abi, te tesi ta miti u?
6 Unfa u sa djeesi Jesosi a di sakafasi di a abi? Wë u sa du di soni aki te u ta booko u hedi ku soni u wotowan möön dee u fuu seei soni (Fil. 2:3, 4). Pakisei fa soni bi dë a di lasiti ndeti di Jesosi bi dë a goonliba aki. Jesosi bi sabi taa an bi o tei longi möön, nöö de bi o kii ën a wan hogihati fasi. Ma tökuseei a bi ta booko hën hedi ku dee apösutu fëën, dee bi o tjali gaanfa. A bi tei hii di ndeti dë ta lei de soni, ta da de degihati, söseei a bi piki de fa a lobi de tjika (Joh. 14:25-31). Jesosi bi ta booko hën hedi ku wotowan möön gaanfa, möön leki fa a bi ta booko hën hedi ku hënseei. U sa djeesi Jesosi a di lö fasi aki tu!
JESOSI ABI DEGIHATI
7. Unfa Jesosi bi lei ta a abi degihati, kölö sö baka di a seti di Ndeti Njanjan u Masa?
7 Kölö sö baka di Jesosi seti di Ndeti Njanjan u Masa, hën a bi lei fa a abi degihati tjika. Na un futu? Hii fa Jesosi bi sabi taa ee a du andi hën Tata kë, a bi o dëdë a wan hogihati fasi, tökuseei a du andi Gadu kë, nöö de bi kii ën kumafa de bi ta kii wan sëmbë di bi kosi Gadu (Mat. 26:65, 66; Luk. 22:41, 42). Jesosi hoi hënseei a Gadu a hii futu u tja gafa ko da di në u Jehovah, a hoi hënseei a di leti di Jehovah abi u tii hii soni, söseei a jabi di pasi da sëmbë di ta tjali u dee zöndu di de du, u de sa feni di libi u teego. A di wan seei ten Jesosi bi seeka dee bakama fëën da dee soni dee bi o miti de bakaten.
8. (a) Andi Jesosi bi piki dee apösutu fëën? (b) Unfa dee bakama u Jesosi bi lei taa de bi abi degihati kuma Jesosi, baka di a bi dëdë?
8 Jesosi lei taa a abi degihati tu, u di an bi ta buta pakisei a di fëën bookohedi, ma a bi ta booko hën hedi ku andi dee apösutu fëën bi abi fanöudu. Di Ndeti Njanjan di a seti baka di a manda Judasi go, bi o mbei dee sëmbë dee Gadu bi o salufu ku santa jeje, mëni dee gaan bunu de o feni, u di Jesosi dëdë tuwë hën buuu da de. Söseei a bi o heepi de u de ta hoi a pakisei taa de ku ën o tii makandi a liba ala tu (1 Kol. 10:16, 17). U di Jesosi bi kë u dee bakama fëën hoi deseei a Gadu sö taa de sa libi ku ën a liba ala, mbei a bi piki de andi hën ku hën Tata kë u de musu du (Joh. 15:12-15). Jesosi bi piki dee bakama fëën taa tesi bi o miti de tu. Baka di dë, a piki de taa de musu du kumafa hën a bi du. A piki de taa: „Wan lasi hati e!” (Joh. 16:1-4a, 33) Baka sömëni jaa dee bakama u Jesosi bi ta djeesi ën jeti, u di de bi ta dë kabakaba u booko de hedi ku soni u wotowan möön leki fa de bi ta booko de hedi ku deseei soni. Söseei de bi ta lei taa de abi degihati tu. So juu de bi ta tja pena, ma tökuseei di soni aki an bi ta tapa de u de heepi dee wotowan dee fuka bi ta miti.—Heb. 10:33, 34.
9. Unfa u sa djeesi Jesosi a di degihati di a bi abi?
9 A di ten aki, useei ta lei taa u abi degihati tu, leti kumafa Jesosi bi du ën. U musu abi degihati fuu sa heepi dee baaa ku dee sisa fuu te sëmbë ta du ku de u di biibi u de hedi. So juu de ta buta dee baaa ku dee sisa fuu a dunguwosu, hii fa de an du hogi. Te di soni aki pasa, nöö u musu du hii soni di u sa du u heepi de, aluwasi ee hopo u musu hopo taki da de (Fil. 1:14; Heb. 13:19). Wan woto fasi fa u ta lei taa u abi degihati, da te u ta „konda di buka söndö fëëë” (Tjab. 14:3). Useei dë kuma Jesosi tu. U dë kabakaba u paaja di buka u di Könuköndë, aluwasi sëmbë ta du ku u. Ma so juu u sa ta si kuma wa abi degihati tjika. Andi u sa du?
10. Andi u musu du te di ten ta zuntu fuu mëni di dëdë u Jesosi, nöö faandi mbei u musu du di soni dë?
10 U sa mbei möiti fuu ko abi möön degihati ku di kai di woo ta kai pakisei a dee bunu dee woo feni, u di Jesosi ko dëdë da u (Joh. 3:16; Ef. 1:7). Te di ten ta zuntu fuu mëni di dëdë u Jesosi, nöö u sa tei di ten dë fuu lei taa u ta tei di lusupaima u bigi. Mbei möiti a di pisiten dë fii ta lesi dee pisi u Bëibel dee ta taki soni u di dëdë u Jesosi, söseei i musu ta pakisei fundu u dee soni dee bi pasa ufö Jesosi dëdë. Nöö te u ko makandi u hoi di Ndeti Njanjan u Masa, nöö woo ko fusutan möön bunu andi di bëëë ku di win kë taki, söseei woo ko fusutan andi da di gaan soni di Jesosi du da u. Te u ta tei di soni di Jehovah ku Jesosi du da u u bigi, söseei te u ko fusutan un bunu di soni dë o tja ko da u ku dee sëmbë fuu, nöö di biibi fuu ta ko möön taanga. Boiti di dë, di soni dë ta da u taanga fuu hoi dou.—Heb. 12:3.
11, 12. Andi u lei a di woto aki?
11 Wë u si a di woto aki taa di Ndeti Njanjan u Masa an ta mbei u mëni di lusupaima di Jesosi paka da u nöö, ma a ta mbei u mëni di sakafasi ku di degihati di Jesosi bi abi tu. Di soni aki ta mbei u dë ku tangi a hati seei, u di u sabi taa Jesosi abi dee fasi aki jeti, nöö a dë kuma di Gaan Mindima fuu a liba ala, ta fan ku Gadu da u! (Heb. 7:24, 25) Ee u kë lei taa u ta tei di soni aki u bigi, nöö u musu ta mëni di dëdë u Jesosi, leti kumafa Jesosi bi taki taa u musu ta du ën (Luk. 22:19, 20). U ta mëni di dëdë u Jesosi a 14 Nisan, nöö di daka aki da di möön apaiti daka u di jaa.
12 Di Ndeti Njanjan u Masa an taanga u hoi, nöö di soni dë ta lei u wan woto fasi di Jesosi abi, di bi mbei taa a ko dëdë da u. Sëmbë bi ta si di fasi aki nëën di a bi dë a goonliba aki. Andi da di fasi dë?
JESOSI LO’ SËMBË
13. Unfa Johanisi 15:9 ku 1 Johanisi 4:8-10 ta taki u di lobi di Jehovah ku Jesosi lei taa de lobi u, nöö ambë ta feni wini u di lobi dë?
13 Dee soni di Jesosi bi du bi ta lei taa a lobi u gaanfa seei kumafa Jehovah lobi u. (Lesi Johanisi 15:9; 1 Johanisi 4:8-10.) Di möön gaan soni di bi mbei Jesosi ko dëdë da u, hën da u di a lobi u ku hii hën hati. Aluwasi u dë wan salufuwan nasö wan u dee „oto sikafu”, tökuseei u ta feni wini u di lusupaima di Jehovah ku Jesosi paka da u, u di de lobi u (Joh. 10:16; 1 Joh. 2:2). Pakisei dee soni dee u ta tei u mëni di dëdë u Jesosi. Dee soni aki seei ta lei u taa Jesosi lobi dee bakama fëën, söseei taa a ta hoi de a pakisei. Na un futu?
Jesosi an bi du wan gaan apaiti soni di a bi seti di Ndeti Njanjan u Masa. Di soni aki mbei taa sëmbë sa ta mëni di dëdë fëën aluwasi fa soni dë da de (Luku palaklafu 14-16) *
14. Unfa Jesosi bi lei taa a lobi dee bakama fëën?
14 Jesosi lei taa a lobi dee salufu bakama fëën, u di an buta de u de ta du wan gaan taanga soni u mëni di dëdë fëën. Hiniwan jaa dee salufu bakama aki bi musu ta mëni di dëdë u Jesosi, aluwasi unfa soni bi dë da de, aluwasi de bi dë a dunguwosu seei (Ako. 2:10). Ma dee salufuwan aki bi sa du di soni di Jesosi taki ö? Wë aai!
15, 16. Unfa so sëmbë bi du hoi di Ndeti Njanjan u Masa, hii fa soni bi ta taanga da de?
15 Sensi di Jesosi dëdë, hën dee tuutuu bakama fëën ta mëni di dëdë fëën. De ta mbei hii möiti u du di soni dë kumafa Jesosi bi piki de taa de musu ta du ën, aluwasi so juu a ta taanga da de. Luku di woto aki. Di wan baaa de kai Harold King bi dë a dunguwosu a Sinëisi köndë, nöö a bi musu feni wan fasi u mëni di dëdë u Jesosi. A bi tei dee soni dee a bi abi, u seeka soni u mëni di dëdë u Jesosi a wan tjubitjubi fasi. A bi ta mbei möiti ta wegi luku faa bi sa sabi na un ten a bi musu mëni di dëdë u Jesosi. Di di juu bi dou u mëni di dë u Jesosi, hën baaa King bi mëni di dëdë u Jesosi hën wanwan a dunguwosu. A bi kanda, a bi begi, söseei a bi hoi wan taki di nama ku di dëdë u Jesosi.
16 Luku wan woto aki jeti. De bi söötö wanlö sisa a wan sitaafuma kampu a di pisiten u di u Tu Goonliba Feti, nöö dee sisa aki bi mbei möiti u hoi di Ndeti Njanjan u Masa, hii fa de bi sa lasi de libi. Ma u di Jesosi an bi buta dee bakama fëën u de ta tei te a hia soni u mëni di dëdë fëën, mbei dee sisa aki bi sa hoi di Ndeti Njanjan u Masa tjubitjubi. De bi taki taa: „U bi tei wan futu bangi, hën u jabi wan weti koosu nëën liba, hën u buta di bëëë ku di win nëën liba. Baka di dë, hën u taanpu lontu di futu bangi. U bi sëndë wan kanda fuu bi sa si soni, u di sëmbë bi o sa si u ee u bi sëndë di faja u di kamba. . . . A di ndeti dë, u bi toona taki soni
u lei taa u bi buta u libi a u Tata maun ku hii u hati, söseei taa u bi o ta mbei hii möiti u lei taa u kë u di në fëën ko santa.” Dee sisa aki bi lei taa de abi wan taanga biibi tuutuu! Na piki lobi Jesosi bi lei taa a lobi u di a bi seti di Ndeti Njanjan u Masa a wan fasi di an taanga u hoi!17. Andi ku andi u musu hakisi useei?
17 Te di juu di u ta mëni di dëdë u Jesosi ta zuntu, nöö a bi o bunu fuu hakisi useei dee soni aki: ’Unfa mi sa ko ta möön djeesi Jesosi a di lei di a bi ta lei taa a lo’ sëmbë? Mi ta mëni u mi wanwan soni nöö u, naa mi ta möön mëni soni u dee wotowan u mi tu? Mi ta kë u dee baaa ku dee sisa u mi musu ta du möön soni möön fa de sa du ö, naa mi ta hoi a pakisei taa na hii soni de o sa du?’ Boo ta djeesi Jesosi hii juu, ta lei wotowan taa u ta „fii” ku de.—1 Pet. 3:8.
HOI DEE SONI AKI A PAKISEI
18, 19. (a) Fuun soni u sa dë seiki? (b) Andi i dë kabakaba u du?
18 Abiti möön wa o ta mëni di dëdë u Jesosi möön. Te Jesosi „toona ko” a di pisiten u di gaan fuka, nöö a o tja „dee sëmbë u Gadu” ko makandi a liba ala, nöö sëmbë an o ta mëni di dëdë u Jesosi möön.—1 Kol. 11:26; Mat. 24:31.
19 Aluwasi wan ten o ko ka sëmbë an o ta mëni di dëdë u Jesosi möön, tökuseei u sa dë seiki taa dee sëmbë u Jehovah o ta mëni di hoi di de bi ta hoi di soni aki jeti, u di an taanga u hoi. Söseei de o ta mëni unfa Jesosi bi abi sakafasi, degihati, ku lobi tjika. Te di ten dë dou, nöö dee sëmbë dee bi ta mëni di apaiti Ndeti Njanjan aki o konda soni fëën da dee woto sëmbë u di ten dë, u de seei ko sabi un wini a tja ko da de tu. Ma ee u kë feni wini u di Ndeti Njanjan aki nöunöu kaa, nöö u musu dë kabakaba u djeesi Jesosi a di sakafasi fëën, a di degihati di a abi, söseei a di lobi di a lobi sëmbë. Ee u du di soni aki, nöö u sa dë seiki taa woo feni di gaan bunu di Gadu kë da u.—2 Pet. 1:10, 11.
KANDA 13 U kë dë kuma Keesitu
^ pal. 5 Abiti möön woo hoi di Ndeti Njanjan u Masa u mëni di dëdë u Jesosi Keesitu. Di apaiti komakandi aki ta lei u unfa Jesosi abi sakafasi, degihati ku lobi tjika. A di woto aki woo taki unfa u sa djeesi Jesosi a dee bunu fasi dë.
^ pal. 2 SONI DI TAKI MÖÖN FINI: Aki di wöutu hoi kë taki taa i ta du wan apaiti soni u mëni wan soni nasö wan sëmbë, sö taa i sa dëën gafa.
[Basusë wöutu]
^ pal. 56 DEE SONI DI DEE PEENTJE KË TAKI: De ta lei u unfa dee dinima u Gadu dee bi ta hoi deseei nëën, bi ta mëni di dëdë u Jesosi na awooten, söseei a di pisiten baka di jaa 1800. De ta lei tu unfa de bi ta hoi ën a wan sitaafuma kampu a di pisi ten u dee Nazi sodati, söseei unfa de ta hoi ën a di ten fuu aki a wan Könuköndë zali a Zuid-Amerika, a wan köndë ka di sonu ta kendi gaanfa.