1, 2. (a) Unfa di soni di sikifi a Jesaaja 41:10 bi heepi wan sisa de kai Yoshiko? (b) Ambë sa feni taanga a di soni di Jehovah bi mbei sëmbë sikifi a Jesaaja 41:10?

WAN sisa de kai Yoshiko bi go a data, hën di data booko wan buka dëën. Di data bi piki ën taa wantu liba nöö a bi o libi jeti. Andi di sisa aki du di a jei di soni aki? Wë Yoshiko bi ko mëni wan Bëibel tëkisi di a bi lobi. Di tëkisi dë da Jesaaja 41:10. (Lesi ën.) Baka di dë, hën a piki di data taa an bi ta fëëë, biga Jehovah bi dë ku ën. * Di soni di sikifi a di tëkisi aki bi heepi di sisa fuu faa buta futoou a Jehovah ku hii hën hati, nöö a sa heepi u tu fu wa fëëë te soni ta miti u. Fuu fusutan unfa di tëkisi aki sa heepi u, nöö u musu luku faandi mbei Gadu bi piki Jesaaja di soni aki.

² Jehovah bi mbei Jesaaja sikifi dee soni aki, u di a bi kë da dee Dju di de bi o tja go a katibo a Babilon kötöhati. Ma Jehovah an bi mbei de sikifi dee soni aki da dee Dju wanwan, ma a bi mbei de sikifi de da hii dee sëmbë fëën te kisi dee dinima fëën u di ten aki (Jes. 40:8; Lom. 15:4). A di ten aki, u ta libi a „wan tumisi hogi ten”, nöö u ta abi taanga fanöudu. Möönmöön di taanga di u ta feni a di buku Jesaaja.​—2 Tim. 3:1.

3. (a) Andi Gadu paamusi u a Jesaaja 41:10, di dë di tëkisi u di jaa 2019? (b) Faandi mbei a dë fanöudu fuu ko sabi dee soni dee Gadu paamusi u aki?

³ A di woto aki, woo buta pakisei a dii soni di Jehovah paamusi u a Jesaaja 41:10, di sa mbei di biibi fuu ko möön taanga. Dee dii soni aki da: (1) Jehovah o dë ku u, (2) hën da di  Gadu fuu, ku (3) a o heepi u. A dë fanöudu fuu ko sabi dee soni dee Gadu paamusi * u aki, u di soni ta miti u tu, leti kumafa a bi miti Yoshiko. Soni ta taanga da u tu u di soni ta ko möön hogi a di goonliba aki. So fuu musu ta hoi dou u di dee tiima ta du ku u. Boo taki u dee dii soni di Gadu paamusi u a di tëkisi aki.

4. (a) Andi da di fosu soni u dee soni di Jehovah paamusi u a di tëkisi u di woto aki? (Luku di pisi „wan soni jeti”.) (b) Unfa Jehovah ta lei u taa a lobi u? (c) Unfa i ta si dee soni dee Gadu taki?

⁴ Di fosu soni di Jehovah paamusi u a di tëkisi aki, ta da u taanga. A ta piki u taa: „Na fëëë, biga mi dë ku i.” * Jehovah ta lei u taa a dë ku u u di a ta buta pakisei a u, söseei u di a ta lei u taa a lobi u. Luku andi a taki u lei u unfa a lobi u tjika. A bi taki taa: „Mi ta si unu kuma wan gudu . . . mi ta lesipeki unu, söseei mi lobi unu” (Jes. 43:4). Na wan soni a mundu aki sa mbei Jehovah an lobi dee dinima fëën möön. An ta disa u möönsö (Jes. 54:10). Di lobi di a lobi u, ku di dë di u ku ën dë mati ta mbei u ko abi degihati. A o tjubi u leti kumafa a bi tjubi di mati fëën de kai Abam (nasö Abahamu). Jehovah bi piki ën taa: „Na fëëë e, Abam. Mi hën ta tjubi i.”​—Ken. 15:1.

5, 6. (a) Unfa u du sabi taa Jehovah dë kabakaba u heepi u te fuka ta miti u? (b) Andi u ta lei u di woto u Yoshiko?

⁵ U sabi taa Jehovah kë heepi u ku dee fuka fuu, u di a ta paamusi dee sëmbë fëën taa: „Ee un dë a wata liba, mi o dë ku unu. Ee un musu bazia lio, ma o mbei un singi. Ee un musu pasa a faja dendu, wan o tjuma. Na wan faja o tjuma unu” (Jes. 43:2). Andi dee soni dee sikifi a di tëkisi aki kë taki?

⁶ Jehovah an ta paamusi u taa a o puu dee fuka dee ta mbei di libi ta taanga da u, ma an o disa dee bookohedi fuu dee dë kuma „lio” nasö kuma „faja” u de möön u sö tee taa wa sa dini ën möön, söseei an o disa u ku dee bookohedi dë u nöömö. A ta paamusi u taa a o dë ku u, nöö a o heepi u fuu „pasa” dee taanga ten. Andi Jehovah o du u heepi u? A o  heepi u fu wa fëëë sö möön, sö taa u sa dini ën ku hii u hati go dou, aluwasi woo sa lasi u libi (Jes. 41:13). Yoshiko, bi si di soni aki tu. Di mujëë mii fëën bi taki taa: „A bi ta foondo u seei, te u bi ta luku di fasi fa mama bi dë. U bi ta si tuutuu taa Jehovah bi dëën kötöhati. Mi mama bi ta konda soni u Jehovah ku dee soni dee a paamusi u da dee sösutu ku dee woto sëmbë dee bi dë ku suwaki a di hatiwosu, u te a ko lasi libi.” Andi u ta lei u di woto u Yoshiko? Te u ta biibi di soni di Gadu paamusi u, di a bi taki taa „mi o dë ku i”, nöö woo ko abi di degihati ku di kaakiti di u abi fanöudu fuu hoi dou, hii fa fuka ta miti u.

7, 8. (a) Andi da di u tu soni di Jehovah paamusi u di woo luku, nöö andi di soni aki kë taki? (b) Faandi mbei Jehovah bi piki dee Dju di de bi tja go a katibo taa de an bi musu fëëë? (c) Andi sikifi a Jesaaja 46:3, 4, di bi heepi dee sëmbë u Gadu u de an fëëë?

⁷ Luku di u tu soni di Jehovah paamusi u, di ta da u taanga. A taa: „Na fëëë, biga mi da di Gadu fii.” Andi di soni aki ta lei u te a nama ku bookohedi? Di wöutu di de puu ko „fëëë” a di tëkisi aki, kë taki taa wan sëmbë ta tuwë wojo ta luku kamian kalakala u di a ta fëëë taa wan soni nasö wan sëmbë sa du hogi ku ën.

⁸ Faandi mbei Jehovah bi piki dee Dju dee bi dë a katibo a Babilon taa de an bi musu „fëëë”? Wë u di a bi sabi taa dee sëmbë u di köndë dë bi o ko ta fëëë. Ma andi bi o mbei de ko ta fëëë? Te a bi fika piki faa dou di u 70 jaa di dee Dju bi o dë a katibo, nöö di makiti könuköndë de kai Medo-Pëlsia bi o ko feti ku Babilon. Jehovah bi o tei di könuköndë aki u puu dee sëmbë fëën a katibo a Babilon (Jes. 41:2-4). Di dee sëmbë u Babilon ku dee woto köndë sëmbë u di ten dë, bi jei taa dee felantima u de bi ta ko feti ku de, hën de bi pooba u da deseei taanga u de an musu fëëë. De bi ta piki de na de taa: „Abi degihati.” De bi mbei möön hia pindi gadu ta dini, ku di mëni taa dee gadu dë bi o heepi de (Jes. 41:5-7). Ma a di seei ten dë, Jehovah bi da dee Dju dee bi dë a katibo, kötöhati u di a bi piki de taa: „Isaëli o, ju da di futuboi u mi e, [na dee woto köndë sëmbë ala].  . . Na fëëë, biga mi da di Gadu fii” (Jes. 41:8-10). Hoi a pakisei taa Jehovah bi piki dee sëmbë taa: „Mi da di Gadu fii.” Jehovah bi kë lei dee sëmbë fëën taa an bi dë u de booko de hedi, u di an bi fëëkëtë de, biga a bi dë di Gadu u de jeti, nöö de bi dë sëmbë fëën jeti tu. A bi piki de tu taa: ’Mi o heepi i . . . , nöö mi o puu i a nöutu.’ Wë a musu u dë sö taa dee soni Jehovah bi taki aki bi da dee Dju kötöhati.​—Lesi Jesaaja 46:3, 4.

9, 10. Faandi mbei an dë fuu ta fëëë? Konda wan woto.

⁹ A di ten aki, a hii së u goonliba sëmbë ta booko de hedi, u di möönmöön soni ta ko hogi a di goonliba aki. An dë u taki taa soni ta taanga da u tu. Ma hii fa a dë sö, tökuseei wa musu fëëë. Jehovah ta piki u taa: „Mi da di Gadu fii.” Faandi mbei u sa taki taa di soni di Jehovah taki aki ta heepi u fu wa fëëë?

¹⁰ Boo luku wan woto: Tu sëmbë dë a wan opolani. Wan u de de kai Jim, nöö di wotowan de kai Ben. Ma di de dë te wan pisi, hën di opolani bigi ta seki, u di di ventu ta böö taanga. Baka di dë, hën de jei wan töngö ta piki de taa: „Un banti unuseei hoi. Woo denda go a wanlö bundji dendu.” Di Jim jei di soni dë, hën a bigi ta fëëë seei. Ma di sëmbë di ta tja di opolani bia piki de möön taa: „Wan fëëë e. Di sëmbë di ta tja di opolani hën ta fan ku unu aki.” Di Jim jei sö, hën a seki hedi, hën a taa: „Ambë di womi dë kë ganjan?” Ma  Jim si taa Ben hën an pena ta fëëë seei, hën Jim hakisi ën taa: „Unfa ii du dë piii sö?” Ben booko lafu mukii, hën a piki ën taa: „Biga mi sabi di sëmbë di ta tja di opolani bumbuu. Hën da mi tata!” Baka di dë, hën Ben piki ën taa: „Be mi konda soni u mi tata da i. Mi dë seiki taa te i ko sabi unfa a sa’ u tja opolani tjika, nöö iseei o ko dë piii tu.”

11. Andi u ta lei a di woto u dee tu sëmbë dee bi dë a di opolani?

¹¹ Andi di woto aki ta lei u? Wë a ta lei u taa leti kumafa Ben bi dë piii u di a bi sabi hën tata, sö nöö useei an ta fëëë, u di u sabi di Tata fuu di dë a liba ala bumbuu. U sabi taa a o heepi u aluwasi ee soni ko ta taanga da u seei a dee lasiti daka u di goonliba aki (Jes. 35:4). U ta futoou Jehovah, fëën mbei u sa ta dë fuu söndö fëëë, aluwasi hii dee sëmbë u di goonliba aki ta dë pantapanta (Jes. 30:15). U ta dë fuu kuma Ben tu te u ta piki sëmbë faandi mbei de sa futoou Gadu, sö taa deseei sa dë seiki taa aluwasi un fuka ta miti de, Jehovah o heepi de.

12. (a) Andi da di u dii soni di Jehovah paamusi u di woo luku? (b) Andi u ta pakisei te di Bëibel ta taki u di „maun” u Jehovah?

¹² Luku di u dii soni di Jehovah paamusi u, di Jesaaja bi sikifi. A bi taki taa: „Mi o mbei i ko taanga. Mi o heepi i tuutuu.” Jesaaja bi taki kaa unfa Jehovah bi o da dee sëmbë fëën taanga. A bi taki taa: „Jehovah seei o ko kuma wan gaan fetima, nöö di maun fëën o tii di köndë” (Jes. 40:10). Te di Bëibel ta taki soni u „maun”, hën da a ta taki soni u makiti. Fëën mbei te di Bëibel ta taki taa di ’maun u Jehovah o tii’, nöö a ta mëni u taa Jehovah da wan könu di abi makiti. A bi heepi dee dinima fëën a di ten di pasa, nöö a di ten aki a ta heepi dee sëmbë dee ta futoou ën söseei a ta da de taanga.​—Deto. 1:30, 31; Jes. 43:10.

13. (a) Na un ten Jehovah ta möön hoi hënseei a di soni di a bi paamusi u di a bi taki taa a o mbei u ko taanga? (b) Un soni di Jehovah paamusi u ta da u kaakiti ku degihati?

 ¹³ Möön dee felantima fuu ta du ku u, möön Jehovah ta hoi hënseei a di soni di a paamusi u. A bi taki taa: „Mi o mbei i ko taanga.” A di ten aki, a so köndë u di goonliba, dee felantima fuu ta mbei möiti u tapa di peleikiwooko fuu nasö u tapa di wooko di di ölganisaasi fuu ta du. Hii fa a dë sö, tökuseei wa ta booko u hedi poi. Di soni Jehovah paamusi u ta da u kaakiti ku degihati. A ta paamusi u taa: „Na wan fetilai di de o tei u ko feti ku i, o sa mbei de wini i” (Jes. 54:17). Di soni di Jehovah paamusi u aki ta mbei u pakisei dii fanöudu soni.

14. Faandi mbei an ta foondo u taa dee felantima u Gadu ta du ku u?

¹⁴ Di fosu soni di u musu hoi a pakisei, hën da u di u da bakama u Keesitu mbei u musu sabi taa sëmbë o ta buuse u (Mat. 10:22). Jesosi bi taki taa a dee lasiti daka sëmbë bi o ta du ku dee bakama fëën gaanfa seei (Mat. 24:9; Joh. 15:20). Di u tu soni di u musu hoi a pakisei da di soni di di tjabukama Jesaaja bi taki a fesi. A bi taki taa na buuse nöö dee felantima fuu bi o ta buuse u, ma de bi o ta wooko ku peipei fetilai u ko feti ku u. Dee fetilai aki sa dë di mbei di de ta mbei möiti u ganjan u, di mindi di de ta mindi soni da u, ku di du di de ta du ku u (Mat. 5:11). Jehovah an o tapa dee felantima fuu u de an tei dee fetilai aki u de ko feti ku u (Ef. 6:12; Ako. 12:17). Ma an dë fuu fëëë. Faandi mbei u taki sö?

15, 16. (a) Andi da di u dii soni di u musu hoi a pakisei, nöö unfa Jesaaja 25:4, 5, ta heepi u fuu fusutan di soni aki? (b) Andi o pasa ku dee sëmbë dee ta feti ku u, kumafa Jesaaja 41:11, 12 ta taki?

¹⁵ Boo luku di u dii soni di u musu hoi a pakisei. Jehovah bi taki taa „na wan fetilai” di de o tei u ko feti ku u, „o sa mbei de wini” u. Leti kumafa wan wosu ta tjubi u da wan gaan tjuba, sö nöö Jehovah ta tjubi u te „dee hogihati sëmbë” ta ko du hogi ku u. (Lesi Jesaaja  25:4, 5.) Dee felantima fuu an o sa du hogi ku u u nöömö.​—Jes. 65:17.

¹⁶ Jehovah ta mbei u ko abi möön futoou nëën, u di a ta piki u gbelingbelin andi o pasa ku dee sëmbë „dee hati u de ta boonu” ku u. (Lesi Jesaaja 41:11, 12.) Aluwasi andi dee felantima fuu tei u ko feti ku u, tökuseei di soni di sikifi a Bëibel o pasa tuutuu. Hën da: Jehovah ’o poi de kaba a sösö. De o dëdë.’

17, 18. (a) Konda unfa di lesi di u ta lesi di Bëibel o heepi u fuu möön futoou Gadu. (b) Unfa di pakisei di woo ta pakisei fundu u di tëkisi u di jaa 2019 sa heepi u?

¹⁷ U ta ko futoou Jehovah möön gaanfa te u ta ko sabi ën möön bunu. Di wan kodo fasi fa u sa ko sabi Jehovah möön bunu da te u ta lesi di Bëibel, söseei te u ta pakisei fundu u dee soni dee u lesi. Di Bëibel ta konda sömëni woto u di fasi fa Jehovah bi tjubi dee sëmbë fëën a di ten di pasa. Dee woto aki ta mbei u dë seiki taa a o ta heepi u a di ten aki tu.

¹⁸ Boo luku di fasi fa Jesaaja bi taki taa Jehovah ta tjubi u. Jesaaja bi taki taa Jehovah dë kuma wan sikapuma, nöö dee dinima u Gadu dë kuma sikapu mii. Jesaaja ta taki u Jehovah taa: „Ku hën maun a o tja dee sikapu mii ko makandi, nöö a o ta tja de a hati mindi” (Jes. 40:11). Te u ta si fa Jehovah ta heepi u, nöö wa ta fëëë. U di di köni saafu di dë u futoou an kë fuu fëëë, hii fa sömëni fuka ta miti u, mbei de buta Jesaaja 41:10 kuma di tëkisi u di jaa 2019. A ta taki taa: „Na fëëë, biga mi da di Gadu fii.” I musu ta pakisei fundu u dee soni dee sikifi aki. De o heepi i fii sa pasa dee tesi dee o miti i a di ten di ta ko.