WAN soni bi pasa a wan pikisaba mamate. A bi dë 24 u jailiba u di jaa 2018. Dee baaa ku dee sisa u di Bëtëli na Amëëkanköndë ku dee u di Bëtëli a Kanada, bi wai seei di de jei taa Baaa Kenneth Cook, Jr. toon wan u dee baaa u di Tii Kulupu u Jehovah Kotoigi.

De pai Baaa Cook a di kamian de kai Pennsylvania di dë na Amëëkanköndë. A di kamian dë de kiijëën tu. A bi ko sabi soni u di tuutuu lei di wan mii fëën kalasi bi peleiki dëën ufö a kaba di siköö ka a bi nango. A bi tei dopu a 7 u höndima-liba u di jaa 1980. A bi bigi ku di hii-ten diniwooko a 1 u wajamaka-liba u di jaa 1982. A bi dë wan kowoonu pionili. Baka di a du di pioniliwooko tu jaa longi, hën de kai ën faa go wooko a di Bëtëli u Wallkill, di dë a New York. A bi bigi wooko ala a 12 u tinimu-liba u di jaa 1984.

A dee 25 jaa dee Baaa Cook bi ta wooko a Bëtëli, a bi ta du peipei wooko ka de bi ta doloki buku, söseei a bi ta wooko a dee kantoo tu. Hën ku hën mujëë, Jamie, bi tööu a di jaa 1996, nöö de bi ta wooko makandi a Bëtëli a Wallkill. A tuwalufumu-liba u di jaa 2009, de bi manda Baaa Cook ku hën mujëë go a Patterson, New York, a di kamian de kai Watchtower Educational Center. Ala Baaa Cook bi ta wooko ka de ta piki dee hakisi u sëmbë dee kë ko sabi so soni. A piki-deewei-liba u di jaa 2016, de bi go a Wallkill baka, ma de an bi dë ala longi. Hën de bi manda Baaa Cook ku hën mujëë go a Brooklyn, New York. Baka feifi liba, hën de foloisi go a di hedikantoo di dë a Warwick, New York. A jailiba u di jaa 2017, hën de buta Baaa Cook u heepi a di Sikifi Komite u di Tii Kulupu.