1. Andi wan njönku kijoo bi ko fusutan a wan taki di bi hoi a wan könklësi a di jaa 1935?

WAN njönku kijoo di bi abi 18 jaa, bi dopu a di jaa 1926. Hën mama ku hën tata bi dë Bëibel Öndösukuma. Sö de bi ta kai dee Jehovah Kotoigi a di ten dë. De bi pai dii womi mii ku tu mujëë mii, nöö de bi heepi dee mii aki u de ko ta dini Jehovah Gadu, söseei u de ta djeesi Jesosi Keesitu. Di njönku kijoo aki bi ta njan di bëëë ta bebe di win te de bi ta mëni di dëdë u Jesosi. Sö dee Bëibel öndösukuma bi guwenti a di ten dë. Ma soni bi ko tooka a di njönku kijoo aki libi, di a bi jei wan taki di de bi hoi. Di në u di taki da: „Dee Gaan hia sëmbë.” Di baaa di bi hoi di taki aki da Rutherford. A bi hoi di taki aki a wan könklësi a Washington, na Amëëkanköndë a di jaa 1935. Andi dee Bëibel Öndösukuma bi ko sabi a di könklësi dë?

2. Andi Baaa Rutherford bi tja ko a limbo a di taki di a bi hoi?

² A di taki di Baaa Rutherford bi hoi, a bi taki ambë da „dee gaan hia sëmbë” dee Akoalimbo 7:9 ta taki u de. Ufö di ten dë, de bi ta biibi taa dee sëmbë u di kulupu aki seei bi o go libi a liba ala, ma de an bi o hei kuma dee woto salufuwan. A di taki di Baaa Rutherford bi hoi, a bi tei di Wöutu u Gadu u lei taa dee gaan hia sëmbë an o go libi a liba ala, ma de da dee woto sikapu dee bi o pasa di „gaan fuka” libilibi, u de libi a goonliba aki u teego (Ako. 7:14). Jesosi bi taki taa: ’Mi abi oto sikapu dee an dë a di hipi aki dendu e, nöö deseei mi musu tja ko mökisi ku dee disi tu. Biga de o jei di töngö u mi, nöö te  de jei ën nöö de o piki ko a mi, nöö woo dë wan kodo hipi sikapu ku wan kodo sikapuma’ (Joh. 10:16). Dee woto sikapu aki, da dee dinima u Jehovah dee o libi u teego a di Paladëisi a goonliba aki (Mat. 25:31-33, 46). Boo Luku unfa soni bi ko tooka da dee sëmbë u Jehovah, u di de bi ko ta fusutan dee lei u Bëibel möön bunu. Soni bi tooka tu da di njönku baaa fuu di bi abi 18 jaa.​—Ps. 97:11; Nöng. 4:18. *

3-4. Andi dusudusu sëmbë bi ko fusutan a di könklësi di bi hoi a di jaa 1935, nöö andi bi heepi de u de ko fusutan di soni dë?

³ Sëmbë bi wai seei a di könklësi, di di baaa di bi ta hoi di taki bi taki taa: „Sëmbë dë aki di ta wakiti u de libi u teego a goonliba aki ö? Un hopo taanpu i si!” Wan baaa di bi dë a di könklësi bi taki taa söwan 20.000 sëmbë bi sai dë. Nöö a bi si möön leki hafu u dee sëmbë dë hopo taanpu di di baaa bi taki di soni dë. Baka di dë, hën Baaa Rutherford bi taki taa: „Luku dee gaan hia sëmbë!” Nöö hën hii sëmbë naki maun. Dee sëmbë dee bi hopo taanpu bi ko fusutan taa Gadu an bi tei de u de go libi a liba ala. De bi ko sabi taa de an bi dë salufuwan. A di woto daka u di könklësi, hën 840 sëmbë dopu. Gaansë u de bi dë sëmbë u dee woto sikapu.

⁴ Baka di taki dë, nöö di njönku baaa di u bi taki soni fëën, an bi ta njan di bëëë, ta bebe di win möön, te u bi ta mëni di dëdë u Jesosi. Wan baaa di bi abi sakafasi bi taki wan soni. Nöö di soni di a bi taki bi kai ku sömëni sëmbë. A bi taki taa: „Di mëni di u bi mëni di dëdë u Jesosi a di jaa 1935, bi dë di lasiti pasi di mi bi njan di bëëë, bebe di win. Mi bi ko fusutan taa na Gadu hën bi salufu mi ku di santa jeje fëën u mi go libi a liba ala. Ma mi bi abi di biibi u libi a goonliba aki u teego, söseei u heepi mbei di goonliba toon wan paladëisi” (Lom. 8:16, 17; 2 Kol. 1:21, 22). Wë sensi di ten dë, dee gaan hia sëmbë bi ko möön hia, nöö de bi ta wooko makandi ku dee salufuwan.

5. Unfa Jehovah ta si dee sëmbë dee an ta njan di bëëë ta bebe di win möön, te u ta mëni di dëdë u Jesosi?

⁵ Unfa Jehovah bi ko ta si dee sëmbë dee an bi ta njan di bëëë ta bebe di win möön, baka di jaa 1935? Ma unfa Jehovah ta si wan dopudopu Kotoigi a di ten aki, di bi ta njan di bëëë ta bebe di win, ma bakaten a ko fusutan taa an dë wan salufuwan? (1 Kol. 11:28) So sëmbë bi ta njan di bëëë ta bebe di win, u di de an bi kaba fusutan so soni sö bunu. Ma ee bakaten de bi ko tei taa wan föutu de bi mbei, hën de an ta njan di bëëë ta bebe di win möön, söseei ee de ta dini Jehovah ku hii de hati go dou, nöö seiki Jehovah o tei de kuma sëmbë u dee woto sikapu. Hii fa dee sëmbë aki an ta njan di bëëë ta bebe di win möön, tökuseei de nango mëni di dëdë u Jesosi, u di de ta tei di soni di Jehovah ku Jesosi du da de u bigi.

6. Andi Jesosi bi piki dee ëngëli u de du?

⁶ U di di gaan fuka o ko abiti möön, mbei a bunu fuu luku andi Akoalimbo kapitë 7 ta taki u dee salufu Keesitu sëmbë ku dee gaan hia sëmbë. Jesosi ta piki dee ëngëli u de tapa dee fö ventu u de an böö ko booko di goonliba. Dee ëngëli aki an o disa dee ventu aki ko booko di goonliba, solanga hii dee salufu Keesitu  sëmbë an feni di sitampu u de taa Jehovah feni de u bunu (Ako. 7:1-4). Ee dee salufuwan aki hoi deseei a Gadu, nöö de o ko dë könu ku mindima a liba ala (Ako. 20:6). Jehovah, Jesosi, ku dee ëngëli, o wai seei te de o si taa dee salufuwan aki feni di paka u de go libi a liba ala.

7. Ambë Johanisi bi si a wan wojolimbo sunjan, te u luku Akoalimbo 7:9, 10, nöö andi de bi ta du? (Luku di peentje u di kafiti.)

⁷ Baka di Johanisi bi taki u dee könu ku dee mindima aki, hën a bi si wan woto soni di bi dëën gaan piizii seei. A bi si „wanlö gaan hia sëmbë” di pasa Amagedon libilibi. U sabi taa 144.000 salufuwan o go libi a liba ala, ma wa sabi un mëni dee gaan hia sëmbë aki o dë. (Lesi Akoalimbo 7:9, 10.) Dee gaan hia sëmbë aki bi „bisi weti djapona faan”. Di soni dë ta lei taa de bi ta dini Gadu a wan gbelingbelin fasi a di goonliba u Saatan, nöö de bi hoi deseei a Gadu ku Keesitu (Jak. 1:27). Dee sëmbë aki bi ta wai ta bai ta gafa Jehovah ku Jesosi, u di de bi heepi de. Boiti di dë, de bi dë ku palo maun a maun tu. Di soni dë bi ta lei taa de bi wai taa Jehovah bi buta Jesosi ko könu.​—Luku Joh. 12:12, 13.

8. Andi Akoalimbo 7:11, 12 ta taki u dee sëmbë u di wosudendu u Jehovah di dë a liba ala?

⁸ Lesi Akoalimbo 7:11, 12. Andi bi pasa a liba ala di de bi si dee gaan hia sëmbë? Wë Johanisi bi si fa hii dee sëmbë u di wosudendu u Jehovah di dë a liba ala, ta wai ta gafëën, di de si dee gaan hia sëmbë. Wë de o wai seei te de o si fa dee gaan hia sëmbë o pasa di gaan fuka libilibi.

9. Andi dee gaan hia sëmbë ta du a di ten aki, te u luku Akoalimbo 7:13-15?

⁹ Lesi Akoalimbo 7:13-15, NW. Johanisi bi taki taa dee gaan hia sëmbë, bi „wasi di langa djapona u de a di buuu u di sikapu mii dendu ko weti faan”. Di soni aki kë taki taa de dë limbolimbo a Jehovah wojo (Jes. 1:18). Dee sëmbë aki da sëmbë di buta de libi a Gadu maun, hën de dopu ko dë bakama u Keesitu. De ta biibi taa Jesosi paka paima da de, nöö de ku Jehovah dë mati tu (Joh. 3:36; 1 Pet. 3:21). Dee soni aki mbei de sa „taanpu a Gadu fesi ta dini ën ndeti ku didia” a goonliba aki. A di ten aki, dee sëmbë aki ta buta di Könuköndë u Gadu a di fosu kamian a de libi, nöö de ta du di peleikiwooko möön gaanfa.​—Mat. 6:33; 24:14; 28:19, 20.

10. Fuun soni dee gaan hia sëmbë dë seiki, nöö un soni di Gadu paamusi de, o pasa tuutuu?

¹⁰ Dee gaan hia sëmbë dee o pasa di gaan fuka libilibi, dë seiki taa soni o ta waka bunu da de hii juu, u di „di sëmbë di sindo a di könubangi o tjubi de, u soni an musu du de möön”. Nöö di soni di Gadu bi paamusi dee sëmbë aki, o pasa tuutuu. Di Bëibel bi taki taa: „[Gadu] o feki hiniwan u de wojowata puu a de, nöö dëdë an o dë möön. Na wan sëmbë o tjali nasö bai kai wolo, söseei pen an o de möön.”​—Ako. 21:3, 4.

11-12. (a) Un wini dee gaan hia sëmbë o feni kumafa Akoalimbo 7:16, 17, ta taki? (b) Andi dee woto sikapu sa ta du te u ta mëni di dëdë u Jesosi, nöö faandi mbei de sa ta du ën?

¹¹ Lesi Akoalimbo 7:16, 17. A di ten aki, so u dee dinima u Jehovah ta tja hangi pena, u di möni soni an ta waka bunu a di köndë ka de ta dë, nasö u di feti ta feti a di köndë ka de ta dë. Wotowan dë a dunguwosu u di biibi u de hedi. Ma dee gaan hia sëmbë ta wai, u di de sabi taa te de pasa di gaan fuka libilibi, nöö hii juu de o ta feni soni u njan, söseei Jehovah o ta lei de soni. Te Jehovah o poi di goonliba u Saatan aki, nöö a o tjubi dee gaan hia sëmbë aki. Te di gaan fuka pasa, nöö Jesosi o tja dee sëmbë dee pasa libilibi, go ka de sa „bebe di wata di ta da libi u teego”. Pakisei di soni aki: A sa pasa taa dee gaan hia sëmbë aki an dëdë  wan daka. Wan gaan bunu seei de o feni!​—Joh. 11:26.

¹² Dee woto sikapu o feni wan gaan bunu, nöö de ta tei ën u bigi taa Jehovah ku Jesosi o mbei de feni di bunu dë! Jehovah an tei de u de go libi a liba ala. Ma di soni dë an kë taki taa Jehovah ta si de kuma de möön lagi. Dee gaan hia sëmbë ku dee salufuwan tuu sa ta gafa Gadu ku Keesitu. Wan fasi fa de ta du di soni aki, da te de ta hoi di Ndeti Njanjan u Masa.

13-14. Faandi mbei dee salufuwan dee dë a goonliba aki jeti, ku dee woto sikapu tuu ta mëni di dëdë u Jesosi?

¹³ A dee ten aki, tei i konda dusu sëmbë di go mëni di dëdë u Jesosi, nöö 1 u de nöö ta njan di bëëë ta bebe di win. Fuu taki ën, nöö gaansë u dee kemeente an ta abi sëmbë di ta njan di bëëë ta bebe di win. Di soni aki ta lei taa gaansë u dee sëmbë dee nango mëni di dëdë u Jesosi, o libi a goonliba aki. Wë nöö faandi mbei dee sëmbë aki nango mëni di dëdë u Jesosi? Wë di seei soni di ta mbei sëmbë nango te wan mati u de ta tööu, hën nöö ta mbei dee sëmbë aki nango mëni di dëdë u Jesosi tu. Te tu sëmbë ta tööu, nöö dee mati u de nango a di tööu u de, u di de kë lei de taa de lobi de, söseei u di de kë heepi de a soni. Wë sö nöö dee woto sikapu nango mëni di dëdë u Jesosi, u di de kë lei Jesosi ku dee salufuwan taa de lobi de, söseei taa de kë heepi de. De nango tu u di de kë lei taa de ta tei ën u bigi taa Jesosi ko dëdë da de, sö taa de sa libi u teego a goonliba aki.

¹⁴ Wan woto fanöudu soni di mbei dee woto sikapu nango mëni di dëdë u Jesosi, hën da u di de kë piki Jesosi buka. Di Jesosi bi hoi di Ndeti Njanjan u Masa ku dee apösutu fëën, hën a bi piki de taa: „Un musu ta mëni di dëdë di mi o dëdë da unu” (1 Kol. 11:23-26). Di soni dë mbei dee woto sikapu ta mëni di dëdë u Jesosi, nöö de o ta du di soni aki u te na wan salufuwan dë a goonliba aki möön. Boiti di dë, de ta kai hii sëmbë u de ko mëni di dëdë u Masa Jesosi ku de.

15. Andi u sa ta du u gafa Gadu ku Keesitu te u ta mëni di dëdë u Jesosi?

¹⁵ Te u ta kanda, söseei te u ta begi te u ta mëni di dëdë u Jesosi, nöö a di lö fasi dë u ta  feni di okasi u gafa Gadu ku Keesitu. Di taki di de o hoi u mëni di dëdë u Jesosi di jaa aki da: „Tei di soni di Gadu ku Keesitu du da i u bigi!” Di taki aki o heepi u fuu ko ta möön tei dee soni dee Jehovah ku Keesitu du da u u bigi. Di bëëë dë kuma di sinkii u Jesosi, nöö di win dë kuma di buuu fëën. Di pasa di de ta pasa di bëëë ku di win, ta mbei u mëni dee soni aki. U ta toona mëni tu di lei di Jehovah lei taa a lobi u, u di a manda di Womi Mii fëën ko dëdë da u, sö taa u sa feni libi (Mat. 20:28). Hii dee sëmbë dee lobi di Tata fuu a liba ala ku di Womi Mii fëën, o kë ko mëni di dëdë u Jesosi.

16. Na un fasi u sa taki taa dee salufuwan ku dee woto sikapu dë di wan?

¹⁶ So soni tooka a dee salufu Keesitu sëmbë ku dee woto sikapu. Ma Jehovah an lobi wan kulupu möön di wotowan. Wë u sa taki sö, u di a manda di Womi Mii fëën di a lobi, ko dëdë da dee salufuwan, ku dee woto sikapu tuu. Di soni di tooka a dee tu kulupu aki, hën da wan u de o go libi a liba ala, nöö di wotowan o libi a goonliba aki. De tuu musu hoi deseei a Gadu ku Keesitu (Ps. 31:23). A bunu fuu hoi a pakisei tu taa Gadu ta da hiniwan sëmbë di santa jeje fëën kumafa di sëmbë dë abi ën fanöudu, aluwasi ee di sëmbë dë wan salufuwan nasö wan woto sikapu.

17. Andi dee salufuwan dee dë a goonliba aki jeti ta wakiti?

¹⁷ Te de pai wan mii, nöö an ta dë salufuwan fa i si de pai ën dë. Gadu hën ta salufu wan sëmbë. Dee salufuwan aki ta pakisei di go di de o go libi a liba ala, de ta begi fëën, nöö de dë seei ta wakiti di ten ka de o go libi a liba ala. De an saanfa sinkii u de o dë te de o dë a liba ala (Fil. 3:20, 21; 1 Joh. 3:2). Hii fa a dë sö, tökuseei de dë seei ta wakiti di ten ka de o si Jehovah, Jesosi, dee ëngëli, ku dee woto salufuwan. Söseei de ta wakiti u de tii makandi ku Jesosi ku dee woto salufuwan aki.

18. Andi dee woto sikapu dë ta wakiti?

¹⁸ Dee woto sikapu ta wakiti di ten ka de o libi u teego a goonliba aki. Di soni aki da wan soni di hii sëmbë bi o kë (Peleik. 3:11). De ta wakiti di ten ka de o mbei hii di goonliba ko toon wan paladëisi, ka de o ta mbei u deseei wosu, ka de o ta paandi soni, söseei ka de o ta kiija miii di an o ta suwaki (Jes. 65:21-23). De ta wakiti di ten ka de o sa waka luku dee kamiankamian u goonliba. De o sa ta subi dee waiti kuun, de o sa ta waka a dee matu, söseei de o sa ta luku dee waitiwaiti soni dee dë a wata basu. Boiti di dë, de o sa ko sabi möön soni u dee soni dee Jehovah mbei. Ma di soni di o mbei de o dë möön waiwai, hën da u di de  ku Jehovah o ta ko dë möön gaan mati daka fu daka.

19. Un okasi u ta feni te u ta mëni di dëdë u Jesosi, nöö na un daka woo ni ën di jaa aki?

¹⁹ Jehovah ta paamusi hiniwan u dee dinima fëën taa de o feni gaan bunu a di ten di ta ko (Jel. 29:11). Te dee salufuwan ku dee woto sikapu ta ko makandi u mëni di dëdë u Jesosi, nöö de ta feni di okasi u gafa Gadu ku Jesosi u dee soni di de du da de, u di de seeka soni da de u de sa libi u teego. Di mëni di u ta mëni di dëdë u Keesitu, da di möön fanöudu komakandi di u dee Keesitu sëmbë ta hoi hiniwan jaa. Di jaa aki woo hoi a ën a Sata 27 u gaanliba u 2021 baka te sonu go. Sömëni sëmbë o sa mëni di dëdë u Jesosi di jaa aki, söndö u soni tapa de. Wotowan o sa mëni ën hii fa sëmbë ta du ku de. So u de o mëni ën a dunguwosu. Jehovah, Jesosi, dee ëngëli, ku dee salufuwan dee weki go a libi ala, o dë ta luku fa woo ta mëni di dëdë u Jesosi. Fëën mbei, be hiniwan kemeente, hiniwan kulupu, ku hiniwan sëmbë, dë waiwai te woo mëni di dëdë u Jesosi!