1-2. (a) Na un ten u ta möön pakisei wan sëmbë fuu di dëdë? (b) Andi Jesosi bi du di ndeti ufö a dëdë?

 ALUWASI un longi wan sëmbë fuu dëdë, tökuseei wa ta fëëkëtëën. U ta möön pakisei di sëmbë te di daka dou di a bi dëdë.

² Hiniwan jaa u ta ko makandi ku milionmilion sëmbë fuu mëni di dëdë u Jesosi Keesitu, di sëmbë di u lobi gaanfa seei (1 Pet. 1:8). U ta ko makandi u mëni di sëmbë di paka ku hën libi, u puu u a zöndu ku dëdë basu (Mat. 20:28). Jesosi bi kë u dee bakama fëën ta mëni di dëdë fëën. Di ndeti ufö a dëdë, hën a seti wan apaiti ndeti njanjan, hën a taki taa: „Sö nöö un musu ta du nöömö, fuun ta mëni di dëdë di mi o dëdë da unu.”​—Luk. 22:19.

3. Andi woo luku a di woto aki?

³ Wantu sëmbë nöö u dee sömëni sëmbë dee ta mëni di dëdë u Keesitu, o go a liba ala. Ma dee milionmilion sëmbë dee o libi a goonliba aki seei ta mëni di dëdë fëën tu. A di woto aki woo luku faandi mbei dee tu kulupu aki tuu ta hangi u mëni di dëdë u Jesosi hiniwan jaa. Woo luku söseei un bunu woo feni te u ta mëni ën makandi. Ma woo taki fosu faandi mbei dee sëmbë dee o go a liba ala ta mëni di dëdë u Jesosi.

4. Faandi mbei dee sëmbë dee o go a liba ala ta njan di bëëë, ta bebe di win, te u ta mëni di dëdë u Jesosi?

⁴ Hiniwan jaa dee sëmbë dee o go a liba ala ta hangi u mëni di dëdë u Jesosi, kuma sëmbë di ta njan di bëëë, söseei di ta bebe di win. Faandi mbei de ta njan di bëëë, söseei faandi mbei de ta bebe di win? U piki di soni aki, nöö boo luku andi bi pasa di ndeti ufö Jesosi dëdë. Baka di Pasika piizii, hën Jesosi seti wan woto soni di u sabi kuma di Ndeti Njanjan u Masa. A mbei di bëëë ku di win pasa a hii dee 11 apösutu fëën dee bi hoi deseei nëën, hën a taa be de njan nöö de bebe. Jesosi bi piki de soni u tu buka. A bi taki soni u di njunjun buka, ku di buka di a bi mbei ku de taa de bi o tii makandi ku ën a di Könuköndë * (Luk. 22:19, 20, 28-30). Dee tu buka aki mbei taa dee apösutu ku woto sëmbë jeti sa dë könu ku mindima a liba ala (Ako. 5:10; 14:1). Dee salufuwan dee dë a goonliba aki jeti, de dë a dee tu buka aki dendu, nöö de wanwan nöö sa njan di bëëë, bebe di win, te u ta mëni di dëdë u Jesosi.

5. Andi dee salufuwan sabi u di gaan bunu di de o feni?

⁵ Wan woto soni di mbei taa dee salufuwan ta hangi u mëni di dëdë u Jesosi, hën da u di de abi di okasi u kai pakisei a di bunu di de o feni. Jehovah da de di apaiti gaandi u de libi u teego a liba ala, söseei u de tii makandi ku Jesosi Keesitu ku dee 144.000 wotowan. Ma di möön gaan soni di de o feni hën da de o dë makandi ku Jehovah Gadu seei! (1 Kol. 15:51-53; 1 Joh. 3:2) Dee salufuwan sabi taa Gadu kai de u de sa go feni dee gaan bunu aki a liba ala. Ma u de sa go a liba ala, de musu hoi dou u te de dëdë (2 Tim. 4:7, 8). Dee salufuwan ta wai gaanfa seei te de ta pakisei di gaan bunu di de o feni a liba ala (Tit. 2:13). Ma unfa a dë ku dee „woto sikapu”? (Joh. 10:16) Faandi mbei de ta mëni di dëdë u Jesosi?

6. Faandi mbei dee woto sikapu ta mëni di dëdë u Jesosi hiniwan jaa?

⁶ Dee woto sikapu an ta njan di bëëë, ta bebe di win, ma tökuseei de ta wai taa de sa mëni di dëdë u Jesosi tu. A di jaa 1938, hën de kai dee sëmbë dee o libi a goonliba aki u de ko mëni di dëdë u Jesosi u di fosu pasi. Di Wachttoren u 1 u gaanliba u di jaa 1938 bi taki taa: „A bi o bunu seei ee dee woto sikapu sa ko a di komakandi aki, u deseei si fa soni ta waka. . . . A dë wan piizii ten da de tu.” Leti kumafa dee sëmbë di de kai u go a wan tööu ta wai u dë a di tööu, sö nöö dee woto sikapu ta wai te de ta si fa soni ta waka te de ta mëni di dëdë u Jesosi tu.

7. Faandi mbei dee woto sikapu ta hangi u jei di taki di ta hoi te u ta mëni di dëdë u Jesosi?

⁷ Dee woto sikapu seei ta kai pakisei a di gaan bunu di de o feni. De ta hangi u jei di taki di ta hoi te u ta mëni di dëdë u Jesosi. Di taki aki ta mbei de buta pakisei a di soni di Keesitu ku dee 144.000 sëmbë dee o tii makandi ku ën, o du a di pisiten u di Dusu Jaa Tii, da dee sëmbë dee ta hoi deseei a Gadu. Te di Könu u de Jesosi Keesitu o tii, nöö dee sëmbë dee o tii a liba ala o heepi ën mbei di goonliba ko toon wan paladëisi. Nöö dee sëmbë dee ta piki Gadu buka o ko dë sëmbë di an abi zöndu möön. Dee milionmilion woto  sëmbë dee ta mëni di dëdë u Jesosi, ta wai gaanfa seei te de ta pakisei di ten ka so u dee tjabukama woto dee sikifi a Bëibel o pasa tuutuu. Wantu u dee tjabukama woto aki sikifi a Jesaaja 35:5, 6; 65:21-23; ku Akoalimbo 21:3, 4. Te de ta pakisei fa soni o dë da de ku dee sëmbë u de a di njunjun goonliba, nöö di biibi u de ta ko möön taanga, söseei de ta dë kabakaba u dini Jehovah go dou.​—Mat. 24:13; Gal. 6:9.

8. Andi da wan woto soni di mbei dee woto sikapu ta mëni di dëdë u Jesosi?

⁸ Boo luku wan woto soni di mbei dee woto sikapu ta mëni di dëdë u Jesosi. De ta lei taa de lobi dee salufuwan, söseei taa de ta wooko makandi ku de. Di Wöutu u Gadu bi taki a fesi taa dee salufuwan ku dee sëmbë dee o libi a goonliba aki o ta wooko makandi. Unfa sö? Boo luku wantu woto.

9. Unfa dee woto sikapu ta si dee salufuwan, te u luku di tjabukama woto di sikifi a Sakalia 8:23?

⁹ Lesi Sakalia 8:23. Di tjabukama woto aki ta taki unfa dee woto sikapu ta si dee salufu baaa ku sisa u de. Dee wöutu „wan Dju” ku dee wöutu „ku unu” ta taki u di wan seei kulupu sëmbë. Dee sëmbë dë da dee salufuwan dee dë a goonliba aki jeti (Lom. 2:28, 29). Dee „teni womi dee kumutu a tookatooka nasiön, di ta fan peipei töngö” da dee woto sikapu. De ta „kisi wan Dju panjan gbaa hoi”. Hën da de ta hoi deseei a dee salufuwan, u di de ta dini Gadu makandi ku de. Fëën mbei a di ndeti di u ta mëni di dëdë u Jesosi, dee woto sikapu ta dë makandi ku dee salufuwan. A sö wan fasi de ta lei taa de ta hoi deseei a de.

10. Andi Jehovah du u mbei di tjabukama woto di sikifi a Ezekiëli 37:15-19, 24, 25 pasa tuutuu?

¹⁰ Lesi Ezekiëli 37:15-19, 24, 25. Jehovah mbei di tjabukama woto aki pasa tuutuu, u di a mbei dee salufuwan ku dee woto sikapu ta wooko makandi. Di tjabukama woto aki ta taki u tu pau. Dee sëmbë dee o go libi a liba ala dë kuma di pau „u Juda” (a di lö dë dee Könu u Isaëli bi ta kumutu), nöö dee sëmbë dee o libi a goonliba aki dë kuma di pau „u Efalahim”. * Jehovah bi o tja dee sëmbë u dee tu kulupu aki ko a wan sö taa de sa ko dë „wan kodo pau”. Di soni aki kë taki taa de bi o ta dini Gadu makandi, nöö di Könu u de Jesosi Keesitu, hën bi o ta tii de. Dee salufuwan ku dee woto sikapu an ta mëni di dëdë u Jesosi paatipaati. Ma hiniwan jaa de ta mëni ën makandi, kuma „wan kodo ipi sikapu”, di „wan kodo sikapuma” ta tii.​—Joh. 10:16.

11. Unfa dee sikapu dee Jesosi bi taki soni u de a Mateosi 25:31-36, 40, ta lei taa de ta wooko makandi ku dee baaa u Keesitu?

¹¹ Lesi Mateosi 25:31-36, 40. Dee sikapu dee Jesosi bi taki soni u de, da dee sëmbë dee ta libi a wan leti fasi a di kaba pisiten u di goonliba aki, söseei dee o feni di libi u teego a goonliba aki. Dee sëmbë aki da dee woto sikapu. De ta wooko makandi ku dee baaa u Keesitu dee dë a goonliba aki jeti, u de du di gaan wooko di de ta du. Di wooko dë da di peleikiwooko di u ta du a hii di goonliba, u heepi sëmbë u de toon bakama u Jesosi.​—Mat. 24:14; 28:19, 20.

12-13. Andi da wantu fasi jeti fa dee woto sikapu ta lei taa de ta wooko makandi ku dee baaa u Keesitu?

¹² Hiniwan jaa te u ta mëni di dëdë u Jesosi, nöö sömëni wiki a fesi dee woto sikapu ta wooko makandi ku dee baaa u Keesitu u di de ta heepi de kai sëmbë u de ko mëni di dëdë u Jesosi makandi ku de. (Luku di pisi „ I ta seeka soni a fesi u mëni di dëdë u Jesosi ö?”)  Söseei de ta heepi seeka dee soni dee dë fanöudu u de sa mëni di dëdë u Jesosi a hii dee kemeente, aluwasi ee a so kemeente salufuwan an dë. Dee woto sikapu ta wai seei u heepi dee baaa u Keesitu a di lö fasi aki. Dee sikapu aki sabi taa Jesosi ta si hii dee wooko di de ta du da dee baaa fëën, kuma hën de ta du ën da.​—Mat. 25:37-40.

¹³ Andi da wantu soni jeti di ta mbei taa hii u tuu ta mëni di dëdë u Jesosi, hii fa wa o libi a di wan seei kamian?

14. Unfa Jehovah ku Jesosi lei u taa de lobi u gaanfa seei?

¹⁴ U ta tei di fasi fa Jehovah ku Jesosi lei u taa de lobi u u bigi. Sömëni fasi dë fa Jehovah lei u taa a lobi u, ma wan u dee fasi aki dë apaiti möön hii de wotowan. Di möön apaiti fasi fa Jehovah lei u taa a lobi u, hën da di manda di a manda di Womi Mii fëën ko dëdë da u (Joh. 3:16). Jesosi seei lei taa a lobi u, u di a bi dë kabakaba u dëdë da u (Joh. 15:13). Nöiti woo sa toona paka Jehovah ku Jesosi u di fasi fa de lei u taa de lobi u. Ma u sa lei de taa u ta tei di soni di de du da u u bigi, ku di fasi fa u ta libi hiniwan daka (Kol. 3:15). Söseei u ta mëni di dëdë u Jesosi, u di u kë mëni di lobi di de lei taa de lobi u, söseei u di u kë lei de taa u lobi de tu.

15. Faandi mbei dee salufuwan ku dee woto sikapu tuu ta tei di lusupaima u bigi?

¹⁵ U ta tei di lusupaima u bigi (Mat. 20:28). Di lusupaima ta mbei taa dee salufuwan o sa feni gaan bunu, nöö de ta tei ën u bigi seei. U di de ta biibi taa Jesosi paka paima da de, mbei Jehovah ta si de kuma sëmbë di ta du soni a wan leti fasi. Fëën mbei a tei de ko miii fëën (Lom. 5:1; 8:15-17, 23). Dee woto sikapu seei ta tei di lusupaima u bigi. U di de ta biibi taa Jesosi paka paima da de, mbei de sa dini Gadu ku wan limbo háti, de sa du wooko dëën, söseei de o sa „pasa di gaan fuka libilibi” (Ako. 7:13-15). Wan fasi fa dee salufuwan ku dee woto sikapu ta lei taa de ta tei di lusupaima u bigi, hën da te de ta mëni di dëdë u Jesosi hiniwan jaa.

16. Andi da wan woto soni di mbei u ta mëni di dëdë u Jesosi?

¹⁶ Wan woto soni di mbei u ta mëni di dëdë u Jesosi, hën da u di u kë piki Jesosi buka. Aluwasi naasë woo libi a di ten di ta ko, tökuseei hii u tuu kë du di soni di Jesosi bi taki taa u musu du. A bi taki taa: „Nöö sö fuun ta du nöömö fuun ta mëni mi e.”​—1 Kol. 11:23, 24.

17. Unfa di mëni di u ta mëni di dëdë u Jesosi, ta mbei u ku Jehovah ko dë möön gaan mati?

¹⁷ U ku Jehovah ta ko dë möön gaan mati (Jak. 4:8). Kumafa u bi si kaa, di mëni di u ta mëni di dëdë u Jesosi ta da u pasi fuu pakisei dee gaan bunu di Jehovah o da u a di ten di ta ko. Söseei a ta da u pasi fuu kai pakisei a di fasi fa a lei taa a lobi u (Jel. 29:11; 1 Joh. 4:8-10). Te u ta pakisei dee gaan bunu dee Jehovah Gadu o da u a di ten di ta ko, söseei te u ta pakisei di lobi di a lobi u, nöö u ta ko möön lobi ën, söseei u ku ën ta ko dë möön gaan mati.​—Lom. 8:38, 39.

18. Andi woo sa du te u ta kai pakisei a dee soni dee Jesosi bi ta du?

¹⁸ U ta dë kabakaba u djeesi Jesosi (1 Pet. 2:21). Ufö u mëni di dëdë u Jesosi, u ta lesi dee pisi u Bëibel dee ta konda da u andi bi pasa a di lasiti wiki di Jesosi bi dë a goonliba. Söseei u ta lesi dee pisi dee ta taki soni u di dëdë fëën, ku di weki di Gadu weki ën ko a libi baka. Boiti di dë, di taki di de ta hoi a di ndeti  di u ta mëni di dëdë u Jesosi, ta heepi u fu wa fëëkëtë di lobi di Jesosi lobi u (Ef. 5:2; 1 Joh. 3:16). Te u ta lesi soni di ta lei u unfa Jesosi bi ta du soni, söseei te u ta kai pakisei a dee soni dë, nöö de ta da u taanga fuu „ta waka kumafa Keesitu bi ta waka”.​—1 Joh. 2:6.

19. Unfa u ku Jehovah sa dë mati go dou?

¹⁹ U ta dë kabakaba u mbei möiti fuu ku Jehovah sa dë mati go dou (Jud. 20, 21). U ku Jehovah o dë mati go dou te u ta mbei hii möiti u piki hën buka a soni, te u ta tja gafa ko da di në fëën, söseei te u ta mbei a ta wai ku u (Nöng. 27:11; Mat. 6:9; 1 Joh. 5:3). Di mëni di u ta mëni di dëdë u Jesosi, ta heepi u fuu ta libi a wan fasi di ta kai ku Jehovah. A sö wan fasi, a ta dë kuma u ta piki ën taa: „Mi kë dë i mati u nöömö!”

20. Andi da wantu soni di ta mbei u ta mëni di dëdë u Jesosi?

²⁰ Aluwasi ee woo libi a liba ala u nöömö, nasö ee woo libi a goonliba aki, tökuseei soni dë di mbei u musu ta mëni di dëdë u Jesosi. Hiniwan jaa te u ta ko makandi u mëni di dëdë fëën, nöö a ta dë taa u ta ko makandi u mëni di dëdë u wan sëmbë di u lobi. Di sëmbë dë da Jesosi Keesitu. Ma di möön fanöudu soni, hën da u ta mëni di gaan lobi di Jehovah lei taa a lobi u, u di a manda di Womi Mii fëën ko paka di lusupaima da u. Di jaa aki, woo mëni di dëdë u Jesosi a feeda 15 u piki-deewei-liba 2022. U lobi Jehovah ku di Womi Mii fëën. Fëën mbei te di daka di Jesosi bi dëdë dou, nöö wa ta mbei na wan soni tapa u fuu mëni di dëdë fëën.