DI WÖUTU di de puu ko „wagi” a di Nyun-Grontapuvertaling sa dë hiniwan u dee sömëni pei wagi dee bi dë a di ten ala (Tja 8:28, 29, 38). A djei kuma di Etiopia womi bi ta lëi a wan wagi di bi bigi möön wan feti wagi, nasö wan wagi di de bi ta fia lëi ku wotowan. Luku faandi mbei u taki sö.

Di Etiopia womi bi dë wan heihei sëmbë, nöö a bi kumutu a wan longi kamian. A bi dë wan womi di bi „ta seeka hii di möni u di mujëë könu u de de kai Kandasi” (Tja 8:27). Di awooten Etiopia bi dë teka di köndë Sudan dë nöunöu, te go miti wan së u di pisiwata ka Egepiti dë nöunöu. A kan taa di womi aki bi tooka wagi a pasi u di a bi abi hia lai u tja. So u dee wagi dee sëmbë bi ta lëi a di ten ala, bi ta abi fö banti ku wan piki daki. Wan buku de kai Acts​—An Exegetical Commentary bi taki taa: „Di wagi dë bi ta abi kamian u tja möön hia lai, sëmbë bi sa sindo möön bunu nëën, söseei de bi sa lëi go a wan möön longi kamian ku ën”.

Di Etiopia womi bi ta lesi di Filipi bi ko fan ku ën. Di Bëibel ta taki taa: „Filipi kule go a di wagi bandja. Hën a jei di [Etiopia womi] ta lesi di soni di di tjabukama [Jesaaja] bi sikifi” (Tja 8:30). Dee wagi dee sëmbë bi ta lëi te de bi nango a wan longi kamian an bi mbei u lëi taanga. U di di wagi dë an bi ta lëi taanga, mbei di womi aki bi sa lesi, söseei Filipi bi sa kule kisi di wagi.

Di Etiopia Womi bi kai Filipi faa ko sindo ku ën a di wagi dendu (Tja 8:31). Sëmbë bi ta dë taanputaanpu a dee wagi dee de bi ta mbei u fia lëi ku wotowan. Ma di Etiopia womi ku Filipi bi o sa feni kamian u sindo a wan wagi dendu di bi mbei u go a wan longi kamian.

Kumafa a sikifi a Tjabukama kapitë 8, ku dee soni dee sëmbë sikifi fu awooten, nöö dee buku fuu ta lei taa di Etiopia womi bi ta lëi a wan wagi di bi bigi möön wan feti wagi. Söseei a bi bigi möön wan wagi di sëmbë bi ta fia lëi ku wotowan.