WOTO 4
KANDA 30 Mi Mati, mi Gadu, mi Tata
Jehovah lobi i tuutuu
„Jehovah lobi sëmbë tuutuu.”—JAK. 5:11.
SONI DI WOO LUKU
Woo si unfa di lobi di Jehovah lobi sëmbë o mbei u ku ën ko dë möön gaan mati, nöö wa o ta dë pantapanta. Ma woo ta fii bunu, söseei woo ta si taa a ta booko hën hedi ku u tuutuu.
1. Andi ta ko a i pakisei te i ta pakisei soni u Jehovah?
I BI pooba u pakisei luku kaa unfa Jehovah dë u? Andi ta ko a i pakisei te i ta begi ën? Hii fa wa sa si Jehovah ku wojo, tökuseei di Bëibel ta konda da u a peipei fasi unfa a dë. A ta taki taa Jehovah da ’wan sonu, söseei a dë wan felu soni di ta tjubi sëmbë’, söseei taa a dë ’wan faja di ta tjuma soni kaba a sösö’ (Ps. 84:11; Heb. 12:29). A ta taki tu taa a dë kuma di djamati sitonu de kai safila, kuma goutu di ta koti faja, söseei kuma wan mutjama di ta sëndë faja njaan (Eze. 1:26-28). A sa foondo u seei te u si unfa di Bëibel ta taki taa Jehovah dë, ma a sa mbei u fëëë tu.
2. Andi sa mbei a taanga da so sëmbë u de ko dë Jehovah mati?
2 U di wa sa si Jehovah, mbei a sa taanga da u fuu biibi taa a lobi u. So sëmbë ta si kuma nöiti Jehovah o sa lobi de, u di sömëni soni bi miti de a de libi. Kandë nöiti de bi abi wan tata di lobi de. Jehovah ta fusutan unfa u ta fii, nöö a sabi faandi mbei a sa taanga da u fuu ko dë mati fëën. Fëën mbei a ta tei di Wöutu fëën u konda da u un pei sëmbë a dë.
3. Faandi mbei u musu ko sabi soni u di lobi di Jehovah abi?
3 Di wöutu di ta konda da u gbelin unfa Jehovah dë tuutuu, da lobi (1 Joh. 4:8). Jehovah da lobi. Lobi hën ta mbei a ta du hii dee soni dee a ta du. Di lobi u Gadu taanga sö tee taa a ta lobi dee sëmbë dee na lobi ën (Mat. 5:44, 45). A di woto aki, woo taki soni u Jehovah, ku di lobi di a abi. Möön u ta lei soni u di Gadu fuu, möön woo ko lobi ën.
JEHOVAH LOBI U GAANFA SEEI
4. Unfa i ta fii u di i sabi taa Jehovah lobi sëmbë tuutuu? (Luku di peentje tu.)
4 „Jehovah lobi sëmbë tuutuu” (Jak. 5:11). A di Bëibel, Jehovah ta tei hënseei maaka ku wan mama di lobi dee mii fëën (Jes. 66:12, 13). Pakisei luku fa wan mama ta sölugu wan mii fëën a wan lobihati fasi. A ta butëën nëën futu liba, nöö a ta fan ku ën a wan suti fasi. Te di mii ta këë, nasö te a ta fii pen, nöö di mama ta mbei hii möiti faa sa dëën di soni di a abi fanöudu. Te soni ta hebi da u, nöö u sa dë seiki taa Jehovah o heepi u. Di psalöm sikifima bi taki taa: „Di dee soni mi bi ta pakisei, bi ko möön hebi da mi, nöö ju hën bi da mi kötöhati, sö taa mi bi sa ta dë waiwai baka.”—Ps. 94:19.
„Mi o ta da unu kötöhati hiniwan juu baka, leti kumafa wan mama ta da di womi mii fëën kötöhati hiniwan juu” (Luku palaklafu 4)
5. Unfa i ta si di hoi di Jehovah ta hoi hënseei a sëmbë?
5 Jehovah ta hoi hënseei a sëmbë (Ps. 103:8). An ta disa u te u mbei wan föutu. Sömëni pasi seei dee Isaëli sëmbë bi du soni di bi hati Jehovah. Ma tökuseei a bi ta lei de taa a lobi de, te de bi disa di hogi libi u de, nöö de bia ko nëën. A bi piki de taa: „Mi ta si unu kuma wan gudu, mi ta lesipeki unu, söseei mi lobi unu” (Jes. 43:4, 5). Wë sö nöö Jehovah lobi u a di ten aki tu. Hii juu seei u sa futoou ën. Aluwasi u mbei wan gaan föutu, tökuseei Jehovah an ta disa u. Te u tjali u di zöndu fuu, nöö u bia ko nëën, nöö woo si taa a lobi u jeti. A ta paamusi u taa ’a o da u paadon ku hii hën hati’ (Jes. 55:7). Di Bëibel ta taki taa te Jehovah da u paadon kaa, nöö di soni dë ’o mbei u dë bööböö’.—Tjab. 3:19.
6. Andi Sakalia 2:8 ta lei u, u Jehovah?
6 Lesi Sakalia 2:8. Jehovah ta tei u maaka ku hën wojo mii. Wojo da wan gaan dii soni di u abi, söseei a dë wan soni di u musu ta köni ku ën. Fëën mbei te Jehovah ta tei u maaka ku hën wojo mii, nöö a dë kuma a ta taki taa: ’Di sëmbë di panjan un dee sëmbë u mi, panjan wan dii soni u mi.’ U di Jehovah lobi u, mbei a ta booko hën hedi ku di fasi fa u ta fii, söseei a ta dë kabakaba u puu u a fuka. Te u ta tjali, nöö hënseei ta tjali tu. Fëën mbei u sa dë seiki taa a o heepi u ee u begi ën, nöö u piki ën taa: „Tjubi mi kuma i wojo mii.”—Ps. 17:8.
7. Faandi mbei u musu mbei möiti fuu ko dë seiki taa Jehovah lobi u?
7 Jehovah kë fuu dë seiki taa a lobi hiniwan fuu seei vö. Ma a sabi taa dee soni dee bi miti u a di ten di pasa, sa mbei u ta hakisi useei ee a sa lobi u tuutuu. Nasö kandë soni ta miti u nöunöu, di ta mbei u ta hakisi useei ee a lobi u tuutuu. Andi o heepi u fuu ko dë seiki taa a lobi u? Wë boo luku unfa Jehovah ta lei Jesosi ku dee salufuwan taa a lobi de, söseei unfa a ta lei u taa a lobi u tu.
UNFA JEHOVAH TA LEI TAA A LOBI SËMBË?
8. Faandi mbei Jesosi bi dë seiki taa hën Tata lobi ën?
8 Na tide jaa Jehovah ku di lobi Womi Mii fëën Jesosi ta lobi deseei, söseei na piki lobi de lobi deseei. De da dee sëmbë dee dë makandi möön longi a hii di mundu. Jehovah bi lei gbelingbelin a Mateosi 17:5 taa a lobi Jesosi. Jehovah bi sa taki nöö taa: ’Di sëmbë aki da di sëmbë di libi fëën ta kai ku mi.’ Ma a bi kë fuu sabi unfa a lobi Jesosi tjika. Fëën mbei a bi taki taa Jesosi da ’di lobi Womi Mii fëën’. Jehovah bi ta wai seei taa Jesosi dë Miii fëën, söseei a bi ta wai ku di soni di Jesosi bi o du (Ef. 1:7). Nöö Jesosi seei bi seiki taa hën Tata lobi ën. A bi ta fii di lobi dë te nëën hati dendu. Sömëni pasi seei a bi ta taki ku hii hën hati taa hën Tata lobi ën.—Joh. 3:35; 10:17; 17:24.
9. Andi ta lei fa Jehovah lobi dee salufuwan tjika? Konda wan woto. (Loomë 5:5)
9 Jehovah ta lei dee salufuwan taa a lobi de tu. (Lesi Loomë 5:5.) Te i buta pakisei a di töngö di de bi sikifi di tëkisi aki, nöö a ta lei taa Jehovah lobi dee salufuwan sö tee taa u sa tei ën maaka ku di fasi fa wata ta kule djulululu a wan dan. Dee salufuwan sabi taa ’Gadu lobi de’ (Jud. 1). Apösutu Jakobosi bi taki unfa de ta fii, di a bi taki taa: „Dee sëmbë o, de ta kai u Masa Gadu mii e. Nöö sö a dë. U da mii fëën tuu. Wë nöö ee u ta tja di në taa u da Gadu mii, nöö nëën da Masa Gadu lobi u te na soni nö?” (1 Joh. 3:1) Dee salufuwan nöö Jehovah lobi ö? Wë nönö. Jehovah lei taa a lobi hii u tuu.
10. Andi da di möön gaan soni di ta lei taa Jehovah lobi i tuutuu?
10 Andi da di möön gaan soni di ta lei taa Jehovah lobi sëmbë tuutuu? Di soni dë da di lusupaima. Sëmbë an bi du sö wan gaan soni wan daka u lei taa de lobi wotowan (Joh. 3:16; Lom. 5:8). Jehovah bi manda di Womi Mii fëën ko dëdë da libisëmbë, sö taa a sa da u paadon u dee zöndu fuu, söseei fuu ku ën sa ko dë mati (1 Joh. 4:10). Möön u ta kai pakisei a di paka di Jehovah ku Jesosi paka puu u a zöndu ku dëdë basu, möön woo sa ko si unfa de lobi hiniwan fuu tjika (Gal. 2:20). Jehovah an bi paka di lusupaima da u, u di a bi kë hoi hënseei a di leti fasi fa a ta du soni nöö a kaba. Ma wan kado a da u, u di a lobi u. Jehovah bi lei taa a lobi u, u di a bi da u di möön dii soni di a abi. A bi mbei Jesosi ko dëdë da u. A bi da pasi u di Womi Mii fëën tja sitaafu u tefa a dëdë.
11. Andi u ta lei a Jelemia 31:3?
11 Wë u si taa na lobi nöö Jehovah lobi u nöö a kaba, ma a ta piki u unfa a lobi u tjika. (Lesi Jelemia 31:3.) Jehovah hai u ko nëën, u di a lobi u. (Luku Detolonomi 7:7, 8.) Na wan soni sa paati u ku di lobi dë, söseei na wan sëmbë sa paati u ku ën tu (Lom. 8:38, 39). Unfa i ta fii u di i sabi taa sö Gadu lobi i? Lesi Psalöm 23, nöö luku unfa Dafiti bi ta fii te a bi buta pakisei a di fasi fa Jehovah lobi sëmbë tjika, söseei luku unfa di soni dë sa mbei i fii tu.
UNFA I TA FII TE I LUKU UNFA JEHOVAH LOBI SËMBË TJIKA?
12. Andi i bi o taki taa sikifi a Psalöm 23?
12 Lesi Psalöm 23:1-6. Psalöm 23 da wan kanda ka di psalöm sikifima ta lei unfa a dë seiki tjika taa Jehovah lo’ sëmbë, söseei taa a ta booko hën hedi ku sëmbë. Dafiti hën sikifi di psalöm aki, nöö a ta taki unfa hën ku Jehovah, di Sikapuma fëën, lobi deseei tjika. Dafiti bi ta mbei Jehovah tii ën, söseei a bi ta buta hii hën futoou a Jehovah, nöö a bi ta fii taa Jehovah ta luku ën. Dafiti bi sabi taa Jehovah bi o ta lei ën hii daka taa a lobi ën. Unfa a du waka taa a bi dë sö seiki u di soni dë?
13. Faandi mbei Dafiti bi dë seiki taa Jehovah bi ta sölugu ën?
13 „Ma o makei na wan soni.” Dafiti bi ta fii taa Jehovah bi ta luku ën, u di hii juu Jehovah bi ta heepi ën faa feni dee soni dee a abi fanöudu. Dafiti bi sabi tu taa hën ku Jehovah bi dë mati, söseei taa Jehovah bi ta feni ën u bunu. Fëën mbei a bi dë seiki taa aluwasi fa soni bi o dë a di ten di ta ko, Jehovah bi o ta sölugu ën go dou. U di Dafiti bi ta biibi taa Jehovah lobi ën, söseei taa a bi o ta heepi ën, mbei an bi ta booko hën hedi, ma a bi ta dë waiwai.—Ps. 16:11.
14. Unfa Jehovah sa luku u ku lobi tjika?
14 Jehovah ta sölugu u ku lobi, möönmöön te soni an nango bunu da u. Claire, a da wan sisa di bi wooko a Bëtëli möön leki 20 jaa longi, nöö an bi sabi unfa a bi musu heepi dee sëmbë fëën di sömëni gaangaan soni bi miti de baka-na-baka. Buuu bi naki hën tata, de bi puu wan u dee sisa fëën a di kemeente, söseei dee sëmbë fëën bi lasi di wooko u de ku di wosu u de. Unfa Jehovah bi lei de taa a ta luku de? Claire bi taki taa: „Hii juu Jehovah bi ta heepi dee sëmbë u mi, u de feni dee soni di de bi abi fanöudu u pasa dee daka. Sömëni pasi Jehovah bi da u soni möön fa u bi abi fanöudu seei. Mi lo’ u pakisei fa Jehovah bi heepi u, söseei fa a bi lei taa a lobi u. Di soni dë bi heepi mi u mi hoi dou, di woto soni bi miti mi.”
15. Faandi mbei Dafiti bi fii taa a feni kaakiti baka? (Luku di peentje tu.)
15 „A ta da mi kaakiti baka.” So juu Dafiti bi ta fii bookosaka, u di sömëni soni bi ta miti ën (Ps. 18:4-6). Ma di lobi di Jehovah bi ta lei ën taa a lobi ën, bi ta dëën kaakiti baka. Jehovah ta tja dee mati fëën dee dë weiwei, go „a kamian ka ahun ta göö vitiii sö”, söseei „a ta tja [de] go böö a kamian ka wata ta kule djulululu”. Di soni dë bi mbei taa Dafiti bi feni kaakiti baka faa bi sa hoi dou.—Ps. 18:28-32.
Hii fa Dafiti bi ta kule ta tjubi u sëmbë hedi, tökuseei di lobi di Jehovah bi lobi ën, ku di sölugu di a bi ta sölugu ën, bi ta dëën kaakiti baka (Luku palaklafu 15)
16. Unfa di lobi di Jehovah lobi i bi da i kaakiti baka?
16 Sö nöö soni dë da u a di ten aki. „U di Jehovah abi bunuhati fuu, mbei wa dëdë” di soni bi miti u (Këë. 3:22; Kol. 1:11). Luku di woto u wan sisa de kai Rachel. A bi booko saka seei di hën manu disa hën ku Jehovah tuu, a di pisiten di di kolona siki bi ta paaja a hii goonliba. Andi Jehovah bi du da di sisa aki? A bi taki taa: „Jehovah bi mbei mi fii taa a lobi mi. A bi mbei dee baaa ku dee sisa dë makandi ku mi. De bi ta tja soni u njan ko da mi, de bi ta manda bosikopu ku Bëibel tëkisi da mi u da mi taanga, de bi ta lafu da mi, söseei de bi ta heepi mi u ma fëëkëtë taa Jehovah ta luku mi. Mi ta da Jehovah tangi hii juu u di a da mi wan gaan famii di lobi mi.”
17. Faandi mbei Dafiti an bi ta „fëëë taa hogi o miti” ën?
17 „Ma o fëëë taa hogi o miti mi, biga i dë ku mi.” Sömëni pasi seei hogi bi dë u miti Dafiti, söseei a bi abi sömëni felantima di bi abi makiti. Ma u di Jehovah bi lobi ën, mbei an bi ta fëëë. Dafiti bi ta si taa Jehovah bi ta dë ku ën hii juu, nöö di soni dë bi ta mbei taa an ta dë pantapanta. Fëën mbei a bi taki a wan kanda taa: „Jehovah mbei taa ma dë fëëëfëëë möön” (Ps. 34:4). Soni bi dë u Dafiti fëëë tuutuu, ma u di Jehovah bi lobi ën, mbei an bi ta fëëë möön.
18. Unfa di sabi di i sabi taa Jehovah lobi i, ta da i taanga fii hoi dou te i ta fëëë?
18 Unfa di sabi di u sabi taa Jehovah lobi u ta da u taanga fuu hoi dou te u ta fëëë? Susi, da wan sisa di ta du di kowoonu pioniliwooko, nöö a bi taki unfa hën ku hën manu bi fii di di womi mii u de kii hënseei. A bi taki taa: „Te wan gaan soni ko miti i vou sö, nöö a ta hebi da i seei, söseei i sa ko ta fii kuma saanfa-u-du fii kaba. Ma di lobi di Jehovah bi lei u taa a lobi u, bi da u kötöhati.” Sisa Rachel, di u bi taki soni fëën a fesi kaa, bi taki taa: „Wan ndeti, mi bi dë ku gaan tjali a hati. Mi bi ta fëëë, söseei mi bi ta booko mi hedi gaanfa seei. Di mi si sö, hën mi bai suku heepi a Jehovah. Wantewante dë, mi fii taa a da mi kötöhati leti kumafa wan mama ta ganjan wan mii fëën, hën mi duumi go piii. Nöiti mi o fëëkëtë di soni dë.” Wan gaanwomi u kemeente de kai Tasos bi koti feifi jaa sitaafu, u di an bi kë go a sodati. Unfa di baaa aki bi fii taa Jehovah lobi ën, söseei taa a ta booko hën hedi ku ën? Wë a bi taki taa: „Jehovah bi da mi soni möön fa mi bi abi fanöudu. Di soni dë bi mbei mi bi ko dë möön seiki taa mi sa futoou ën. Boiti di dë, Jehovah bi da mi di santa jeje fëën u heepi mi u mi dë waiwai, hii fa mi bi dë a dunguwosu. Di soni dë bi mbei mi ko si taa möön mi ta wooko makandi ku ën, möön mi o ta si fa a abi bunuhati u mi tjika. Fëën mbei mi bi bigi du di kowoonu pioniliwooko di mi bi dë a dunguwosu.”
KO DË MATI U DI GADU FII DI LO’ SËMBË
19. (a) Unfa woo ta begi Gadu, te u sabi taa a lobi u? (b) Un soni i möön lobi, te i luku dee soni di di Bëibel ta taki u di lobi di Jehovah abi? (Luku di pisi „ Wantu soni di ta lei u unfa Jehovah lobi u tjika”.)
19 Hii dee woto dee u taki u de aki ta lei u taa Jehovah, di Gadu ka ’lobi ta kumutu’, dë ku u! (2 Kol. 13:11) A ta booko hën hedi ku hiniwan fuu vö. U dë seiki taa „a abi bunuhati [fuu]” (Ps. 32:10). Möön u ta kai pakisei a di fa a lei u taa a lobi u tjika, möön woo ko si taa a dë wan tuutuu sëmbë, nöö möön u ku ën o ko dë mati. U sa begi ën hiniwan juu u konda dëën unfa u abi di lobi fëën fanöudu tjika. U sa konda hii soni di dë a u hati dëën, nöö u sa dë seiki taa a ta fusutan u, söseei taa a dë kabakaba u heepi u.—Ps. 145:18, 19.
20. Unfa di lobi di Jehovah abi, ta mbei u ta kë ko möön zuntu fëën?
20 Leti kumafa u ta kë ko zuntu ku wan faja te kamian ta kötö, sö nöö u ta kë ko zuntu ku Jehovah te u sabi taa a lobi u. Na piki lo’ Jehovah lo’ sëmbë. Fëën mbei i musu ta wai u di Jehovah lobi i. Nöö be hii u tuu lei ën taa u lobi ën tu. Boo taki taanga taa: „Mi lobi Jehovah”!—Ps. 116:1.
ANDI I BI O PIKI?
-
Unfa i bi o taki taa Jehovah lobi sëmbë tjika?
-
Faandi mbei i sa dë seiki taa Jehovah lobi i gaanfa seei?
-
Unfa i ta fii te i luku unfa Jehovah lo’ sëmbë tjika?
KANDA 108 Di lobi u Gadu an ta kaba
a So u dee në aki tooka.