WOTO 3
KANDA 124 Boo ta hoi useei a Jehovah
Jehovah o heepi i te soni ta taanga da i
„[Jehovah] hën da di Sëmbë di ta heepi unu fuun taanpu gingin.”—JES. 33:6.
SONI DI WOO LUKU
Dee soni dee u sa du fuu feni heepi a Jehovah te soni ta taanga da u.
1-2. Andi sa miti dee dinima u Jehovah?
GAANGAAN soni ta miti u di ta mbei libi fuu tooka wan pasi vou sö. De sa tooka hii u libi sö tee taa libi fuu an sa ko dë kuma fosu möön. Wan baaa de kai Luis, a di abi wan taanga biibi, bi ko jei taa a abi kanker, söseei taa feifi liba nöö fika dëën faa libi. Wan sisa de kai Monika, ku hën manu, bi ta du sömëni wooko da Jehovah. Ma wan daka, hën Monika ko jei taa hën manu ta libi wan fanafiti libi tjubitjubi sömëni jaa longi kaa. Boiti di dë, a bi dë wan gaanwomi u kemeente. Olivia da wan sisa di an tööu, nöö a bi musu kule kumutu ka a ta dë, u di wan gaan ventu bi o ko a di pisiwata ka a ta libi. Bakaten, di a toona ko nëën pisi, hën a ko si taa di wosu booko kaba a sösö. Libi u dee sëmbë aki bi tooka wan pasi vou sö. Di soni aki bi pasa ku i kaa u? Wan soni bi miti i di tooka hii i libi vou sö u?
2 Hii fa u ta dini Jehovah ku hii u hati, tökuseei u ta dë ku suwaki, söseei gaangaan soni ta miti u leti kumafa a ta miti hii dee woto sëmbë. Ma a sa kan tu taa sëmbë ta du ku u, u di de an lobi dee sëmbë u Gadu. Wë Jehovah an ta puu u u dee lö soni aki an miti u, ma a paamusi u taa a o heepi u (Jes. 41:10). Aluwasi unfa soni ta taanga da u, tökuseei u sa dë seiki taa Jehovah o heepi u fuu sa ta du soni a wan köni fasi, fuu sa ta dë waiwai go dou, söseei fuu sa hoi useei nëën go dou. A di woto aki, woo taki u fö fasi fa Jehovah ta heepi u te wan gaan hogi soni miti u. Woo si tu andi u musu du fuu sa feni heepi a Jehovah.
JEHOVAH O TJUBI I
3. Andi sa taanga da u u du, te wan gaan fuka miti u?
3 A sa ta taanga da u fuu dë ku limbolimbo fusutan, söseei fuu du soni a wan köni fasi te gaan fuka miti u. Faandi mbei u taki sö? Wë u di a sa dë taa u dë ku gaan fuka a hati, nöö u sa ta fii kuma hedi fuu fuu poi. A sa dë kuma wojo fuu ko dungu wan pasi vau sö, nöö u ta fii kamian ta bia ta lontu, u di wa sabi andi u musu du. Buta pakisei a di fasi fa dee tu sisa dee u bi taki soni u de a fesi, bi fii di fuka bi miti de. Olivia bi taki taa: „A bi hebi da mi seei di di gaan ventu booko di wosu u mi, söseei mi bi ta fii seei kuma saanfa-u-du u mi kaba.” Monika hën a bi taki taa: „Na hati nöö di soni dë bi hati mi. Mi ta fii seei kuma hati u mi bi tënë pisipisi. A bi dë kuma mi ko babau, ma bi sa’ u du soni bumbuu möön. Nöiti mi bi mëni taa sö wan soni bi sa miti mi.” Andi Jehovah paamusi u taa a o du u heepi u, te u ta fii kuma saanfa-u-du fuu kaba?
4. Andi Jehovah paamusi u, te u luku Filipi 4:6, 7?
4 Andi Jehovah paamusi u taa a o du da u? A paamusi u taa a o da u di soni di di Bëibel ta kai di „kötöhati u Gadu”. (Lesi Filipi 4:6, 7.) Di kötöhati dë, da di fii di woo ta fii bunu te dou u hati dendu, u di u ku Jehovah dë gaan mati. Di kötöhati dë „bigi pasa hii sëmbë fusutan”. A bigi gaanfa möön fa u ta mëni. A pasa ku i kaa taa i begi Jehovah sö tee taa bakaten i ko ta fii kuma i böö seei fëëë sö u? Wë di fasi fa i bi fii dë da di „kötöhati u Gadu”.
5. Unfa di kötöhati u Gadu ta tjubi u hati ku u fusutan?
5 Filipi 4:7 ta taki tu taa di kötöhati u Gadu „o tjubi unu hati ku unu fusutan”. Di Giiki wöutu di de puu ko „tjubi”, bi dë wan wöutu di de bi ta wooko ku ën, te de bi ta taki soni u dee sodati dee bi ta hoi wakiti u tjubi wan foto. Dee sëmbë dee bi ta libi a wan foto ka sodati bi ta hoi wakiti, bi ta duumi suti, u di de bi sabi taa sodati ta tjubi de. Wë leti sö a dë ku di kötöhati u Gadu, te a ta tjubi u hati ku u fusutan, nöö u ta dë bööböö, u di u sabi taa a ta tjubi u (Ps. 4:8). Aluwasi ee di fuka fuu an seeka wantewante, tökuseei u sa ta fii taa u dë bööböö, leti kuma Hana (1 Sam. 1:16-18). Te u ta fii taa u dë bööböö, nöö an ta taanga da u sö fuu du soni ku köni, söseei fuu si soni a wan soifi fasi.
Begi fu te i fii taa di „kötöhati u Gadu” ta tjubi i hati ku i fusutan (Luku palaklafu 4-6)
6. Andi u sa du fuu sa feni di kötöhati u Gadu? (Luku di peentje tu.)
6 Andi u musu du? Te soni ta hebi da i, nöö bai kai Jehovah faa heepi i. Hën da di Sëmbë di ta tjubi i. Unfa i sa du ën? Wë begi fu te i fii taa Gadu da i di kötöhati fëën (Luk. 11:9; 1 Tes. 5:17). Baaa Luis di u bi taki soni fëën a fesi, bi konda unfa hën ku hën mujëë Ana bi bia ko ta du soni, di de bi jei taa wantu liba nöö bi fika dëën faa libi jeti. Baaa Luis bi taki taa: „A dee lö pisiten dë, a ta taanga seei fii taki andi joo du fii sa dë gösöntu, nöö sö a ta dë da hiniwan woto soni di i musu du. Ma u bi ko ta dë bööböö a dee taanga pisiten dë, u di u bi ta begi gaanfa seei.” Baaa Luis ku hën mujëë bi taki taa de bi ta begi seei te na soni, de an bi ta wei u hakisi Jehovah faa da de di kötöhati fëën, söseei faa da de köni u de sa du soni a wan köni fasi. Wë de bi ta fii taa Jehovah ta heepi de. Ee wan fuka ta miti i, nöö ta begi fajafaja. Te i ta du sö, nöö joo si fa di kötöhati u Jehovah o tjubi i hati ku i pakisei.—Lom. 12:12.
JEHOVAH O MBEI I TAANPU GINGIN
7. Unfa u sa ta fii te wan gaan soni miti u?
7 Te wan gaan soni miti u, nöö a sa pasa taa wa ta dë kumafa u bi naa. Di fasi fa u ta fii, di fasi fa u ta pakisei, ku di fasi fa u bi guwenti u du soni sa tooka. U sa ta fii seei kuma wa ta feni böö, leti kuma wan boto di wata ta naki nango ta ko. Ana di u bi taki soni fëën a fesi, bi ta taki taa baka di hën manu Luis lasi libi, nöö an bi sa taki unfa a bi ta fii. A bi taki taa: „Te mi bi ta fii taa mi dë mi wanwan, nöö soni u mi bi ta bia tjali da miseei. Hati u mi ta bia boonu, u di mi manu lasi libi.” So juu Ana bi ta fii taa a dë seei hooo sö, söseei hati fëën bi ta boonu te a bi musu du soni di hën manu bi abi di faantiwöutu u du. Boiti di dë, a bi ta fii kuma a dë a wan gaan seki wata a ze. Unfa Jehovah ta heepi u te soni bigi ta hebi da u gaanfa seei?
8. Andi Jehovah ta paamusi u, te u luku Jesaaja 33:6?
8 Andi Jehovah paamusi u taa a o du da u? A ta piki u taa a o heepi u fuu taanpu gingin. (Lesi Jesaaja 33:6.) Te wan gaan ventu ta böö wan sipi, nöö a sa bigi ta naki ën nango ta ko gaanfa seei. Ma fu di sipi sa hoi gingin, mbei de ta buta wanlö soni a dee tu së bandja fëën. Dee soni dë ta dë a di pisi u di sipi, di ta dë a basu wata. Dee soni dë sa heepi di sipi fu an ta seki gaanfa poi, sö taa dee sëmbë dee dë a di sipi sa fii möön bunu. Boiti di dë, dee soni dë ta wooko möön bunu te di sipi ta lëi nango tololoo. Sö nöö a dë da u tu. Te soni ta taanga da u, nöö Jehovah o heepi u fuu hoi gingin te u ta mbei möiti fuu dini ën ku hii u hati go dou.
Wooko ku dee soni dee u abi u öndösuku soni, sö taa i sa taanpu gingin (Luku palaklafu 8-9)
9. Unfa dee soni di di ölganisaasi u Jehovah mbei da u fuu ta öndösuku soni u Bëibel, sa heepi u fuu ko ta fii möön bunu? (Luku di peentje tu.)
9 Andi u musu du? Te ja ta fii bunu, nöö mbei hii möiti fii ta begi, fii nango a dee komakandi, söseei fii ta peleiki go dou. Tuu taa ja o sa du soni gaanfa sö kumafa i bi guwenti, ma na fëëkëtë taa Jehovah an ta suku fuu du soni möön leki fa u sa du. (Luku Lukasi 21:1-4.) Boiti dee soni dee u taki dë, a bunu fii ta tei ten tu u lei soni u Bëibel, söseei u pakisei fundu u soni. Faandi mbei? U di Jehovah ta wooko ku di ölganisaasi fëën u mbei buku ku fëlön da u, u heepi u fuu sa ko ta fii möön bunu te soni ta taanga da u. Fii sa feni dee soni dee sa heepi i, nöö i sa wooko ku dee soni di di ölganisaasi mbei da u u öndösuku soni. I sa wooko ku di JW Library® app, di Index van Wachttoren-publicaties, nasö di buku Ondrosuku Bijbel moro fini—Gi Yehovah Kotoigi. Monika, di sisa di u bi taki soni fëën a fesi, bi taki taa te a bigi fii wan fasi, nöö wantewante a ta bigi wooko ku dee soni fuu u öndösuku soni. Ee hati fëën ta bigi boonu, nöö a ta sikifi di wöutu „hatiboonu” u öndösuku soni fëën. Bakaten, a ta sikifi „bookohedi” nasö „hoi dou”, nöö a ta lesi soni u de fu te a ko ta fii möön bunu. Monika bi taki taa: „Mi bi ta dë ku gaan bookohedi seei te mi bi ta bigi öndösuku soni, ma te mi bi ta lesi dee soni nango, nöö mi bi ta fii seei kuma Jehovah ta kisi mi baasa seei duuu sö. Mi ta si taa Jehovah ta heepi mi, söseei taa a ta fusutan unfa mi ta fii.” Jehovah sa heepi i a di seei fasi aki tu.—Ps. 119:143, 144.
JEHOVAH O HEEPI I
10. Unfa u sa ko ta fii ee wan gaan soni miti u?
10 A sa ta taanga da u ee wan gaan soni miti u. Kandë so daka wa o ta abi peesa, söseei wa o ta abi kaakiti u du soni. U sa ta fii kuma wan sëmbë di ko ta waka ku kokoti, hii fa a bi dë wan sëmbë di bi ta du sport, ta fia kule. A sa ko taanga da u fuu du dee soni dee u bi guwenti, nasö a sa pasa taa wa ko ta abi peesa u du dee soni dee u bi lo’ u du. U sa ko ta fii leti kuma Elia. Kandë wa o ta abi peesa u hopo. Ma kandikandi nöö woo ta kë dë. (1 Kön. 19:5-7). Andi Jehovah paamusi u taa a o du da u te u ta fii sö?
11. Na un woto fasi Jehovah ta heepi u? (Psalöm 94:18)
11 Andi Jehovah paamusi u taa a o du da u? A paamusi u taa a o heepi u. (Lesi Psalöm 94:18.) Leti kumafa wan sëmbë di ta fia kule ta abi heepi fanöudu faa go dou ee a kisi makei, sö nöö useei sa abi heepi fanöudu fuu dini Jehovah go dou. Te soni dë sö da u, nöö Jehovah ta piki u a di Wöutu fëën taa: „Mi, Jehovah da di Gadu fii, di ta panjan i a i letisë maun hoi. Mi da di sëmbë di ta piki i taa: ’Na fëëë. Mi seei o heepi i’” (Jes. 41:13). Könu Dafiti bi si taa sö di soni aki dë tuu. Di sömëni fuka bi ta miti ën, söseei di dee felantima fëën bi ta suku u du hogi ku ën, hën a bi piki Jehovah taa: „Di letisë maun fii panjan mi hoi” (Ps. 18:35). Ma unfa Jehovah ta heepi u?
Da dee famii fii, dee mati fii, ku dee gaanwomi pasi u de heepi i (Luku palaklafu 11-13)
12. Ambë Jehovah sa tei u heepi u te soni ta taanga da u?
12 Möön gaanfa Jehovah ta mbei sëmbë ko heepi u. Wan daka di Dafiti bi ta fii kuma an bi abi kaakiti möön, hën hën mati Jonatan bi ko luku ën u dëën taanga (1 Sam. 23:16, 17). Jehovah bi du di seei soni da Elia. A bi tei Elisa faa ta heepi ën (1 Kön. 19:16, 21; 2 Kön. 2:2). A di ten aki, Jehovah sa tei dee famii fuu, dee mati fuu, nasö dee gaanwomi u de heepi u. Ma te soni ta hebi da u gaanfa seei, nöö a sa pasa taa wa ta kë dë a woto sëmbë dendu. U ta kë u de disa u be u dë fuu u wanwan. Wë a dë u fusutan. Ma andi u sa du u Jehovah sa heepi u te u ta fii sö?
13. Andi u musu du u Jehovah sa heepi u? (Luku di peentje tu.)
13 Andi u musu du? Mbei taanga möiti be ja suku u dë i wanwan. Te u ta hai useei puu a wotowan dendu, nöö a sa pasa taa u bigi ta buta pakisei a useei nöö, söseei a di fuka di ta miti u. Nöö di soni dë sa mbei taa wa du soni ku köni (Nöng. 18:1). An dë fuu taki taa hii u tuu ta kë dë u wanwan so juu. U ta abi ën fanöudu, möönmöön te wan gaan soni miti u. Ma ee a ko dë wan guwenti, nöö a sa pasa taa u ta tapa dee sëmbë dee Jehovah kë wooko ku de u heepi u. Fëën mbei aluwasi unfa soni ta taanga da i tjika, mbei möiti fii sa disa dee mati fii, dee famii fii, ku dee gaanwomi u de sa heepi i. Si de kuma sëmbë di Jehovah ta tei u heepi i.—Nöng. 17:17; Jes. 32:1, 2.
JEHOVAH O DA I KÖTÖHATI
14. Andi sa mbei u ta fëëë?
14 Soni sa ta taanga da u, u di so juu u ta fëëë. Di Bëibel ta taki soni u dinima u Gadu di bi ta fëëë gaanfa, söseei di bi ta tja pena ku fuka, u di felantima bi ta suku u du hogi ku de, nasö u di woto soni bi ta toobi de (Ps. 18:4; 55:1, 5). Sö nöö soni sa dë da u tu. A sa pasa taa sëmbë ta du ku u a siköö, a wookope, a di wosudendu fuu, nasö a sa pasa taa lanti ta du ku u. U sa ta fëëë tu taa woo dëdë ee wa feni bumbuu data heepi. A dee ten dë, u sa ta fii kuma wan piki mii di an sa du na wan hojo soni u heepi hënseei. Unfa Jehovah ta heepi u a dee pisiten dë?
15. Andi Jehovah ta du da u, te u luku Psalöm 94:19?
15 Andi Jehovah paamusi u taa a o du da u? A ta da u kötöhati, sö taa u sa ta dë waiwai baka. (Lesi Psalöm 94:19.) Di psalöm aki sa mbei u pakisei wan piki mujëë mii di an sa duumi a ndeti, u di a ta fëëë te gaangadu ta bai ta koti faja. U sa pakisei fa hën tata ta ko hopo ën tei tja fu te a duumi. Hii fa gaangadu ta bai jeti, tökuseei a ta fii bunu u di hën tata ko hopo ën tei. Wë te wan soni ta mbei u ta fëëë, nöö a sa kan taa u abi di Tata fuu di dë a liba ala fanöudu faa hopo u tei tja fu te hati fuu ko kötö. Unfa u sa feni kötöhati nëën a di fasi dë?
Da di Tata fii di dë a liba ala pasi faa da i kötöhati ku di Wöutu fëën (Luku palaklafu 15-16)
16. Andi u sa du fuu feni kötöhati a Jehovah? (Luku di peentje tu.)
16 Andi u musu du? U musu abi di guwenti u ta begi Jehovah, söseei u lesi di Wöutu fëën (Ps. 77:1, 12-14). Te i abi di guwenti dë, nöö te i abi bookohedi, nöö di fosu soni di joo du, hën da joo go suku heepi nëën. Konda da Jehovah andi ta mbei i ta fëëë, söseei andi ta da i bookohedi. Baka di dë, nöö i mbei a da i kötöhati ku di Wöutu fëën (Ps. 119:28). Kandë joo ko si taa so buku u Bëibel sa da i kötöhati a wan apaiti fasi te i ta fëëë. A kan taa i feni taanga a di buku Jöpu, Psalöm, Nöngö, nasö a dee soni dee Jesosi bi taki a Mateosi kapitë 6. Jehovah o da i kötöhati te i ta begi ën, söseei te i ta lesi di Wöutu fëën.
17. Fuun soni u sa dë seiki?
17 U sa dë seiki taa Jehovah o heepi u te wan gaan fuka miti u. Nöiti woo dë u wanwan (Ps. 23:4; 94:14). Jehovah paamusi u taa a o tjubi u, a o mbei u taanpu gingin, a o heepi u, söseei taa a o da u kötöhati. Jesaaja 26:3 ta taki u Jehovah taa: „Joo mbei soni waka bunu da dee sëmbë dee ta pakisei bumbuu soni, u di de ta buta futoou a i.” Fëën mbei buta futoou a Jehovah, nöö i du hii soni di i sa du, sö taa i sa feni wini u hii dee soni dee a ta tei u heepi i. Te i ta du sö, nöö joo feni taanga, aluwasi soni ta taanga da i.
ANDI I BI O PIKI?
-
Na un pisiten u sa abi Jehovah fanöudu möön gaanfa?
-
Andi da dee fö fasi fa Jehovah ta heepi u te u dë ku fuka?
-
Andi u sa du fuu sa feni heepi a Jehovah?
KANDA 12 Jehovah, di Gadu fuu
a So u dee në u di woto aki tooka.