1. Andi sa ta taanga da hii u tuu u du?

 HINIWAN daka u musu ta taki andi woo du. So juu an ta taanga u sabi andi u musu du, kuma fuu ko sabi andi woo njan, nasö na un ten woo go duumi. Ma so juu a ta möön taanga u sabi andi u musu du, u di dee soni dee woo du, sa mbei u ta tjali, dee sa mbei di gösöntu fuu nasö di wosudendu libi fuu go ku baka, nasö de sa mbei wa ko ta dini Jehovah kuma fosu möön. U kë u dee soni dee u ta du tja wini ko da u ku di wosudendu fuu. Ma di möön fanöudu soni, hën da u kë ta du soni di o mbei Jehovah piizii.​—Lom. 12:1, 2.

 2. Andi o heepi i fii sa du soni a wan köni fasi?

² Joo sa du soni a wan möön köni fasi te i ta mbei möiti u dee dii soni aki: (1) te i ta mbei möiti u ko sabi fa soni dë tuutuu, (2) te i ta pakisei luku unfa Jehovah ta si di soni, ku (3) te i ta wegi luku andi ku andi i sa du ufö i hopo du wan soni. Woo taki u dee dii soni dë a di woto aki, nöö de o heepi u fuu ko sabi unfa u sa wooko a wan bunu fasi ku dee soni dee u ko sabi.​—Nöng. 2:11.

MBEI MÖITI U KO SABI FA SONI DË TUUTUU

 3. Konda faandi mbei i musu ko sabi unfa soni dë tuutuu, ufö i buta taa joo du wan soni.

³ Di fosu soni di o heepi u fuu du soni ku köni, hën da te u  ta mbei möiti u ko sa sabi fa soni dë tuutuu. Faandi mbei u taki sö? Wë boo taa wan sëmbë go a data u di a abi wan taku siki. I si kuma di data o da di sëmbë deesi söndö faa luku ën nasö söndö faa fan ku ën u? Wë nönö. Iseei o sa du soni a wan köni fasi tu, ee i ta tei ten u ko sabi unfa soni dë tuutuu. Unfa i sa du di soni dë?

 4. Andi o heepi i fii ko sabi fa soni dë tuutuu, te i luku Nöngö 18:13? (Luku di peentje tu.)

⁴ I sa ko sabi fa soni dë tuutuu te i ta hakisi soni. Boo taa de kai i fii go a wan piizii. I musu go u? Wë ee ja sabi ambë ta hoi di piizii, ku dee soni dee de o du a di piizii, nöö i musu hakisi iseei dee lö soni aki: „Naasë di piizii o hoi? Na u daka a o hoi? Un mëni sëmbë o go? Ambë o seti soni u soni sa waka bunu di daka dë? Ambë ku ambë o go? Andi sëmbë o du a di daka dë? De o paati soni u bebe ku daan a dendu ö?” Dee soni aki o heepi i fii sa du soni a wan bunu fasi.​—Lesi Nöngö 18:13.

 5. Andi i musu du baka te i ko sabi fa soni dë tuutuu?

⁵ Baka te i ko sabi kaa fa soni dë tuutuu, nöö i musu pakisei hii soni lontu ko kai. Boo taa i ko sabi taa sëmbë di na ta libi ku dee mama wëti u Bëibel o dë a di piizii, nasö taa de o paati soni u bebe di dë ku daan a dendu, ma sëmbë an o dë u tei fesi sö taa soni sa waka bunu. Andi joo du? I si kuma soni sa bia ko dë kuma un dë a wan gaan baja wosu ö?  (1 Pet. 4:3) Boiti di dë, ee a ko pasa taa di piizii o hoi a di juu di i nango a komakandi nasö a di peleikiwooko wë? Awa, te i ta tei ten pakisei hii soni lontu ko kai, nöö joo sa du soni a wan köni fasi. Ma wan woto soni dë di i musu du tu. Te i ko sabi kaa unfa soni dë tuutuu, nöö i sa hakisi iseei taa: ’Unfa Jehovah seei ta si di soni dë?’​—Nöng. 2:6.

PAKISEI LUKU UNFA JEHOVAH TA SI DI SONI

 6. Faandi mbei u musu go suku heepi a Jehovah, te u luku Jakobosi 1:5?

⁶ I sa hakisi Jehovah faa heepi i fii ko fusutan unfa a ta si wan soni. Jehovah paamusi u taa a o da u köni fuu sa sabi ee a ta feni wan soni u bunu. A ta da sëmbë köni „ku hii ën hati”, söndö faa ’suku föutu a de’.​—Lesi Jakobosi 1:5.

 7. Unfa i sa ko sabi unfa Jehovah ta si wan soni? Konda wan woto.

⁷ Te i begi Jehovah faa heepi i, nöö i musu luku unfa a piki di begi fii. Pakisei di soni aki: Ee i nango köi a wan kamian, hën i lasi pasi, nöö i sa hakisi wan sëmbë di ta libi a di kamian dë faa heepi i. Ma i bi o waka go söndö u di sëmbë feni pasi piki i naasë i musu go u? Wë nönö. Joo dë piii ta haika te a ta lei i di pasi. Wë sö nöö a dë ku Jehovah tu. Te i kaba hakisi ën faa da i köni, nöö mbei möiti u ko sabi unfa a piki di begi fii. I sa ko sabi unfa a piki di begi fii, te i ta mbei möiti fii ko sabi ku un mama wëti u Bëibel i bi o sa wooko. Boo taa te  i joo luku ee a bi o bunu fii go a di piizii di u bi taki soni fëën kaa, nöö i sa luku andi di Bëibel ta taki u baja wosu, u poipoi mati, söseei andi a ta taki u di buta di u musu ta buta pakisei a di Könuköndë u Gadu, möön dee soni dee u bi o kë du.​—Mat. 6:33; Lom. 13:13; 1 Kol. 15:33.

 8. Andi i sa du ee i abi heepi fanöudu u feni di soni di i ta suku? (Luku di peentje tu.)

⁸ Sö juu i sa abi heepi fanöudu fii feni di soni di i ta suku. I sa feni heepi a baaa ku sisa di abi öndöfeni. Ma i sa feni wini tu te i ta öndösuku soni iseei. Dee hia soni dee dë a dee buku dee u ta öndösuku soni sa heepi i. I sa wooko ku di buku Ondrosuku Bijbel moro fini-Gi Yehovah Kotoigi, ku di buku Bijbelteksten voor ons leven als christen. Hoi a pakisei taa di soni di i kë, hën da i kë du wan soni di o mbei Jehovah piizii.

 9. Unfa u sa dë seiki taa di soni di u buta taa woo du, o mbei Jehovah piizii? (Efeise 5:17)

⁹ Unfa u sa dë seiki taa di soni di u buta taa woo du o mbei Jehovah piizii? Wë di fosu soni, hën da u musu ko sabi Jehovah bumbuu. Di Bëibel ta taki taa: „Te wan sëmbë sabi di Möön Santa wan, nëën ufö a abi fusutan” (Nöng. 9:10). Awa, wan sëmbë sa ko abi fusutan te a sabi dee fasi u Jehovah, dee soni dee a abi a pakisei u du, söseei dee soni dee a lobi ku dee an lobi. I sa hakisi iseei taa: ’Te mi kai pakisei a di fasi fa mi sabi Jehovah, nöö andi mi sa du u mbei a piizii?’​—Lesi Efeise 5:17.

10. Faandi mbei dee mama wëti u Bëibel dë fanöudu möön famii guwenti nasö di fasi fa de kiija u?

¹⁰ So juu a o sa dë taa u musu du soni di o sa hati dee sëmbë dee u lobi, u di u kë Jehovah piizii. So mama ku tata di kë bunu u wan mujëë mii u de, sa kë taa a tööu ku wan womi di gudu, aluwasi ee di womi an kaba abi wan taanga biibi. Tuu taa de an o sa kë u di mujëë mii u de tja pena, ma ambë o heepi ën fu hën ku Jehovah dë bunu go dou? Nöö unfa Jehovah ta si di soni aki? Wë u sa feni di piki a Mateosi 6:33. A di tëkisi aki Jesosi ta piki dee Keesitu sëmbë taa: „A di fosu kamian un musu biinga fuun ta dë a di Tii u Masa Gadu dendu.” A dë sö tuu taa u musu ta lesipeki dee gaansëmbë fuu ku dee sëmbë u di pisiwata ka u ta libi. Ma di möön fanöudu soni, hën da u musu ta mbei Jehovah piizii.

WEGI LUKU ANDI KU ANDI I SA DU

11. Andi o heepi i fii sa wegi soni luku bunu, te i luku Filipi 1:9, 10?

¹¹ Te i luku dee mama wëti u Bëibel te i kaba, nöö i musu wegi luku andi ku andi i sa du. (Lesi Filipi 1:9, 10.) Te i ta pakisei hii soni lontu ko kai, nöö di soni dë o heepi i fii sa sabi andi sa pasa te i du wan soni. So juu na di du di i musu du wan soni hën ta taanga, ma so juu a ta dë fanöudu fii luku bunu ufö i hopo du wan soni. Te i ta pakisei hii soni lontu ko kai, nöö di soni dë o heepi i fii sa du soni a wan köni fasi, aluwasi fa soni dë da i.

12-13. Unfa di wegi di joo wegi hii soni lontu ko kai o heepi i fii sa sabi un wooko i musu tei?

¹² Pakisei di soni aki luku: I ta suku wan wooko di bi o sa heepi i fii sölugu dee sëmbë fii wosudendu. Tu wooko dë di i sa feni, nöö i ta tei ten luku unfa soni dë. I ta luku un pei wooko di dë, i ta luku di juu di i musu ta wooko, i ta luku un longi a o ta tei fii dou a di wookope, ku wantu woto soni jeti. Dee tu wooko aki tuu bi o bunu da wan Keesitu sëmbë. Nöö kandë i kë wan u de möön di wotowan, u di i lobi di wooko dë, nasö u di a bi o sa mbei i kisi möön hia möni. Ma woto soni dë jeti di i musu luku, ufö i tei wan u dee wooko dë.

¹³ Hakisi iseei dee soni aki: Dee wooko aki o tapa mi u mi go a komakandi ö? De o tapa mi u mi ta dë makandi ku dee sëmbë u mi wosudendu ö? Dee sëmbë mi o sa ta fii bunu ö? De o sa ta dë waiwai, söseei de o sa ta dë mati ku  Jehovah go dou ö? Te i hakisi iseei dee lö soni aki, nöö de o heepi i fii sa hoi dee möön fanöudu soni a pakisei. Dee möön fanöudu soni da di dini di i musu ta dini Jehovah, ku dee soni di dee sëmbë fii wosudendu abi fanöudu, ma na di mbei di i sa mbei gaan hia möni. A sö wan fasi, joo sa du wan soni di sa mbei Jehovah piizii, nöö a o mbei i feni gaan bunu.

14. Unfa lobi, ku di wegi di woo ta wegi soni luku, sa heepi u fu wa du soni di o toobi wotowan?

¹⁴ Te u ta wegi hii soni lontu ko kai, nöö di soni dë ta heepi u tu fu wa „du soni di sa toobi wotowan” (Fil. 1:10). Di soni aki dë fanöudu te u ta luku andi woo bisi, ku di fasi fa woo ta modo. Kandë u lobi wan apaiti mödö. Ma ee di soni dë sa mbei taa wotowan u di kemeente nasö woto sëmbë a döö fii wan fasi wë? Awa, te u ta tei ten wegi soni luku, nöö di soni dë o heepi u fuu lesipeki di fasi fa de ta fii. Lobi o heepi u fuu ’ta mëni andi dë bunu da di otowan fuu’, söseei a o heepi u fu wa ta du soni pasa maaka (1 Kol. 10:23, 24, 32; 1 Tim. 2:9, 10). A sö wan fasi woo du soni di o lei taa u lobi wotowan, söseei taa u ta lesipeki de.

15. Andi i musu pakisei luku ufö i buta taa joo du wan fanöudu soni?

 ¹⁵ Ee kë du wan fanöudu soni, nöö pakisei luku andi i musu du sö taa i sa du di soni di i abi a pakisei u du. Jesosi bi lei u taa u musu ’go sindo pakisei te u kaba luku ee di möni fuu tjika’ (Luk. 14:28). Pakisei luku un mëni ten a o tei, un mëni soni joo abi fanöudu, ku un hia möiti a o dë fii mbei u soni sa waka bunu da i. So juu i sa sindo fan ku dee sëmbë fii wosudendu, fuun luku andi o dë fanöudu u hiniwan fuunu du, u soni sa waka bunu. Faandi mbei di fasi u du soni aki da wan bunu fasi u du soni? Wë a sa heepi i fii si ee i musu tooka so soni, nasö ee wan möön bunu fasi dë u du soni. Boiti di dë, te i sindo fan ku dee sëmbë fii wosudendu, nöö de sa da i köni, söseei de o sa möön dë kabakaba u heepi i u soni sa waka bunu.​—Nöng. 15:22.

DU SONI DI O TJA WINI KO DA I

16. Andi ku andi i musu du u di soni di i kë du sa waka bunu? (Luku di pisi „ Unfa i sa du soni ku köni?”)

¹⁶ Ee i du hii dee soni dee u taki a di woto aki, nöö hën da i dë kabakaba kaa u du soni a wan köni fasi. I mbei möiti u ko sabi fa soni dë, söseei i luku dee mama wëti u Bëibel di bi o sa heepi i fii du soni di o mbei Jehovah piizii. U di i du hii dee soni aki kaa, mbei i sa hakisi Jehovah faa heepi i u soni sa waka bunu da i.

17. Andi da di möön fanöudu soni di sa heepi i fii du soni, di o mbei soni waka bunu da i?

¹⁷ Aluwasi ee dee soni dee i bi du a di ten di pasa bi waka bunu, tökuseei i musu hoi a pakisei taa di möön fanöudu soni di sa heepi i u soni sa waka bunu, hën da te i ta wooko ku di köni u Jehovah, ma na tei ta wooko ku di öndöfeni nasö di köni fii. Jehovah wanwan tö sa da i tuutuu köni, ku sabi. Dee soni dë de o heepi i fii du soni a wan bunu fasi (Nöng. 2:1-5). Jehovah sa heepi i fii du soni di sa mbei a piizii.​—Ps. 23:2, 3.