1. Andi u sa du u mbei Jehovah wai?

 BOO taa i da wan sëmbë di i lobi wan apaiti kado. Di kado waiti, nöö di sëmbë dë sa du wan bumbuu soni ku ën. An dë u taki taa i bi o fii tjali ee di sëmbë bi o buta di kado a wan së, söseei ee nöiti möön a pakisei soni fëën! Ma i bi o fii bunu ee di sëmbë wooko ku di soni di dëën a wan bunu fasi, söseei ee a lei taa a tei ën u bigi. Unfa di woto aki nama ku di lusupaima? Wë Jehovah manda di Womi Mii fëën ko dëdë paka paima da u. A musu u ta wai seei te u ta lei taa u ta tei di kado aki u bigi, söseei te u ta lei taa u ta tei ën u bigi taa a lobi u. Biga u di a lobi u mbei a paka di lusupaima da u!​—Joh. 3:16; Lom. 5:7, 8.

 2. Andi woo luku a di woto aki?

² Te dee jaa ta pasa, nöö a kan taa wa ko ta si di lusupaima kuma wan apaiti kado möön. Ma ee wa ta tei di kado aki u bigi möön, nöö a o dë kuma u ta buta di waiti kado di Jehovah da u a wan kamian ka wa ta si ën, nasö ka wa o ta pakisei soni fëën möön. Di soni di u sa du fu an pasa sö, hën da hii juu u musu ta pakisei di soni di Gadu ku Keesitu du da u. Di woto aki sa heepi u fuu du di soni dë. Woo luku unfa u ta feni wini  u di lusupaima nöunöu kaa, söseei a di ten di ta ko. Boiti di dë, woo luku unfa u sa lei taa u ta tei di lobi di Jehovah lobi u bigi, möönmöön a di pisiten di u ta mëni di dëdë u Jesosi.

UNFA U TA FENI WINI NÖUNÖU AKI?

 3. Andi da wan fasi fa u ta feni wini u di lusupaima nöunöu aki?

³ U ta feni wini nöunöu kaa u di dëdë di Keesitu dëdë paka paima da u. Di lusupaima dë mbei Jehovah ta da u paadon u dee zöndu fuu. An musu u da u paadon. Ma a kë du ën. Di psalöm sikifima bi lei taa a ta tei di soni aki u bigi, di a taa: „Jehovah, i da wan bunu Gadu, nöö i dë kabakaba u da sëmbë paadon.”​—Ps. 86:5; 103:3, 10-13.

 4. Ambë Jehovah paka di lusupaima da? (Lukasi 5:32; 1 Timoteo 1:15)

⁴ So fuu sa fii kuma wa bunu tjika u Jehovah da u paadon. Ma te i luku ën te i kaba, nöö na wan fuu bumbuu tjika u Jehovah da u paadon. Apösutu Paulosu seei bi fusutan taa an bi ’bumbuu tjika u de kai ën wan apösutu seei’. Ma tökuseei a bi taki taa: „Ma fu di Gadu abi gaan bunuhati, hën mbei i si mi ko dë di sëmbë di i si mi dë tide aki” (1 Kol. 15:9, 10). Te u ta tjali u dee zöndu fuu, nöö Jehovah ta da u paadon. Faandi mbei? Wë, na u di u bumbuu tjika faa da u paadon, ma u di a lobi u mbei a ta da u paadon. Ee i ta fii kuma ja bumbuu tjika u Jehovah da i paadon, nöö hoi a pakisei taa Jehovah an paka di lusupaima da sëmbë di na abi zöndu, ma a pakëën da zöndu libisëmbë, di ta tjali u dee zöndu u de.​—Lesi Lukasi 5:32; 1 Timoteo 1:15.

 5. U abi leti u taki taa u fiti u Jehovah da u paadon u? Booko ën a piki möni.

⁵ Na wan fuu musu si kuma Jehovah musu u da u paadon, aluwasi ee u ta dini ën sömëni jaa longi kaa. A dë sö tuu taa Jehovah ta tei hii dee soni dee u ta du dëën u bigi (Heb. 6:10). Ma an manda di Womi Mii fëën ko paka paima da u, u paka u u dee soni dee u ta du dëën, ma a da u ën kuma wan kado. Ee u ta taki taa u fiti u Jehovah lei taa a abi tjalihati fuu, nasö taa u fiti u Jehovah buta pakisei a u apaiti, nöö a o dë taa u ta taki taa Jesosi Keesitu ko dëdë u sösö.​—Luku Galasia 2:21.

 6. Faandi mbei Paulosu bi ta wooko taanga da Jehovah?

⁶ Paulosu bi sabi taa, aluwasi ee a bi ta du sömëni soni da Jehovah, tökuseei Jehovah an bi musu u dëën paadon. Wë nöö faandi mbei a bi ta wooko sö taanga da Jehovah? A bi kë lei Jehovah taa a ta tei ën u bigi taa a abi bunuhati (Ef. 3:7). Wë sö nöö useei ta wooko taanga da Jehovah go dou u di u kë lei ën taa u ta tei ën u bigi taa a abi tjalihati fuu, ma na u di u kë lei ën taa u fiti faa da u paadon.

 7. Andi da wan woto fasi fa u ta feni wini u di lusupaima nöunöu? (Loomë 5:1; Jakobosi 2:23)

⁷ Wan woto fasi fa u ta feni wini u di lusupaima nöunöu, hën da u ku Jehovah sa dë gaan mati. a Kumafa u bi luku a di woto di pasa, nöö di de pai u, nöö u ku Jehovah an bi dë mati. Ma u di Jehovah paka di lusupaima da u, mbei u sa ko dë „bumbuu sëmbë nëën wojo”, söseei u ku ën sa ko dë gaan mati.​—Lesi Loomë 5:1; Jakobosi 2:23.

 8. Faandi mbei u musu tei ën bigi taa u sa begi Jehovah?

⁸ U abi di gaandi u begi Jehovah, u di u ku ën dë mati. Na di begi di u ta begi makandi ku wotowan nöö Jehovah ta jei, ma a ta jei dee begi u hiniwan fuu apaiti. Te u ta begi, nöö u ta feni kötöhati. Ma na di dë nöö. A sa  mbei u ku Jehovah ko dë möön gaan mati tu (Ps. 65:2; Jak. 4:8; 1 Joh. 5:14). Di Jesosi bi dë a goonliba aki, nöö a bi lo’ u begi u di a bi sabi taa Jehovah ta haikëën, söseei u di a bi sabi taa begi bi o heepi ën fu hën ku Jehovah dë mati go dou (Luk. 5:16). U ta tei ën u bigi seei taa u ku Jehovah sa ko dë mati, söseei taa u sa ta begi ën, u di Jesosi ko dëdë paka paima da u!

UNFA U SA FENI WINI U DI LUSUPAIMA A DI TEN DI TA KO?

 9. Unfa dee dinima u Jehovah dee ta hoi deseei nëën o feni wini u di lusupaima a di ten di ta ko?

⁹ Unfa dee dinima u Jehovah dee ta hoi deseei nëën o feni wini u di lusupaima a di ten di ta ko? Wë de o feni di libi u teego. Sömëni sëmbë ta si kuma di soni aki an kan, u di dusudusu jaa kaa libisëmbë ta dëdë. Ma sensi a di bigi Jehovah bi kë taa libisëmbë bi musu ta libi u teego. Ee Adam an bi du zöndu, nöö na wan sëmbë bi o ta pakisei taa libisëmbë an sa libi u teego. Hii fa nöunöu aki a ta djei kuma libisëmbë an o sa libi u teego, tökuseei u sa biibi taa a o pasa, u di u sabi taa Jehovah paka wan gaan paima da u, ku di libi u di Womi Mii fëën.​—Lom. 8:32.

10. Andi dee salufuwan ku dee woto sikapu ta wakiti u feni?

¹⁰ Hii fa a dë taa na nöunöu aki woo feni di libi u teego, tökuseei Jehovah kë fuu ta pakisei soni fëën nöunöu aki. Dee salufuwan ta wakiti di libi di de o feni a liba ala, te de o tii di goonliba makandi ku Keesitu (Ako. 20:6). Dee woto sikapu ta wakiti di libi di de o feni a wan paladëisi a goonliba aki, söndö pen ku fuka (Ako. 21:3, 4). I da wan u dee sëmbë dee ta wakiti u feni di libi u teego a goonliba aki ö? Di bunu di joo feni a goonliba aki an lagi möön di bunu di de o feni a liba ala. Jehovah bi mbei libisëmbë u libi a goonliba. Fëën mbei di libi a goonliba aki o suti te na soni. Woo ta dë waiwai.

11-12. Andi da so u dee bunu soni dee u sa wakiti fuu feni a di Paladëisi? (Luku dee peentje tu.)

¹¹ Pakisei luku unfa di libi o dë da i a di  Paladëisi. Ja o ta booko i hedi möön ku siki, nasö taa joo dëdë (Jes. 25:8; 33:24). Jehovah o da i hii dee bunu soni dee i kë. Andi i kë du a di Paladëisi? I kë lei soni u dee mbeti ö? I kë sa’ u pëë wan poku lai ö? I kë tëmbë u? An dë u taki taa a di paladëisi woo abi sëmbë fanöudu di sa’ u teeken wosu, di sa’ u mbei wosu, söseei di sa’ u paandi soni. Woo abi sëmbë fanöudu tu u heepi seeka soni u njan, u mbei wookolai, söseei woo abi sëmbë fanöudu u ta seeka di kamian faa sa ta dë hansehanse (Jes. 35:1; 65:21). Te woo libi u teego, nöö joo abi ten u du hii dee soni aki, ku woto soni jeti.

¹² A o dë wan piizii soni seei, u wai ku dee sëmbë dee o weki ko a libi baka! (Tjab. 24:15) Pakisei luku fa joo lei möön soni u Jehovah te i ta luku dee soni dee a mbei (Ps. 104:24; Jes. 11:9). Ma di möön bunu soni, hën da wa o ta du hogi soni möön. Joo ta dini Jehovah, söseei an o dë fii ta hakisi paadon möön! I bi o kë tooka di bunu libi di joo feni a di ten di ta ko, ku di piizii di sëmbë ta „piizii u zöndu libi u wan pisiten nöö” u? (Heb. 11:25) Wë nönö! Dee soni dee woo feni a di ten di ta ko bunu möön dee soni dee u sa feni a di goonliba aki. Hoi a pakisei taa wa o ta wakiti di Paladëisi u nöömö. A o ko dë wan kamian ka woo ta libi hiniwan daka. Dee soni dë an bi o sa pasa ee Jehovah an bi lobi u tjika u da u di Womi Mii fëën kuma wan kado!

LEI TAA I TA TEI DI LOBI DI JEHOVAH LOBI I U BIGI

13. Unfa u sa lei taa u ta tei di lobi di Jehovah lobi u u bigi? (2 Kolenti 6:1)

¹³ Unfa u sa lei taa u ta tei di seeka di Jehovah seeka soni u paka di lusupaima da u u bigi? U sa du di soni dë te u ta lei taa di dini di u ta dini ën da di möön fanöudu soni a u libi (Mat. 6:33). Jesosi dëdë da u ’fu wa musu libi a useei kë möön. Ma u musu libi a di kë u di Sëmbë di dëdë toona weki baka fuu hedi naandë’ (2 Kol. 5:15). Wa kë sösö di bunuhati di Jehovah lei taa a abi da u.​—Lesi 2 Kolenti 6:1.

14. Unfa u sa lei taa u ta futoou Jehovah, nöö u du soni kumafa a ta lei u?

¹⁴ U sa lei tu taa u ta tei di lobi di Jehovah lobi u u bigi te u ta futoou ën, nöö u du soni kumafa a ta lei u. Unfa sö? Wë te woo luku un siköö lei woo tei, nasö un wooko woo du, nöö u musu pakisei luku andi Jehovah bi o kë fuu du (1 Kol. 10:31; 2 Kol. 5:7). Te u ta futoou a Jehovah, nöö di biibi fuu ta ko möön taanga, söseei u ku ën ta ko dë möön gaan mati. Boiti di dë, u ta ko dë möön seiki taa woo sa feni di libi u teego.​—Lom. 5:3-5; Jak. 2:21, 22.

15. Unfa u sa lei taa u ta tei di lobi di Jehovah lobi u bigi, a di pisiten di u ta mëni di dëdë u Jesosi?

¹⁵ Wan woto fasi dë jeti fa u sa lei taa u ta tei di lobi di Jehovah lobi u u bigi. U sa lei ën unfa u ta tei di lusupaima u bigi a dee wiki ufö u mëni di dëdë u Jesosi, ku baka te u mëni di  dëdë u Jesosi. Boiti di seeka di u ta seeka soni sö taa u sa go mëni di dëdë Jesosi, u sa kai wotowan u ko mëni ën tu (1 Tim. 2:4). Konda da dee sëmbë dee i kai andi woo du di daka dë. A bi o bunu seei fii lei de di fëlön Faandi mbei Jesosi dëdë?, ku di fëlön Mëni di dëdë u Jesosi di dë a jw.org. Dee gaanwomi sa kai dee sëmbë dee an ta ko a komakandi möön u de ko mëni di dëdë u Jesosi. Pakisei luku unfa dee ëngëli a liba ala, ku dee sëmbë a goonliba aki o wai tjika ee so u dee sëmbë u Jehovah di bi lasi toona ko a wosu baka (Luk. 15:4-7). Boo wai ku hii sëmbë di ko mëni di dëdë u Jesosi makandi ku u, möönmöön dee njunjun sëmbë, ku dee sëmbë dee an bi ko a komakandi djunsu. U kë u de fii bunu!​—Lom. 12:13.

16. Faandi mbei a bunu fuu du möön soni da Jehovah, a di pisiten di u ta mëni di dëdë u Jesosi?

¹⁶ I sa du möön soni da Jehovah a di pisiten di u ta mëni di dëdë u Jesosi ö? Wë, a sö wan fasi i sa lei taa i ta tei dee soni dee Gadu ku Keesitu du da u u bigi. Möön u nango a di peleikiwooko, möön woo si fa Jehovah ta heepi u. Di soni dë o mbei woo ko ta möön futoou ën (1 Kol. 3:9). Boiti di dë, mbei hii möiti fii lesi dee pisi u Bëibel di ta taki soni u di libi u Jesosi. De o dë u feni a di buku Öndösuku Gadu Wöutu hiniwan daka, söseei a di mindi wiki komakandi-buku fuu. I sa buta tu taa joo öndösuku dee Bëibel tëkisi dë, te joo lei soni u Bëibel.

17. Andi sa mbei Jehovah piizii? (Luku di pisi „ Fasi fa u sa lei taa u ta tei di lobi di Jehovah lobi u u bigi”.)

¹⁷ Kandë soni dë di bi o sa mbei taa ja o sa du hii dee soni dee u taki a di woto aki. Ma hoi a pakisei taa Jehovah an ta tei dee soni dee i ta du maaka ku dee soni dee wotowan ta du. A ta si andi dë a i hati. A ta piizii te a ta si taa i dë ku tangi a hati, u di a da u di lusupaima kuma kado.​—1 Sam. 16:7; Maik. 12:41-44.

18. Faandi mbei u ta da Jehovah Gadu ku Jesosi Keesitu tangi?

¹⁸ Di lusupaima hën mbei u sa feni paadon u dee zöndu fuu, hën mbei u ku Jehovah sa dë mati, söseei hën mbei u sa feni di libi u teego. Boo ta lei Jehovah taa u ta tei ën bigi taa u sa feni dee gaan bunu aki, u di a lobi u (1 Joh. 4:19). Boo ta lei tu taa u ta tei di soni di Jesosi du da u bigi, u di a lobi u sö tee taa a dëdë paka paima da u!​—Joh. 15:13.