TE WAN sëmbë du wan gaan soni da u, nöö u musu lei taa u tei di soni dë u bigi. Jesosi bi taki u di soni dë, baka di a bi kula teni womi di bi abi wan taku siki di data an bi sa kula a di ten ala. Wan u dee teni womi dë, bi „bia toona, nöö hën a ta bai taanga ta gafa Gadu ta dëën tangi u di bunu a du ën naandë”. Jesosi bi taki taa: „Na teni sëmbë un bi dë ko bunu nö? Unsë dee otowan fii dë?” (Lukasi 17:12-17) Andi u ta lei a di woto aki? Wë u ta lei taa hesihesi seei u sa fëëkëtë dee bunu soni di wotowan ta du da u!

Di lusupaima an dë kuma dee woto soni di sëmbë sa da u. Hën da di möön gaan soni di wan sëmbë bi sa du da wotowan. Ma nöö unfa i sa lei taa i tei di soni di Gadu du da i u bigi?

• Ko sabi di Sëmbë di seeka di lusupaima da u. Na  u di Gadu seeka di lusupaima da u, mbei a musu u dë taa hii sëmbë o libi u teego. Wan daka Jesosi bi begi Gadu hën a piki ën taa: „Nöö andi da di libi u teego? Hën da u de ko sabi i, di wan kodo tuutuu Gadu u mundu ku mi, Jesosi Keesitu, di i manda ko a goonliba aki” (Johanisi 17:3). Boo taa wan sëmbë piki i taa di i bi dë piki mii, hën wan soni bi pasa ku i di bi sa mbei taa i lasi i libi. Hën wan womi ko heepi i fu ja dëdë. Wë ja bi o kë ko sabi di sëmbë dë, ku faandi mbei a bi heepi i ö? Jehovah Gadu, di sëmbë di seeka di lusupaima da u di o mbei sëmbë libi u teego, an kë taa i ko sabi ambë dëën nöö. Ma a kë fii ko dë gaan mati ku ën tu. Di Bëibel ta piki u taa: „Pusa go a Gadu e, nöö Gadu seei o pusa ko a i tu.”​—Jakobosi 4:8.

• Ko abi möön biibi a di lusupaima. „Nöö ee wan sëmbë i ta biibi a di Womi Mii u Gadu i si dë, nöö i abi di libi u teego kaa” (Johanisi 3:36). Andi a kë taki u ko abi biibi a wan soni? Hën da u musu du soni u lei taa u abi biibi (Jakobosi 2:17). Andi u musu du? Te wan sëmbë ta da i wan soni, nöö i musu lei taa i këën tuutuu, u di joo tëndë maun tei ën. Sö a dë ku di lusupaima tu. I musu lei taa i këën tuutuu. Unfa sö? Mbei möiti fii ko sabi unfa Gadu kë fii ta libi, nöö libi a di lö fasi dë. * Begi Gadu faa da i paadon, söseei faa mbei háti fii ta dë limbolimbo. Ko dë mati ku Gadu, nöö abi di futoou taa hii dee sëmbë dee o lei taa de abi biibi a di lusupaima, o feni wan bööböö libi a di ten di ta ko, de an o ta dë pantapanta möön, nöö de o abi wan bunu libi!​—Hebelejën 11:1.

• Ko a di komakandi ka woo mëni di dëdë u Jesosi. Jesosi bi taki taa hiniwan jaa u musu ta mëni di dëdë di a ko dëdë da u. A bi taki u di soni dë taa: „Sö nöö un musu ta du nöömö, fuun ta mëni di dëdë di mi o dëdë da unu” (Lukasi 22:19). Dee Jehovah Kotoigi o mëni di dëdë u Jesosi a feifidaka 11 u piki-deewei-liba 2017, baka te sonu go. Di komakandi aki o hoi wan juu longi sö. De o hoi wan taki di o lei u andi di dëdë u Jesosi kë taki tuutuu, ku un fa di dëdë fëën ta tja wini ko da u nöunöu kaa, söseei unfa a o tja wini ko da u a di ten di ta ko. Di jaa di pasa dë, söwan 20 milion sëmbë bi ko mëni di dëdë u Jesosi a hii së u goonliba. Ku piizii seei u ta kai i fii ko mëni ën makandi ku u, u lei taa i tei di gaan soni di Gadu du da u u bigi.