DI SONI di de da Jordan aki da wan soni di de ta saapu pötiloutu. De mbei ën kuma wan boto, nöö a ta djei wan piki soni. Ma a dë wan u dee soni di a möön lobi. Jordan taki taa: „Wan mati u dee sëmbë u mi de kai Russel, hën bi da mi ën di mi bi möön njönku.” Baka di Russel ko dëdë, hën Jordan ko jei taa Russel bi heepi hën mama tata ku dee sëmbë fëën. Russel bi ta da de degihati te soni bi ta taanga da de. Jordan taki taa: „Di mi ko sabi Russel möön bunu, hën mi ko ta si di piki kado di a bi da mi dë, kuma wan gaan dii soni seei.”

Di woto u Jordan ta lei taa so sëmbë sa ta si wan kado di de da de kuma wan piki soni nasö kandë de an ta pena ta si ën u soni seei. Ma wan sëmbë di ta tei soni u bigi o wai ku di kado di wan sëmbë dëën, nöö a o si ën kuma wan soni di möni an sa bai seei. Di Bëibel ta taki u wan soni di dë kuma wan kado di dii seei. A taa: „Masa Gadu lobi libisëmbë sö tee a da de di wan kodo Womi Mii fëën di a abi. Nöö ee wan sëmbë i ta biibi a di Mii fëën aki liba, nöö ja o lasi go kaba a sösö möönsö, ma i abi di libi u teego kaa.”​—Johanisi 3:16.

Gadu du wan soni da u di sa mbei u feni di libi u teego! Wan sëmbë bi o sa da u wan soni di bigi möön disi ö? Hii fa so sëmbë an ta tei di soni aki u bigi, tökuseei tuutuu Keesitu sëmbë ta si ën kuma wan „dii” soni seei (Psalöm 49:8; 1 Petuisi 1:18, 19). Ma nöö faandi mbei Gadu bi musu mbei di Womi Mii fëën ko dëdë da hii sëmbë?

Wë apösutu Paulosu ta konda faandi mbei. A taa: „Adam hën tja hogi du ko da hii sëmbë a goonliba aki e, nöö di hogi du tja dëdë ko. Hën wë mbei dëdë ko ta kii hii sëmbë te kisi tide” (Loomë 5:12). Di fosu womi de kai Adam, bi du zöndu u di a pasa  Gadu buka, nöö sö wë a bi ko dëdë. Fëën mbei hii libisëmbë ta dëdë.

„Hogilibi abi hën paka, hën da dëdë. Ma nöö Gadu [ta da u] di libi u teego di u sa feni a Jesosi Keesitu u Masa” (Loomë 6:23). Gadu bi manda di Womi Mii fëën, Jesosi Keesitu, ko a goonliba u da di telutelu libi fëën söndö föutu, u puu libisëmbë a dëdë basu. U di Jesosi ko dëdë da u, mbei hiniwan sëmbë di abi biibi nëën o feni di libi u teego.​—Loomë 3:24.

Paulosu bi taki u hii dee gaan bunu dee Gadu o da hii dee dinima fëën, u di Jesosi ko dëdë da de. A bi taa: „Gaantangi u Gadu fu di a manda Masa Jesosi kuma wan gaan gudu ko da u. A bigi tee buka an tjika u sa taki ën” (2 Kolenti 9:15). Awa, di dëdë Jesosi ko dëdë paka da u bigi tee taa wa sa taki fa a bigi tjika. Gadu da libisëmbë sömëni waiti soni. Ma faandi mbei di lusupaima dë sö wan apaiti soni? Na un futu a tooka u hii dee woto soni dee Gadu du da u? * Wë nöö andi u musu du? Gaantangi, lesi unfa di Bëibel ta piki dee hakisi aki a dee tu woto dee ta ko.