SO SËMBË TA PIKI NÖNÖ. Wan data taki taa te wan sëmbë ta wooko ku dee lai u Bëibel, nöö a dë kuma a ta wooko ku wan buku u di jaa 1920 u lei sëmbë soni a di ten aki. Kandë wan sëmbë di an ta lesipeki di Bëibel bi sa taki taa wan sëmbë an bi o tei di pampia u wan awoo computer faa sa sabi unfa a musu wooko ku wan njunjun computer u di ten aki. Te i luku ën bunu, sëmbë ta pakisei taa di Bëibel na u di ten aki möön.

Faandi mbei wan sëmbë bi o wooko ku sö wan buku faa ko sabi unfa a musu du soni a di ten aki ka di goonliba go a fesi ku dee njunjun computer soni? Gaan hia website dë ka i sa feni lai hiniwan daka. Soni ta pëë a teefei ka sëmbë di sabi soni ta da wotowan lai. So u dee sëmbë aki da sëmbë di ondösuku soni u di fasi fa sëmbë fusutan ta wooko, so u de sabi unfa sëmbë musu libi, nöö so u de da sëmbë di sikifi buku. Boiti di dë, i abi wënkë di ta sei te a hia buku di nama ku dee soni aki, nöö dee sëmbë dee ta mbei dee buku aki ta feni hia moni seei.

Hiniwan miniti u sa feni lai di nama ku soni di u kë sabi. Wë nöö faandi mbei u musu suku lai a di Bëibel hii fa de sikifi ën söwan 2000 jaa pasa? A sa djei kuma sëmbë di an ta lesipeki di Bëibel abi leti u taki taa ee wan sëmbë bi o ta suku lai a sö wan awooten buku, nöö a dë kuma a ta wooko ku wan gaandi buku nasö wan pampia u wan awoo computer. Ma di soni dë an dë sö tuutuu. Dee soni dee könima ko sabi ku dee njunjun soni di de ta mbei ta tooka hesihesi. Ma dee soni di libisëmbë abi fanöudu tooka u? Sëmbë ta kë sabi jeti faandi mbei u dë a libi, de ta kë abi wan suti libi, de ta kë dë bunu ku dee famii u de, nöö de ta kë abi mati di de sa futoou.

Hii fa di Bëibel da wan awooten buku, a ta konda soni u dee soni dë, ku woto soni tu. Söseei a ta konda da u taa di sëmbë di mbei hii soni, hën mbei sëmbë sikifi ën. A sa heepi u a hiniwan soni a u libi, söseei a sa seeka u da hiniwan fuka di sa miti u (2 Timoteo 3:16, 17). Ma boiti di dë, a abi lai di sa heepi u hiniwan ten. Dee lai aki an ta gaandi nöiti! Di Bëibel seei ta taki taa: „Dee Wöutu u Gadu a ta fan . . . libi dë a de e.”​—Hebelejën 4:12.

Dee soni dee di Bëibel taki dë sö tuu ö? A gaandi da di ten aki poi ö, naa a dë di möön fanöudu buku di ta da u bunu lai a di ten aki? Sömëni u dee Hei Wakitimawosu di ta ko o heepi u fuu ko sabi fa dee soni aki dë tuutuu. Disi da di fosuwan.