Ambë da Gadu tuutuu?
Sömëni sëmbë ta taki taa de ta biibi a Gadu. Ma ee i hakisi de ambë da Gadu tuutuu, nöö de ta piki i peipei soni. So u de ta si kuma Gadu da wan hogihati sëmbë di ta kuutu sëmbë hii juu te de du wan soni di an bunu. Wotowan möön o piki i taa hii juu Gadu ta lei taa a lobi sëmbë, söseei taa a ta da sëmbë paadon aluwasi andi de du. Söseei i abi sëmbë di ta pakisei taa Gadu dë a longi poi, nöö an abi toobi ku u. U dee soni aki mbei so sëmbë sa pakisei taa wa sa sabi ambë da Gadu tuutuu.
A dë fanöudu fuu sabi ambë da Gadu ö? Wë aai. Ee u ko sabi ambë da Gadu tuutuu, nöö di soni dë sa mbei u feni gaan bunu (Tjabukama 17:26-28). Möön i ko zuntu ku Gadu, möön a o lobi i, söseei a o ta heepi i tu (Jakobosi 4:8). Boiti di dë, dee sëmbë dee ko sabi ambë da Gadu tuutuu o feni di libi u teego a di ten di ta ko.—Johanisi 17:3.
Unfa i sa ko sabi ambë da Gadu tuutuu? Pakisei u wan sëmbë di i sabi bumbuu. Boo taa a dë wan gaan mati fii. Unfa a du ko taa i ku ën ko dë gaan mati sö? I bi ko sabi hën në, dee fasi dee a abi, dee soni dee a lobi, dee soni dee an lobi, dee soni dee a bi du, dee soni dee a buta taa a o du, ku sömëni woto soni fëën jeti. Dee soni aki de bi mbei taa i ku di sëmbë dë bi ko dë mati. I bi ko sabi soni fëën.
Sö nöö u sa ko sabi Gadu te u pakisei fundu u dee soni dee sikifi a basu aki:
Di Hei Wakitimawosu aki o heepi i fii ko sabi unfa dee soni dë, dë tuutuu. Joo ko sabi ambë da Gadu tuutuu, söseei un wini joo feni te i ku ën ko dë gaan mati.
