Un wini joo feni te i ko sabi ambë da Gadu tuutuu?
A dee woto dee u bi taki u de kaa, u lei sömëni soni di sa heepi u fuu piki di hakisi: ’Ambë da Gadu tuutuu?’ U bi si a di Bëibel taa di në fëën da Jehovah, söseei u bi si taa di fasi di a abi möön gaanfa, da lobi. Söseei u bi luku dee soni dee a bi du a di ten di pasa ku dee a o du a di ten di ta ko jeti da libisëmbë. Sömëni soni dë jeti di i musu ko sabi u Gadu. Ma kandë i ta hakisi iseei ee un wini joo feni te i ko sabi dee soni dë.
Jehovah paamusi i taa „ee i suku ën, a o mbei i feni ën” (1 Kloniki 28:9). Pakisei di dii kado di joo feni ee i mbei möiti fii ko sabi ambë da Gadu tuutuu. I ku ’Jehovah sa ko dë gaan mati’! (Psalöm 25:14) Un wini joo feni ee i ku Gadu dë gaan mati?
Wan piizii libi. Jehovah da di „piizii Gadu” (1 Timoteo 1:11, NW). Ee i ku ën ko dë mati, söseei ee i ta djeesi ën a dee fasi fëën, nöö joo ta dë waiwai tuutuu. Di soni dë o mbei soni ta waka bunu da i (Psalöm 33:12). Joo sa abi wan piizii libi tu, u di joo ta koti pasi da soni di bi o sa kaba i libi a sösö, söseei u di joo ta du dee soni dee o heepi i fii abi wan bunu gösöntu. A sa heepi i söseei fii ku wotowan sa ta libi bunu ku unuseei. Di soni dë o mbei taa joo kë taki di soni di di psalöm sikifima bi taki, taa: „A bunu da mi u ko zuntu ku Gadu.”—Psalm 73:28.
A o ta buta pakisei a i apaiti. Jehovah paamusi dee dinima fëën taa: „Mi o da i lai, nöö mi o ta luku i” (Psalöm 32:8). Di soni dë kë taki taa Jehovah ta buta pakisei a hiniwan u dee dinima fëën, nöö a ta da hiniwan u de andi de abi fanöudu. (Psalöm 139:1, 2) Te i ku Jehovah ko dë gaan mati, nöö joo ta si taa hii juu a ta dë kabakaba u heepi i.
Wan bunu libi a di ten di ta ko. Boiti taa a o da i wan bunu libi a di ten aki, Jehovah Gadu o da i wan bunu libi a di ten di ta ko tu (Jesaaja 48:17, 18). Di Bëibel taa: „Andi da di libi u teego? Hën da u de ko sabi i, di wan kodo tuutuu Gadu u mundu ku mi, Jesosi Keesitu, di i manda ko a goonliba aki” (Johanisi 17:3). A di taanga ten aki, dee soni dee Gadu paamusi u dë kuma wan sipi hanka di ta heepi u „fuu dë gingin”.—Hebelejën 6:19.
Dee soni aki da wantu u dee wini dee joo feni ee i ko sabi ambë Gadu dë tuutuu, söseei ee i ku ën ko dë gaan mati. I sa fan ku hiniwan Jehovah Kotoigi nasö i sa go a jw.org ee i kë sabi möön soni.
Kandë i lobi dee woto aki tu
DI HEI WAKITIMAWOSU
Gadu ta buta pakisei a i ö?
Andi ta lei gbelingbelin taa Gadu kë u soni waka bunu da i seei?
DEE FANÖUDU LEI U BËIBEL
U sa ko dë mati ku Gadu ö?
A pasa sömëni jaa kaa taa sëmbë kë ko sabi di Sëmbë di mbei de. Di Bëibel sa heepi u fuu ko dë wan mati u Gadu. Fuu ko dë wan mati u Gadu, nöö a ta bigi a di lei di u ta lei ko sabi di në fëën.
