Gadu ta haika u te u ta begi ën u?
I hakisi iseei wan daka ee Gadu ta haika i te i ta begi ën u? Wë, na ju wanwan kë sabi di soni dë. Sömëni sëmbë ta begi Gadu te de dë ku wan fuka, ma awa seei de ta abi di fuka jeti. Di soni dë kë taki taa Gadu an ta kë haika u te u ta begi ën u? Wë nönö! Di Bëibel ta piki u taa Gadu ta haika u te u ta begi ën a wan fasi di fiti. Boo luku andi di Bëibel ta taki.
GADU TA HAIKA TE U TA BEGI ËN.
„I da di Sëmbë di ta haika begi. A i hii pei sëmbë o ta ko suku heepi.”—Psalöm 65:2.
So sëmbë ta begi u di de ta taki taa a ta mbei taa de ta fii bunu, hii fa de an ta biibi taa wan sëmbë dë di ta haika de tuutuu. Ma begi an musu dë wan soni nöö di musu heepi u fuu fii bunu te u abi fuka. Di Bëibel ta piki u taa ’Jehovah * dë zuntu ku hii dee sëmbë dee ta kai ën, dee ta bai kai ën ku wan limbo hati. . . . A o jei de, nöö a o puu de a fuka.’—Psalöm 145:18, 19.
U sa dë seiki taa Jehovah Gadu ta haika te dee dinima fëën ta begi ën. A bi taki taa: „Un musu kai mi, un musu ko a mi, un musu begi mi, nöö mi o haika unu.”—Jelemia 29:12.
GADU KË FII TA BEGI ËN.
„Un musu ta begi nango nöömö tu. Wan musu disa.”—Loomë 12:12.
Di Bëibel ta da u taanga fuu ta „begi taanga.” Söseei a ta piki u taa ’hiniwan juu u musu ta tja hii dee fuka fuu di u abi tuu ko a Gadu fesi ku begi’. Di soni dë ta lei gbelingbelin taa Jehovah Gadu kë taa u musu ta begi ën.—Mateosi 26:41; Efeise 6:18.
Ma faandi mbei Gadu kë taa u musu ta begi ën? Pakisei taa wan tata ta wai seei te di mii fëën ta hakisi ën faa heepi ën ku soni. Wë, wan tata sabi kaa andi di mii fëën abi fanöudu, nasö unfa di mii fëën ta fii, ma te a jei di mii seei hakisi ën faa heepi ën, nöö di soni dë ta lei taa di mii ta futoou ën, söseei taa hën ku ën dë mati. Wë, sö nöö a dë tu te u ta begi Jehovah Gadu, u ta lei ën taa u ta futoou ën, söseei taa u kë taa u ku ën musu dë mati.—Nöngö 15:8; Jakobosi 4:8.
GADU TA BOOKO HËN HEDI KU I TUUTUU.
„Tuwë hii dee fuka fii tuu da Gadu e, . . . biga a a’ toobi ku i.”—1 Petuisi 5:7.
Gadu kë taa u musu ta begi ën u di a lobi u, söseei u di a ta booko hën hedi ku u. A sabi andi ta da u bookohedi, nöö a kë heepi u.
Hii juu Könu Dafiti bi ta begi Jehovah Gadu faa heepi ën. A bi ta piki ën andi a bi ta pakisei, söseei unfa a bi ta fii (Psalöm 23:1-6). Unfa Gadu bi feni Dafiti? Wë Gadu bi lobi Dafiti, nöö a bi ta haikëën te a bi ta begi ën (Tjabukama 13:22). A di wan seei fasi Gadu ta haika u te u ta begi ën, u di a ta booko hën hedi ku u.
„MI LOBI JEHOVAH BIGA A TA JEI MI TÖNGÖ TE MI TA BEGI ËN”
Di soni aki wan u dee sëmbë dee sikifi di buku Psalöm bi taki. A bi dë seiki taa Gadu bi ta haika dee begi fëën, nöö di soni dë bi dëën taanga seei. A bi ta fii taa hën ku Gadu bi dë gaan mati, nöö a bi feni taanga u hoi dou, hii fa a bi abi fuka ku bookohedi.—Psalöm 116:1-9.
Te u dë seiki taa Gadu ta haika u te u ta begi ën, nöö a o da u taanga fuu ta fan ku ën nöömö. Luku di woto u wan womi de kai Pedro, di ta libi a Sipanjöluköndë. Di womi mii fëën u 19 jaa bi ko lasi libi a wagi pasi liba. Ku fuka a hati Pedro begi Gadu sömëni pasi faa dëën kaakiti. Andi bi pasa? Pedro bi taki taa: „Jehovah bi piki dee begi dee mi bi ta begi ën, u di a bi mbei dee baaa ku dee sisa fuu da mi ku mi mujëë taanga seei.
Gadu lo’ u mbei dee mati fuu ko da u taanga ku kötöhati, u lei taa a ta piki dee begi dee u ta begi ën
Dee begi dee Pedro bi ta begi, an bi tja di womi mi fëën ko dëën baka, ma de bi heepi Pedro ku dee famii fëën a sömëni fasi seei. Hën mujëë de kai María Carmen, bi taki taa: „Dee begi dee mi bi begi bi heepi mi ku di kusumi di mi bi ta kusumi. Mi bi sabi taa Jehovah Gadu bi ta fusutan mi, u di te mi bi ta begi, nöö mi bi ta fii taa mi bi ta dë bööböö. Ma bi ta dë pantapanta.”
Dee soni dee sikifi a di Bëibel, ku dee soni dee useei ta öndöfeni, ta lei gbelingbelin taa Gadu ta piki u te u ta begi ën. Ma u sa fusutan tu taa Gadu an ta piki hii begi di sëmbë ta begi ën. Faandi mbei Gadu ta piki so begi di sëmbë ta begi, ma an ta piki wotowan?
^ pal. 5 Jehovah da di në u Gadu.—Psalöm 83:18.
