Te sëmbë an o ta buuse deseei nöiti möön!
Aluwasi ee wa ta buuse sëmbë möön, tökuseei wa sa puu di buuse di woto sëmbë ta buuse wotowan. Hii fa so sëmbë an du na wan hojo soni, tökuseei sëmbë ta du ku de, u di de buuse de. Wë nöö ambë sa puu di buuse di sëmbë ta buuse wotowan?
Jehovah Gadu wanwan tö sa puu di lö libi aki be an dë a mundu möön. Di soni aki di Bëibel ta piki u taa o pasa.—Nöngö 20:22.
GADU O PUU HII DEE SONI DEE TA MBEI SËMBË TA BUUSE DESEEI
-
1. SAATAN DIDIBI. Saatan hën ta mbei sëmbë ta buuse deseei a di ten aki. Gadu o kii Saatan ku hii dee sëmbë dee ta buuse wotowan kuma ën.—Psalöm 37:38; Loomë 16:20.
-
2. DI HOGI GOONLIBA U SAATAN. Gadu o puu hii dee soni dee ta mbei sëmbë ta buuse wotowan. So u dee soni aki da dee politikima u köndë ku dee fesima u keiki. Gadu o puu dee langahati seisonima tu.—2 Petuisi 3:13.
-
3. ZÖNDU. Di Bëibel ta lei taa u di u da zöndu libisëmbë, mbei u ta du soni, söseei u ta pakisei soni di an bunu (Loomë 5:12). Wan u dee soni dë da di buuse di sëmbë ta buuse wotowan. Gadu o heepi u fu wa ko abi fasi möön di an bunu, nöö te u kaba fëën sëmbë an o ta buuse deseei nöiti möön.—Jesaaja 54:13.
DI BËIBEL TA PAAMUSI U WAN GOONLIBA KA SËMBË AN O TA BUUSE DESEEI MÖÖN
-
1. NA WAN SËMBË O LIBI HOGI KU WOTOWAN MÖÖN. Di Könuköndë u Gadu hën o ta tii di goonliba. A o dë a liba ala ta tii, nöö letilibi o dë u nöömö (Daniëli 2:44). Sëmbë o ta lobi hii pei sëmbë. Gadu o puu di libi di sëmbë ta libi hogi ku deseei.—Lukasi 18:7.
-
2. HII SËMBË O TA LIBI BÖÖBÖÖ. Na wan sëmbë o ta tja sitaafu, u di feti dë (Psalöm 46:9). Hii sëmbë o kë libi bööböö ku wotowan. Fëën mbei na wan hogi o dë a goonliba.—Psalöm 72:7.
-
3. HII SËMBË O LIBI U TEEGO, NÖÖ HII SONI O DË BUNU. Hii sëmbë o lobi wotowan tuutuu (Mateosi 22:39). Na wan sëmbë o ta abi bookohedi, söseei na wan sëmbë o ta pakisei dee hogi dee bi miti ën a di ten di pasa (Jesaaja 65:17). Te sëmbë an o ta buuse deseei möön, nöö „de o piizii seei biga bööböö libi o dë pasa maaka.”—Psalöm 37:11.
I bi o kë libi a sö wan goonliba u? Nöunöu kaa i abi sëmbë di ta mbei möiti u de an buuse wotowan möön, u di de ta du dee soni di de ta lei a Bëibel (Psalöm 37:8). Dee Jehovah Kotoigi dee dë a hii së u goonliba, ta du di soni aki. Hii fa de dë sëmbë u peipei lö, söseei hii fa de kiija de a peipei fasi, tökuseei de ta libi makandi kuma wan famii, söseei de lobi de na de.—Jesaaja 2:2-4.
Dee Jehovah Kotoigi o wai u heepi i fu iseei ko sabi unfa i sa du soni te sëmbë an ta libi a wan leti fasi ku i. Dee soni dee joo lei sa heepi i fu ja ta buuse wotowan möön, ma de o heepi i fii lobi de. I sa ko sabi unfa i sa lei taa i lobi hii sëmbë, te kisi dee sëmbë dee ta buuse wotowan. Te i ta du di soni aki, nöö joo ta möön dë waiwai, söseei i ku wotowan o ta libi möön bunu ku unuseei. Ma di möön fanöudu soni, hën da joo ko sabi andi i sa du fii sa dë a di ten ka di Könuköndë u Gadu o puu di buuse di sëmbë ta buuse deseei.—Psalöm 37:29.
Kandë i lobi dee woto aki tu
DI HEI WAKITIMAWOSU
Andi di Könuköndë u Gadu o du?
Jesosi bi sabi taa di Könuköndë u Gadu wanwan sa puu dee fuka u libisëmbë. Andi di Könuköndë du kaa, di ta mbei u dë seiki taa a o du dee soni dee a paamusi u?
