Wë ee di soni aki an bi pasa ku i, tökuseei a kan taa i bi si unfa a bi pasa ku woto sëmbë kaa. A lo’ u pasa taa de ta taki a njunsu unfa sëmbë ta buuse wotowan, u di de dë u wan woto köndë, nasö u di de ta du soni woto fasi. De ta taki tu unfa sëmbë ta buuse wotowan, u di de dë womi di ta libi ku womi nasö mujëë di ta libi ku mujëë. Di soni aki mbei sömëni tiima u köndë ta buta wëti di ta da pasi u sitaafu sëmbë di ta libi hogi ku wotowan.

Te sëmbë ta buuse wan sëmbë, nöö a lo’ u pasa taa di sëmbë dë seei ta bia buuse woto sëmbë tu. Di du di sëmbë ta du hogi ku wotowan u di de buuse de, ta mbei taa dee sëmbë dë seei ta bia ta libi hogi ku wotowan tu. Nöö di soni dë ta mbei taa sö nöö soni o ta pasa nango nöömö.

Kandë sëmbë bi da i sen, kandë de bi mbei i fa, nasö kandë de bi taki hogi fii, hii fa ja du soni ku de. Ma na dee soni aki nöö sëmbë ta du ku wotowan te de buuse de. De ta du möön gaan soni seei. So sëmbë ta du soni ku taanga hati boonu, de ta booko sëmbë soni, söseei de ta kisi mujëë. Wotowan ta kii wan hii kulupu sëmbë.

Di buku aki o lei u andi u musu du te sëmbë buuse u, söseei a o piki dee hakisi aki tu:

• Faandi mbei sëmbë ta buuse wotowan sö?

• Unfa u sa du te nöö sëmbë an ta buuse wotowan möön?

• Di buuse di sëmbë ta buuse wotowan o kaba wan daka u?