Buuse da te ja lobi wan sëmbë nasö wan kulupu sëmbë seei kwetikweti. Nasö te ja sa si de a wojo seei. Buuse da wan fii di taanga möön di boonu di hati fii ta boonu ku wan sëmbë u wan pisiten.

Peipei soni dë di ta mbei sëmbë ta buuse wotowan. A lo’ u pasa taa sëmbë ta buuse wotowan u di de dë u wan pei nasiön nasö u wan pei lö, ma na u di de du wan soni. De ta buuse dee sëmbë aki u di de ta si kuma hii dee sëmbë u di nasiön dë ta du soni di an bunu. De ta si kuma de abi hogihati, nöö sö nöö de o dë kaa. Sëmbë sa ta si de kuma de sösö, nasö kuma sëmbë di ta mbei taa soni an ta waka bunu. Kandë soni bi miti dee sëmbë di ta buuse wotowan. Kandë sëmbë bi fon de, kandë de an bi libi bunu ku de, nasö woto soni bi pasa di mbei taa de bigi ta buuse wotowan a de hati.

Wan sëmbë sa buuse wan wotowan, hii fa hën ku ën an sabi. A sa pasa taa söndö u wan sëmbë sabi, a ta pakisei wan pei fasi u wan wotowan, u di sö dee sëmbë dee hën ku de ta hulu ta si dee sëmbë dë kaa. Nöö a sö wan fasi a sa pasa taa te fii mëni wan hii kulupu sëmbë ta buuse wan wotowan, u di wotowan ta waka a wotowan baka.

Te u ko fusutan un hesi wan sëmbë sa ko ta buuse wan wotowan, nöö u ta ko fusutan faandi mbei a dë a hii së. Ma fuu sa ko dë sëmbë di an ta buuse wotowan möön, nöö u musu ko fusutan unfa a du waka taa sëmbë ko ta buuse wotowan. Di Bëibel ta piki u unfa a du waka.

NA LIBISËMBË HËN TJA BUUSE KO. Di soni aki bigi di di ëngëli di u ko sabi bakaten kuma Saatan Didibi hopo fia ku Gadu. Sensi di ten dë, a „bi ta kii sëmbë kaa”. „Nëën mindi soni ku lëgëdë kumutu”, nöö a ta mbei möiti u sëmbë ta buuse wotowan, söseei a ta mbei hati u de ta boonu ku deseei (Johanisi 8:44; 1 Johanisi 3:11, 12). Di Bëibel ta taki taa a abi hogihati, nöö hati fëën ta boonu taanga.​—Jöpu 2:7; Akoalimbo 12:9, 12, 17.

ZÖNDU LIBISËMBË LO’ U BUUSE WOTOWAN. Di fosu womi de kai Adam, waka a Saatan baka, hën a du zöndu. Di soni aki mbei hii sëmbë ko abi zöndu (Loomë 5:12). Di fosu womi mii u Adam de kai Kain, bi buuse hën baaa sö gaanfa taa a kii ën (1 Johanisi 3:12). A dë sö tuu taa sömëni sëmbë a di ten aki ta lobi sëmbë, söseei de ta fii da de. Ma u di u ko abi zöndu, mbei sömëni sëmbë ko ta haun ku wotowan, de ta pakisei deseei nöö, söseei de ta fii deseei. Dee fasi aki ta tja buuse ko.​—2 Timoteo 3:1-5.

WAN SËMBË DI AN LOBI DEE SËMBË DEE AN DË KUMËËN, SA KO TA BUUSE WOTOWAN. Di goonliba di u ta libi nëën aki, an ta da sëmbë taanga u de abi tjalihati u sëmbë, söseei u de libi bunu ku sëmbë, nöö di soni dë ta mbei sëmbë ta bigi buuse wotowan. A lo’ u pasa taa sëmbë ta fia ku wotowan, de ta kuutu wotowan a fesi, de ta kosi wotowan, de ta du hogihogi ku wotowan, söseei de ta poi sëmbë soni a wan hogihati fasi, u di hii „di goonliba aki tuu dë a didibi basu”.​—1 Johanisi 5:19.

Ma na piki nöö di Bëibel ta piki u unfa a du waka taa sëmbë ko ta buuse wotowan. A ta konda da u tu unfa di soni dë o kaba.