Di Bëibel an dë wan buku di ta taki data soni, ma a ta taki soni di sa heepi u. Dee soni aki sa heepi wan sëmbë di abi wan hedi dendu siki. Boo luku wantu soni di a ta taki.

„Dee sëmbë dee dë gösöntu an abi data fanöudu, ma dee sëmbë dee dë ku suwaki de abi data fanöudu.”​—MATEOSI 9:12.

Di Bëibel ta taki taa a sa dë fanöudu fuu go suku data heepi. Sömëni sëmbë di bi abi wan hedi dendu siki bi feni heepi, u di de bi ko sabi andi ta du de, söseei u di de bi go a data.

’Te u ta buli sinkii, nöö u ta feni wini fëën.’​—1 TIMOTEO 4:8.

Te i ta du soni fii sa dë gösöntu, nöö di soni dë sa heepi i fii ta fii bunu te dou. I sa du di soni aki te i ta du sport, te i ta njan bunu, söseei te i ta duumi bunu.

„Wan hati di ta piizii, bunu kuma deesi, ma te wan sëmbë ta tjali, nöö di soni dë ta mbei bonu fëën ko dëë.”​—NÖNGÖ 17:22.

Te i ta lesi so pisi u Bëibel di sa da i taanga, söseei te i ta buta maaka da iseei di i bi o sa dou, nöö di soni dë sa heepi i fii ta dë waiwai. Ee i ta buta pakisei a dee bunu soni dee ta pasa a di libi, söseei ee i ta biibi taa soni o go  bunu a di ten di ta ko, nöö di soni dë o heepi i fii hoi dou, hii fa i abi wan hedi dendu siki.

„Wan köni sëmbë ta abi sakafasi.”​—NÖNGÖ 11:2.

Kandë joo ta si taa ja sa ta du hii soni iseei. Fëën mbei i musu ta da wotowan pasi u de heepi. A kan taa dee famii fii ku dee mati fii o ta kë heepi i, ma kandë de an o sabi ku andi de sa heepi i. I sa piki de ku andi i kë u de heepi i. Na ta hakisi de tumisi hia soni poi, söseei hii juu i musu ta tei dee soni di de ta du da i u bigi.

„U di ma bi ta kaba fii sö bunu, mbei mi bi go a data. Di data bi ko si andi bi ta du mi. Di soni dë bi heepi mi u mi ko fusutan andi bi ta du mi, söseei a bi heepi mi u mi ko sabi andi mi bi sa du, u mi ko ta fii möön bunu.”​—Nicole, a wan mujëë di abi wan hedi dendu siki di ta mbei taa di fasi fa a ta fii ta tooka vou sö.

„Mi bi ko si taa te mi ku mi mujëë ta lesi di Bëibel hii juu, nöö di soni dë ta heepi mi u mi dë ku di mëni taa soni o go bunu a di daka dë. Nöö a lo’ u pasa tu taa a dee daka ka soni ta hebi da mi gaanfa seei, wan Bëibel tëkisi ta da mi taanga.”​—Peter, wan womi di abi wan hedi dendu siki di ta mbei a ta dë tjalitjali.

„A bi ta taanga da mi u mi konda da wotowan unfa mi bi ta fii, u di sen bi ta kisi mi gaanfa seei. Ma wan mati u mi bi ta tei hën ten ta haika mi, söseei a bi ta mbei möiti u fusutan unfa mi bi ta fii. Di mati u mi aki bi heepi mi tuutuu u mi ko ta fii möön bunu, söseei a bi heepi mi u mi si taa ma dë mi wanwan.”​—Ji-yoo, wan mujëë di abi wan hedi dendu siki di ta mbei an ta njan kumafa a musu njan.

„Di Bëibel heepi mi u ma ta wooko pasa maaka, söseei u mi ta böö bumbuu. Dee köni soni dee sikifi nëën heepi mi u mi sa libi ku di siki u mi.”​—Timothy, wan womi di abi wan hedi dendu siki di ta mbei a ta booko hën hedi gaanfa, söseei di ta mbei a ta pakisei soni di ta mbei a ta fuka seei.