Hedi dendu siki ta du ku sëmbë a hii së u goonliba
„Hii juu mi ta booko mi hedi ku soni, aluwasi ee mi dë sindosindo a wan kamba mi wanwan.”
„Te mi ta fii bunu gaanfa seei, nöö mi ta booko mi hedi. Mi sabi taa te mi ta fii ’bunu poi’, nöö te u kaba fëën mi o bia ta ’tjali’.”
„Mi ta mbei möiti u mi ta buta pakisei a di soni di ta pasa a di daka dendu. Ma so juu sömëni soni ta ko a mi pakisei wan pasi vou sö, di ta da mi bookohedi.”
Dee soni aki da soni di sëmbë di abi wan hedi dendu siki bi taki. A dë sö taa ju, nasö wan sëmbë fii abi dee lö bookohedi dë tu ö?
I sa dë seiki taa na i wanwan nöö dee soni dë ta miti. Sëmbë dë a hii së u goonliba, di abi hedi dendu siki. So juu a ta dë tu taa wan sëmbë u de, hën abi sö wan siki.
U ta libi tuutuu a „wan tumisi hogi ten”, di ta mbei taa sëmbë ta abi sömëni bookohedi (2 Timoteo 3:1). Öndösuku ta lei taa te i konda aiti sëmbë di ta libi a goonliba, nöö wan ta dë a dendu di ta abi wan hedi dendu siki. Di kolona siki di ko a di jaa 2020, mbei taa möön hia sëmbë ko abi hedi dendu siki. So sëmbë ko ta booko de hedi gaanfa seei, söseei so u de ko ta dë tjalitjali.
An föutu fuu kë sabi unfa hedi dendu siki ta du ku sëmbë a di ten fuu aki tjika. Ma a möön dë fanöudu fuu sabi andi u ku dee sëmbë fuu sa du fuu sa ta fii bunu te dou.
Unfa wan sëmbë ta dë te an abi hedi dendu siki?
Te wan sëmbë an abi wan hedi dendu siki, nöö a ta fii bunu, söseei a sa ta du soni a wan bunu fasi. Sö wan sëmbë sa ta hoi hënseei te senuwe ta naki ën, a sa ta du wan wooko kumafa a musu du ën, söseei a sa ta dë waiwai.
Hedi dendu siki:
-
Wan sëmbë AN TA ABI hedi dendu siki u di an dë bumbuu sëmbë, nasö u di a bi du wan soni di an bunu.
-
Hedi dendu siki TA mbei wan sëmbë ta booko hën hedi ku soni gaanfa seei, söseei a ta mbei a ta taanga dëën faa ta pakisei bumbuu, faa ta hoi hënseei, söseei faa ta du soni a wan bunu fasi.
-
Hedi dendu siki sa mbei taa a ta taanga da wan sëmbë faa abi mati, söseei faa ta du dee soni dee a musu ta du hiniwan daka.
-
Hii pei sëmbë sa ko abi wan hedi dendu siki, aluwasi un mëni jaa de abi, nasö fuun pei nasiön de dë. Wan sëmbë sa ko abi wan hedi dendu siki aluwasi na un pei keiki a dë, aluwasi na un pei siköö a go, söseei aluwasi a gudu nasö a pooti.
Suku heepi te i abi wan hedi dendu siki
So juu wan sëmbë ta tooka vou sö. Di fasi fa a dë, nasö di fasi fa a ta du soni ta tooka. Kandë a ta duumi pasa maaka, nasö an ta duumi tjika. Kandë a ta njan hia möön fa a bi guwenti, nasö an ta njan kuma fosu möön. A sa dë taa a ko ta booko hën hedi ku soni gaanfa poi, nasö a ta dë tjalitjali. Ee sö wan soni ta pasa ku wan sëmbë, nöö a kan taa a abi wan data fanöudu di sabi soni u dee lö soni dee ta du ën dë. A o heepi ën faa ko sabi faandi mbei dee soni dë ta pasa ku ën, söseei andi a musu du faa ko kisi hënseei baka. Wë nöö naasë sö wan sëmbë sa go suku heepi?
Jesosi Keesitu, di möön köni womi di bi libi a goonliba aki, bi taki taa: „Dee sëmbë dee dë gösöntu an abi data fanöudu, ma dee sëmbë dee dë ku suwaki de abi data fanöudu” (Mateosi 9:12). Te wan sëmbë di dë ku suwaki feni di data heepi di a abi fanöudu, nöö dee soni dee bi ta du ën an o ta du ën sö möön. Boiti di dë, a o sa ta du soni kumafa a musu du de, söseei a o sa ta dë waiwai. A bi o dë wan köni soni u sö wan sëmbë go suku heepi hesihesi, ee a ta fii taa bumbuu soni hën ta du ën, nasö ee an ta kisi hënseei möönsö. a
Hii fa di Bëibel an dë wan buku di ta taki data soni, tökuseei dee soni dee sikifi nëën sa heepi u fuu dë gösöntu. U ta da i taanga fii lesi dee woto dee ta ko baka disi. De ta taki unfa di Bëibel sa heepi u te u abi wan hedi dendu siki.
a Di Hei Wakitimawosu aki an ta taki un pei heepi wan sëmbë musu go suku. Hiniwan sëmbë musu wegi luku andi ku andi a sa du, ufö a hopo du wan soni.
Kandë i lobi dee woto aki tu
ESSENTIAL BIBLE TEACHINGS
Faandi mbei Gadu ta da pasi taa u ta tja pena ku sitaafu
Di Bëibel ta piki u unfa a du ko, nöö di soni dë ta da u kötöhati seei.
AMBË DA U?
Hakisi u lei soni u Bëibel
I sa mbei sëmbë ko lei i soni u Bëibel söndö u paka a di ten ku di kamian di i kë.
