Te wan mati fuu abi wan hedi dendu siki, nöö hesihesi seei u sa si kuma saanfa-u-du fuu kaba. Ma u sa lei di mati fuu unfa u ta booko u hedi ku ën tjika, te u ta heepi ën faa sa libi ku di siki fëën. Unfa u sa du di soni dë?

’I musu hesi u jei soni.’​—JAKOBOSI 1:19.

Wan u dee möön bunu fasi fa i sa heepi di mati fii, hën da te i ta haikëën te a kë fan ku wan sëmbë. Ja abi fu fii kuma hii juu i musu toona piki ën te a taki wan soni. Be a si taa i ta haikëën, söseei be a si taa i ta booko i hedi ku ën. Mbei möiti u ko fusutan unfa a ta fii, söseei na taki soni di sa mbei a si kuma i ta kuutu ën. Hoi a pakisei taa a sa taki soni di an bi kë taki tuutuu, di sa hati ën bakaten.​—Jöpu 6:2, 3.

„Fan a wan fasi u da dee sëmbë dee bookosaka kötöhati.”​—1 TESALONIKA 5:14.

Di mati fii sa ta booko hën hedi ku soni, söseei a sa ta fii kuma an dë wan bumbuu sëmbë. Te i ta lei ën taa i ta booko i hedi ku ën, nöö joo sa dëën taanga ku kötöhati, hii fa ja kaba sabi andi i musu taki.

„Wan tuutuu mati ta lobi [hën mati] hii juu.”​—NÖNGÖ 17:17.

I musu ta suku fasi u heepi di mati fii. Ka fii si kuma i sabi andi i musu du u heepi ën, nöö a bi o möön bunu fii hakisi ën andi i sa du dëën u heepi ën. Ee a ta taanga da di mati fii u konda da i andi a kë fii du dëën, nöö suku soni di i ku ën bi o sa du makandi, nöö i hakisi ën ee a bi o kë fuun du dee soni dë. Wan soni di un bi o sa  du, hën da un sa go köi. Nasö kandë i sa hakisi ën fii heepi ën bai soni, fii heepi ën seeka wosu, nasö fii heepi ën du wan woto soni.​—Galasia 6:2.

’I musu abi pasensi.’​—1 TESALONIKA 5:14.

Kandë na hii juu di mati fii o ta kë fii ku ën fan. Ma mbei a sabi taa solanga a kë da woto ku wan sëmbë, nöö joo dë kabakaba u haikëën. U di di mati fii dë ku suwaki, mbei a sa taki soni nasö du soni di sa hati i. Ee i ku ën bi abi buka u du wan soni, nöö a sa pasa taa a ko tooka pakisei. Boiti di dë, so juu a sa ta dë kuma soni fëën an dë bunu. Te joo heepi ën a soni, nöö lei taa i abi pasensi ku ën, söseei taa i ta fusutëën.​—Nöngö 18:24.

„Mi ta mbei möiti faa sa ta si mi kuma wan mati fëën di ta abi ten dëën hii juu. Hii fa ma sa heepi ën ku dee bookohedi fëën, tökuseei mi ta mbei möiti hii juu u mi ta haikëën te a kë konda da wan sëmbë unfa a ta fii. So juu kë nöö a ta kë u wan sëmbë haikëën faa sa fii bunu.”​—Farrah, a wan mujëë di abi wan mati di abi wan hedi dendu siki di ta mbei an ta njan kumafa a musu njan, di ta mbei a ta booko hën hedi gaanfa ku soni, söseei di ta mbei a ta dë tjalitjali.

„Wan u dee mati u mi abi bunu fasi seei, söseei a ta da mi taanga. A bi kai mi ko njan wan soni nëën pisi. Di bunu fasi fëën, bi mbei an bi taanga da mi u mi konda dëën unfa mi ta fii. Di soni dë bi da mi taanga seei!”​—Ha-eun, wan mujëë di abi wan hedi dendu siki di ta mbei a ta dë tjalitjali.

„Pasensi da wan gaan fanöudu soni. Te mi mujëë du wan soni di sa mbei hati u mi boonu, nöö mi ta mbei möiti u hoi a pakisei taa na ku hënseei kë a du ën, ma di siki fëën hën mbei. Di soni aki ta heepi mi u hati u mi an boonu, söseei u mi ta hoi ën a pakisei.”​—Jacob, wan womi di mujëë fëën abi wan hedi dendu siki di ta mbei a ta dë tjalitjali.

„Na piki heepi mi mujëë bi ta heepi mi, söseei a bi ta da mi taanga tu. Te dee bookohedi u mi bi ta möön mi, nöö an bi ta duwengi mi u mi du soni di ma bi a’ peesa u du. U di soni dë mbei so juu an bi ta feni pasi du so soni di a bi o kë du. Mi lobi ën seei u di a ta dë kabakaba u heepi wotowan, söseei u di an ta pakisei hënseei nöö.”​—Enrico, wan womi di abi wan hedi dendu siki di ta mbei a ta booko hën hedi gaanfa ku soni.