1. Di tööu libi

Sëmbë ta si di tööu libi a peipei fasi. Nöö tookatooka fasi dë fa de ta pakisei u di fasi fa de musu ta du soni, u de sa ta dë waiwai a di tööu libi.

ANDI DI SONI DË KË TAKI? Di tööu libi da wan soni di Gadu seei seti, nöö a sabi bumbuu andi dee tu sëmbë abi fanöudu u de sa ta dë waiwai (Maikusi 10:6-9). Dee tu sëmbë dee tööu o ta dë waiwai te de ta möön booko de hedi ku dee soni di di wotowan u de abi fanöudu. Te wan womi lobi hën mujëë, nöö a o ta libi bunu ku ën, söseei a o ta booko hën hedi ku ën. Nöö te wan mujëë abi lesipeki dëën manu, nöö a o ta dë u si a di fasi fa a ta fan ku ën, söseei a di fasi fa a ta du soni.

DEE LEI U BËIBEL TA HEEPI SËMBË: Quang ku Thi da manu ku mujëë. De ta libi a di köndë de kai Vietnam, nöö de bi ta pakisei taa nöiti de o sa ko ta dë waiwai a di tööu libi u de. Quang an bi abi di guwenti u libi bunu ku hën mujëë. A bi taki taa: „Ma bi ta booko mi hedi ku di fasi fa mi mujëë bi ta fii, söseei mi bi ta lo’ u du soni u dëën sen.” Thi bi kë booko di tööu. A bi taki taa: „Mi bi ta fii kuma nöiti möön mi bi o sa futoou, nasö lesipeki mi manu.”

Te u kaba fëën, hën Quang ku Thi ko lei soni u Bëibel, hën de ko lei fa de musu du di soni di sikifi a Efeise 5:33. Quang bi taki taa: „Di pisi u Bëibel aki bi heepi mi u mi ko fusutan faandi mbei mi musu ta libi bunu ku mi mujëë, söseei u mi ta du soni u mbei a fii taa mi lobi ën. Mi bi ko fusutan tu taa mi musu ta booko mi hedi ku di fasi fa a ta fii, ku di gösöntu fëën, söseei ku dee soni dee a ta abi fanöudu. Te mi ta libi sö ku ën, nöö a ta möön lobi mi, söseei a ta möön lesipeki mi.” Thi bi taki taa: „Möön mi bi ta du di soni di sikifi a Efeise 5:33, möön mi bi ta fii taa mi manu lobi mi, mi bi ta fii bunu, söseei mi bi ta fii taa a ta booko hën hedi ku mi.”

 2. Unfa u sa libi ku wotowan

So sëmbë lo’ u libi hogi ku wotowan u di de ku de an abi di wan kulölu, u di de an dë di wan nasiön sëmbë, nasö u di de an dë di wan köndë sëmbë. De ta buuse wotowan tu, u di de an abi di seei biibi, nasö u di di sëmbë ta duumi ku womi nasö ku mujëë sëmbë kuma hënseei.

ANDI DI SONI DË KË TAKI? Di Bëibel an ta lei u taa u musu ta buuse woto köndë sëmbë. Söseei an ta lei u taa u musu ta buuse womi di ta duumi ku womi, nasö mujëë di ta duumi ku mujëë. Ma a ta lei u taa u musu ta lesipeki hii pei sëmbë, aluwasi un köndë sëmbë a dë, söseei aluwasi ee di sëmbë gudu, nasö ee a pooti (Tjabukama 10:34). Aluwasi ee di soni di wan sëmbë ta biibi, nasö di fasi fa a ta du soni an ta kai ku u, tökuseei u sa ta libi bunu ku ën, söseei u sa ta lesipeki ën.​—Mateosi 7:12.

DEE LEI U BËIBEL TA HEEPI SËMBË: De bi lei wan womi de kai Daniel taa dee sëmbë u di pisiwata u Asia da felantima u di köndë fëën. Di soni dë mbei Daniel bi ko ta buuse dee lö sëmbë u di pisiwata dë, nöö a bi lo’ u kosi de a sëmbë dendu tu. Daniel bi taki taa: „Mi bi ta si kuma heepi mi bi ta heepi di köndë u mi. Ma bi pena pakisei seei taa di fasi fa mi bi ta du soni an bunu.”

Di Daniel ko lei soni u Bëibel, hën a taki taa: „Mi bi musu tooka hii di fasi fa mi bi ta pakisei. Mi bi musu ko ta si wotowan kumafa Gadu ta si de. Biga hii u tuu dë di wan sëmbë a Gadu wojo, aluwasi un köndë sëmbë da u.” Daniel ta konda da u unfa a ta fii nöunöu te a miti woto köndë sëmbë. A taki taa: „Ma ta pena hakisi miseei möön ee na un köndë de kumutu. Nöunöu mi ko lobi hii pei sëmbë, nöö mi abi mati a hii së u goonliba.”

 3. Möni

Sömëni sëmbë ta mbei möiti u ko gudu, u di de kë dë waiwai, söseei u di de kë abi wan möön bunu libi a di ten di ta ko.

ANDI DI SONI DË KË TAKI? U abi möni fanöudu. Ma tökuseei möni an sa heepi u fuu ko dë seiki ee woo abi wan möön bunu libi a di ten di ta ko, söseei wa sa dë seiki ee a o mbei u ta dë waiwai (Nöngö 18:11; 23:4, 5). Ma ee u ta du soni kumafa di Wöutu u Gadu ta lei u, nöö u sa dë seiki taa woo ta dë waiwai, söseei woo abi wan suti libi a di ten di ta ko.​—1 Timoteo 6:17-19.

DEE LEI U BËIBEL TA HEEPI SËMBË: Cardo da wan womi di ta libi a di köndë de kai Indonesia. A bi ta mbei möiti u ko gudu. A bi taki taa: „Mi bi abi hii dee soni di gaansë u sëmbë ta kë. Mi bi sa nango köi ka mi kë. Mi bi sa ta bai gaan diidii soni, wagi, ku wosu.” Wë dee soni dee Cardo bi abi dë an bi hoi longi seei. A bi taki taa: „Wan sëmbë bi ganjan mi tei hii di möni di mi bi wooko taanga u feni. Mi lasi hii soni seei wan pasi vou sö. Hii mi libi longi mi bi ta kule a gudu baka, ma te u kaba fëën mi bi bai sabisö. Mi bi ko ta fii seei kuma ma dë na wan hojo soni, mi bi dë seei hooo sö.”

Cardo bi bigi ta du soni kumafa Bëibel ta taki te a nama ku möni soni. An bi ta mbei möiti u ko gudu möön, ma a bi ta dë tifeedi ku dee soni dee a abi. A bi taki taa: „Nöunöu mi ta fii taa mi gudu tuutuu, biga mi ku Gadu dë mati. Söseei hii ndeti mi ta duumi suti. Mi ta dë waiwai seei.”

 4. Di duumi di sëmbë ta duumi ku deseei

Sëmbë abi tookatooka fasi fa de ta si di duumi di sëmbë ta duumi ku deseei.

ANDI DI SONI DË KË TAKI? Di Bëibel ta lei u taa na hii soni bunu u du te a nama ku manu ku mujëë soni. Wan sëmbë ta „libi fanafiti a di së u manu ku mujëë soni”, te a ta duumi ku wan sëmbë di hën ku ën an tööu, te a ta waka dëën manu nasö hën mujëë, te a ta sei hën sinkii, te a ta duumi ku mbeti, söseei te a ta duumi ku womi nasö ku mujëë kuma hënseei (1 Kolenti 6:9, 10). Di duumi di tu sëmbë sa ta duumi ku deseei, da wan kado di Gadu mbei vö da wan womi ku wan mujëë di tööu.​—Nöngö 5:18, 19.

DEE LEI U BËIBEL TA HEEPI SËMBË: Wan mujëë de kai Kylie, di ta libi a di köndë de kai Ösutualia bi taki taa: „Di ma bi tööu, nöö mi bi ta pakisei taa ee mi duumi ku wan sëmbë, nöö mi bi o ta fii bunu, söseei mi bi o ta fii taa wan sëmbë lobi mi. Ma soni an bi pasa kumafa mi bi mëni. Biga mi bi ko ta dë seei tjalitjali.”

Bakaten, hën Kylie ko lei andi di Bëibel ta taki u manu ku mujëë libi. A bi taki taa: „Mi ko fusutan taa dee Wëti u Gadu ta puu u fu wa du soni di sa hati u bakaten. Nöunöu mi tööu, nöö mi ta fii taa mi manu lobi mi, söseei mi ta fii bunu u di mi ta du soni kumafa Jehovah kë. Di du di mi bi ta du dee soni dee sikifi a Bëibel bi tjubi mi da sömëni soni!”