Iseei musu luku andi joo du
Dee soni dee u buta taa woo du sa mbei u ko ta dë waiwai, nasö de sa mbei u ko ta dë tjalitjali. Jehovah sabi di soni dë. Fëën mbei a kë fuu ta du soni kumafa a ta lei u.
Jehovah kë fuu abi wan suti libi, söseei a kë fuu ta dë waiwai.
„Mi Jehovah, da i Gadu. Mi da di sëmbë di ta lei i soni sö taa i sa feni bunu. Mi da di sëmbë di ta tii i ka i musu waka. Mi bi o kë fii buta pakisei a dee wëti u mi! Nöö joo ko dë bööböö kuma te lio dë pii, söseei di leti fasi u libi fii o hia kuma seki wata a ze.”—Jesaaja 48:17, 18.
Gadu sabi bumbuu unfa u musu ta libi, u di hën da di Sëmbë di mbei u. A kë fuu du soni kumafa a ta lei u, biga a sabi taa dee soni dë o tja wini ko da u. Te u ta du soni kumafa Gadu ta lei u, nöö wa o abi u ta hakisi useei ee soni o waka bunu da u. Hii juu seei woo ta du soni a wan köni fasi, nöö dee soni dë o heepi u fuu ko abi wan möön suti libi, söseei woo ta dë waiwai.
Jehovah an ta hakisi u fuu du soni di wa sa du.
„Dee wëti dee mi da i aki tide an taanga da i poi e. Nöö de an dë longi ku i tu.”—Detolonomi 30:11.
Ee u kë ta du soni kumafa Gadu kë, nöö a sa kan taa u musu tooka di fasi fa u ta pakisei, ku di fasi fa u guwenti u du soni. Ma Jehovah an ta hakisi u fuu du soni di wa sa du. Fuu taki ën kumafa a dë, nöö a sabi bumbuu andi u sa du, biga hën mbei u. Möön woo ko sabi soni u Jehovah, möön woo ko si taa „dee wëti fëën an hebi da u poi”.—1 Johanisi 5:3.
Jehovah paamusi taa a o heepi dee sëmbë dee kë hoi dee wëti fëën.
„Mi, Jehovah da di Gadu fii, di ta panjan i a i letisë maun hoi. Mi da di sëmbë di ta piki i taa: ’Na fëëë. Miseei o heepi i.’”—Jesaaja 41:13.
U sa ko ta libi kumafa Gadu kë, u di a o heepi u. A sa wooko ku di Wöutu fëën u da u taanga, söseei u heepi u fuu abi di biibi taa soni o waka bunu da u a di ten di ta ko.
Milionmilion sëmbë ta libi ku dee wëti u Gadu a hii së u goonliba, nöö de ko si taa di soni dë heepi de u de ko abi wan möön bunu libi. A bi o bunu seei fii mbei möiti u ko sabi soni u Bëibel möön gaanfa! I sa bigi lei soni u Bëibel ku di buku de kai I sa dë waiwai u teego! I sa feni ën a di website fuu jw.org. An o dë fii paka seei. I sa feni dee woto aki nëën:
-
Unfa di Bëibel sa heepi i?
-
Di Bëibel ta paamusi u wan möön bunu libi da di ten di ta ko
-
I sa biibi dee soni dee sikifi a di Bëibel ö?
Te i ta öndösuku di Bëibel, nöö joo ko si taa dee soni dee a ta lei u an ta gaandi. Joo ko si tu taa „hii juu u sa ta futoou dee wëti u Gadu, söseei u sa abi di biibi taa de o dë u teego” (Psalöm 111:8). Di möön bunu fasi fa u sa ta du soni, da te u ta wooko ku dee lei u Bëibel. Ma hii fa a dë sö, tökuseei Gadu an o duwengi u fuu hoi dee wëti fëën (Detolonomi 30:19, 20; Josua 24:15). Hiniwan sëmbë musu luku ee a o libi kumafa Gadu kë, nasö ee an o libi kumafa a kë.
