Bëina hii sëmbë ta taki gbelingbelin taa so soni bunu u du, söseei taa so soni an bunu u du seepiseepi. A hii së u goonliba de ta sitaafu dee sëmbë dee ta kii wotowan, dee ta kisi mujëë, nasö dee ta tja manu ku mujëë fasi a pikimii. Ma de ta gafa dee sëmbë dee ta du soni a wan leti fasi, dee abi bunu fasi, söseei dee ta lei taa de abi tjalihati u wotowan. Boiti di dë, te a nama ku woto soni u di libi, nöö sömëni sëmbë ta pakisei taa de sa du soni kumafa de kë. De ta buta taa de sa duumi ku ambë de kë, de sa kiija miii kumafa de kë, nasö de sa luku ee de o du soni ku wan limbo háti. De ta pakisei taa hii dee soni dë tuu bunu u du. Möön gaanfa, sëmbë lo’ u du soni kumafa de ta fii, nasö kumafa woto sëmbë ta si soni. A bunu u du soni a dee fasi dë u?

Te u musu luku andi bunu ku andi an bunu, nöö möön gaanfa u ta du soni kumafa u ta fii, nasö kumafa háti fuu ta piki u (Loomë 2:14, 15). Njönkunjönku kaa wan pikimii sa sabi ee wan soni bunu, nasö ee an bunu. Nöö ee a du wan soni di an bunu, nöö háti sa ta fon mëën. Möön dee jaa ta pasa, möön di fasi fa u ta si bunu ku hogi ta tooka. Dee soni dee ta tookëën, da di fasi fa de kiija u, dee pei fuu, dee soni dee u ta lei a siköö, dee sëmbë dee u ta hulu, di biibi fuu, ku dee guwenti fuu. Nöö te woo du wan soni, nöö di háti fuu ta piki u ee di soni di woo du dë bunu, nasö ee an bunu.

Di fasi fa u ta fii sa mbei u lei taa u abi tjalihati u wotowan. A sa mbei u ta tei soni u bigi, söseei a sa mbei u ta du soni a wan leti fasi. A sa mbei tu taa u hoi useei u na du soni di sa hati dee sëmbë dee u lobi. Söseei a sa mbei u hoi useei u na du soni di sa mbei háti fon u, nasö di sa mbei sen kisi u.

Faandi mbei an bunu fuu ta du soni hii juu kumafa u ta fii? Wan njönku kijoo de kai Garrick bi taki taa: „Mi bi ta libi kumafa mi kë.” Ma bakaten hën a ko fusutan taa na hii juu soni bi ta waka bunu dëën, te a bi ta du soni kumafa a kë. A bi taki taa di libi an bi ta suti dëën, u di a „bi ta du fanafiti soni, ta bebe dööngö, ta sumuku taku tabaku, ta du wanlö gaan hia hogi”.

Hii fa u ta du soni kumafa u ta fii, tökuseei a ta pasa taa u ta du soni kumafa wotowan ta si soni. Di soni dë sa heepi u fuu feni wini u di köni, ku di öndöfeni di wotowan abi. Te u ta du soni kumafa dee famii fuu kë, söseei te u ta du soni kumafa dee mati fuu ku dee sëmbë u di pisiwata fuu kë, nöö de o ta lesipeki u.

Faandi mbei an bunu fuu ta du soni hii juu kumafa wotowan ta si soni? Wan njönku mujëë mii de kai Priscila bi ko ta du soni kuma dee pei fëën. A bi bigi ta duumi ku tookatooka womi hii fa an bi tööu jeti. A bi ko si taa te a bi ta du soni kumafa wotowan feni bunu, nöö an bi ta dë waiwai. A bi taki taa: „Ma bi ta fii bunu te mi bi ta du soni kumafa hii sëmbë ta du soni. A bi ta mbei mi du soni a wan don fasi, söseei mi bi ta du soni di bi sa mbei hogi miti mi.”

Te woo luku ee wan soni bunu, nasö ee an bunu, nöö di fasi fa u ta fii, söseei di fasi fa wotowan ta fii sa heepi u fuu du soni ku köni. Ma dee soni dë wanwan an tjika u heepi u. So juu a sa pasa taa u du soni di hati u, nasö di hati wotowan, u di wa ta sabi unfa soni o waka te u du wan soni (Nöngö 14:12). Nöö aluwasi ee u, nasö wotowan ta si kuma di soni di u ta du bunu, tökuseei a sa pasa taa di soni dë ko hati u bakaten. Söseei a sa pasa taa de ko tooka pakisei. Fuu taki ën, nöö dee soni di sëmbë bi ta kuutu taa an bi bunu fosu, ko dë soni di gaansë u sëmbë ko ta si kuma bumbuu soni a di ten aki. Nöö dee soni di de bi ta taki taa bunu a di ten di pasa, ko dë soni di an ta kai ku de a di ten aki möön.

Wan möön bunu soni dë di sa heepi u fuu ko sabi andi bunu ku andi an bunu ö? Bumbuu wëti dë di sa heepi u fuu sabi fa u musu libi a di ten aki, söseei di an o ta tooka aluwasi dee jaa ta pasa u?

U ta wai seei taa wan soni dë di ta heepi sëmbë a hii së u goonliba u ko sabi andi bunu, ku andi an bunu. Di soni dë an ta gaandi. Di woto di ta ko, o lei u andi da di möön bunu soni di sa heepi u fuu ko sabi andi da bunu ku hogi.