DOREEN bi panta seei di data piki hën manu Wesley taa de feni wan taku siki nëën töönzön. Di manu fëën bi abi 54 jaa nöö. * Data bi taki taa wantu liba nöö a bi o libi jeti. Doreen taa: „Ma bi sa biibi di soni di mi bi jei dë. Sömëni wiki longi mi bi buuja seei. A bi djei kuma na mi ku mi manu di soni aki bi ta miti, ma woto sëmbë. Ma bi mëni taa sö wan soni bi sa miti mi.”

Sömëni sëmbë ta fii kuma Doreen tu. A sa miti hiniwan fuu a wan ten di wa mëni, taa data ko si taa wan sëmbë fuu abi wan taku siki di o kii ën. A fiti u gafa dee sömëni sëmbë di tei di wooko u heepi wan sëmbë u de di an o libi longi möön, u di a abi wan taku siki. Ma a dë wan gaan wooko seei u heepi sö wan sëmbë. Andi dee famii u wan sëmbë sa du u kötö hën hati, te an o libi longi möön u di a abi wan taku siki, nöö andi de sa du u heepi ën? Andi dee sëmbë dee ta heepi wan sëmbë di siki, sa du u heepi ën, hii fa a sa taanga da de? Andi u sa ta pakisei, te wan sëmbë fuu di siki, an o libi longi möön? Boo luku fosu faandi mbei a dë wan apaiti soni u heepi wan sëmbë fuu a di ten aki, di an o libi longi möön u di a abi wan taku siki.

Dee njunjun soni di könima ko sabi, mbei sëmbë ko ta dëdë woto fasi. Söwan wan höndö jaa pasa, sëmbë an bi ta libi longi kumafa de ko ta libi tide aki. Sëmbë bi ta dëdë hesihesi te wan taku siki bi kisi de nasö te de bi kisi wan gaan makei. Na hii sëmbë bi sa nango a data, nöö dee famii u gaansë u dee sëmbë dë, de bi ta sölugu de, nöö de bi ta dëdë a de pisi.

A di ten aki, data ko sa’ u heepi sëmbë u de libi möön longi ku wan taku siki di de abi. Wan siki di  bi o sa kii wan sëmbë hesihesi, ko ta tei sömëni jaa ufö a kii di sëmbë a di ten aki. Ma hii fa sëmbë sa libi möön longi, tökuseei de an ta ko bëtë u di siki u de. So sëmbë ta abi siki di an ta da de pasi u de sa sölugu deseei. A ta ko möön taanga u heepi dee lö sëmbë aki a di ten aki.

Fëën mbei möönmöön sëmbë nango a hatiwosu, nöö de ta dëdë ala. Gaansë u sëmbë a di ten aki an guwenti ku di dëdë di sëmbë ta dëdë, nöö sëmbë an hia di si fa wan sëmbë ta dëdë. Di fëëë di wan sëmbë ta fëëë wan soni di an sabi, sa tapëën fu an heepi wan sëmbë fëën di siki. Ma andi sa heepi ën?

Di woto u Doreen ta lei u taa sömëni sëmbë ta booko saka seei te de jei taa wan sëmbë u de an o libi longi möön, u di a abi wan taku siki. Andi sa heepi u ee u ta booko u hedi gaanfa seei, ee u ta fëëë, söseei ee u ta tjali? Wan sëmbë di bi ta dini Gadu ku hii hën hati bi taki taa: „Lei u unfa u musu konda dee daka fuu sö taa u sa ko köni” (Psalöm 90:12). Awa, begi Jehovah Gadu fajafaja faa sa lei i unfa i musu ’konda dee daka fii’ a wan köni fasi, sö taa i ku di sëmbë fii sa pasa dee lasiti daka di a dë a libi jeti a wan bunu fasi.

I musu seeka soni a fesi, nöö i musu du ën bunu. Ee di sëmbë fii sa fan jeti, nöö a bi o bunu fii hakisi ën ee ambë musu taki dëën, te a ko dë taa an sa fan möön. A bi o bunu u taki ku di sëmbë ee unfa a kë u de hoi ën a libi, unfa de musu hoi ën a hatiwosu, söseei unfa a kë u data kulëën. Di soni aki o heepi dee famii u di sëmbë, u de taki fiti ku deseei, söseei u de an si kuma de du wan hogi soni te de musu taki da di sëmbë u de di an sa heepi hënseei möön. Te dee famii taki fiti a fesi ku deseei, nöö de o sa feni ten u de sa heepi di sikisiki sëmbë u de a di pisiten dë. Di Bëibel ta taki taa: „Te sëmbë an ta konda da deseei unfa soni dë tuutuu, nöö hii soni ta buuja.”​—Nöngö 15:22.

Di fosu soni di di sëmbë di ta heepi di sëmbë di dë ku siki musu du, hën da a musu dëën kötöhati. Wan sëmbë di an o libi longi möön, musu fii taa sëmbë lobi ën, söseei taa sëmbë dë ku ën a di fuka di a ta tja. Unfa i sa heepi ën? Lesi wan soni dëën, nasö kanda dëën. Lesi buku nasö tuwë kanda di o dëën taanga, nöö di a lobi tu. So sëmbë ta feni kötöhati te wan famii u de ta panjan de, nöö a ta fan saapi ku de.

 A dë wan bunu soni u piki ën ambë ko luku ën. De bi sikifi a wan buku taa di lasiti soni di wan sëmbë sa du ufö a dëdë, hën da a sa jei soni jeti. Di sëmbë sa jei soni bunu jeti, hii fa a djei kuma a ta duumi. Fëën mbei na taki na wan soni ka de dë ee ja bi o taki ën a de fesi te de dë ku wojo.

Begi ku de, ee i sa. Di Bëibel ta taki taa wan daka, soni bi taanga da apösutu Paulosu ku dee mati fëën, nöö de bi ta fëëë taa de bi sa lasi de libi seei. Naasë de bi go suku heepi? Paulosu bi piki dee mati fëën taa: „Unu seei musu ta heepi u ku dee begi fuunu tu e” (2 Kolenti 1:8-11). A dë wan bunu soni seei u begi te u dë ku gaan bookohedi, söseei te u abi wan taku siki.

Te i sabi taa wan sëmbë fii an o libi longi möön, nöö i ta fuka seei. A ta dë sö, u di dëdë an dë wan soni di kumutu a Gadu. An bi mbei u fuu bi musu ta si dëdë kuma wan hii daka soni (Loomë 5:12). Di Wöutu u Gadu taki taa dëdë dë kuma wan „felantima” (1 Kolenti 15:26). Fëën mbei te wan sëmbë an kë biibi taa wan sëmbë fëën o dëdë, nöö u sa fusutëën.

Ma te dee famii u wan sëmbë seeka deseei a fesi ufö di sëmbë u de dëdë, nöö de an o ta dë pantapanta sö, söseei de o du soni di sa heepi di sëmbë faa sa fii bunu. So u dee soni di ta pasa ku wan sëmbë ufö a dëdë, sikifi a di pisi „ Dee lasiti wiki ufö wan sëmbë lasi libi”. Na hii sëmbë dee soni aki ta miti ufö de dëdë, söseei de an musu u pasa baka-na-baka kumafa de sikifi a di pisi dë tu. Ma tökuseei so u dee soni dee sikifi naandë ta miti so sëmbë di siki gaanfa.

Baka te wan sëmbë fii dëdë, nöö a bi o bunu u go luku wan mati fii di bi heepi i. Dee sëmbë dee bi heepi di sëmbë ku dee famii u di sëmbë musu sabi taa an ta tja sitaafu möön. Di Gadu di mbei libisëmbë, ta piki u a wan lobihati fasi taa „dee dëdë sëmbë an sabi na wan hojo soni.”​—Peleikima 9:5.

A dë fanöudu fuu ta futoou Gadu. Na a di pisiten di di sëmbë fii siki gaanfa nöö i musu ta futoou ën, ma te i ta tjali baka te di sëmbë dëdë seei tu. Gadu sa heepi i, u di a sa mbei wotowan taki soni di sa da i kötöhati, nasö a sa mbei de du soni di o heepi i. Doreen taki taa: „Mi bi ko lei u na piki sëmbë taa ma abi heepi fanöudu. Te u luku ën bunu, sëmbë bi heepi u gaanfa seei. Mi ku mi manu bi sabi taa Jehovah hën bi ta piki u a di ten dë taa: ’Mi dë ku unu u heepi unu ku di fuka fuunu.’ Ma o fëëkëtë di soni aki nöiti.”

Jehovah hën da di sëmbë di ta sölugu u möön gaanfa. U di hën mbei u, mbei a ta fusutan unfa u ta fii, söseei unfa u ta tjali tjika. A abi di makiti u heepi u, söseei u da u degihati fu wa booko u hedi tumisi. Boiti di dë, a paamusi u taa abiti möön a o puu di dëdë di u ta dëdë, söseei a o weki milionmilion sëmbë di dë nëën pakisei, u de sa toona ko a libi baka (Johanisi 5:28, 29; Akoalimbo 21:3, 4). Te u kaba fëën, hiniwan fuu o sa taki dee soni di apösutu Paulosu bi taki, di a taa: „Wë Dëdë oo, andi seei i wini? Naasë di poosian fii dë möön?”​—1 Kolenti 15:55.