I SA TAKI DA ISEEI TUUTUU UNFA I KË U LIBI FII WAKA U? So sëmbë ta biibi taa di fasi fa de libi o waka, dë sikifisikifi kaa. Te wan soni an pasa kumafa de bi kë, nöö de ta taki taa sö a kai da de kaa. De ta taki taa: „Sö a kai taa a bi musu pasa ku mi!”

Woto sëmbë ta lasi hati te de ta si taa soni seei an dë di sa heepi de a di hogi goonliba ka u ta libi aki. Kandë de du soni u mbei soni waka möön bunu a de libi, ma te u kaba fëën feti, hogi di sëmbë ta du, dee soni kuma gaan ventu nasö gaan wata, nasö siki ta tapa de u de an du dee soni di de bi kë du. Fëën mbei de ta hakisi deseei: ’Faandi mbei mi musu booko mi hedi möön?’

A dë sö tuu taa soni sa pasa a di libi di sa tapa i fu ja du dee soni dee i bi kë du möön (Peleikima 9:11). Ma tökuseei i sa taki da iseei unfa i kë u di libi fii waka. Di Bëibel ta taki taa dee soni dee i ta du, de o lei unfa di libi fii o waka. Boo luku andi a ta taki.

Di womi de kai Mosesi, di bi ta tei fesi da dee Isaëli sëmbë, bi piki de di de bi o go a di Paamusi Köndë taa: „Mi da unu pasi fuun taki ee un kë libi nasö ee dëdë un kë, ee un kë gaan bunu nasö ee un kë fuuku. Ma mi ta begi unu gaantangi, un tei di libi, nöö unu ku dee bakamii fuunu o fika a libi. Woon fika a libi ee un lobi Jehovah di Gadu fuunu, ee un ta haikëën, söseei ee un ta hoi unuseei nëën.”​—Detolonomi 30:15, 19, 20.

Awa! Gadu puu dee Isaëli sëmbë a katibo a Egepiti, nöö a lei de taa de sa feni wan suti libi a di Paamusi Köndë. Ma de bi musu du wan soni ee de bi kë feni sö wan libi. De bi musu „tei di libi”. Unfa de bi o du ën? ’Te de bi o lobi Gadu, te de bi o ta haikëën, söseei te de bi o ta hoi deseei nëën.’

A di ten aki, iseei musu taki unfa i kë u di libi fii waka tu. Te i lobi Gadu, te i ta haikëën, söseei te i ta hoi iseei nëën, nöö hën da i tei di libi, di teego libi a di Paladëisi a goonliba aki. Ma andi hiniwan u dee soni aki kë taki tuutuu?

Lobi da di fasi di Gadu abi möön gaanfa. Di santa jeje bi mbei apösutu Johanisi sikifi taa: „Masa Gadu, hën hatiböö da lobi” (1 Johanisi 4:8). U di soni aki mbei di de bi hakisi Jesosi ee undi u dee wëti da di möön gaanwan, hën a bi piki de taa: „I musu lobi Gadu i Masa te dou ku hii i hati ku hii i akaa [libi,NW] ku hii di pakisei fii di i abi” (Mateosi 22:37). Ee wan sëmbë kë dë mati ku Jehovah Gadu, nöö an musu piki hën buka u di a ta fëëë Gadu, ma u di a lobi ën. Ma nöö faandi mbei u musu lobi ën?

Di lobi di Jehovah lobi libisëmbë dë kuma di lobi di wan mama nasö wan tata lobi dee mii fëën. Hii fa mama ku tata da zöndu libisëmbë, tökuseei de ta lei dee mii u de soni u di de lobi de, de ta da de taanga ta heepi de. Boiti di dë, de ta sitaafu de te a dë fanöudu, u di de kë taa soni musu waka bunu da de. Andi dee mama ku dee tata kë a dee mii u de? De kë taa dee mii u de lobi de, söseei de kë u dee mii u de libi ku dee soni di de lei de, sö taa de sa feni wini u de. Wë an fiti taa di lobihati  Tata fuu di dë a liba ala, si taa u ta tei dee soni dee a ta du da u, u bigi ö?

A di töngö di de bi sikifi di Bëibel, di wöutu „haika” kë taki „piki sëmbë buka”. Te u piki wan mii taa a musu haika hën mama ku hën tata, nöö u ta piki ën taa a musu du dee soni di hën mama ku hën tata piki ën. U ta haika Gadu te u ta mbei möiti u ko sabi andi a ta taki, nöö u musu du di soni di a taki. Wa sa jei Gadu töngö tuutuu, ma u ta haikëën te u ta lesi di Wöutu fëën, Bëibel, ku te u ta du dee soni dee u ta lei.​—1 Johanisi 5:3.

U di Jesosi kë lei fa a dë fanöudu tjika u haika Gadu, mbei a bi taki wan pasi taa: „Na soni u njan wanwan nöö ta hoi sëmbë a libi e, ma a hiniwan wöutu fu Gadu di a ta taki, nöö a de libi ta kumutu” (Mateosi 4:4). Leti kumafa a dë fanöudu taa u musu ta njan, sö nöö a dë taanga fanöudu taa u musu ta lei soni u Gadu tu. Faandi mbei? Könu Salumon, di bi köni, bi taki taa: „Köni ta tjubi sëmbë, leti kumafa möni ta tjubi sëmbë. Ma te wan sëmbë sabi soni, ku te a abi köni tu, nöö a feni wini u di di soni dë o hoi ën a libi” (Peleikima 7:12). Te Gadu heepi u fuu ko sabi soni ku te u abi di köni di Gadu ta da sëmbë, nöö a sa tjubi u a di ten aki, söseei a sa heepi u fuu du soni a wan köni fasi, di sa mbei u feni di libi u teego.

Toona mëni di woto di Jesosi bi konda di u bi taki fëën a di woto ufö disi. A bi taki taa: „Di pasi di ta tja sëmbë go feni libi, sumaa nöö di dööbuka fëën piki. Nöö biti sëmbë ta feni ën” (Mateosi 7:13, 14). Ee u bi o waka a sö wan pasi, nöö soni bi o waka möön bunu da u ee u bi o waka ku wan sëmbë di sabi ën bunu, di sa tja u go dou ka u musu dou, hën da a musu tja go feni di libi u teego. U di soni aki mbei a bunu fuu dë zuntuzuntu ku Gadu (Psalöm 16:8). Ma nöö unfa u ta du di soni dë?

Hiniwan daka sömëni soni ta dë di u musu du, ku sömëni soni dë di u bi o kë du jeti. Dee soni dë sa mbei wa abi ten tjika nasö wa abi ten möön seei fuu sabi andi Gadu kë taa u musu du. Fëën mbei di Bëibel ta mëni u taa: „I musu mëni i seei kumafa i ta tja i libi e. Wan musu libi kuma dee sëmbë söndö fusutan, ma un musu libi kuma sëmbë di a’ bumbuu pakisei. Nöö ee i feni okasi fii du wan bunu soni, nöö i musu du ën wante e, biga u dë a wan gaan hogi ten” (Efeise 5:15, 16). U sa dë zuntu ku Gadu te u ta du soni di ta lei taa di dë di u ku ën dë mati, da di möön fanöudu soni a u libi.​—Mateosi 6:33.

Ja sa tooka dee soni dee i bi du pasa kaa, ma i sa taki da iseei ee i kë wan bunu libi da iseei ku dee sëmbë fii, a di ten di ta ko. Di Bëibel ta taki taa di Tata fuu di dë a liba ala, Jehovah Gadu, ta booko hën hedi ku u gaanfa seei, nöö a ta piki u andi a bi o kë fuu du. Luku andi di soni di di tjabukama u Gadu de kai Mika bi taki:

„Dee sëmbë o, Jehovah piki unu andi da bunu. Ma andi a ta hakisi unu fuun du? A ta hakisi unu fuun ta libi a wan leti fasi, fuun lobi u du bunu soni, söseei fuun abi sakafasi, hii fa un ta waka ku di Gadu fuunu.”​—Mika 6:8.

Joo haika Jehovah di ta kai i fii ko waka ku ën fii sa feni dee gaan bunu dee a o da dee sëmbë dee ta waka ku ën u? Wë iseei musu taki andi joo du!