I BI fii wan daka kaa taa a bi o möön bunu fii dëdë ka fii dë a libi ö? Ee i fii sö wan daka, nöö i sa fusustan unfa Adriana bi ta fii. A bi ta booko hën hedi gaanfa ku soni, a bi ta fii bookosaka, nöö an bi ta si kuma soni bi o sa go bunu dëën nëën libi. Dee data bi ko si taa Adriana bi abi wan siki di ta mbei a ta fii bookosaka gaanfa seei.

Luku wan woto u wan womi u Japan, di de ta kai Kaoru. A bi musu sölugu hën mama ku hën tata dee bi ko gaandi kaa, nöö de bi ta dë ku suwaki tu. Kaoru ta taki taa: „A di seei pisiten dë mi bi ta du wan wooko di bi ta da mi bookohedi gaanfa. Te u kaba fëën, soni u njan an bi ta suti da mi möön, nöö ma bi sa ta duumi a ndeti. Mi bi ko ta si seei taa mi bi o böö u dee soni aki ee mi bi dëdë.”

Wan womi u Nigelia de kai Ojebode taki taa: „Hii juu mi bi ta dë tjalitjali. Mi bi ta tjali sö tee taa hii juu mi bi ta këë. Di soni dë bi mbei mi bi ta suku wan fasi u mi kii miseei”. U ta wai taa Ojebode, Kaoru ku Adriana an kii deseei. Ma a ta pasa hiniwan jaa taa dusudusu sëmbë ta kii deseei.

Gaansë u dee sëmbë dee ta kii deseei da womi, u di gaansë u de ta sen u go hakisi wotowan u heepi de. Jesosi bi taki taa sëmbë di dë ku siki abi data fanöudu (Lukasi 5:31). Wë ee di pakisei u kii iseei ko a i, nöö na fëëë u go suku heepi a wotowan. Sömëni sëmbë di ta fii bookosaka gaanfa, ta si taa dee deesi di dee data ta da de, ta heepi de u de fii bunu. Ojebode, Kaoru, ku Adriana tuu go suku heepi a data, nöö a de feni heepi.

Dee data sa’ u fan ku sëmbë di ta fii bookosaka gaanfa, söseei de ta da de deesi u heepi de ku di siki di de abi. Dee sëmbë dee ta fii bookosaka gaanfa abi mati ku famii fanöudu di ta hoi pasensi da de, di ta booko de hedi ku de, di lobi de, söseei di ta heepi de. Di möön bunu mati di hiniwan sëmbë sa abi, da Jehovah Gadu. Hën da u di Bëibel di sa heepi u.

Sëmbë di ta fii bookosaka gaanfa seei musu suku heepi a data wan hii pisiten, nöö de musu tooka so soni di de bi ta du. Ma ee i dë wan sëmbë di ta fii bookosaka, nöö a bunu fii buta pakisei a di bunu ten di dë a u fesi ta ko, leti kumafa Ojebode ta du ën. A taki taa: „Mi kë u di ten dou seei ka di soni di sikifi a Jesaaja 33:24 o pasa tuutuu, ka a sikifi taa na wan hojo sëmbë o taki taa: ’Mi suwaki’”. Be di soni di Gadu paamusi u da i kötöhati, leti kumafa a bi da Ojebode kötöhati. Gadu bi taki taa a „di njunjun goonliba” na wan sëmbë o ta fii „pen” möön (Akoalimbo 21:1, 4). Di soni aki kë taki tu taa sëmbë an o ta tja fuka a hati möön. Ja o ta ’mëni dee fesiten soni möön, nöö dee soni dë an o ta toobi i möön’.​—Jesaaja 65:17.