Milionmilion sëmbë a hii së u goonliba ta biibi taa Bëdaki da di daka di de ta mëni di pai di de bi pai Jesosi Keesitu. Ma i bi hakisi iseei wan daka kaa ee dee fosu Keesitu sëmbë bi ta hoi Bëdaki ö? I saandi di Bëibel ta taki u Bëdaki ö? Te u feni dee piki u dee hakisi aki, nöö de o heepi u fuu ko sabi ee Keesitu sëmbë musu hoi Bëdaki.

Di fosu soni, hën da di Bëibel an ta taki ee u musu mëni di daka di de pai Jesosi, nasö di daka di de pai wan woto dinima u Gadu. Di Bëibel ta taki soni u tu sëmbë nöö, dee bi hoi di fuujai daka u de. Na wan u de bi ta dini Jehovah, söseei soni an bi waka bunu di de bi hoi dee fuujai daka u de (Kenesesi 40:20; Maikusi 6:21). Di buku Encyclopædia Britannica ta taki taa dee fesiten Keesitu sëmbë an bi ta hoi fuujai daka, u di dee sëmbë dee an bi ta dini di tuutuu Gadu, de bi ta du ën.

Di Bëibel an ta taki na un daka de pai Jesosi. McClintock ku Strong bi taki a di buku Cyclopedia taa di „Njunjun Buka an ta taki u di daka di de pai Jesosi, söseei na wan woto buku ta taki u di soni dë tu”. Ee Jesosi bi kë taa dee bakama fëën musu ta mëni di daka di de pai ën, nöö a bi o piki de na un daka de pai ën.

Di u tu soni da, di Bëibel an ta taki ee Jesosi nasö wan u dee bakama fëën bi ta hoi Bëdaki. Kumafa di buku New Catholic Encyclopedia ta taki, nöö di fosu pasi di de taki u di hoi di sëmbë ta hoi Bëdaki, bi dë a di buku Chronograph di Philocalus sikifi. Kandë di buku dë bi ta taki u soni di bi pasa a di jaa 336 baka Keesitu. Dee Loomë sëmbë bi ta sikifi wan u di buku aki hiniwan jaa. De bi taki di soni dë baka di de bi kaba sikifi di Bëibel, söseei baka un mëni höndö jaa di Jesosi bi ko a goonliba. McClintock ku Strong bi taki taa „di hoi di sëmbë ta hoi Bëdaki an dë wan soni di Gadu kë, söseei an sikifi a di Njunjun Buka”. *

Jesosi, di Gaan Mësitë, bi piki u gbelingbelin andi a kë taa dee bakama fëën musu du, nöö dee soni dë sikifi a di Bëibel. Nöö di hoi di sëmbë ta hoi Bëdaki an dë a dendu. Leti kumafa wan mësitë an o kë taa dee siköö mii fëën pasa hën buka, sö nöö Jesosi an kë u dee bakama fëën „musu tei oto wëti möön leki dee wëti Gadu da u”.​—1 Kolenti 4:6.

Ma wan apaiti daka dë di dee fosu Keesitu sëmbë bi ta hoi. Hën da di mëni di de ta mëni di dëdë u Jesosi. Jesosi seei bi piki dee bakama fëën na un ten de musu hoi di daka dë, söseei a bi piki de unfa de musu hoi ën. Hii dee soni dë, te kisi di daka di a dëdë seei sikifi a di Bëibel.​—Lukasi 22:19; 1 Kolenti 11:25.

A di woto aki u lei taa Bëdaki da wan fuujai daka di sëmbë ta hoi, nöö dee fosu Keesitu sëmbë an bi ta hoi ën. Söseei di Bëibel an ta taki taa Jesosi nasö woto sëmbë bi ta hoi Bëdaki. Dee soni aki de mbei taa milionmilion Keesitu sëmbë a hii së u goonliba ko fusutan taa Bëdaki na soni u de hoi.