A taanga fii ko sabi andi sa dë wan bunu kado da wan sëmbë. Di sëmbë di joo da di kado hën musu taki ee a dë wan bunu kado. Nöö di kado di bunu da wan sëmbë aan fu bunu da wan woto sëmbë.

Wan njönkuwan sa si kuma ee de dëën wan u dee njunjun computer soni, nöö hën da de dëën wan bunu kado. Ma wan gaangaan sëmbë bi o sa si wan woto soni kuma wan bunu kado, möönmöön ee wan famii fëën di dëdë hën bi abi di soni dë. A so köndë, sëmbë ta si möni kuma di möön bunu kado di i sa da wan sëmbë, u di di sëmbë o sa bai andi hënseei kë.

Hii fa di soni aki dë sö, tökuseei so sëmbë ta pakisei bunu andi sa dë di möön bunu kado di de sa da wan apaiti sëmbë. A sa taanga u feni sö wan kado. Ma te u ta hoi dee soni u bi taki u de dë a pakisei, nöö soni sa waka bunu. Boo luku fö soni di o sa mbei taa di sëmbë di woo da di kado, wai ku ën.

Di soni di wan sëmbë bi o kë. Wan womi di ta libi a di köndë Ierland bi taki taa di a bi abi 10 nasö 11 jaa, de bi dëën wan baisigi di ta lëi hesi seei. A bi ta si ën kuma di möön bunu kado di sëmbë bi sa dëën. Faandi mbei? A bi taki taa: „Bika mi bi këën seei.” Di soni aki ta lei taa di soni di wan sëmbë kë, sa mbei a wai ku wan kado di de dëën. Fëën mbei pakisei di sëmbë di i abi a pakisei u da wan kado. Pakisei luku andi a ta tei u bigi. Dee soni di wan sëmbë ta tei u bigi, da soni di a ta kë. Dee gaan sëmbë ta tei ën u bigi te de sa dë makandi ku dee famii u de. De ta kë ta si dee mii u de, ku dee mii dee kai de avo. Ee i bi o go pasa fakansi ku dee gaan sëmbë aki, de bi o tei ën u bigi seei möön hiniwan woto soni.

Wan soni di sa heepi i fii sa sabi andi wan sëmbë lobi, da te i ta haikëën. Di Bëibel ta piki u taa ’wa musu hesi u taki soni tumisi, ma u musu hesi u jei soni’ (Jakobosi 1:19). Te i ku dee mati fii nasö dee famii fii ta fan, nöö haika bunu u ko sabi andi de lobi ku andi de an lobi. Di soni aki o heepi i fii ko sabi andi da di möön bunu kado di i sa da de.

Dee soni di wan sëmbë abi fanöudu. Aluwasi  un piki wan kado dë, wan sëmbë o wai ku ën ee a ta tapa di fuka fëën. Ma unfa i sa ko sabi andi wan sëmbë abi fanöudu?

Di möön bunu fasi fa i sa ko sabi andi wan sëmbë abi fanöudu, nasö andi a kë, da te i hakisi ën. Ma di soni aki ta mbei taa sömëni sëmbë di lo’ u da sëmbë soni an ta dë waiwai möön, u di de bi o kë da di sëmbë wan soni di an bi mëni. Ma hii fa so sëmbë ta taki u dee soni di de lobi ku dee soni di de an lobi, so juu a ta taanga da de u taki andi de abi fanöudu.

Fëën mbei luku bunu unfa di sëmbë dë. A gaandi ö? A njönku ö? A dë a ganda u? A tööu ö? A booko tööu ö? Hën manu nasö hën mujëë lasi libi ö? A ta wooko naa an sa wooko möön? Nöö pakisei un kado i bi o sa da sö wan sëmbë u tapa wan fuka fëën.

Ee i kë ko sabi andi wan sëmbë di i kë da wan kado abi fanöudu, nöö a bi o bunu fii hakisi wan sëmbë di miti dee seei soni. De o sa piki i andi da dee soni di dee lö sëmbë dë ta abi fanöudu, hii fa gaansë u sëmbë an o sabi de. Di soni dë o heepi i fii sa da di sëmbë wan soni di a abi fanöudu, di wotowan an bi pakisei u dëën.

Di ten. Di Bëibel ta taki taa: „Wan soni di de taki a wan soifi ten, bunu seei!” (Nöngö 15:23). Di tëkisi aki ta lei u taa u musu sabi na un ten woo taki wan soni. Sö nöö a dë tu te woo da wan sëmbë wan soni. Leti kumafa wan soni di de taki a wan soifi ten, bunu da wan sëmbë u jei, sö nöö wan kado di i bi o da wan sëmbë a di soifi ten, sa mbei taa di sëmbë wai seei.

Boo taa wan mati fii ta tööu, wan njönkuwan kaba siköö nasö wan mujëë di tööu o pai abiti möön. A dee lö ten dë, sëmbë lo’ u da sëmbë kado. So sëmbë lo’ u sikifi dee daka di wan apaiti soni o pasa a di jaa di ta ko. A sö wan fasi de sa ta seeka soni a fesi, u da wan sëmbë wan kado di fiti di okasi dë. *

Fëën mbei, na mbei a dë sö taa a wan apaiti daka nöö i ta da sëmbë soni. U sa ta dë ku piizii hiniwan juu u di u lo’ u da sëmbë soni. Ma tökuseei u musu ta köni. Boo taa wan womi kë da wan mujëë wan kado, ma di mujëë an du wan apaiti soni u di womi dëën di kado. Di mujëë sa pakisei taa kë di womi këën. Hii fa a sa dë sö, söseei hii fa an föutu, tökuseei di da di a da di mujëë di kado, sa mbei a fusutan wan woto soni, nasö a sa tja toobi ko. Di soni aki ta lei u taa a dë fanöudu fuu ko sabi faandi mbei wan sëmbë kë da u wan kado.

Faandi mbei di sëmbë da i di kado. Kumafa u bi taki a fesi kaa, a bunu u di sëmbë ko sabi faandi mbei di sëmbë kë dëën di soni. Boiti di dë, a bi o bunu u di sëmbë di kë da di soni, öndösuku faandi mbei a kë da di sëmbë di soni. Hii fa hia sëmbë ta si ën taa a dë wan bunu soni u da sëmbë soni, tökuseei so sëmbë ta da wotowan soni a wan pisiten u di jaa, u di de ta fii taa de musu u du ën. Wotowan ta da sëmbë soni ku di mëni taa dee sëmbë dë o toona da de wan soni baka, nasö taa de o libi bunu ku de.

Andi i sa du fii dë seiki taa ja abi wan föutu pakisei te i ta da wan sëmbë wan soni? Di Bëibel ta piki u taa: „Hii dee soni woon ta du kaa, nöö un musu du de fu lobi hedi e, dee sëmbë” (1 Kolenti 16:14). Ee i ta da sëmbë soni u di i ta booko i hedi ku de, söseei u di i lobi de, nöö de o ta wai seei te i da de wan soni, söseei iseei o ko si taa joo ta dë waiwai te i ta da sëmbë soni. Te i lo’ u da sëmbë soni ku hii i hati, nöö Jehovah di Tata fuu a liba ala, o ta wai ku i. Apösutu Paulosu bi gafa dee baaa ku dee sisa u Kolenti, u di de bi dë kabakaba u heepi dee baaa ku dee sisa u de u Judea, di de bi dë ku fuka. Paulusu bi piki de taa: „Di sëmbë di ta da soni ku wai nëën hati, hën Gadu ta lobi.”​—2 Kolenti 9:7.

Ee u ta buta pakisei a dee soni dee u taki aki, nöö de o mbei u ta da sëmbë soni di o ta mbei de ta dë waiwai. Dee soni dee u taki u de aki, ku wanlö woto soni bi dë a dendu, di Gadu bi ta seeka soni u da libisëmbë di möön gaan kado di a bi o da de. U kë hakisi i fii lesi di woto di ta ko, fii sa ko sabi andi da di gaan kado dë.