Don ku Margaret * bi lobi ën seei di di mujëë mii u de ku hën manu ku dee mii u de, bi ko luku de. Margaret bi sa’ u boi soni. Di wooko dë a bi ta du. Hën wë a boi wan soni de kai macaroni ku kasi da dee sëmbë. Dee tu womi mii dee kai ën avo, lobi di soni dë seei.

Hii sëmbë bi dë sindosindo. Hën Margaret tja di soni di a boi ko buta a di tafa liba. Di a hopo di gansë tampa, hën a djëmë. Kasi baafu nöö bi dë a di gansë dendu! Margaret bi fëëkëtë u buta di möön fanöudu soni, di macaroni! *

Aluwasi un jaa u abi nasö aluwasi fa u sabi soni tjika, tökuseei hii u tuu ta mbei föutu. Kandë u taki wan soni ufö u pakisei a fesi nasö u du wan bunu soni, ma na a di soifi ten, nasö a sa dë taa u fëëkëtë u du wan soni. Faandi mbei u ta mbei föutu? Andi sa heepi u te u mbei föutu? Andi sa heepi u fu wa mbei de möön? Te u ta si dee föutu dee u ta mbei kumafa a fiti, nöö woo sa piki dee hakisi aki.

Te u du wan bunu soni, nöö u ta wai seei te wotowan ta gafa u fëën, u di u ta feni taa u fiti di gafa dë. Wë nöö te u mbei wan föutu aluwasi sëmbë an si di föutu dë seei, nöö wa musu tei taa u mbei wan föutu ö? U musu abi sakafasi ee u kë tei taa u mbei wan föutu.

Ee u ta si kuma u bumbuu möön wotowan, nöö a sa pasa taa wa o si di föutu di u mbei u gaan soni. U sa feni taa wotowan hën mbei u mbei di föutu, nasö a sa pasa taa u ta fia taa wa mbei föutu. Ee wan sëmbë ta libi a sö wan fasi, nöö soni an o waka bunu dëën. A o dë taa di föutu di di sëmbë mbei, fika dëën jeti, söseei di föutu sa fika a woto sëmbë hedi. Aluwasi soni ta waka bunu da u nöunöu te wa ta tei taa u mbei föutu, ma tökuseei u musu hoi a pakisei taa „hiniwan fuu o piki Gadu a dee soni dee u seei bi du”.​—Loomë 14:12.

Gadu ta si dee föutu dee u ta mbei kumafa a fiti u wan sëmbë si de. Di buku Psalöm ta taki taa Gadu abi „tjalihati ku sutifasi”, taa nöiti a o ta „suku föutu a u, nöö an o ta hoi u a hati u nöömö”. A sabi taa u da zöndu libisëmbë, nöö a sabi taa u abi suwakifasi, söseei a ta „hoi a pakisei taa ku doti u mbei”.​—Psalöm 103:8, 9, 14.

Boiti di dë, Gadu kë fuu ta si dee föutu fuu kumafa a ta si de, leti kumafa wan tata di lobi dee mii fëën kë u de ta si dee föutu di de ta mbei (Psalöm 130:3). Di Wöutu fëën ta da u gaan hia lai di sa heepi u te u mbei föutu, söseei te wotowan mbei föutu.

A lo’ u pasa taa te wan sëmbë mbei wan föutu, nöö a tei ten ta suku fasi u buta di föutu fëën a sëmbë hedi nasö a ta suku wan soni taki, u lei taa di soni dë hën mbei a taki wan soni nasö du wan soni di an bunu. Ma te i piki wan sëmbë wan soni di hati  ën, nöö a bunu fii hakisi ën paadon, ka u hati fii ta boonu ku ën. A sö wan fasi i ku ën ta dë mati nöömö. I bi du wan hogi ku iseei nasö ku wan woto sëmbë u? Hati fii an musu boonu ku iseei, söseei ja musu taki taa wotowan hën mbei wan soni pasa. A bi o möön bunu fii seeka di soni. Ee ja du sö, nöö a sa pasa taa i ku wotowan hati o ta boonu ku unuseei, nöö di taki an o seeka möönsö. Ma a dë wan bunu soni u lei wan soni a di föutu di i mbei. Seeka di taki, nöö disa di soni.

Ma te wan sëmbë mbei wan föutu, nöö u lo’ u lei taa di soni di a du an kai ku u seepiseepi. A bi o möön bunu seei u du di soni di Jesosi Keesitu bi taki, di a bi taki taa: „I musu libi ku sëmbë leti kumafa i seei kë u de musu libi ku i tu” (Mateosi 7:12). Te i mbei wan föutu, aluwasi wan pikiwan seei, nöö i bi o kë u wotowan abi tjalihati fii, nasö i bi o kë u de da i paadon. Wë nöö ja bi o kë lei wotowan taa i abi sö wan tjalihati da de u?​—Efeise 4:32.

Wan wöutu buku ta taki taa u sa mbei wan föutu te wa kuutu wan soni a wan bunu fasi, te wa sabi wan soni tjika, nasö te wa buta pakisei a wan soni tjika. A musu u dë sö taa a pasa ku u kaa taa u mbei wan föutu u dee soni aki hedi. Ma wa o ta mbei föutu sö möön ee u ta buta pakisei a wantu mama wëti u Bëibel di sa heepi u.

Wan u dee mama wëti dë sikifi a Nöngö 18:13. A ta taki taa: „Te wan sëmbë piki wan woto ufö a jei unfa a dë tuutuu, nöö di soni dë da wan don soni. A o kisi sen.” Awa, te i tei ten haika fa wan soni dë tuutuu, söseei te i pakisei andi joo piki, nöö a heepi i fu ja taki wan soni di o hati wotowan nasö fu ja du soni söndö i pakisei. Te u ta haika bunu, nöö u ta ko sabi soni di o heepi u fu wa kuutu soni a wan föutu fasi, nöö a sa heepi u fu wa mbei föutu tu.

Wan woto mama wëti u Bëibel ta lei u taa: „I musu biinga fii libi fiifii ku hii sëmbë” (Loomë 12:18). Mbei hii möiti fii sa ta libi fiifii ku wotowan ta du soni makandi ku de. Te i ku wotowan ta du soni makandi, nöö haika de, söseei lesipeki de. Mbei möiti u ta gafa de ta da de taanga tu. Te i ta libi ku de a sö wan fasi, nöö woon ta da unuseei paadon te wan fuunu taki wan soni nasö du wan soni di hati di wotowan fëën. Nöö te un mbei möön gaan föutu seei, tökuseei woon sa seeka di taki.

Luku ee i sa lei wan soni a wan föutu di i mbei. Ka fii suku andi i sa taki u di i taki wan soni nasö u di i du wan soni di an bunu, nöö a bi o bunu fii si ën kuma wan okasi di i feni fii mbei möiti u ko abi bumbuu fasi. A sa dë taa i musu lei taa i abi möön pasensi ku möön sutifasi ö? I musu ko ta möön duwengi iseei ö? I musu ko abi möön saapifasi ö? I musu ko ta möön libi fiifii ku wotowan nasö i musu ko ta lobi wotowan möön gaanfa u? (Galasia 5:22, 23). Boiti di dë, i sa lei unfa i musu du soni wan woto pasi. I musu tei taa i mbei wan föutu, ma na booko i hedi tumisi ku di fasi fa i ta fii tu. Te ja ta tei wan soni hebi poi, nöö a sa heepi i fii ku wotowan hati an boonu ku unuseei.

Te u ta si dee föutu dee u ta mbei kumafa u musu si de, nöö woo sa sabi andi u musu du te u mbei wan föutu. Soni an o ta toobi u, nöö woo ta dë fiifii ku wotowan. Te u ta mbei möiti u lei wan soni a dee föutu dee u ta mbei, nöö woo ta du soni a wan möön köni fasi, söseei sëmbë o ta möön lobi u. Wa o ta booko saka pasa maaka, söseei wa o ta pakisei hogi fu useei tu. Te u ko fusutan taa wotowan ta mbei möiti ku dee föutu di de ta mbei tu, nöö a o heepi u fuu ko dë gaan mati ku de. Ma di möön gaan soni, hën da u sa feni wini te u ta djeesi Gadu a di lobi di a abi, söseei a di dë di a dë kabakaba u da u paadon ku hii hën hati.​—Kolosën 3:13.

A bigi u di woto aki, u bi taki u di föutu di Margaret bi mbei. Di soni dë bi poi di ko di hën ku dee sëmbë fëën bi ko makandi ö? Na seei! Hii sëmbë lafu di soni, möönmöön Margaret. Nöö de bi njan di soni, hii fa di macaroni an bi dë a dendu! Sömëni jaa baka di dë, dee tu womi mii dee kai Margaret avo, bi konda di woto dë da dee mii u de. Söseei de bi taki u dee bunu soni di de an fëëkëtë te de bi dë ku dee avo u de. Wë te u luku ënseei, nöö wan föutu nöö Margaret bi mbei!