TE WAN GAAN FUKA MITI I, I TA HAKISI ISEEI EE ’FAANDI MBEI GADU AN HEEPI I Ö?’ NASÖ WAN TJALI SONI BI MITI I DI MBEI I HAKISI ISEEI EE GADU TA BOOKO HËN HEDI KU I Ö?

Kandë i ta fii kuma Sheila, di ta libi na Amëëkanköndë. Hii fa dee sëmbë fëën bi lei ën taa a bi musu ta biibi a Gadu, tökuseei a bi taki taa: „Sensi mi bi dë piki mii, mi bi lobi Gadu u di hën mbei u. Ma tökuseei, ma bi ta fii kuma mi ku ën dë mati. Mi bi ta mëni taa a ta dë te a longi ta luku mi. Mi bi sabi taa Gadu an buuse mi, ma ma bi ta si kuma a ta booko hën hedi ku mi.” Faandi mbei Sheila an bi dë seiki ee Gadu lobi ën? A bi taki taa: „Fuka bi ta miti dee sëmbë u mi baka na baka, nöö a bi ta djei kuma Gadu an bi ta heepi u seei.”

Leti kuma Sheila, kandë iseei ta biibi taa di makiti Gadu u mundu dë tuutuu. Ma kandë i ta hakisi iseei ee a ta booko hën hedi ku i tuutuu. Di womi de kai Jöpu, di bi ta libi bunu a Gadu wojo, bi sabi taa di Gadu di mbei hii soni abi makiti, söseei taa a köni, ma tökuseei Jöpu an bi dë seiki ee Gadu bi ta booko hën hedi ku ën (Jöpu 2:3; 9:4). Baka di fuka bi miti Jöpu baka na baka, u te a bi ko ta si kuma dee fuka fëën an bi o kaba möönsö, hën a hakisi Gadu taa: „Faandi mbei i go disa mi? Faandi mbei i ta si mi kuma felantima fii?”​—Jöpu 13:24.

Andi di Bëibel ta taki u di soni aki? Gadu hën ta mbei fuka ta miti u ö? Soni dë di ta lei taa Gadu ta booko hën hedi ku libisëmbë u, söseei taa a ta booko hën hedi ku hiniwan fuu apaiti ö? U sa ko sabi ee Gadu ta buta pakisei a u ö? U sa ko sabi ee a ta fusutan andi ta miti u ö, nasö ee a ta heepi u ku dee bookohedi fuu ö?

A dee woto dee ta ko, woo luku unfa dee soni dee Gadu mbei ta lei u taa a ta booko hën hedi ku u (Loomë 1:20). Baka di dë, woo luku andi di Bëibel ta taki u di fasi fa Gadu ta booko hën hedi ku u. Möön i ko ’sabi Gadu’ u di i ta luku dee soni dee a mbei, ku di lesi di i ta lesi di Wöutu fëën, möönmöön joo ko dë seiki taa „a a’ toobi ku i”.​—1 Johanisi 2:3; 1 Petuisi 5:7.